عداد الـrpm ... إزاي تستخدمه؟؟؟

[borio1704]

كتير من العربيات الحديثة بينزل فيها عداد مكتوب عليه RPM

ناس كتير ما تعرفش إيه العداد ده ولا بيعمل إيه ولازمته إيه في العربية!!!




خلينا نعرف الأول إيه هو العداد ده

العداد ده بيقيس عدد دورات عمود الكرنك بتاع الموتور في الدقيقة... أو بمعنى آخر بيقيس الموتور بلف كام لفة في الدقيقة... والمعروف إن موتور العربية دورانه بيزيد ويقل مع زيادة أو نقص كمية الوقود اللي بيدخله... طبعا على حسب دوسة رجلك للبنزين والحمل على الموتور.




خلي بالك... الـRPM دي مش اسم العداد... دي وحدة قياس... وهي اختصار للجملة Revolution Per Minute بمعنى "دورة في الدقيقة"

والاسم الصحيح لعداد الـRPM هو ... "تاكوميتر Tachometer"





عرفنا إنه بيقيس لفات الموتور... طيب ده هيفيدني في إيه؟؟؟


التاكوميتر عموما بيديك فكرة عن أداء الموتور ومنها تقدر تحافظ على موتور عربيتك وتطول عمره

إزاي؟؟؟

في العادة ... التاكوميتر فيه تدريج من 0 إلى 8 آلاف، وعادة حتلاقي التدريج بيتلون للأحمر بداية من 6 آلاف أو أكتر

المنطقة دي إسمها الـ"Red Zone" أو المنطقة الحمرا



طول ما انت ما دخلتش المنطقة دي يبقى موتورك في أمان إن شاء الله




حاجة تانية

كل موتور بيبقى متصمم عشان يطلع شكل معين للأداء ، والأداء ده بيختلف من موتور للتاني على حسب الغرض اللي الموتور ده متصمم عشانه



يعني فيه مواتير عشان تاخد منها أداء عالي لازم ترفع الدوران بتاعها قوي... وفي مواتير تانية متصممة إنها تديك عزم عالي على دوران أبطأ... وده كمان بيختلف أساسا على حسب المنطقة الحمرا بتبدأ منين.


في المقابل... الفتيس أو الجيربوكس اللي هيركب على الموتور ده معمول بطريقة إنك تاخد أفضل أداء من الموتور في حدود المطلوب من العربية أساسا.


عشان كده..


في القيادة العادية (غير الرياضية) ... عادة ... النقل في الدورات المتوسطة هو أحسن شيء للموتور... عشان تاخد أعلى عزم من الموتور من غير ما صوت الموتور يعلى وكمان يديك أعلى كفاءة في استهلاك البنزين




على فكرة... النقل على دورات منخفضة مضر للموتور وبيسبب إن الشنابر تتكسر


بس لو انت عايز تسوق بطريقة "رياضية"... المفروض ما تنقلش للنقلة اللي بعدها إلا على دورات عالية... لإن أقصى قدرة بتاخدها من الموتور بتبقى في الدورات العالية



___________


مع الوقت... هتتعود على حركة العداد، وهتعرف إمتى تنقل وهتفهم عربيتك أحسن بكتير.... وأحيانا ممكن تعرف إذا كان أداء عربيتك كويس أو لأ من العداد، ده كمان ممكن تستغنى عن عداد السرعة لو حبيت


طيب... يعني إيه النقل على دوران متوسط؟؟؟؟


يعني مثلا: لما تيجي تنقل من الأول للتاني ... أو من التاني للتالث، يفضل إنك تنقل لما العداد يشاور على الثلث الوسطاني للعداد قبل الخط الأحمر

بص على الصورة كده:



العداد ده الخط الأحمر بيبتدي من 7000 RPM، الدورات المتوسطة بتبقى في التلت الوسطاني من حوالي 2300 لحد 4600.. بالتقريب كده

لو معظم نقلاتك في المسافة دي ... ده بيبقى أحسن للموتور... إنما ده ما يمنعش إنك تضطر تنقل على RPM أقل أو أكتر حسب الموقف اللي انت فيه


الدورات المنخفضة بتبقى في التلت الأول... يعني أقل من 2300


طبعا... مش كل عداد زي التاني في بداية الخط الاحمر.... عشان كده التلت الوسطاني بدايته ونهايته هتختلف

طيب إيه موضوع الاستغناء عن عداد السرعة؟؟؟؟؟

اقرا المشاركة الجاية




...

[borio1704]

طيب... إحنا قلنا في المرة اللي فاتت إننا ممكن نستغنى عن عداد السرعة

هو فيه علاقة بين التاكوميتر وعداد السرعة





فيه علاقة طبعا


العلاقة موجودة عن طريق الفتيس والكورونا + الكاوتش


في بعض كتالوجات العربيات... بيبقى مكتوب نسب تخفيض التروس بتاعة الفتيس والكورونا، ووبناء عليها بيتعمل عداد السرعة





طبعا القيم دي بتختلف من عربية للتانية


مثلا:

لو عندك نسبة تخفيض النقلة التانية = 2.5 .... دي معناها إن الموتور بيلف عدد لفات 2.5 ضعف عدد لفات العمود اللي طالع من الفتيس



الكورونا بتاخد الكلام ده وتعمل تخفيض تاني في السرعة وتوصله للعجل




عادة .. نسبة التخفيض في الكورونا بتبقى 4 .... يعني عدد لفات العمود اللي طالع من الفتيس هي 4 أضعاف العمود اللي واصل على العجل


فلو الموتور بيلف 3000 RPM على النقلة التانية

يبقى العجلة هتلف كام RPM؟؟؟

العجلة هتلف 3000 / 2.5 / 4 = 300 RPM

الـ 300 RPM دول لما تضربهم في محيط العجل يديك القيمة اللي بتطلعلك في عداد السرعة لما يبقى عداد الـRPM على 3000 وانت ماشي على التاني



وبالطريقة دي.... تقدر تعرف أقصى سرعة لكل غيار


عشان كده .... لو حبيت تغير مقاس الكاوتش وتجيب كاوتش أعرض ... مهم جدا إنك تحافظ على القطر الخارجي للكاوتش زي ماهو الأصلي... عشان ما يخلفش معاك عداد السرعة




العلاقة دي ممكن تبوظ في حالتين....

إن اسطوانة الدبرياج تكون بتفوت ... أو ... في حالة العربيات الأوتوماتيك لما يبقى محمل عليها جامد



...

[truss]

موضوع رائع جداً و مهم جداً , احييك عليه

اسمح لى بس اعقب على نقطة بسيطة جداً عشان يبقى كلام هندسى 100 %

[SIZE="5"]

فلو الموتور بيلف 3000 RPM على النقلة التانية

يبقى العجلة هتلف كام RPM؟؟؟

العجلة هتلف 3000 / 2.5 / 4 = 300 RPM

الـ 300 RPM دول لما تضربهم في محيط العجل يديك القيمة اللي بتطلعلك في عداد السرعة لما يبقى عداد الـRPM على 3000 وانت ماشي على التاني

...

ال 300 rpm دول بنضربهم فى نصف قطر العجلة و ليس محيط العجلة عشان نحول السرعة الدورانية لسرعة خطية ,

بس فعلاً موضوع كويس و شرح ممتاز

[borio1704]

موضوع رائع جداً و مهم جداً , احييك عليه

اسمح لى بس اعقب على نقطة بسيطة جداً عشان يبقى كلام هندسى 100 %



ال 300 rpm دول بنضربهم فى نصف قطر العجلة و ليس محيط العجلة عشان نحول السرعة الدورانية لسرعة خطية ,

بس فعلاً موضوع كويس و شرح ممتاز

لا يا فندم.... بنضرب عدد اللفات في محيط العجل مع الأخذ في الاعتبار تحويل المليمتر أو السنتيمتر إلى كيلومتر، وتحويل الدقيقة إلى ساعة

عشان نعرف السرعة الخطية لازم نضربها في محيط العجل... ونصف القطر عامل من العوامل الموجودة في المعادلة... بس مش هو العامل الوحيد فيها

لو حضرتك تحب أجيب معادلات أنا جاهز... بس أنا بحب أركز على المفاهيم أكتر من المعادلات... لإن ببساطة المعادلات متاخدة من المفاهيم

ولو على المعادلات... المسألة سهلة... والكمبيوتر بيعمل كل حاجة... بس من غير ما يفهم



...

[walaaeldeen]

لا يا فندم.... بنضرب عدد اللفات في محيط العجل مع الأخذ في الاعتبار تحويل المليمتر أو السنتيمتر إلى كيلومتر، وتحويل الدقيقة إلى ساعة

عشان نعرف السرعة الخطية لازم نضربها في محيط العجل... ونصف القطر عامل من العوامل الموجودة في المعادلة... بس مش هو العامل الوحيد فيها

لو حضرتك تحب أجيب معادلات أنا جاهز... بس أنا بحب أركز على المفاهيم أكتر من المعادلات... لإن ببساطة المعادلات متاخدة من المفاهيم

ولو على المعادلات... المسألة سهلة... والكمبيوتر بيعمل كل حاجة... بس من غير ما يفهم



...

السلام عليكم
فعلا بنضرب في المحيط وليس نصف القطر
لأن عندما تلف العجل تكون المسافه كأنك فردة الكاوتش
موضوع مفيد ومميز
والله المستعان

[borio1704]

السلام عليكم
فعلا بنضرب في المحيط وليس نصف القطر
موضوع مفيد ومميز
والله المستعان

نورت الموضوع يا بشمهندس ولاء الدين



...

[truss]

السرعة الدورانية عشان تحولها لسرعة خطية لازم تضربها فى نصف قطر العجلة دة أ ب هندسة ميكانيكية

V= r w
V: السرعة الخطية
r: نصف القطر
w: السرعة الدورانية


بالنسبة للسيارات:
لمعرفة سرعة العربية عند سرعة محرك معينة و نقلة معينة نستخدم المعادلة دى

V=2π *N *r/60* Ig * If

N سرعة دوران المحرك بـ rpm
r نصف قطر العجلة بالمتر
Ig نسبة تخفيض النقلة
If نسبة التخفيض النهائية فى differential
V سرعة السيارة كم/س


قبل ما نجادل مع بعضنا هو الفرق انى بضرب 2π فى السرعة الدورانية عشان احولها
لكن انت بتضرب 2π فى نصف اقطر عشان كدة بتقول محيط العجلة
لكنى ما غلطش لما قولت اننا بنضرب السرعة الدورانية فى نصف القطر عشان نجيب السرعة الخطية

[amrelsaqqa]

خلاص يبقى الراجل كلامه كان صح لما قال المحيط مش غلط !

[MohammedAladel]

ماشاء الله موضوع رائع ربنا يبارك لك يا هندسة

[borio1704]

السرعة الدورانية عشان تحولها لسرعة خطية لازم تضربها فى نصف قطر العجلة دة أ ب هندسة ميكانيكية

V= r w
V: السرعة الخطية
r: نصف القطر
w: السرعة الدورانية


بالنسبة للسيارات:
لمعرفة سرعة العربية عند سرعة محرك معينة و نقلة معينة نستخدم المعادلة دى

V=2π *N *r/60* Ig * If

N سرعة دوران المحرك بـ rpm
r نصف قطر العجلة بالمتر
Ig نسبة تخفيض النقلة
If نسبة التخفيض النهائية فى differential
V سرعة السيارة كم/س


قبل ما نجادل مع بعضنا هو الفرق انى بضرب 2π فى السرعة الدورانية عشان احولها
لكن انت بتضرب 2π فى نصف اقطر عشان كدة بتقول محيط العجلة
لكنى ما غلطش لما قولت اننا بنضرب السرعة الدورانية فى نصف القطر عشان نجيب السرعة الخطية

حضرتك لخبطت ما بين Wrad و Wcyc

Wrad المقصود بيها السرعة الزاوية، ودي اللي بنضربها في نصف القطر علشان نعرف السرعة الخطية... ووحدة القياس بتاعتها rad/sec أو راديان في الثانية

أما Wcyc فالمقصود بيها السرعة الدورانية ، وبتتقاس بعدد الدورات في الثانية، والعلاقة بين السرعتين بتيجي من المعادلة التالية:
Wcyc = Wrad/2π

ودي اللي بنضربها في 2π بالإضافة إلى الضرب في r

بمعنى إننا بنضربها في المحيط




...

[zezozezozezo]

موضوع اكثر من رائع بس سؤال هل عدد لفات الموتور بتأثر ان الزيت بينقص او البخر بتاعة بيبقى عالى لان عندى الزيت بيقل مثلا كل اربع الف كيلو مثلا بحط بتاع ربع كيلو الزيت شيل هيلكس متهيألى ممكن يكون البخر عالى لانى بغير على 2500 لفة فى الدقيقة ولا دة طبيعى ولا اية بس مكنش كدة ومفيش اية تسريب زيت خالص

[truss]

حضرتك لخبطت ما بين wrad و wcyc

wrad المقصود بيها السرعة الزاوية، ودي اللي بنضربها في نصف القطر علشان نعرف السرعة الخطية... ووحدة القياس بتاعتها rad/sec أو راديان في الثانية

أما wcyc فالمقصود بيها السرعة الدورانية ، وبتتقاس بعدد الدورات في الثانية، والعلاقة بين السرعتين بتيجي من المعادلة التالية:
Wcyc = wrad/2π

ودي اللي بنضربها في 2π بالإضافة إلى الضرب في r

بمعنى إننا بنضربها في المحيط




...

لأ انا ما لخبطتش و اقرا كويس اخر سطرين فى تعليقى هتعرف انى وضحت الالتباس,

[borio1704]

لأ انا ما لخبطتش و اقرا كويس اخر سطرين فى تعليقى هتعرف انى وضحت الالتباس,

براحتك



...

[borio1704]

موضوع اكثر من رائع بس سؤال هل عدد لفات الموتور بتأثر ان الزيت بينقص او البخر بتاعة بيبقى عالى لان عندى الزيت بيقل مثلا كل اربع الف كيلو مثلا بحط بتاع ربع كيلو الزيت شيل هيلكس متهيألى ممكن يكون البخر عالى لانى بغير على 2500 لفة فى الدقيقة ولا دة طبيعى ولا اية بس مكنش كدة ومفيش اية تسريب زيت خالص

الرد اللي تحت ده كان ردي على سؤال مشابه

اللي حضرتك بتوصفه اسمه "استهلاك الزيت"

كل مواتير العالم بتستهلك زيت مع التشغيل... بمعنى إن الزيت بيتحرق مع البنزين أو السولار

وده بسبب طبيعة عمل الموتور اللي فيها الزيت لازم يزيت أي جزء متحرك علشان تبقى حركته سهلة وما يولدش حرارة عالية



السلندر من جوه لازم يبقى عليه طبقة من الزيت عشان البستم يمشي كويس... والبستم بيبقى فيه حلقات بتمنع اختلاط غرفة الحريق عن الأجزاء التانية المتحركة، ودي اللي معروفة بإسم "الشنابر"، ومن ضمن الشنابر دي فيه واحد أو اتنين مخصصين لمسح الزيت من على السلندر... بس المسح عادة مش بيتم بصورة كاملة، وبتفضل فيه طبقة رقيقة على السلندر بتتحرق مع البنزين



الموضوع ده لا يمكن نتفاداه... بس ممكن نقلل منه


إزاي؟؟؟

*حاول تستخدم زيت أثقل بعض الشيء (مداه مناسب لجو مصر).. لإن كل ما كان الزيت خفيف ، كل ما كان استهلاكه أكتر

*حاول تستخدم زيت تخليقي

*حاول تقلل من الدوران العالي للموتور... يعني خليك في المدى المتوسط بتاع الـRPM

على سبيل المثال... في كتالوج تويوتا كورولا 2010 (في أمريكا) مكتوب إن معدل استهلاك ازيت ممكن يوصل لحد 1 لتر كل ألف كيلو !!!!! بس المعدل العالي ده لإن الزيت اللي بيستخدموه هناك خفيف جدا لإن الجو هناك بارد في مناطق كتير ... ده غير إنهم عاملين حساب طريقة السواقة الرياضية.



أرجو إني أكون فدتك


...

يبقى نوع الزيت اللي حضرتك بتستخدمه ليه دور، وممكن حالة الموتور نفسه ليها علاقة... بمعنى إن الشنابر ممكن تكون اتأثرت لو حضرتك بتنقل على دوران منخفض كتير (الموتور بيكركر أو بيسقف منك كتير)

متهيألي 2500 RPM معقولة عند النقل... بس ده برضو يعتمد على حسب العربية محملة ولا لأ، أو مستوى الشارع نفسه بحيث لو بتطلع منطقة عالية نسبيا فهنحتاج طاقة أعلى من الموتور، وبالتالي ما ينفعش ننقل على 2500 أبدا... على الأقل 3500 أو 4000 RPM

على فكرة أنا كنت عامل موضوع من زمان إسمه:"قواعد اختيار زيت الموتور.. إزاي تعرف الزيت المناسب؟؟؟ "
ممكن نتواصل هناك لو عندك أسإلة عن الزيوت





...

[truss]

براحتك



...

أحمد باشا اوعى تكون زعلت

انا هوضحلك سوء الفهم اللى بينى و بينك

و انا بقرا موضوع حضرتك عينى جت على كلمة بنضرب السرعة الدورانية فى محيط العجلة عشان نجيب سرعة العربية انا قلت لأ احنا بنضرب السرعة الدورانية فى نصف القطر فى تعليقى الاول
حضرتك رديت و قلت لأ احنا بنضرب فى محيط العجلة !
انا قلت الراجل دة شكله واثق من كلامه قمت جبت المعادلات و فصصتها اتضح ان الرقم 2π انا بضربه فى ال rpm فبيدينى سرعة دورانية زاوية فبضربها فى نصف القطر
انما حضرتك بتسيب ال rpm زى ما هو و تضرب 2π فى نصف القطر فبيديك المحيط

يعنى من الاخر كنا هنخسر بعض عشان الرقم اللعين 2π و لكنى تداركت الموقف (حلوة تداركت دى) و وضحت دة فى تعليقى التانى

و حضرتك لازم تعرف ان تلت معلوماتى عن السيارات بعرفها من كتاب الموضوعات الجامدة زيك كدة ع المنتدى, الى جانب دراستى فى قسم السيارت فى تلك القلعة اللعينة المسماة بهندسة عين شمس

و انا دايماً بحب انكش مع الناس اللى حاسس انها بتفهم زيك كدة يا باشمهندس

و اوعى تزعل