تقييم كامل بيجو 301

[hatem_swaf]

بسم الله الرحمن الرحيم

الحمد لله اشتريت عربيه بيجو 301 هاى لاين - لون بترولى


أولا تقرير الشراء :


اشترتها من سمير ريان من عشره ايام وكان قبل ماشتريها بيوم واحد قالى سعرها 136 الف ويوم مارحت ادفع الفلوس قال لى المورد رفع السعر وهى بقت ب 138 الف علشان الشحنه الجديده لسه حاتيجى في يونيو ، فتوكلت على الله واخدتها لانى سالت برضه في اباظه التجمع وكان قايل نفس السعر بس مكنش عنده حاجه في المعرض. ( بعد كده فيه ناس قالولى كنت سالت عليها عند ياسين بس بصراحه انا مكنتش اعرفه )


المهم انا استلمت ورقها بعد أسبوع كامل ( المبايعات والافراج الجمركي و شهاده البيانات)


انت بتاخد مع العربيه :


- غطا علبه الفيوزات


- 4 سره للجنوط حولى 16 غطا حليه للمسامير بتاعه العجل


- استبن


- عده ( كوريك + مفتاح عجله + مفتاح اصفر للمسامير الحليه)


- 2 كتالوج للعربيه عربى وانجليزى


- عدد 2 مفتاح واحد بريموت للسنتر وواحد عادى


- ايريال كاسيت


وده لينك لموضوع واحد من الاعضاء كان كاتبه عن كيفيه استلام العربيه وكيفيه القياده في فتره التليين وفادنى جامد بصراحه

http://www.nilemotors.net/Nile/212403-a.html

ثانيا شكل العربيه :


انا عاجبنى شكلها ولونها بصراحه جميله ودول صور العربيه من بره




















دول صور العربيه من جوه وفيها صور الكاسيت والتابلوه و صوره الشاشه لما بتكون العربيه راجعه للخلف
























وده صوره ذراع التحكم في الصوت والاتصال بالموبايل وشاشه الكاسيت







وده صوره الشنطه هي وسعه جدا بصراحه













وده صوره العجله على فكره الأربع عجلات جنوط 16 ميشلان 195/55/ 16 ولكن الاستبن طاسه ومقاسه 15 جود يير 185/65/15



وفيه شنطه العده كوريك ومفتاح عجله و مفتاح اصفر علشان تربط وتفك رؤوس المسامير الحليه للعجل










ودول صور للموتور




















وده صوره القايم مش مكتوب عليه ضغط العجل يبقى كام ؟؟ في ناس قالتلى 30 وناس قالت 32 انا ضبطه النهارده 30 لحد ما اشوف (طبعا كان 50 من المعرض )







ثالثا تقييمى للعربيه :


احب أوضح الأول ان تقييمى مش حيبقى دقيق لانى كنت راكب لادا وطبعا الوضع اختلف و حاحس كل حاجه انها حلوه اووى وكمان انا مشيت بيها مرتين بس


عموما تقييمى


التكيف جميل جدااا


الفرامل ممتازه


صوت الموتور هادى هو طبعا في صوت بس مش مزعج و ساعات كتيره مش بتحسه هو بيبان وانت بتدور المفتاح في الأول لمده ثوانى ويهدا و لما تيجى تضغط جامد على الدواسه


السحب ممتاز انا كنت طالع مطلع كوبرى وماشى ببطئ وضغطت على الدواسه طلعت الكوبرى بسرعه كأنى كنت ماشى بسرعه وبطلع الكوبرى.


الثبات بصراحه مقدرش أقول حاجه لانى مفتحتش بيها لسه اخر حاجه كانت 90


العفشه كنت بحس بخبطات بسيطه في الحفر بس ده كان لما ضغط العجل 50 بس لما ضبطته 30 لسه مجربتش اوى وان كنت حسيت ان الخبط قل



رابعا ايه مش موجود في العربيه :


طبعا العربيه هي هاى لاين المفروض يكون فيها كل حاجه بس لما قرأت الكتالوج الخاص بيها شوفت فيه الحاجات ده ( اكيد طبعا ده اللى بينزل في أوروبا ) مش في مصر


1- ESP


2- زرار لتدفئه كرسى السائق


3- لمبه في السقف في الجزء الخلفى


4- كمبروسور هواء لنفخ العجل و كمان كبسوله ممكن تصلح العجل المخروم


5- ذراع تحكم كروز في تثبيت السرعه او زيادتها و تقليلها


6- جهاز انذار للسرقه


مش عارف بقى الحاجات ده حتبقى متوفره في التوكيل ولا لا ؟ وياترى أسعارها حتبقى ايه ؟





خامسا الصيانه وقطع الغيار :


انا طلبت كذا فرع بس اتضح ليا ان فرع غمره هو اللى جامد وفيه الصيانه وقطع الغيار وكلمت مهندس هناك وقالى ان اول صيانه مجانيه (مجرد كشف عام على العربيه من غير تغيير اى زيوت او اى حاجه) هي صيانه 2500 كم وأول صيانه فعليه هي 10000 كم وده اللى بيتغير فيها الزيت وفيه صوره لاقيتها في موضوع اخر لشكل الصيانات








اما بخصوص أسعار قطع الغيار


1- أسعار جريده الاهرام


فلتر زيت 49


فلتر بنزين 40


فلتر هواء 50


فلتر تكييف 134


طقم بوجيهات 134


طقم تيل فرامل امامى 430


سير مجموعه 172


طقم كاتينه 482 (كاتينه + 2 بليه )


مرايه جانبيه 624



2- لما اتصلت بفرع غمره عرفت الأسعار التاليه طبعا تزود عليها 10% ضريبه


طقم طنابير خلفى 731


طقم تيل خلفى 551


اكصدام امامى 2231


اكصدام خلفى 1845


كشاف امامى 1274


فانوس خلفى 591


برابريز امامى 998


مساعدين خلفى 241


بوجيه واحد 33



3- كان في موضوع واحد من الاعضاء كان كاتبه فيه بعض الأسعار برضه ممكن يفيدنا

http://www.nilemotors.net/Nile/358950-peugeot-301-a.html

سادسا مميزات العربيه :


انا شايف ان العربيه كلها مميزات


1- سعرها وده اهم حاجه


2- انها تقفيل اسبانى


3- موتورها قوى


4- خاماتها جيده جدا


5- الشاشه والتحكم فيها من كمبيوتر الرحلات و ال USB- AUX – CD والبلوتوث والاتصال بالموبايل


6- قطع غيارها مش غاليه اووى ومعقوله


7- التكيف ممتاز


8- الفرامل ممتازه


9- الشنطه واسعه جدا


10- درج العربيه واسع


11- مرايات كهربا


12- باركنج سينسور للركن من الخلف


13- زرار للتحكم في منع فتح او غلق الزجاج الخلفى من الأطفال للحمايه


14- أخيرا لشكل الانيق ليها



انا لسه مجربتش الثبات ولا استهلاك البنزين



سابعا عيوب العربيه :


انا لسه مقدرش أقول اى عيوب بس فيه نقط ومش عارف اذا كانت عيوب ولا لا


1- المساحات فى اى عربيه لما السايس يمسحها بيرفع المساحات ويمسح الزجاج لكن العربيه ديه المساحات متترفعش لانها بتخبط في غطا الكبوت يدوب ترفعها عشره سم وتنزلها تانى والحل ليها انك بعد لما تبطل العربيه اضغط زرار المساحه تقوم الريش تقف عموديه وتثبت على كده.


2- الجزء الخلفى للعربيه مفيهوش اى طفايه سجاير و لا جراب في الباب احط فيه ورق او حاجه.


3- مفيش مكان مناسب احط فيه الموبايلات في التابلوه


4- مفتاح واحد بس بريموت للسنتر لازم يكونوا اتنين




ثامنا اسئله : للخبراء ولمالكى السياره


1- هو ضغط العجل مفروض كام 30 ولا 32 ؟؟؟


2- لما بتمشى بالعربيه منغير ماتربط الحزام بتفضل تعطى انذار بصوت عالى لحد ما تربط الحزام فهل فيه حل انى أوقف صوت الإنذار ده من غير ما اربط الحزام ؟؟





واخيرا أتمنى من الجميع ان يستفاد من الموضوع واطلب منكم الدعاء لى ان يبارك لى في العربيه و يرزقنى خيرها ويكفينى شرها ان شاء الله



ولو حده عنده سؤال يتفضل يسأل وانا أحاول اجاوبه ان شاء الله

[waleedelpiloot]

الففففففف مبرووك يا باشا
وشكرا جدا على المجهود الرائع دة انا لسة انهارده ان شاء الله قررت هروح ادفع مقدم بكره ان شاء الله الهاى لاين بس مش عارف اختار لوون اية حضرتك شوفت اللون الموكا شكلوا حلو؟؟؟

[hatem_swaf]

الففففففف مبرووك يا باشا
وشكرا جدا على المجهود الرائع دة انا لسة انهارده ان شاء الله قررت هروح ادفع مقدم بكره ان شاء الله الهاى لاين بس مش عارف اختار لوون اية حضرتك شوفت اللون الموكا شكلوا حلو؟؟؟

الله يبارك فيك و ربنا يكرمك
انا شوفت لون الرصاصى و الفيرانى كانوا حلويين وطبعا البترولى لكن الموكا مش عارف
ده رابط للالوان العربيه
مواصفات و أسعار السيارات: سيارة بيجو 301 PEUGEOT

[mohjarr]

ألف مبروك و ربنا يديك خيرها و يكفيك شرها .
ضغط الهواء على 32 و أنا عامله نيتروجين مش هواء عادى ... لسه هأشوف إذا كان ممكن تفصل صفارة الحزام أم لا و أرد عليك لو وصلت لحاجة.

[hossam_elwani]

مبرووووووووووووووك عليك الاسد

يااااه وجه اليوم الى البيجو ترجع تانى فى السوق المصرى من تانى بركاتك يا 504 هههههههه

[الجنرال]

طبعا فى الاول الف مبروك وربنا يديك خيرها ويكفيك شرها ويحفظهالك ان شاء الله

ثانيا احب اشكرك جدا جدا على التقرير الرائع ده .. في حاجات كتيرة وضحتلي وربنا يكرمك ان شاء الله .. خاصة اسعار قطع الغيار

دعواتك بقه احنا كمان نستلم .. بس انا هجيب اختها الستيروين الاليزيه باذن الله

[hatem_swaf]

ألف مبروك و ربنا يديك خيرها و يكفيك شرها .
ضغط الهواء على 32 و أنا عامله نيتروجين مش هواء عادى ... لسه هأشوف إذا كان ممكن تفصل صفارة الحزام أم لا و أرد عليك لو وصلت لحاجة.

الله يبارك فيك و يباركلك فى عربيتك

بس سؤال عرفت ازاى انها 32 مش مكتوب على القايم وانت الوحيد اللى قولت انها 32 مع انى سالت ناس كتير قالولى 30 ؟؟؟

[hatem_swaf]

طبعا فى الاول الف مبروك وربنا يديك خيرها ويكفيك شرها ويحفظهالك ان شاء الله

ثانيا احب اشكرك جدا جدا على التقرير الرائع ده .. في حاجات كتيرة وضحتلي وربنا يكرمك ان شاء الله .. خاصة اسعار قطع الغيار

دعواتك بقه احنا كمان نستلم .. بس انا هجيب اختها الستيروين الاليزيه باذن الله

الله يبارك فيك

وربنا يكرمك ان شاء الله بالعربيه اللى انت عايزها متنساش الاستخاره

على فكره انا ركبت الستيروين الاليزيه والبيجو فى معرض الاتنين نسخه واحده من جوه علشان خط انتاج واحد اختلافات بسيطه اوووى وطبعا الشكل الخارجى مختلفين بس نفس التابلوه والزراير

[mhf_77]

طول عمر بيجو محترمه لما شركه تنزل فى فئه تعتبر اقتصاديه من عربياتها كاوتش ميشلان وبطاريه فارتا يبقى كل شركه تعرف حجمها ومتعشى فى دور الهبل والاوبشن واصل فى زرار بيهرشلى ضهرى مش موجود فى عربيه
تانيه وفى زرار بيزغزغنى لما اكون زعلان وزرار بيقولى بخ وبكام ياعم الزرايير دى - لأ مش غاليه مقربه على الربع مليون - طول ما الاسد الفرنسى لسه بيزأر - كل الخفافيش تتشعلق من رجليها - ومبروك عليك صفقه رابحه ان شاء الله

[hossam_elwani]

انا ليا كام سؤال كده على الماشى

هو لون الطابلوه فيه منه اسود قاتم زى ده








وفيه منه رمادى زى عربيتك ؟؟

وهل فيها مرايات ضم ؟؟

وهل الطابلوه فيه رسمة الاسد اول ما تدور العربيه زى الصوره اعلاه ؟؟ ولو مش موجوده يبقى ليه فيه فرق بين النسخه الى بتنزل مصر والى بتنزل اوروبا ؟؟

الجميل هو التطعيم الاسود تحفه فعلا غير الفئه العاديه خالص

والجميل اكتر هو مسند اليد طويل كفايه انه يكون فعلا مسند مريح اثناء القياده بعكس الكروز عندى لازم ارجع ايدى ورا عشان اسند ايدى عليها وببقى مش مستريح

السلبيه الى لاحظتها هو دخلة الشنطه من تحت عند الكالون اللون بلون العربيه ومعرض للخدش مع دخول وخروج الامتعه وبديل كده فى العربيات التانيه هو وجود كسوه فبر

[zooma2009]

الف مبرووك يا باشا ربنا يباركلك فيها ويكفيك شرها

ياريت بس تقولنا ايه اخبار العفشه بعد مظطت ضغط الكاوتش ... يا تري لسه بتخبط مع الحفر والطرق المكسره؟؟؟

ياريييت تتابعنا بتقريير مفصل عن نعومه العفشه والثبات

[hossam_elwani]

ألف مبروك و ربنا يديك خيرها و يكفيك شرها .
ضغط الهواء على 32 و أنا عامله نيتروجين مش هواء عادى ... لسه هأشوف إذا كان ممكن تفصل صفارة الحزام أم لا و أرد عليك لو وصلت لحاجة.

طيب وعبيته نيتروجين ازاى فك العجل وشقط الهوا من جوه الكاوتش وبعدين عباه نيتروجين ورصص ولا ايه بالزبط ؟؟

[hossam_elwani]

طيب وعبيته نيتروجين ازاى فك العجل وشفط الهوا من جوه الكاوتش وبعدين عباه نيتروجين ورصص ولا ايه بالزبط ؟؟

[hatem_swaf]

انا ليا كام سؤال كده على الماشى

هو لون الطابلوه فيه منه اسود قاتم زى ده






وفيه منه رمادى زى عربيتك ؟؟

وهل فيها مرايات ضم ؟؟

وهل الطابلوه فيه رسمة الاسد اول ما تدور العربيه زى الصوره اعلاه ؟؟ ولو مش موجوده يبقى ليه فيه فرق بين النسخه الى بتنزل مصر والى بتنزل اوروبا ؟؟

الجميل هو التطعيم الاسود تحفه فعلا غير الفئه العاديه خالص

والجميل اكتر هو مسند اليد طويل كفايه انه يكون فعلا مسند مريح اثناء القياده بعكس الكروز عندى لازم ارجع ايدى ورا عشان اسند ايدى عليها وببقى مش مستريح

السلبيه الى لاحظتها هو دخلة الشنطه من تحت عند الكالون اللون بلون العربيه ومعرض للخدش مع دخول وخروج الامتعه وبديل كده فى العربيات التانيه هو وجود كسوه فبر

1- انا كل اللى شوفته كان رمادى بس ممكن حد من الاشترى يفيدنا اذا كان فى فرش اسود ولا لا

2- مفيش مرايات ضم
3- مفيش رسمه الاسد برضه فى الكتالوج حاجات كتيره مش موجوده فى العربيه واضح ان موديل اللى بينزل فى اوروبا مختلف كتيير عن اللى بينزل مصر

4- فعلا مسند اليد للسائق مريح جدا

5- ممكن يكون عندك حق فى مدخل الشنطه


ممكن انا بقى اسألك سؤال ازاى خليت الصوره تظهر كده مع انى غلبت و معرفتش مع انى حملتهم على الموقع الاول ؟؟؟؟

وشكرا لمرورك

[aboamina]

الله يبارك فيك و يباركلك فى عربيتك

بس سؤال عرفت ازاى انها 32 مش مكتوب على القايم وانت الوحيد اللى قولت انها 32 مع انى سالت ناس كتير قالولى 30 ؟؟؟

عشان تظبط الكاوتش على 30 يبقى تظبط المقاس على 32 عشان في 2بار بيكونوا في الخرطوم...