مش عارف اختار واحترت

[fiercedragonn]

السلام عليكم
ده اول موضوع ليا قرأت مواضيع كثير بس توهت - عندي دايو لانوس 2006 ماشية 30 الف كيلو بس ، مشاويري خفيفة ، استخدمت زيت شيل الاصفر 15w50 - HX5 مش عارف ده تخليقي أم ماذا ؟ وحاسس ان العربية تقيلة في الطلعة
هل استخدم تخليقي؟
- هل في زيت افضل من كده استخدمه واسمه ايه ورقمه - واغيره كل اد ايه؟
انا بالاسكندرية

[borio1704]

أهلا وسهلا بيك معانا... وإن شاء الله نفيدك...

أولا.. لما تختار الزيت المناسب... لازم تختاره حسب توصيات كتالوج عربيتك... لإن صانع السيارة هو أدرى واحد بأفضل شيء للمحافظة على سيارته...

تقدر تنزل كتالوج اللانوس من هنا...

https://drive.google.com/file/d/0B5RUBV42O9DYRUtIdzZxazFLbm8/view?usp=drivesdk

في الكتالوج... هتلاقي أكتر من زيت يمشي مع العربية... أي زيت فيهم يمشي معاك.. ومعندكش مشاكل... إلا إذا كنت من النوع اللي بيحمل الموتور بأحمال شديدة.. ساعتها بنلجأ للزوجة الأعلى..

بالنسبة لزيت شل هيليكس HX-5... فالزيت ده معدني...

زيوت شل التخليقية اسمها هيليكس ألترا... ولون العلبة رمادي غامق (فيراني).

موضوع تقل العربية ده ممكن يكون بسبب الزيت... خصوصا إن الزيت اللي حضرتك بتستخدمه لزوجته عالية نسبيا..

بس أتوقع إن في حالة حضرتك الموضوع غالبا له علاقة بنظافة بوابة الثروتل.. مش بنوع الزيت.. خصوصا لو كنت بتستخدم نوع الزيت ده من مدة طويلة... وبالتالي فالمفروض إن أداء الزيت واحد.. فإيه اللي اتغير؟؟؟

فيه حاجة لفتت نظري...

العربية ما شاء الله ماشية 30 ألف خلال 11 سنة... يعني بتمشي حوالي 3000 كيلومتر في السنة...

يا ترى حضرتك بتغير زيت كل قد إيه؟؟

خد بالك كويس قوي إن الزيت لازم يتغير بالمسافة أو المدة الزمنية... أيهما أقرب...

حسب كتالوج عربيتك... المفروض تغير زيت كل 5000 كيلومتر أو 3 شهور... أيهما أقرب...

فما ينفعش تخلي الزيت في عربيتك أكتر من 3 شهور... سواء مشيت بالعربية أو ما مشيتش.

ادخل هنا لو عايز تعرف أكتر..

https://www.nilemotors.net/Nile/490076-a.html

بالنسبة لنوع الزيت المناسب... فالموضوع يعتمد بشكل أساسي على أولوياتك وميزانيتك.. والأهم من كده.. أنواع الزيوت المتاحة قدامك بسهولة.

قولنا إيه الأهم بالنسبة لك من ناحية توفير الوقود والحفاظ على الموتور والأداء... وميزانيتك كام... وأنواع الزيت اللي قدامك.

وإن شاء الله نساعدك بالأنسب لعربيتك وليك.

...

[fiercedragonn]

جزاك الله خيرا على الرد السريع


بصراحة انا مش فاهم الكتالوج
العربية كانت مع اول مالك لها وكان راكنها في الجراج ومشى بها 10 الاف كم في مدة 5 سنوات ، وعلى كلامه انه كان بيغير الزيت كل شوية ، انا مش عارف نوع الزيت اللي استخدمه لكن اعتقد انه اختار نوع كويس لانه كان محافظ عليها


أما انا مشيت بها 20 الف كم خلال ال 5 سنوات الاخرى ، وكنت بغيرالزيت كل 5 الاف كم
ولسه عارف موضوع الزيتت التخليقي وخصوصا لما دخلت على نايل موتورز


الزيوت المتاحة موبيل تخليقي وشيل هليكس الترا


اولوياتي هي اني عايز احافظ على موتور العربية


ممكن حضرتك تقولى انواع الزيوت المناسبة لي بالترتيب التنازلي (الافضل فالاقل) ؟


- واعرف منين ان الزيت مش مغشوش؟


- هل اغير فلتر الزيت كل مرة؟


- هل في زيت ممكن احطه وأنساه حتى لو غالي شوية ؟


- هل لكم مركز صيانة بالاسكندرية؟

[fiercedragonn]

بالاضافة الى الزيوت المتاحة السابقة يوجد زيوت توتال و كاسترول بس مش ضامن ايه مصدرهم وطبعا في زيوت اخرى بس لسه لم لبحث عنهم

[fiercedragonn]

لماذا لم يرد على احد

[borio1704]

أنا آسف جدا في تأخير الرد... كنت عايز أرد على حضرتك من ساعتها ولكن انشغلت ونسيت !!!


على حسب استخدام حضرتك ده... يبدو إن استخدام العربية خفيف جدا وأغلب المشاوير قصيرة...

على فكرة.. المشاوير القصيرة هي أحد الأسباب اللي المفروض تغير فيها الزيت بدري..

واستخدام الزيوت التخليقية بالنسبة لحضرتك ميزته الأساسية هي في بداية التشغيل.. علشان العربية بتتركن كتير.. وبالتالي هيحافظ على الموتور..

ميزة الزيوت التخليقية بشكل عام إنها ممكن تخدم لمسافة تشغيل أطول... بس

مش معنى الكلام ده إن أي زيت تخليقي تحطه.

أهم حاجة حضرتك لازم تاخد بالك منها هي إن مواعيد تغيير الزيت حسب طريقة استخدامك هي بالمدة الزمنية.. مش بالمسافة إطلاقا.

الغالبية العظمى من الزيوت التخليقية اللي في السوق بتعيش بما لا يتجاوز 6 شهور في الموتور.. زيها زي الزيوت المعدنية... وقليل جدا جدا اللي بيعيش سنة فعلا في الموتور.


لو عايز تجيب زيت تحطه لمدة سنة وتنساه.. فأنصحك بزيت آمسويل سجنتشر... عندهم كذا لزوجة
أعتقد اللي موجود في مصر لزوجة 5w-30 و 5w-50

الاتنين ينفعوا مع حضرتك.. وأنا شخصيا أفضل الـ5w-30 علشان توفير البنزين.

زيت آمسويل أمريكي مستورد من أمريكا مباشرة.. بيتباع بالكوارت (الكوارت = 0.945 لتر).. ولو هتشتري 4 كوارت هيكلفوك حوالي 700-800 جنيه تقريبا..

بس لو استخدمت الزيوت دي عندك احتمال يحصل تسريب أو نقص في مستوى الزيت.. وده شيء طبيعي بيحصل مع نوعية الزيوت التخليقية اللي بتقعد مدة طويلة بشكل عام... خصوصا مع العربيات اللي عمرها طويل نسبيا زي عربية حضرتك (12 سنة تقريبا).


لو حضرتك قلقان من الموضوع ده... تقدر تروح لأي زيت تخليق آخر في السوق... موبل - شل - كاسترول... كلهم يشتغلوا مع موتور عربيتك بشكل ممتاز...

تقدر تحط لزوجة 5w-30 أو 5w-40 بدون مشاكل.. (هما دول اللي حتلاقيهم موجودين عند أغلب الشركات).. وأنا شخصيا بردو أفضل الـ5w-30 علشان توفير الوقود... خصوصا إن استخدام العربية خفيف..

الاستخدام الخفيف يعني:
- مفيش أوزان كبيرة بتتحط في العربية أكتر من 250 كجم (ركاب كتير + شنط تقيلة)
- السواقة هادية بدون قرص على الموتور
- أغلب الطرق مستوية (مهياش طرق جبلية فيها صعود ونزول)

تقريبا غيار الزيت هيكلفك بين 500-600 جنيه..


نصيحتي.. اشتري زيت تخليقي من ماركة معروفة تلاقيه بسهولة قدامك وتدوخش عليه... وغيره كل 6 أشهر (ضروري جدا جدا)... وكل مرة غيره مع الفلتر... واشتريه من محطة البنزين اللي سمعتها كويسة.. واتأكد إنه مقفول كويس قبل الفتح.

...

[fiercedragonn]

جزاك الله خيرا
حجرب وان شاء الله سوف اقولك النتيجة

[akmm]

لو زى ماتم ذكره الزيت المناسب لحضرتك 5w30 يبقى الأفضل موبيل او شيل تحياتى .

[ahmed_wagih]

السلام عليكم
لو حضرتك تفتكرنى كنا اتكلمنا فى مواضيع الزيوت واستفد منك كتير ربنا يكرمك
عندى ملحوظة انا كنت بستخدم زيت منوبيل ون 5w30 بناء على توصيتك والدنيا كانت تمام حبات اغير لامسويل سيجنتشر قلت ايكون افضل وعد السنة وانا ضامنة

المفاجاة رغم ان كل الناس بتشكر فيه ومنهم حضرتك بس الاداء بقى وحش معايا صوت المكنة على
السؤال هو الزيت مش بينقص تفتكر انزلة علشان الصوت الماتور دة مؤشر ان الزيت وحش ولو كان رايك اكمل المرة اللى جاية ارجع ل موبيل ون اتانى ولا اعلى باللذوجة شوية سؤا فى موبيل ولا امسويل
العربية دلوقتى عاملة 155 الف دايو لانوس

[borio1704]

السلام عليكم
لو حضرتك تفتكرنى كنا اتكلمنا فى مواضيع الزيوت واستفد منك كتير ربنا يكرمك
عندى ملحوظة انا كنت بستخدم زيت منوبيل ون 5w30 بناء على توصيتك والدنيا كانت تمام حبات اغير لامسويل سيجنتشر قلت ايكون افضل وعد السنة وانا ضامنة

المفاجاة رغم ان كل الناس بتشكر فيه ومنهم حضرتك بس الاداء بقى وحش معايا صوت المكنة على
السؤال هو الزيت مش بينقص تفتكر انزلة علشان الصوت الماتور دة مؤشر ان الزيت وحش ولو كان رايك اكمل المرة اللى جاية ارجع ل موبيل ون اتانى ولا اعلى باللذوجة شوية سؤا فى موبيل ولا امسويل
العربية دلوقتى عاملة 155 الف دايو لانوس

أولا.. الصوت مش مؤشر للأداء.. ولا هو دليل على جودة الزيت..

هو الصوت اللي حضرتك بتسمعه صوت إيه بالضبط؟؟؟ لإن طبيعة الصوت بتحدد مصدر المشكلة.. إذا كان فيه مشكلة.

ثانيا.. اختيار اللزوجة بيكون حسب طبيعة الاستخدام.. وكقاعدة عامة.. كل ما كان التحميل على الموتور أكبر كل ما احتجنا لزيادة اللزوجة... والاختيار دايما بيكون من اللزوجات المذكورة في الكتالوج.

ثالثا.. طبيعة الزيوت التخليقية الحقيقية (زي آمسويل سجنتشر) بتخلي صوت الموتور يعلى.. والمقصود بالصوت هنا هو صوت تكتكة التاكيهات والبلوف في وش السلندر... والصوت بيبقى واضح جدا في بداية تشغيل الموتور الصبح وبيستمر لمدة حوالي 3-5 دقايق لحد ما الموتور يسخن... بعد كده بيقل (بس مش بيروح).

ده مش معناه إن التزييت وحش أو إن كفاءة الزيت قلت.. وكل الموضوع ببساطة إن الجو البارد بيوضح صوت تكتكة الموتور.

رابعا.. التغيير المستمر في أنواع الزيوت مش مفضل لإن بيقلل من كفاءة الزيت الجديد... فالأفضل هو إنك تثبت على نوع واحد تكون استريحت معاه .. بعد ما تكون اخترته صح.. بغض النظر عن ماركة الزيت أو سمعته.

...

[ahmed_wagih]

هو فعلا زى ما حضرتك تفضلت الصوت بيبقى مع بداية الدوارة الصبح وبيروح ودلوقتى بقى احسن بكتير بصراحة

بس اللى ملاحظة ان لما بجى اقرص على الغيار صوت المكنة بيعلى عن الاول يعنى لازم اطلع بالغيار عن ما كنت بعمل قبل كدة مع زيت موبيل يعنى مثلا لو ماشى على الثالث اطلع بالرابع علشان صوت المكنة على قبل كدة مع موبيل مكنش بالطريقة دى

بس بردة لما كلمت خدمة العملاء بتوع امسويل قالوا لى كلام عايز اتاكد منه من حضرتك هما قالوا لى ان الزيت امسويل كدة بقى احسن لانى كنت متعود انى اضغط بنزين علشان التصارع مع امسويل بمارس نفس الدوسة على البنزين وانا مش محتاجها علشان كدة بحس ان الصوت عالى

هل الكلام دة منطقى

سؤال تانى انا بردة اصبحت طريقة سواقتى مش هادية زى الاول اتجرات وبقيت بجرى وبقرص على العربية مش زى الاول

هى العربية دايو لانوس 2008 عاملة دلوقتى 155 الف
طبيعة مشويرى دائرى رايح جاى للشغل حوالى 35 كيلو بس فى اليوم والعربية طول اليوم بتبقى مركونة وفى الغالب بنزل بدرى والطريق بيبقى مفتوح وفى العودة متوسط الطريق بيبقى معقول

بس بقيت بقرص وبجرى عن الاول

ايه راى حضرتك فى التغير اللى جاى استمر على امسويل ولو الاجابة بنعم لو استخدم تخليقى 100% وانا بفضله بصراحة اتضر استخدم 5w50 لان اللى بستخدمة دلوقتى 5w30

او استخدم امسويل بردة نصف تخليقى اللى هو تقريبا xl 10w 40 واغلب الناس بتقول ان العداد بتاعى كبير ولذوجة 30 قليلة علية ( عارف اننا اتعلمنا منك انه مش بالكيلوهات علشان متتعصبش ) بس انا شارى العربية مستعملة تقريبا كانت عاملة 136 الف
وبالتالى معرفش اللى قبلة كان استخدامة اية وبيستخدم اية

ملحوظة الزيت عندى الحمد لله مش بينقص

معلش طولت عليك تعبينك معانا

[wael.shaker]

السلام عليكم بعد إذن صاحب الموضوع
استاذنا الفاضل @

borio1704 انا عربيتى اكسينت 99 1500 cc غيرت زيت التعاون sj كتير قالولى انه مناسب للسياره وموديلها .
من فضل حضرتك رئيك أيه وايه افضل زيت مناسب عشان اعمل حسابى من المره الى جايه إن شاء الله تعالى .
وعايز اعرف اضع كام ك من الجالون مع تغيير الفلتر يعنى 3.5 ولا 4 لنر
شكرا لك على الشرح الوافى فى موضوع الزيوت استفت كتير منه .

[wael.shaker]

السلام عليكم بعد إذن صاحب الموضوع
استاذنا الفاضل @

borio1704 انا عربيتى اكسينت 99 1500 cc غيرت زيت التعاون sj كتير قالولى انه مناسب للسياره وموديلها .
من فضل حضرتك رئيك أيه وايه افضل زيت مناسب عشان اعمل حسابى من المره الى جايه إن شاء الله تعالى .
وعايز اعرف اضع كام ك من الجالون مع تغيير الفلتر يعنى 3.5 ولا 4 لنر
شكرا لك على الشرح الوافى فى موضوع الزيوت استفت كتير منه .

http://<a href="http://www.up-00.com....jpg[/img]</a>

[borio1704]

هو فعلا زى ما حضرتك تفضلت الصوت بيبقى مع بداية الدوارة الصبح وبيروح ودلوقتى بقى احسن بكتير بصراحة

بس اللى ملاحظة ان لما بجى اقرص على الغيار صوت المكنة بيعلى عن الاول يعنى لازم اطلع بالغيار عن ما كنت بعمل قبل كدة مع زيت موبيل يعنى مثلا لو ماشى على الثالث اطلع بالرابع علشان صوت المكنة على قبل كدة مع موبيل مكنش بالطريقة دى

بس بردة لما كلمت خدمة العملاء بتوع امسويل قالوا لى كلام عايز اتاكد منه من حضرتك هما قالوا لى ان الزيت امسويل كدة بقى احسن لانى كنت متعود انى اضغط بنزين علشان التصارع مع امسويل بمارس نفس الدوسة على البنزين وانا مش محتاجها علشان كدة بحس ان الصوت عالى

هل الكلام دة منطقى

موضوع الصوت هنا هو ده بالضبط اللي قصدي عليه... لازم نعرف إيه طبيعة الصوت العالي اللي قصدك عليه...

صوت تكتكة الموتور غير صوت انفجار البنزين جوه السلندر

صوت التكتكة له علاقة مباشرة بلزوجة الزيت وإضافات كتم الصوت في الزيت...
صوت انفجار البنزين له علاقة مباشرة بكمية البنزين جوه السلندر ومعدل دوران الموتور... وده له علاقة مباشرة بكمية المقاومة اللي الموتور بيواجهها في مقابل كمية البنزين المحترقة..

المقاومة دي مصادرها كتييييير جدا (الزيت واحد منها).. تقدر تتعرف عليهم من هنا..
https://www.nilemotors.net/Nile/475925-a.html

سؤال تانى انا بردة اصبحت طريقة سواقتى مش هادية زى الاول اتجرات وبقيت بجرى وبقرص على العربية مش زى الاول

هى العربية دايو لانوس 2008 عاملة دلوقتى 155 الف
طبيعة مشويرى دائرى رايح جاى للشغل حوالى 35 كيلو بس فى اليوم والعربية طول اليوم بتبقى مركونة وفى الغالب بنزل بدرى والطريق بيبقى مفتوح وفى العودة متوسط الطريق بيبقى معقول

بس بقيت بقرص وبجرى عن الاول

طريقة سواقة حضرتك اتغيرت علشان استجابة العربية بقت أحسن من الأول...

الموضوع ده له كذا سبب...

أولا.. برودة الجو.. لإن الجو البارد بيزود كمية الأكسجين في الجو وبالتالي بيدينا احتراق أفضل بأقل كمية بنزين... وبالتالي قوة الموتور بتزيد .. أو بمعنى أصح بترجع لأصلها.

ثانيا.. لزوجة الزيت الخفيفة بتساعد على تقليل المقاومة الداخلية جو الموتور


عموما... لو حضرتك عندك عداد RPM.. فالقرص على الموتور بيكون لما العداد يعدي 4500 RPM (أو 2/3 مدى التشغيل)

لا أتوقع إن حضرتك بتوصل للمستوى ده.. بالتالي حضرتك ما زلت ما قرصتش على الموتور.

ايه راى حضرتك فى التغير اللى جاى استمر على امسويل ولو الاجابة بنعم لو استخدم تخليقى 100% وانا بفضله بصراحة اتضر استخدم 5w50 لان اللى بستخدمة دلوقتى 5w30

او استخدم امسويل بردة نصف تخليقى اللى هو تقريبا xl 10w 40 واغلب الناس بتقول ان العداد بتاعى كبير ولذوجة 30 قليلة علية ( عارف اننا اتعلمنا منك انه مش بالكيلوهات علشان متتعصبش ) بس انا شارى العربية مستعملة تقريبا كانت عاملة 136 الف
وبالتالى معرفش اللى قبلة كان استخدامة اية وبيستخدم اية

ملحوظة الزيت عندى الحمد لله مش بينقص

معلش طولت عليك تعبينك معانا

حسب الاستخدام اللي حضرتك بتوصفه... ما زلت شايف إن لزوجة 5W-30 مناسبة لحضرتك أكتر من 5W-50

وما تحطش موضوع الكيلومترات ده في دماغك ما دام الموتور مش بياكل زيت...

ادخل على الموضوع ده لمعلومات أكتر..
https://www.nilemotors.net/Nile/477071-100.html


توصياتي دايما هي...
اشتري الزيت اللي يحقق طلبات الكتالوج وتستريح معاه ومناسب لميزانيتك وتتوقع إنه يكون موجود باستمرار .. لإن التغيير المستمر بيقلل من جودة الزيت الجديد.

ولو آمسويل ريحك أكتر.. خليك معاه.


...

[borio1704]

السلام عليكم بعد إذن صاحب الموضوع
استاذنا الفاضل @

borio1704 انا عربيتى اكسينت 99 1500 cc غيرت زيت التعاون sj كتير قالولى انه مناسب للسياره وموديلها .
من فضل حضرتك رئيك أيه وايه افضل زيت مناسب عشان اعمل حسابى من المره الى جايه إن شاء الله تعالى .
وعايز اعرف اضع كام ك من الجالون مع تغيير الفلتر يعنى 3.5 ولا 4 لنر
شكرا لك على الشرح الوافى فى موضوع الزيوت استفت كتير منه .

كل اللي حضرتك بتسأل عليه موجود في الكتالوج...

تقدر تنزل كتالوج الأكسنت بتاعتك من هنا...
https://drive.google.com/file/d/0B5R...ew?usp=sharing

ودي توصيات الزيت في الكتالوج..



حسب الصورة دي.. توصيات الزيت كالتالي:

مستوى الجودة:
تصنيف API بمستوى جودة SG أو SH على الأقل... يعني ممكن تحط SG أو SH SJ أو SL أو SM أو SN بالترتيب من الأسوأ إلى الأفضل.

اللزوجة:

تقدر تحط أي لزوجة من دول:
20W-40 أو 20W-50
10W-50 أو 10W-40 أو 10W-30
5W-30 أو 5W-40

دي اللزوجات المسموحة.. وما ينفعش تحط أي درجة لزوجة تانية..


بالنسبة لزيت التعاون SJ.. فهو بيحقق المطلوب في الكتالوج...

بس دايما أفضل زيت يختلف حسب أولوياتك.. بشرط يكون محقق طلبات الكتالوج (ده شرط أساسي)..

من ناحية وجود زيوت أفضل... أكيد قيه زيوت أفضل... بس يهمني أعرف حاجتين.. طريقة استخدامك وسواقتك للعربية.. وميزانيتك.

وساعتها إن شاء الله نلاقي الزيت المناسب لحضرتك.


...