يااهل الخبرة افيدوني n16 بخصوص الزيت

[AMR27000]

نيسان صني الشكل القديم n16 العربيه كانت ماشيه علي موبيل 10000 لحد 20000 وغيرت ل شل الاصفر والماتور والاداء والسحب مش زي الاول والسخونيه زايده جدا وعايز اغير للكاسترول ماجنيتك او الايدج
العداد دلوقتي عامل 22500.... وهنزل الشل علي 3000.
سبب اني غيرت لزيت شل الاصفر واحد قريبي قاللي ان الزيت 10000 غلط وبيطبع في الماتور وبيقلل من عمره الافتراضي وكده لانه بيقعد فتره كبيره مع استهلاكي بيقعد حوالي 9 ل 10 شهور وقاللي كل ماتغير الزيت اسرع الماتور هعيش معاك

[borio1704]

أولا وقبل أي شيء.. اوعى تدي ودنك لحد... الوحيد اللي تسمع كلامه في التعامل مع عربيتك هو الكتالوج بتاعها... فقط لا غير.

وكل كتالوجات العربيات بلا استثناء مكتوب فيها توصيات الزيت المناسب لها... والصح ترجعله وتشوف هو طالب إيه وتنفذ كلامه... مفيش حد يعرف عربيتك أحسن من اللي عملها.

ثانيا... مفيش حاجة اسمها زيوت 3000 وزيوت 5000 وزيوت 10000 ... الأرقام دي لو شفتها على علبة زيت هي مجرد أرقام لفئة الزيت من الناحية التسويقية.. إنما مالهاش علاقة بعمر الزيت في الموتور.. واللي بيحدد عمر الزيت في الموتور هو الكتالوج... بردو...

إنما المتعارف عليه في مصر إن الزيوت التخليقية بيسموها زيوت 10000 (وده مفهوم خاطئ) ... والمعروف طبعا إن الزيوت التخليقية بتحافظ على المواتير أفضل من الزيوت المعدنية.. خصوصا لو نزلناهم في نفس المواعيد..

وتغيير الزيت زيه زي أي صيانة في العربية دايما بيتغير بطريقتين... عدد الكيلومترات أو المدة ... أيهما أسبق...

يعني لو الكتالوج كاتبلك 5000 كم أو 6 أشهر.. يبقى لو عدى عليك 6 أشهر قبل ما تمشي الـ5000 كيلو لازم تغير الزيت... دي قاعدة في صيانة أي عربية.. مش في الزيت بس إنما في أي حاجة فيها...

راجع جدول الصيانة في كتالوج عربيتك.

ولو عايز معلومات أكتر.. ادخل على الموضوع ده

https://www.nilemotors.net/Nile/490076-a.html

نيجي بقى لتوصيات كتالوج عربيتك...

دي صور التوصيات من كتالوج الصني N16




توصيات الزيت بتاعت العربية تعتبر متواضعة .. لإن العربية مقصود إنها تبقى اقتصادية في التشغيل.. والموتور اللي فيها يعتبر قديم..

ملخص التوصيات كالتالي:

اللزوجة:
20W-50 أو 20W-40 أو 20W-20
15W-50 أو 15W-40
10W-50 أو 10W-40 أو 10W-30
ممكن تحط 5W-30 في حالة إنه زيت تخليقي فقط.. غير كده ما ينفعش.

مستوى الأداء:
-مستوى أداء API SE على الأقل ... يعني يمشي معاك أي زيت مكتوب على علبته SE أو SF أو SG أو SH أو SJ أو SL أو SM أو SN
- مستوى أداء ILSAC GF-1 على الأقل... ودي تكافئ مستوى SG .. بس بتديك حماية أكتر شوية في الظروف الشاقة.
بردو تقدر تحط أي زيت مكتوب عليه GF-2 أو GF-3 أو GF-4 أو GF-5... بس دول مس موجودين إلا في اللزوجات الخفيفة بس (10W-30 أو أقل).

المهم..

حسب التوصيات دي.. تقدر تحط أي زيت معدني في السوق باللزوجات اللي فوق دي.. وهيكون ممتاز معاك..

ولو حبيت تحط تخليقي.. تقدر تحط أي زيت 5W-30

يا ريت تقولنا إيه أولوياتك بالنسبة للعربية والناحية الاقتصادية وأسلوب سواقتك.. وإن شاء نساعدك باللي يناسبك..

أو ادخل على الموضوع ده..

https://www.nilemotors.net/Nile/481878-a.html

...