عداد الـrpm ... إزاي تستخدمه؟؟؟

[borio1704]

أحمد باشا اوعى تكون زعلت :e_braces[1]:

انا هوضحلك سوء الفهم اللى بينى و بينك

و انا بقرا موضوع حضرتك عينى جت على كلمة بنضرب السرعة الدورانية فى محيط العجلة عشان نجيب سرعة العربية انا قلت لأ احنا بنضرب السرعة الدورانية فى نصف القطر فى تعليقى الاول
حضرتك رديت و قلت لأ احنا بنضرب فى محيط العجلة !
انا قلت الراجل دة شكله واثق من كلامه قمت جبت المعادلات و فصصتها اتضح ان الرقم 2π انا بضربه فى ال rpm فبيدينى سرعة دورانية زاوية فبضربها فى نصف القطر
انما حضرتك بتسيب ال rpm زى ما هو و تضرب 2π فى نصف القطر فبيديك المحيط

يعنى من الاخر كنا هنخسر بعض عشان الرقم اللعين 2π :c_laugh[1]: و لكنى تداركت الموقف (حلوة تداركت دى) و وضحت دة فى تعليقى التانى

و حضرتك لازم تعرف ان تلت معلوماتى عن السيارات بعرفها من كتاب الموضوعات الجامدة زيك كدة ع المنتدى, الى جانب دراستى فى قسم السيارت فى تلك القلعة اللعينة المسماة بهندسة عين شمس :ka_che1[1]:

و انا دايماً بحب انكش مع الناس اللى حاسس انها بتفهم زيك كدة يا باشمهندس

و اوعى تزعل

زياد باشا... أنا مازعلتش والله

أنا يمكن كنت حاد شوية في الرد بتاعي.. وأنا باعتذر إذا كان ردي ضايقك

بس اعتبرني زي أخوك الكبير :) ... يعني الواحد متخرج من سنة 96 فما بقتش بحط موضوع المعادلات ده في دماغي... إنما باعتمد أكتر على المفاهيم، يمكن عشان بتعامل مع عمال أو فنيين ما عندهمش فكرة عن اللي احنا دارسينه... فبضطر أبسط المعلومة عشان اللي قدامي يفهمها عشان يتجاوب معايا في اللي أنا باطلبه في الشغل

بس صدقني لو ركزت إنك تفهم المعنى من المعادلات هتلاقي الهندسة دي أسهل بكتير، وهتبقى مؤثر في اللي حواليك أكتر

مرة تانية باعتذر إذا كان ردي ضايقك


آه صحيح... أنا شايفك حاطط صورة "تربو"... شفت الموضوع ده؟؟
إيه الفرق بين مواتير التربو والمواتير العادية؟؟؟

ياريت تشوفه وتقولي إيه رأيك



...

[truss]

زياد باشا... أنا مازعلتش والله

أنا يمكن كنت حاد شوية في الرد بتاعي.. وأنا باعتذر إذا كان ردي ضايقك

بس اعتبرني زي أخوك الكبير :) ... يعني الواحد متخرج من سنة 96 فما بقتش بحط موضوع المعادلات ده في دماغي... إنما باعتمد أكتر على المفاهيم، يمكن عشان بتعامل مع عمال أو فنيين ما عندهمش فكرة عن اللي احنا دارسينه... فبضطر أبسط المعلومة عشان اللي قدامي يفهمها عشان يتجاوب معايا في اللي أنا باطلبه في الشغل

بس صدقني لو ركزت إنك تفهم المعنى من المعادلات هتلاقي الهندسة دي أسهل بكتير، وهتبقى مؤثر في اللي حواليك أكتر

مرة تانية باعتذر إذا كان ردي ضايقك


آه صحيح... أنا شايفك حاطط صورة "تربو"... شفت الموضوع ده؟؟
إيه الفرق بين مواتير التربو والمواتير العادية؟؟؟

ياريت تشوفه وتقولي إيه رأيك



...

يا بشمهندس اعتذار ايه بس دة المفروض انا اللى اعتذر, انا عارف انى بتبع النمط الجدلى شوية فى كلامى , كويس انك استحملتنى

على رأى حضرتك الواحد المفروض يركز فى المفاهيم اكتر و هو دة اللى بعمله و اللى خلانى اعدى من شوية مواد ما اعرفش عديت منها ازاى فى الكلية دى ( انا غارز فى الكلية بقالى 6 سنين و مش عارف اطلع )

بالنسبة لموضوع التربو .. ردى هناك :)

[zezozezozezo]

الرد اللي تحت ده كان ردي على سؤال مشابه



يبقى نوع الزيت اللي حضرتك بتستخدمه ليه دور، وممكن حالة الموتور نفسه ليها علاقة... بمعنى إن الشنابر ممكن تكون اتأثرت لو حضرتك بتنقل على دوران منخفض كتير (الموتور بيكركر أو بيسقف منك كتير)

متهيألي 2500 rpm معقولة عند النقل... بس ده برضو يعتمد على حسب العربية محملة ولا لأ، أو مستوى الشارع نفسه بحيث لو بتطلع منطقة عالية نسبيا فهنحتاج طاقة أعلى من الموتور، وبالتالي ما ينفعش ننقل على 2500 أبدا... على الأقل 3500 أو 4000 rpm

على فكرة أنا كنت عامل موضوع من زمان إسمه:"قواعد اختيار زيت الموتور.. إزاي تعرف الزيت المناسب؟؟؟ "
ممكن نتواصل هناك لو عندك أسإلة عن الزيوت





...

انا فتحت تانى الموضوع لانة كان جايب رسالة ادارية بس علقت وفتح برجاء المتابعة

[MohammedAladel]

ليه العلاقة ممكن تبوظ عند التحميل على الفتيس الأوتو ؟؟

عشان محول العزوم مثلا بيهدر جزء من الطاقة ومع الحمولة الزايدة هيهدر جزء أكبر ؟؟ ودا اللى بيخلى العربية الأوتو وهى واقفة على الغيار وأنت ماسك فرامل متبطلش ؟ هو دا حضرتك اللى تقصده ؟؟

يعنى فلنفرض إن عدد لفات الموتور عند 3000 بتطلع مع الغيار الرابع 115 كيلو متر فى الساعة مع المقاس الأصلى للعربية

لو محملة محول العزوم هيهدر جزء من الطاقة دى بسبب الحمولة والضغط عليه فممكن يطلع سرعة أقل عند نفس العدد من اللفات !!


استفسار آخر ....... أنا عربيتى بتجيب ال 115 على الرابع عند 3000 تقريبا فتيسى أوتوماتيك ..... نفس العربية مع فتيس مانيوال 5 سرعات بتجيب 120 عند 3750 وعلى الغيار الخامس !!!!!

فين بقى توفير الاستهلاك مع الفتيس المانيوال ؟؟ فين هى السرعة القصوى اللى المفروض إنها تبقى أزيد مع الفتيس المانيوال لنفس الموتور ؟؟؟

[sakr_skoda]

رائع جدا شرح ومجهود رائع بارك الله فيك....

[borio1704]

ليه العلاقة ممكن تبوظ عند التحميل على الفتيس الأوتو ؟؟

عشان محول العزوم مثلا بيهدر جزء من الطاقة ومع الحمولة الزايدة هيهدر جزء أكبر ؟؟ ودا اللى بيخلى العربية الأوتو وهى واقفة على الغيار وأنت ماسك فرامل متبطلش ؟ هو دا حضرتك اللى تقصده ؟؟

يعنى فلنفرض إن عدد لفات الموتور عند 3000 بتطلع مع الغيار الرابع 115 كيلو متر فى الساعة مع المقاس الأصلى للعربية

لو محملة محول العزوم هيهدر جزء من الطاقة دى بسبب الحمولة والضغط عليه فممكن يطلع سرعة أقل عند نفس العدد من اللفات !!


استفسار آخر ....... أنا عربيتى بتجيب ال 115 على الرابع عند 3000 تقريبا فتيسى أوتوماتيك ..... نفس العربية مع فتيس مانيوال 5 سرعات بتجيب 120 عند 3750 وعلى الغيار الخامس !!!!!

فين بقى توفير الاستهلاك مع الفتيس المانيوال ؟؟ فين هى السرعة القصوى اللى المفروض إنها تبقى أزيد مع الفتيس المانيوال لنفس الموتور ؟؟؟

العلاقة بتبوظ لإن محول العزم بينقل الحركة عن طريق وسط سائل (اللي هو الزيت) ... مش زي اسطوانة الدبرياج اللي بتعتمد على التلامس المباشر

لو بصينا لمحول العزم من جوه هنلاقيه عبارة عن مروحتين قصاد بعض... لما المروحة المتوصلة على الموتور بتلف بتخلي الزيت كمان يلف معاها ... وبعدين المروحة المتوصلة على الفتيس تلف من تأثير حركة الزيت

وزي ما حضرتك قلت... أول أعراض إن العلاقة تبوظ كل ملاك العربيات الأوتو حسو بيها في وقت من الأوقات... وخصوصا لما تكون دايس بنزين جامد فالموتور صوته بيعلى ويفضل ثابت (يعني سرعة دورانه ثابتة)... في حين إن العربية سرعتها بتزيد
وتفضل كده لحد ما توصل العربية للسرعة المناسبة بتاعة الموتور

_______


بالنسبة لموضوع التوفير في الوقود


العلاقة بين الفتيس وتوفير الوقود مش بس في في عدد لفات الموتور

العلاقة بين نسب التخفيض في التروس وكمان الكورونا ليها دخل كبير


خليني أشرح بشكل أبسط

لو جربت تسوق عجلة سبق.... جرب تعشق السرعة العالية (الترس الصغير اللي ورا) وشوف كمية المجهود اللي رجلك هتبذله عشان تحرك العجلة من السكون والوقت اللي هتاخده عشان توصل لسرعة معقولة

جرب تاني تعشق العجلة على السرعة البطيئة (الترس الكبير اللي ورا) وشوف أخبار رجلك إيه؟؟؟ أكيد المجهود اللي هتبذله أقل بكتير، وكمان وصلت للسرعة اللي انت عايزها بسرعة... صحيح انت ماشي بسرعة أقل إنما بمجهود أقل


مجهود رجلك ده يعني طاقة... وفي العربية الطاقة = بنزين


المشكلة باختصار إن ساعات مهندسين السيارات بيعملوا تروس أصغر من اللازم... ممكن تخليك تمشي بسرعة أكبر... بس بتاخد بنزين أكتر عشان توصل للسرعة دي... وبيسموا النقلات اللي فيها التروس دي "نقلات طويلة" عشان تقدر تمشي عليها في مدى سرعات كبير على بال ما يوصل الموتور للفات اللي المفروض تنقل عليها... إنما الموتور هيستهلك بنزين أكتر


عشان كده كل ما زاد عدد النقلات في الفتيس كان استهلاكه للبنزين أفضل، لإن الموتور هيبقى مستريح في النقلة... بمعنى إنك هتدوس بنزين قليل وهتاخد تسارع أعلى

وفي الحالة دي النقلات بتبقى "قصيرة"... يعني مدى السرعات بتاعها قصير بالمقارنة مع سرعة الموتور ومش بتدي سرعة كبيرة للعربية.. إنما بتدي تسارع أعلى بكتير

وفي الآخر.... الكورونا هي كمان بتتحكم في كل ده


فيه حاجة كمان...

غالبا الفتيس عندك النسبة الرابعة دي تعتبر "اوفر درايف" ... والتسمية دي بيقولوها على النقلة اللي الغرض منها التوفير في البنزين (على أساس إنك هتستخدمها غالبا في الطريق السريع)... وغالبا مش هتقدر توصل للسرعة القصوى على النقلة دي (آخرك 140) ، أنما لازم تنزل على النقلة التالتة وهي اللي هتوصلك للسرعة القصوى

شوف الكتالوج... لو لقيت نسبة التخفيض في الترس الرابع أقل من 1.00 ... تبقى دي أوفر درايف



...

[MohammedAladel]

شكرا يا هندسة ربنا يبارك لك إنت برنس والله

بالتأكيد محول العزوم بيفوت للموتور ... كان أول سؤال ليا فى المنتدى عن الفتيس الأوتوماتيكى ... هو ليه مش بيبطل ... واتضح إنه بسبب محول العزوم وحكاية العزم المهدر بسبب نقل الحركة عن طريق ضغط الزيت .... وبكل بساطة لو وأنت راجع وراك طوبة عالية ممكن تدوس بنزين و ال rpm يرفع والعربية مش قادة تطلع لسة !!!!! بعكس ال عربية المانيوال بتبطل

بالنسبة لنسب التخفيض ولفات الموتور ...... معنى كدا إن ممكن أصمم فتيس أوتو مع محرك ما نسب تخفيضه أفضل إنها تخلى الحمل خفيف على المحرك ..... فلنفرض أن الفتيس دا أوتو

لو عملنا نفس الفتيس مانيوال بنفس نسب التخفيض هيبقى الاستهلاك أفضل فى صالح المانيوال لأن مفهوش محول عزم يعنى مفيش عزم مهدر بسبب وجود السائل الضاغط

ومعنى ذلك إن على أرض الواقع مش بالضرورة يكون استهلاك الفتيس الاوتو أعلى من المانيوال لنفس المحرك زى ما كل الناس معتقدة

يعنى ميجان مانيوال بيجيب ال 120 على 3750 لفة للمحرك على الغيار الخامس

مع الفتيس الأوتو لنفس المحرك لنفس السيارة نفس السرعة على 3100 أو أقل كمان هنا نسب التخفيض واضحة جدا

لكن الفتيس المانيوال عنده عزم أعلى الغيار سهل ونفسه قصير فى نفس الوقت صح كدا ؟؟

ولكن برضه مفهوش محول عزم

النقطة الجميلة الرائعة اللى عرفتها من حضرتك حكاية ال 4 غيار إن ممكن يكون غيار منهم لغرض معين أما الغيار النهائى هو الرقم 3 ..... أنا هشوف نسب التخفيض بس قبل ما أشوفها ... هقول لحضرتك إن لما ببقى ماشى على الرابع وعايز أشد أو أجيب سرعة عالية العربية بتروح منزلة على طول للتالت !!

حاجة تانية بتأكد كلام حضرتك من غير ما أقرأ حتى نسب تخفيض فتيس عربيتى
عندنا الفتيس استبترونيك ممكن تختار النقلة ...... فيه ناس جابت 180 على الغيار التالت بس أنا أعرف إن الأوفر درايف دا اللى هو كيك داون !

بس أنا هشوف وأتأكد

[MohammedAladel]

زى ما قلت بالضبط يا هندسة دى نسب التخفيض
نوع الفتيس dp0
gearbox suffix:083
1st:2.724
2nd:1.499
3rd:1.000
4th:0.710









final drive :25/68
lowering:52:67
طبعا أنا مش فاهم إيه ال final drive.
لا ال lowering.
ولا ال gearbox suffix
معنى كدا إن عند الغيار الأول بيبقى كل 2.724 لفة للموتور بتدى لفة لترس الغيار الأول

بس هنا المفروض إن الغيار الرابع أسرع حاجة ليه بقى ؟؟ عشان هنا نسبة التخفيض قليلة بيبقى الترس صغير يعنى ال 0.710 لفة للموتور بتدى لفة كاملة للغيار الرابع صح كدا ؟؟

يبقى المفروض إن الغيار التالت هو ال over drive ?

[MohammedAladel]

نسيت أقول حاجة إن الفتيس دا مع العربية اللوجان بيطلع السرعات دى عند 1000 rpm
الغيار الأول :8.74
الغيار الثانى :15.89
الغيار الثالث :23.82
الغيار الرابع : 33.51
دا بالنسبة للفتيس الأوتو ال 4 غيار ال dp0
بالنسبة للفتيس المانيوال ال jh3
Suffix
JH3-050
First
11/41
Second
21/43
Third
28/39
Fourth
34/35
Fifth
39/31
Reverse
gear
11/39
Final
drive
15/56
Tachometer
21/19

دا مثال لفتيس مانيوال ..... طبعا أنا مش فاهم نسبة التاكو ميتر دى ولا فاهم المقصود بال final drive ومعرفش هو ميدنى نسبتين مقسومين على بعض أنا قسمت الكبير على الصغير أدانى نسبة مقاربة للحقيقة بس النسب دى نسب إيه بالضبط ..... ؟؟ هل النسبة بين تخفيض التروس ولا differential ?? عشان أضربها فى قطر الكاوتش تدينى السرعة على طول ؟؟؟

يعنى مثلا هنروح للغيار الأول نقسم ال 41 على ال 11 هتدينى النسبة دى 3.7 تقريبا تمام كدا ؟

االغيار الخامس هنا هيدينى 0.794 تقريبا برضه

يعنى لو قا رننا بين الفتيس دا والأوتو بتاعى هنلاقى إن نسبة التخفيض بالنسبة للغيار الخامس متقاربة جدا مع نسبة التخفيض بالنسبة للغيار الرابع عندى صح كدا ؟؟

بس هو بيوصل لسرعة معينة أسرع منى عشان عنده عدد تروس أكتر ومشوارها أقصر وعزمها أكبر وفى نفس الوقت مفيش محول عزوم يهدر الطاقة

لكن بعد ما نوصل لسرعة معينة والعربية تاخد راحتها تقريبا هيبقى الاتنين متساويين مع بعض سواء استهلاك أو تسارع

[borio1704]

انت سألت كمية أسئلة عايزة موضوع لوحده :)

ولا يهمك :) ما دام الشرح بيجيب نتيجة كويسة أنا معاك

بس في الأول عايز أوضح كام حاجة علشان ما نتلخبطش



أول حاجة: مفيش حاجة إسمها نقلة معينة تبقى كيك داون

الكيك داون Kick Down هي ببساطة لما بندوس (kick) دواسة البنزين لحد الآخر تحت (down) علشان ناخد أقصى قدرة من الموتور...

عادة بنسقط نقلة لو راكبين عربية مانيوال... وفي العربيات الأوتوماتيك .. الفتيس بيسقط نقلة (وأحيانا اتنين) علشان ترفع الدوران وتاخد عزم أعلى.... معنى الكلام ده إن "الكيك داون" أو تسقيط النقلات ممكن يحصل من أول الغيار التاني وانت طالع...



تاني حاجة: الأوفردرايف Overdrive هي جاية أساسا من التسمية الهندسية للتروس... الترس اللي بيلِف أو بيسلم الحركة إسمه الترس "القائد" (Drive)... والترس اللي بيتلَف أو بيستلم الحركة إسمه "المنقاد" (Driven)

والمتعارف عليه من زمان إن القائد أسرع من المنقاد أو على الأقل بيساوو بعض في السرعة

الأوفر درايف كان مصطلح بيتقال على إن الترس المنقاد بقى هو اللي أسرع... يعني سرعته Over Drive، وزي ما قلت لحضرتك الغرض منه التوفير في الوقود على أساس إنك مش عايز منه تسارع ... مجرد بس تبقى ماشي على سرعة ثابتة عالية نسبيا بدون زيادة في السرعة، وفي الحالة دي رجلك حتدوس بنزين على قد ما العربية ماشية




طيب... نيجي للأسئلة

بصراحة إنت قلت نقطة كويسة جدا

إن مش شرط إن الفتيس المانيوال يكون بيوفر في الوقود.... وده حقيقي.... لإنه لو قدرنا نعمل فتيس أوتوماتك له نفس نسب التخفيض بتاعة الفتيس المانيوال... غالبا الموضوع هيكون متعادل لإنه من ناحية :

في صالح الفتيس المانيوال .. لإن الفتيس الأوتو فيه محول عزم... وده بيهدر الطاقة بالذات لو أثناء الوقوف وانت معشق D ... وكمان أثناء التحميل القوي

من ناحية تانية لصالح الأوتو لإنه هينقل بسرعة (الوقت ما بين النقلات) وبشكل أفضل من المانيوال وبدون غلطات


قريب قوي هنلاقي عربيات نزلت السوق في مصر وفيها فتيس أوتو بيوفر عن المانيوال، وهي بدأت فعلا في عربيات غالية زي بي إم دبليو



المهم ... خلينا في الأسئلة

نسبة التخفيض هي فعليا لما نقسم محيط "القائد" على محيط "المنقاد"... ولإن الاتنين فيهم قيم ثابتة اللي هي π .. فبنقسم على القطر

الكلام ده يمش على أي حاجتين بدوروا بعض... يعني لو عندك طارات بتشتغل عن طريق سير أو كاتينة... بتتحسب بنفس الطريقة

في التروس بقى... الكلام ده ممكن يترجم لعدد أسنان التروس لإنها مرادفة للمحيط بتاع الترس (مش عايز أدخلك في إزاي بيحسبوا السنان لإن ده مش موضوعنا)

المهم... الأرقام بتاعة النسب اللي حضرتك جبتها في الفتيس المانيول هي ببساطة عدد أسنان تروس القائد والمنقاد بتاعة كل غيار

يعني لما يقوللك الغيار الأول 41/11 يبقى الترس القائد عدد أسنانه 41 سنة والمنقاد 11




نسبة الـFinal Drive هي نسبة التخفيض بتاعة الكورونا أو الـdifferential، والحقيقة النسبة دي مهمة جدا لإنها بتخفض السرعة كمان بعد الفتيس.... ولو نسبة التخفيض بتاعتها عالية هتخلي العربية كلها بطيئة حتى لو نسب الفتيس نفسه ما كانتش بتخفض بالشكل الكافي... والعكس صحيح

ونسبة التاكوميتر دي تقريبا نسبة الترس اللي طالع من الفتيس عشان عداد السرعة .... بس دي مش متأكد منها بصراحة


نيجي بقى لمقارنة نسب التخفيض في الاتنين فتيس اللي حضرتك جبتهم (بعد ما قسمنا عدد الأسنان)

النسب - - - المانيوال - - - الأوتو
الأول - - - 3.727 - - - 2.742
التاني - - - 2.048 - - - 1.4992
التالت - - - 1.393 - - - 1.000
الرابع - - - 1.029 - - - 0.710
الخامس - - - 0.975 - - - ×××
الدفرنشال - - 3.733 - - -2.720


لو ضربنا كل النسب في نسبة الدفرنشال تطلع النسبة النهائية لتخفيض لكل غيار


بس اللي لاحظته إن نسب التخفيض في الفتيس الأوتو هتبقى قليلة قوي وحتخلي العربية تسارعها بطيء واستهلاكها من البنزين عالي

عشان كده فيه نسبة تانية إسمها Lowering ودي عبارة عن ترس إضافي بيخفض كمان قبل أو بعد الدفرينشال,,,يعني هي كمان حتضرب في نسب التخفيض بتاعة الفتيس ...


وساعتها حتكون النسب النهائية كده:

النسب - - - المانيوال - - - الأوتو
الأول - - - 13.9151 - - - 9.6097
التاني - - - 7.6444 - - - 5.2534
التالت - - - 5.2000 - - - 3.5046
الرابع - - - 3.8431 - - - 2.4883
الخامس - - - 2.9672 - - - ×××

كده يبان لنا إن الثالت بتاع المانيوال هو تقريبا التاني بتاع الأوتو.... والرابع في المانيوال يشبه الثالث بتاع الأوتو


خلي بالك إن ممكن العربية المانيوال يبقى قطر العجل فيها غير العربية الأوتو... ودي كمان وسيلة عشان تعديل الوضع لو فيه لسه فرق كبير بين الأوتو والمانيوال



...

[MohammedAladel]

بالنسبة لموضوع تطوير الفتيسات دلوقتى أنا شايف إن الشركات الحديثة والقوية زى فيات استغنت خلاص عن الفتيس الأوتو بمحول عزم وبتستخدم المانيوال بدبرياج كهربائى dual logic يعنى أنا شايف إن خلاص محول العزم راحت عليه وبكدا دمروا مهدر الطاقة

فلنفرض عربيتين نفس المحرك فتيسين واحد أوتو والآخر مانيوال الاتنين نفس نسب التخفيض (مثلا يعنى ) العربية حمولتها القصوى مع كل من الفتيسين 400 كيلو اللى متخليش المعادلة تختل بالنسبة للفتيس الأوتو
فلنفرض إننا حطينا 50 كيلو زيادة ... فى حالة الفتيس الأوتو هتبدأ العربية تطلع الآربى أم هيعلى والعربية سرعتها لا تتناسب مع عدد لفات الموتور لحد سرعة معينة هيبدأ محول العزم ياخد راحته وميضيعش لفات الموتور ع الفاضى

فى حالة الفتيس المانيوال مفيش طاقة هتفقدها العربية أيوا وعدد لفات الموتور اللى بيمشينى 10 كيلو فى الساعة هو هو مش هيتغير بس هنا الموتور نفسه هيصارع وهياخد بنزين أكتر عشان يقوم العربية وهياكل بنزين زيادة برضه
لحد ما يوصل لسرعة معينة ويضبط الاستهلاك وممنساش برضه إننا مش بنسيب دبرياج مرة واحدة يعنى هيبقى فيه طاقة مهدرة وأحنا بنرفع رجلنا من على الدبرياج خاصة فى الطلعة عشان العربية تقدر تتلحلح من مكانها مع الحمل الأوفر

حاجة جديدة مكنتش اعرفها عرفتها من حضرتك ........ أنا كنت فاكر إن الترس الأساسى القائد واحد بس وبيتغير عليه التروس الباقية
عشان كدا استغربت لما لقيت النسب المقسومة مختلفة فى كل مرة !!!
وراجعت نفسى وشاورت عقلى ورجعت للعجلة بتاعتى اللى هى بغيارات لقيت إن عندى قدام أكتر من ترس قائد ومن ورا أكتر من ترس مقود
وحضرتك أكدت الكلام دا
يعنى فى كل غيار ترسين مختلفين تماما بالنسبة للترس القائد و الترس المقود
وبالنسبة للغيار العكسى متهيقلى هنا بيعكس وضعية التروس بطريقة ما تخليها عشان تخلى العربية ترجع ورا ؟



حلوة قوى حكاية عدد التروس دى بس طبعا لو جينا نحسبها خام كدا بالنسبة لترسين ترس كبير وترس صغير الترس الصغير مثلا 10 سنون والكبير 15 سن طبعا لازم يكون المسافة بين كل سنين متساوية فى كلا من الترسين بس هنا الترس الكبير هيبقى قطره أكبر عشان يشيل سنون أكتر على مداره الدائرى
على العموم مش قصتنا دى
بس أنا عايز أطبق النظرية دى على العجلة اللى عندى
أنا عندى تروس قدام الترس الأكبر أولا يليه الأصغر فالأصغر من اليمين لليسار
عندى 5 تروس ورا من الأصغر للأكبر من اليمين للشمال
طبعا أنا بأمكانى أتحكم فى وضع التروس قدام مع التروس وراء براحتى لو جبت أكبر ترس قدام مع أكبر ترس ورا بيبقى الحمل خفيف جدا على رجلى والعجلة لو فى أحسن مطلع بطلع بسهولة
أتقل غيار بيبقى الترس الأكبر قدام مع الترس الأصغر ورا وبيدينى سرعة عالية محتاج مجهود أعلى لو هبدأ بيه
بس فيه حاجة نروح للغيار الاول فى العربية44/11 معناه إن هنا أكبر ترس مع أصغر ترس بيدى أخف حمل على المحرك نروح للغيار الخامس 39/31 هنا الترسين متقاربين نسبيا هما الاتنين كبار نسبيا فى عدد التروس لكن الفروق بينهم قليلة ودا أصعب غيار على المحرك ميقدرش يطلع بيه صح ؟

أنا اتلغبطت فى الحتة دى ..... وهل معنى كدا إنى ممكن ميكونش أكبر ترس للعجلة من الأمام مع أصغر ترس خلفى ممكن ميكونش هو دا أسرع حاجة فى العجلة ممكن أخدها بالغيار دا وإنى لو نزلت للترس الأقل منه الوسط مثلا مع ترس قريب ليه فى السنون ورا بحيث أنى ممكن آخد نسبة تخفيض أعلى ؟؟
بيبقى فيه ترسين صغيرين كمان فى جهاز نقل الجنزير اللى راكب ورا فى العجلة
ولا الحسبة دى متمشيش مع نظام سنون تروس العجلة ؟؟؟؟؟؟؟؟؟ طبعا فى الفتيس حركة تروس مع بعض لكن هنا حركة تروس مع بعض لكن فيه وسيط وهو الجنزير ولا دى مش هتمنعنا أننا نعاملها نفس معاملة الفتيس ؟؟


حضرتك ضربت النسبة هنا فى نسبة الدفرنشيال تمام بعدين ضربنا فى ال lowering بالنسبة للأوتو
طلعنا النسبة النهائية
نجيب عدد لفات المحرك نقسمه على النسبة النهائية نقسمه تانى على نسبة الدفرنشال ( ولا نسبة الدفرنشيال المعطاه هنا مش النسبة النهائية ؟؟
ولا هنا النظام مختلف فى حساب النسب أنا اتلخبطت شوية أعذرنى يا هندسة

نرجع للنسب النهائية لكل من الفتيسين السابقين
بفرض ثبات كل من وزن العربيتين ..... قطر العجل ... اتجاه الهواء ... نوع وقوة المحرك ... نفس العربية فى نفس الظروف من الآخر
هنا هناخد عزم أعلى مع الفتيس المانيوال وطلعة أقوى وأسرع
مع الفتيس الأوتوماتيكى عزم أقل برغم وجود ال lowering برضه بس أنا معرفش إيه اللى خلاهم معملوش تروس نسبها أفضل عشان تدى تسارع أحسن من غير ال lowering دا على العموم دى حاجات فنية معقدة مش قصتنا وتصاميم وشغل من دا
ولكن هنا سرعة قصوى هتبقى فى صالح الفتيس الأوتوماتيكى عشان نسبة تخفيض الغيار الرابع النهائية أقل فى قطر العجل المتساوى فى كل من السيارتين هيدى سرعة نهائية أعلى ....... بس جايز هنا محول العزم يبتدى برضه مع مقاومة الهواء الشديدة يفوت القوة بتاع الموتور الواصلة للتروس صح كدا ؟؟ وفى الحالة دى ممكن يتساوى الفتيسين أو يتفوق الفتيس المانيوال كمان لأن الفتيس الأوتو لم يستفيد كليا بكامل نسبة تخفيض التروس بسبب محول العزم

ملحوظة صغيرة : أنا الفتيس عندى زى ما قلت لحضرتك 4 غيار فى نقلة الغيار التانى .... الغيار بينقل على مرحلتين كأنه غيارين مش غيار واحد يعنى لو حسبت عدد النقلات والترييحات اللى بيريحها الموتور هتلاقيهم 5 وليس 4 كما هو موضح على الشاشة
حاجة تانية نرجع فوق للفتيس الأوتو مع العربية اللوجان عند 1000 لفة للمحرك
الغيار الأول :8.74 كم الفتيس الأوتو لو نقل للغيار التانى على السرعة دى مثلا يعنى هنلاقى عدد لفات المحرك قل عشان يناسب السرعة الحالية وصوت الموتور بقى أهدى وأنا مثبت رجلى على دواسة البنزين زى ما هى أنا شايف إن لمحول العزم هنا برضه بيشتت طاقة دوسة رجلى اللى مخلية الآر بى أم على 1000 عشان يتناسب مع سرعة العربية الحالية ويبتدى يتسارع من جديد
يعنى شبه الدبرياج فى العربية المانيوال بالضبط لما بنيجى ننقل غيار بس هناك فى العربية المانيوال أحنا بنرفع رجلنا من على البنزين خالص وبعدين نوس دبرياج وندى الغيار ونشيل رجلينا ونبتدى نزود بنزين
لكن العربيات الأوتو بنفضل دايسين بنزين هل دا بالفعل دور محول العزم ؟؟ ولا فيه حاجة بتفصل دواسة البنزين أثناء نقل الغيار فى العربية الأوتو ؟؟؟


بعد ما فهمت مفهوم ال over drive وال slave وال master .... نقدر نقول هنا إن الغيار ال 5 فى الفتيس المانيوال دا over drive
والغيار الرابع فى الفتيس الأوتو هنا overdrive
بس الغيارات دى نسب تخفيضها النهائية أٌقل من الغيارات اللى قبلها يعنى هى اللى نقدر نجيب عليها السرعة النهائية لما نقسم لفات الموتور على النسب دى وبعدين نضربها فى قطر الكاوتش هتدينا سرعة أكبر صح كدا ؟؟

بالنسبة لقطر الكاوشت
أنا عندى مقاس الجنط والكاوتش الستوك كالآتى r16/55/205 أعرف القطر أزاى ؟؟



الله عليك يا هندسة من ساعة ما حضرتك دخلت المنتدى وأنا أبتديت أفهم

[MohammedAladel]

بعد ما فهمت مفهوم ال over drive وال slave وال master .... نقدر نقول هنا إن الغيار ال 5 فى الفتيس المانيوال دا over drive
والغيار الرابع فى الفتيس الأوتو هنا overdrive
بس الغيارات دى نسب تخفيضها النهائية أٌقل من الغيارات اللى قبلها يعنى هى اللى نقدر نجيب عليها السرعة النهائية لما نقسم لفات الموتور على النسب دى وبعدين نضربها فى قطر الكاوتش هتدينا سرعة أكبر صح كدا ؟؟

هوضح لحضرتك استفسارى هنا أكتر

أنا هنا حسبت الغيار الرابع والخامس بناءا على النسب الأولية المعطاة وليس النسب النهائية
لأنى زى ما حضرتك شرحت قبل كدا
أنى هاخد عدد لفات المحرك
أقسمه على نسبة التخفيض ( مكنتش أعرف نسبة التخفيض الأولية والنهائية )
وبعدين اقسمه على نسبة التتخفيض للكارونة ( برضه معرفش أذا كان ليها نسبة أولية ونهائية ولا لأ )

بس هى دى الحتة اللى لغبطتنى

لكن بناءا على النسبة النهائية اللى حضرتك حسبتها يبقى مفيش over drive هنا

يبقى عدد لفات المحرك على نسبة التخفيض النهائية (حاصل ضرب نسبة تخفيض القائد والمقود فى نسبة التخفيض للكرونة المعطاة فى نسبة تخفيض ال lower) بعدين نقسمهم تانى على نسبة تخفيض الكارونة المعطاة اللى هى ال differ بعدين نضربهم فى قطر الكاوتش ناخد سرعتنا النهائية

[borio1704]

في التروس بقى... الكلام ده ممكن يترجم لعدد أسنان التروس لإنها مرادفة للمحيط بتاع الترس (مش عايز أدخلك في إزاي بيحسبوا السنان لإن ده مش موضوعنا)

المهم... الأرقام بتاعة النسب اللي حضرتك جبتها في الفتيس المانيول هي ببساطة عدد أسنان تروس القائد والمنقاد بتاعة كل غيار

يعني لما يقوللك الغيار الأول 41/11 يبقى الترس القائد عدد أسنانه 41 سنة والمنقاد 11







...

أنا آسف جدا ... لازم أصحح المعلومة اللي دي

علشان يحصل تخفيض لازم الترس القائد (Drive) يكون أصغر من الترس المنقاد (Driven)


وده معناه إن في النقلة اللي نسبتها 44/11 معناها إن القائد 11 والمنقاد والمنقاد 44... مش العكس

أنا آسف مرة تانية على اللخبطة



...

[YoussefMostafa]

موضوع رااااااااااااائع

[storm]

كلام رائع