لتفادى إى مشكلة فى تغير زيت الفتيس

[Ahmed Amin]

انا عندى رينو لوجان mcv اوتوماتيك ومغيرتش ليها زيت الفتيس خالص كان من حوالى 6 شهور بيعمل نتشة ودلواقتى مفيش خالص مع العلم ان العربية عاملة 162الف كيلو يا ترى اغيرة ولا اية انا بصراحة قلقان اغيرة عشان الكلام بتاع ان عمر الفتيس عمر الزيت

طبعاً لازم تغير الزيت طالما بدأ يعمل نتشة يبقي الزيت لزوجته راحت وأتحرق ومتحاج يتغير,
162 ألف كتير أوي علي الزيت الأوتوماتيك,,

60 ألف هوا المتوسط اللي المفروض تزود فيه زيت الفتيس الأوتوماتيك زي ما الكتالوج بيقول,
بس الأفضل في ظروف القيادة الشاقة زي مصر أنك تغير الزيت لأنه بينزل أسود من كتر المشي في الزحمة والتحمل الكتير علي d في الأشارات وأنك بتدوس كل شوية تجمع سرعة وتشد وزن العربية كله علي الفتيس وتقف تاني.
علي عكس العربيات اللي طريقها كله بيبقي طريق سفر مش بيكون فيه تحميل علي الفتيس لأنها بتبقي واخدة سرعة والفتيس بيتبرد كويس وهيا علي السريع علي عكس السواقة جوا البلد.

العربيات الكوري بيوصل فيها التغير لحد 100 ألف كيلو لو الظروق مش شاقة, و80 ألف لو ظروف القيادة شاقة,,

أنت كدا عديت ضعف الوقت دا, بصراحة كتير خير الفتيس والزيت,
ألحق نفسك قبل مالزيت يبدأ يعمل رايش وهيبهدلك الفالف بادي والفلتر لأن كدا اللزوجة بتاعت الزيت بقت مية ومبقاش فيه تنزيت, وهتبدأ التروس تاكل في بعضها من الأحتكاك وتعمل رايش كتير.

ولما تيجي تغير الزيت يكون بالأصلي طبعاً وهاته من التوكيل أفضل لو مش ناوي تغيرة هناك,
لكن أوعي تروح لأي ميكانيكي يحط لك أي زيت في العربية مش بتاعه لأنه ممكن ينهي لك عمر الفتيس.

[Ahmed Amin]

الله ينور عليك احسن حاجه انك تشتغل بإيدك

انا معايا نوبيرا 2 مانيوال بعد ماجبت العربية بفتره الفتيس كان بيعض فعرفت ان زيت الفتيس لازم يتغير المهم مكنش عندى خبره وروحت لمركز زيوت
المهم فى المركز حطولى 3 كيلو زيت فتيس لزوجة 140!!
طبعا كارثه ومكنتش اعرف حاجه واطلع اجرب العربية الفتيس بأة بينقل بطلوع الروح واسوء من الاول بكتير
فسألت فى المنتدى هنا وعرفت ان النوبيرا بتاخد 1.8 لتر لزوجه 90-80
روحت جبت الزيت ورفعت العربية وفكيت كرتيره الفتيس ونزلت الزيت كله ونضفت الكرتيره والطبه كويس وقفلت
وحطيت 1800 مللى زيت موبيل 90-80 والفتيس بأة ميه وكله تمام

الله ينور علي الشغل النضيف, وشكراً علي نقي التجربة عشان الناس تستفاد منها هنا.
وكويس أنك لحقت الفتيس بدري بدري ومكملتش عليه بالزيت الغلط دا.

[dreamers_mod]

التوكيل اتصلت بية وقالى التغير بيكون 1100ج غير شامل الضريبة وطبعا دا عالى جدا فياريت اعرف احسن زيت لللوجان mcv2010 اوتوماتيك