2009 ولا 2010 بليييز ساعدوني

**mr_shims_49** · 12-08-2009 12:12 PM

سلاموا عليكوا

لو سمحتم كنت عايز اسأل عن حاجة بخصوص الجين 2

انا عايز اشتري العربية دي سالت عند المصرية تمنها 91 موديل 2009 اتوماتيك

كلمت عز العرب قالي ب 91 بردو موديل 2010 بس هتستلم اخر شهر 9

و انا بصراحة مستعجل اوي بس عايز اعرف هل في فرق بين 2009 و اللي هينزل 2010

التوكيل بيقولي مفيش اي فرق فا عايز اتاكد منكوا و هل لو مفيش فرق اجيب ال 2009 و خلاص عشان استلم علي طول

و ايه احلي لون فيها

و اسف اني طولت عليكوا و شكرا

**MuhammedSoliman** · 12-08-2009 01:21 PM

اعتقد انه مش هيبقى فى فرق ثم على ما اعتقد برضوا محش ممكن يفيدك بشك قاطع لأن محدش جرب أو شاف 2010 إلى بس من رأي ما فرقتش الشهر ده واستنى 2010 على الاقل هتبقى كسبت سنه فى الصنع

تحيات

**john_samy** · 12-08-2009 01:33 PM

من راى تستنى موديل 2010.
احلى لون ممكن يكون الابيض . شكلها رائع فى الابيض وكمان نادرة . بس عيبها لو لا قدر الله حد كحتها هتبان اوى

**mimo3000** · 12-08-2009 03:03 PM

بص انا واقع معاك فنفس الحيره دى
انا نويت اشترى بس بعد بحث وكده عرفت ان الوقت الحالى صعب تلاقى 2009 ولو لقيتها هتلاقى الوان محدوده جداااا منها
فبعد مقعدت اسال وكده قالولى 2010 هتنزل فنص 9 او اخر 10 وممكن تحجز من دلوقتى فسالت فالتوكيل قالى معرفشى هتنزل بسعر كام لسه بس فى ناس بتقول هتنزل اغلى شويه بس انا معرفش وسالته عن الوانها قالى مش عارف بالظبط بس اكيد نفس الالوان القديمه مش هتتغير يعنى سالته هل فى اى تغيير قالى معرفشى لسه برضو انا معنديش اى معلومات عنها قلتله امال انا هحجز على اساس ايه يعنى هشترى سمك فميه يعنى قالى احنا منزلناش اى معلومات عنها خالص والله (ده كان فتوكيل الدقى)
فبصيت فمعرض بره كان عارضها
قالى فى جين 2 لونها ابيض بس اللى موجوده وهتبقى ب 84.900 نفس تمن التوكيل يعنى
وسالت على البرسونا قالى فى منها الاحمر والفرانى ولون تالت كده مش فاكره والفال اوبشن بتاعها 85.900 والهاف اوبشن ب 79.900
وقالى لو كده هسلمهالك اليوم اللى بعدها لو انتا جاهز
وبالنسبه للسعر ممكن ننزل ال 900 فالتلاته (بس ده بعد فصال جامد)
المعرض ده موجود ففيصل

بس بص انا رايي استنى 2010 عشان تبقى واخد موديل احدث وكمان تبقى عندك كل الالوان تختار منها براحتك وكمان عشان لو غيروا فيها حاجه متندمش انك جبت القديمه خصوصا انى سمعت ان الشكل هيتغير شويه والله اعلم

انا عن نفسى غالبا هستنى 2010 انشاء الله

وربنا يوفقك يارب للى فيه الخير والمصلحه
واسف على الاطاله بس انا قلت اقولك كل اللى اعرفه

**unroi** · 12-08-2009 03:18 PM

أنا كمان مستنى مديل 2010 خليك معانا

**mr_shims_49** · 12-08-2009 04:25 PM

انا متشكر جدا يا جماعة لكل اللي رادوا عليا انا متاسف مش بعرف اعمل اقتباس عشان ارد علي واحد واحد
بس بجد متشكر جدا علي الاهتمام ده

انا كمان كلمت عز العرب اللي علي الصحراوي لأنه اقربلي انا في اكتوبر قالي ان 2010 ب 91

و هتحجز ب 1000 و تستلم اخر 9 ان شاء الله لكن ماقليش حكاية ان السعر هيزيد او حاجة و قالي و اكدلي ان الفرق الوحيد بين 2009 و 2010 هيكون السنة اللي مكتوبة في الرخصة

طيب انا مشكلتي اني معرفش عز العر بيقسط ولا لأ لأني عايز ادفع 50 % منها و اقسط الباقي علي سنة او سنتين بالكتير اوي ان شاء الله ياريت حد يفدني في الموضوع ده عشان لو ينفع اروح احجز بكره ان شاء الله

و اسف طولت عليكوا تاني

**Ayman_52** · 13-08-2009 01:14 AM

اولا ... اهلا بحضرتك

بخصوص مو 2010 فعلا (على كلام مستر حبيب) ان مش هيكون فى اى تغيرات لا فى السعر ولا الاوبشن...

وان شاء الله هتكون موجوده (على كلام مستر حبيب) نص9 اول 10

---

وبخصوص التقسيط ... عز العرب هو بيقسط بس مش لصالحه ... لا بيقسط تبع بنك

وبيكون عنده عروض كويسه فى التقسيط ....

حضرتك ان شاء الله لما تروح تحجز فى فرع الصحراوى ...

روح لاستاذ/محسن صالح ... وقوله انك من طرف (ايـــمـــن) وهو هيضبطلك الحاجه

وانا ممكن انهارده اعدى عالتوكيل...

---

وربنا يوفقك وتحجز وتستلم على الف خير ان شاء الله

وانا تحت امرك فى اى استفســــــــار

تحيـــــــــــــاتـــى

**sakrquraish** · 13-08-2009 01:46 AM

اتمنى انها تنزل بEBD & cruise control تاني زي الأول
مفيش حد عنده معلومات بخصوص الموضوع ده

**mr_shims_49** · 13-08-2009 01:59 AM

الف شكر يا استاذ ايمن علي ذوق حضرتك

انا بصراحة كنت مستعجل شوية و شجعني اكتر حكاية ان مفيش فرق بين 2009 و 2010 فا روحت النهاردة
المصرية و مليت ابليكشن و ان شاء الله لو البنك وافق ممكن استلم بكره ان شاء الله بس ربنا يستر و يكون فيه
لأن الراجل اللي هناك قالي ان المخزن قفل دلوقت بس كان في عربيتين جين تو يا رب يكونوا ما طلعوش
انا نفسي اوي اجيب العربية دي انتوا حببتوني فيها ادعولي يا اخوانا