عمليات ضبط المغذى (الكربوراتير )

[samirayad]

يحتاج الكربوراتير أثناء خدمته فى المحرك الى عمليات ضبط بين فتره وأخرى (يعنى لما نحس بخلل فى الآداء )..........

مثل ضبط السرعه البطيئه (السلانسيه ) أو مستوى البنزين فى غرفة العوامه ......

- يلاحظ أن عملية الضبط للكربوراتير لا تكون مفيده عند القيام بها الا أذا كان نظام الأشعال كاملا يعمل بصوره جيده ...وأن يكون خلوص صمامات المحرك مضبوط تماما (يعنى التاكيهات تمام ) ومظبوطه كما ينبغى ......

ولكل كربوراتير طريقة ضبط ...طبقا لتعليمات صانع الكربوراتير وصانع المحرك عامة .....الا أن طريقة الضبط تتشابه بدرجه كبيره بين الأنواع المختلفه من المغذيات (الكربوراتير يعنى ).......

1- طريقة ضبط السرعه البطيئه ..........

- يلاحظ أن بعض المغذيات يكون فى تصميمها الداخلى تواجد عدد 2 بيكات أو أربعه بيكات لسحب البنزين من غرفة العوامه الخاصه بالكربوراتير .....

-المغذيات ذات البيكين (بوقين ) يكون لها صمامان خنق (بوابتين )على محور واحد (جنب بعض على أكس الكربوراتير ).......

- أم أربع بيكات بقه (مش أم أربعه وأربعين )....بيكون ليها بوابتين (قرصين ) على أكسين متوازين ....كل أكس عليه بوابتين ....أكس ثانوى وأكس رئيسى .....بيتوصلوا ببعض ميكانيكا من عند بكرة الأكسراتير للتحكم فى فتحاتهم مع السرعه ........

- المهم ....حنركز شويه مع الكربوراتير أبو بابين .....وأبو بكين .....2 بيك يعنى .....مش بكين عاصمة الصين ...........

- كل كربوراتير بيوجد على جانبيه مسمار هواء ومسمار بنزين ......

- بتبدأ عملية الضبط قبل أدارة المحرك بربط مسمار الهواء للنهايه حتى قاعدة المسمار على جسم الكربوراتير ( لحد ماتحس الرباط تقل معاك ....وبهدوء وبدون قوه لعدم الـتأثير على قاعدة المسمار )....

- بعد كده حنفك مسمار الهواء ده 3 لفات للخارج .....وبعد كده حندور المكنه .....

- حنبدأ بعد كده نربط مسمار البنزين (مسمار التحكم فى البوابه ....علشان نواربها شويه لخلق تخلخل من الممر الطبيعى للكربوراتير ...أى زور الكربوراتير ) لسحب بنزين السلانسيه من غرفة العوامه من بيك السرعه البطيئه .....

- أحنا بنعمل أيه دلوقتى ....بنربط فى مسمار البنزين على خفيف ....لحد مادوران المكنه يبقى منتظم (المكنه مابترعشى ) وعلى أقل سرعه ممكنه ....أى صوت المكنه يبقى واطى ومعقول ......

- بعد كده حنربط مسمار الهواء أو البنزين 90 درجه للداخل ....علشان نخللى السرعه تانى مضطربه ...المكنه ترعش تانى لأضعاف نسبة الخليط ....

- بعد كده حنفك تانى مسمار الهواء نصف لفه (180 درجه )....

- كده خلاص ظبطنا مسمار الهواء (مسمار السرعه البطيئه )....بس السرعه لسه مش كويسه ....حنعمل أيه تانى ....

- حنضبط المحرك ودورانه على أقل سرعه بأدارة مسمار التحكم فى صمام التحكم فى البوابه بتاعة الكربوراتير (مسمار البنزين ) للخارج ...لحد مانصل للمطلوب .....

- وكقاعده عامه ...فأنه يلزم المحاوله بالطريقه دى من مرتين الى ثلاث مرات ضبط للحصول على الوضع الصحيح للمسامير .........

2- ضبط مستوى البنزين بالعوامه ......

- يجب أن يكون مستوى البنزين فى العوامه مضبوطا تماما ........طيب أزاى ....

- بيقولك ...ده بيكون فى شكل علامه على جسم غرفة العوامه (من الداخل طبعا ) وذلك لتأمين مستوى البنزين فى البيكات .....

- مستوى البنزين بغرفة العوامه ...مهم جدا أيضا ....حيث أنه يؤثر بشكل كبير على نوعية الخليط ....

- زيادة المستوى فى العوامه ...تجعل الخليط غنى (العربيه حتاكل بنزين )....

- نقص مستوى البنزين فى غرفة العوامه يؤدى الى ضعف الخليط (المكنه حتبقى هزيله )....وترعش والسحب أى كلام ....

- بعض المغذيات ...تزود بزجاجة بيان (من الخارج طبعا ) لتوضيح مستوى البنزين فى العوامه .....

- ده موضوع بسيط عن كيفية ضبط الكربوراتير .....أطلعت عليه من زمان ......بس الصراحه ........بليه أهون من كده بكتير ...........أشكركم على قراءة الموضوع

.[right ....

[/right]

[ASKAFRAWY]

موضوع مهم جدا يا بشمهندس سمير
وشرح اكثر من وافى كر لحضرتك

[samirayad]

أشكرك على زوقك ....ومرورك الطيب بالموضوع

[nabaster]

واحشني ونعمه يا رايس

بس معلش ظروفي الايام دي مش كويسه ووقتي ضيق ومخلياني مش مركز في الردود بقسم الورشه

عموما ان شاء الله خير وربنا يسهل

بس بسم الله ما شاء الله طريقة طرح الموضوع هايله

A.Yakout

[samirayad]

الله يخليك ياباشا .........فينك ....وحشانا مداخلاتك

[ابو حسين]

بسم الله ما شاء الله

موضوع جميل جدا يا بشمهندس سمير

مشكوووووور والله

[samirayad]

الله يخليك يا أبو حميد

[mohamed777]

والله ياباش مهندس كأنك بترد على استفسار عملتة بموضوع فى قسم المحركات عن كيفية ضبط خليط الوقود بالبنزين

الله يكرمك ياباش مهندس

[mohamed777]

- - بعد كده حنربط مسمار الهواء أو البنزين 90 درجه للداخل ....علشان نخللى السرعه تانى مضطربه ...المكنه ترعش تانى لأضعاف نسبة الخليط ....

.[right ....

[/right]

بس ياباش مهندس فى الخطوة دى نربط مين فيهم حضرتك بتقول هنربط مسمار الهواء او البنزين
مش ممكن تفرق دى ولا مين فيهم؟

[samirayad]

والله ياباش مهندس كأنك بترد على استفسار عملتة بموضوع فى قسم المحركات عن كيفية ضبط خليط الوقود بالبنزين

الله يكرمك ياباش مهندس

ماهو أنا عملت الموضوع ده ...لما قريت أستفسارك فى قسم المحركات فعلا ............

بس ياباش مهندس فى الخطوة دى نربط مين فيهم حضرتك بتقول هنربط مسمار الهواء او البنزين
مش ممكن تفرق دى ولا مين فيهم؟

خليها الهواء ياباشا .....وسيب البنزين فى حاله للآخر فعلا .....( بمعنى أصح الشغل كله فى الهواء الأول .....وآخر مرحله البنزين فعلا )......وأليك تلخيص مبسط جدا عن تسلسل الخطوات بعيدا عن الدربكه اللى فوق ........

1-أربط مسمار الهواء حتى قاعدته للنهايه بهدوء .....

2-فك المسمار مره ثانيه بمقدار 3 لفات ....

3- شغل المكنه وأدر مسمار البنزين حتى الوصول لأقل سرعه منتظمه .....

4- أدر مسمار الهواء بمقدار 90 درجه للداخل (رباط يعنى )....

5- فك مسمار الهواء مره تانيه بمقدار نصف لفه (180 درجه )....

6- كده خلاص ظبطنا مسمار الهواء وملناش دعوه بيه ....

7- من خلال مسمار البنزين نظبط على السرعه اللى تعجبنا ( الرباط عليه تزويد سرعه .....وفكه العكس ).....طبعا حنلعب فى مسمار البنزين للوصول للوضع اللى أحنا عاوزينه ( سلانسيه عالى أو واطى )........

[mohamed777]

هايل ياباش مهندس هو ده الكلام

[samirayad]

أى خدمه ياباشا .....وأشكرك على تركيزك ده

[mohamed777]

انا كنت فى مرة شوفت فيديو تعليمى من تويوتا عن الموضوع ده بيشرحة بس مافهمتش منه حاجه لانة كان بيتكلم يبانى ومش مترجم .....ههههههههه

وكمان كان بيجرب العربيةعلى اجهزة وحاجه كان بيحطها فى الشكمان لقياس النسب دى

[samirayad]

وكمان كان بيجرب العربيةعلى اجهزة وحاجه كان بيحطها فى الشكمان لقياس النسب دى

الجهاز اللى كان بيحطه فى الشكمان أسمه engine analyzer وده بياخد عينات من العادم ( زى عينات الدم كده ههههههههه ) وبتحليل العينات دى بيعرف العادم فيه بنزين ولا لا .....بمعنى أدق علشان يعرف يحدد من نواتج التحليل وضع الحريق .......مش أحنا لما بنعمل تحليل بول أو دم وخلافه ....بنقدر نحدد حالة وظائف الجسم ......نفس الطريقه بالنسبه للماكينات ..........يعنى العمليه مش فى الطب بس .....لا ياباشا ....الهندسه كمان فيها تحاليل وأشعه وفحوصات

[ziours]

شكرا يابشمهندس سمير على الشرح الممتاز ده بس كان عندي استفسار بخصوص العادم هو اني بعد ماعملت اكس وباب لاحظت ان فتحه الشكمان من ورا مهببة اسود مع العلم اني مع الدواره مش بلاحظ وجود اي نوع دخنة و في الامبلايهات و لافي اي ريحة حرق ني عند التسخين مع العلم كمان ان العربية في التسخين بلاقي الشكمان بيعرق مية وده اللي انا مستغرباه منين الشكمان مسود و منين بيعرق ميه .
شكرا