تحذير بيجو 301...كارثة على الطريق

[MemO_KinG]

بسم الله الرحمن الرحيم و السلام عليكم

بجد أنا بدعى ربنا ان ماحدش يتعرض للموقف اللى انا اتعرضتله

بإختصار ضغطت فرامل و العربية لم تستجيب إطلاقاً

الحكاية...:
انا كنت متردد ما بين شراء اكتر من نوع بالقسط و كنت ناوى اجيب عربية سواء كروز او مازدا 3 او النترا او شارك

بس لما حسبتها و لقيت ان القسط هايبقى عالى اوى قلت اجيب بيجو 301 امشى نفسى بيها سنة او اتنين لحد ماقدر اجيب حاجة عالية

المهم استلمت العربية من معرض الليثى بمدينة نصر و عشان قسط فا متأمن عليها تأمين شامل غير الضمان

و عما رخصت و كده عملت بالعربية حوالى 210 كيلو و كنت معجب جداً بأدائها و مناوراتها و استجابة الفرامل على الطريق

"ملحوظة العربية مانيوال"

المهم نيجى للقصة بقى....:
اخدت زوجتى و اخواتى البنات و رايح اتفسح فى مدينة الشيخ زايد و قضينا يوم جميل و العربية ماخذلتنيش ابدا و انا رايح
و خلصنا فسحتنا و ركبنا و راجع الجيزة و اخترت طريق اسكندرية الصحراوى المتجه للرماية

دخلت نفق حازم حسن و كنت ماشى على سرعة 70 كيلو و لقيت مطب من بعيد و قدامى عربية رينو لوجان

بدأت اضغط ببطء على الفرامل فحسيت ان العربية على سرعتها و مابتقلش
زودت الضغط لقيت نفسى قربت جداً من المطب و لقيت انى هالبس فى اللوجان

قمت كابس فرامل على الآخر لقيت العربية رعشت جامد زى الفايبريشن و لم تهدأ السرعة إطلاقاً قمت كاسر شمال جنب الرصيف و لسوء الحظ بتاع اللوجان اللى قدامى راح كاسر شمال معايا
قمت لابس فيه

اول حاجة نزلت ابص على عربيته لاقيته بسم الله ما شاء الله عربيته ماتخربشتش خربوش الا ان الاكصدام الخلفى بتاعه من الجانب اليمين الشفة بتاعته خرجت حوالى 4 سم من مكانها

بصيت على عربيتى و لقيت الآتى.....
الكبوت اتطبق من قدام لجوا حوالى 10 سم
الشبكة الامامية اتعوجت جامد
الفانوس الشمال اتكسر من الخلف انما من قدام سليم و الفانوس التانى سليم
الرفرفين اتعوجو عوجة بسيطة جداً من الاطراف و الاكصدام سليم
ده بالنسبة من بره
من جوه بقى ماعرفتش افتح الكبوت لانه اتحشر جامد بس مبدئيا مياه الريدياتير كلها وقعت عالأرض و معرفش ايه تانى هكتشفه فى التوكيل

المهم انا طبعا ماينفعش امشى بالعربية عشان كده الريدياتير فاضى فا كلمت ونش جالى و نقلنى على توكيل بيجو ابو رواش

و كلمت المعرض و مندوب البنك و بعض الاصدقاء و مخوفنى من جزئية انى اقدر اثبت ان الغلطة مش غلطتى عشان التأمين يتكفل بالموضوع

و لسه الصبح بإذن الله هروح الساعة 8 قبل ما المهندس يروح عشان مايحصلش اى تلاعب و عشان اشوف التقرير هيقول ايه

انا بصراحة مش عارف اعمل ايه و بغض النظر عن اى شئ بس انا بقيت خايف اركب العربية دى تانى عشان انا سفرى كتير عالزراعى و خايف يتكرر موقف زى ده ممكن يبقى مؤذى او مميت

لأن صعب جداً واحد يركب عربية و يتخيل انه ممكن يدوس على الفرامل و العربية ماتستجيبش خصوصا انها عربية زيرو

ياريت كل ملاك العربية دى يحذروا من الموقف ده جيداً و يكشفوا على عربياتهم عشان لا قدر الله مايحصلش لحد غيرى

و ياريت لو حد يتفهم موضوعى ده و ينصحنى لو عنده خبرة بالوكلاء و التأمين لانى لاول مرة بركب عربية زيرو و متأمن عليها و لاول مرة بصلح فى توكيل انما انا بسوق بقالى اكتر من 10 سنين بس كنت دايما بجيب عربيات مستعملة و بصلح عادى عند اى ميكانيكى و الحمد لله لم يقابلنى اى موقف صعب زى ده

بجد احذروا جيداً من العربية

و انا ان شاء الله بكره هوافيكم بالمعلومات الجديدة من التوكيل و هصورلكم العربية و هنزل الصور عشان الكل يعرف الموضوع كويس

و ان كانت بسيطة المرة دى ممكن تواجه شخص آخر و لكن بكارثة ممكن تسبب أذى قوى جداً

أسف على الإطالة و شكراً

[Adnfalcon]

يا ساتر يارب .. تجربه صعبه جدا
هي فيها مشكله تيل فرامل اصلا والتوكيل يسأل عنه وعن اللي حصل دا
و الايرباج طلعوا ؟

[MemO_KinG]

هى العربية كانت طالعة من مطلع بسيط من النفق و السرعة مكانتش قاسية لدرجة ان الايرباج يطلع

بس لو فعلا تيل الفرامل ده فيه مشكلة يبقى ازاى العربية نزلت 2013 و 2014 و 2015 و تقفيل اسبانى و مش عارفين يعالجو المشكلة دى

غير انى عندى الحاجة اللى عند معظم الناس اللى هى غطاء الكنترول مش موجود

فا ده قمة الإستهزاء بالعملاء و خاصة المصريين

امال ليه بنعيب فى العربيات التقفيل المصرى...ربنا ينتقم من كل ظالم

بجد يارب ماحدش يتحط فى الموقف اللى انا اتحطيت فيه ده

[J A G U A R]

قدر الله ما شاء فعل وحمد لله على السلامه

الموقف ده فعلا يخلى الواحد يخاف يجرى بالعربيه عن ال60 بس كان ممكن تدى للعربيه التانى كانت ممكن تكلبش العربيه بس الحمد لله بردو وطبيعى ان الخبطه تعمل كده علشان الاكصدام مش بارز واى خبطه بتدخل على الكبوت والفوانيس والشبكه .. بس ربنا يعينك وابقى طمنا

[gehadkilany]

حمد الله عالسلامة. قدر الله و ما شاء فعل

[Adnfalcon]

فعلا تيل الفرامل بيخلص بسرعه رهيبه والناس بتسمع صفارته وفي ناس كتير اشتكت منه وعملوا مشاكل فالتوكيل واتفضل شوف دا كده

https://www.nilemotors.net/Nile/427040-2014-2.html

الحمدلله انك بخير انت والاسره و موقف فعلا صعب جدا جدا انا حاسس بيك كفايه ان معاك اهلك مش لوحدك بس كان مفروض تشد الهاند بريك

[ashouhdy]

الف سلامة عليك و قدر ولطف

دائما الاكصدام الخلفي محمل عن الامامى واقوى

موضوع الفيبريشن دة دة ال abs وطالما عملت كدة يبقي الفرامل اشتغلت في اخر لحظة ... لأن سرعة 60 في حادث مدمرة جامد عن وصفك

الحمد لله

[MemO_KinG]

انا بشكركم يا جماعة عالتفاعل و انا للأسف عشان لأول مرة بواجه موقف زى ده و بالنسبالى غريب جداً فا عقلى هرب منى كل اللى فكرت فيه انى افضل اضغط فرامل و الحمد لله ان مافيش اصابات بشرية بس دى كارثة مايتسكتش عليها خصوصا من شركة عريقة زى دى مش عشان العربية سعرها رخيص تبقى بالسوء ده

[Adnfalcon]

الف سلامة عليك و قدر ولطف

دائما الاكصدام الخلفي محمل عن الامامى واقوى

موضوع الفيبريشن دة دة ال abs وطالما عملت كدة يبقي الفرامل اشتغلت في اخر لحظة ... لأن سرعة 60 في حادث مدمرة جامد عن وصفك

الحمد لله

انا شاكك ان التيل كان جاب اخره بدليل انه فضل يدوس فرامل كتير لحد ما abs اشتغل

[ashouhdy]

انا شاكك ان التيل كان جاب اخره بدليل انه فضل يدوس فرامل كتير لحد ما abs اشتغل

الراجل عامل 270كيلو بالعربية ... مستحيل يكون خلص ... ممكن تكون دايرة الفرامل واخدة هوا جامد عشان كدة البدال وقع في الارض و ممسكتش غير لما كبس جامد

[Adnfalcon]

الراجل عامل 270كيلو بالعربية ... مستحيل يكون خلص ... ممكن تكون دايرة الفرامل واخدة هوا جامد عشان كدة البدال وقع في الارض و ممسكتش غير لما كبس جامد

مش عارف !!! حوار غريب فعلا

[amoor89]

الراجل عامل 270كيلو بالعربية ... مستحيل يكون خلص ... ممكن تكون دايرة الفرامل واخدة هوا جامد عشان كدة البدال وقع في الارض و ممسكتش غير لما كبس جامد

نفس التفسير اللى جه فى بالى بس برده فى نفس الوقت دى تعتبر كارثة بكل المقاييس ازاى يحصل كده فى عربية زيرو ومش من اى شركة ده الصينى مبيحصلش فيه كده
بجد ربنا يكون فى عون صاحب الموضوع وقدر الله وماشاء فعل

[MemO_KinG]

هو بغض النظر عن التفسيرات و الإرتجال فى الموضوع بكره بإذن الله هوافيكم بتقرير المهندس و اى جديد هيتم هعرضه هنا فى المنتدى

الفكرة هنا ان قمة الكارثة انك تضغط فرامل و العربية ماتستجيبش
ده قمة التخلف و الإستهانة و بجد احنا كملاك العربية دى لو ماتحدناش و اخدنا موقف الخساير هتزداد و لا قدر الله ممكن تيجى فى روح انسان
لازم نجبر الشركة دى على احترام المصريين سواء كشركة فرنسية او الوكيل
لازم يكون فى موقف صارم جداً

[Adnfalcon]

هو بغض النظر عن التفسيرات و الإرتجال فى الموضوع بكره بإذن الله هوافيكم بتقرير المهندس و اى جديد هيتم هعرضه هنا فى المنتدى

الفكرة هنا ان قمة الكارثة انك تضغط فرامل و العربية ماتستجيبش
ده قمة التخلف و الإستهانة و بجد احنا كملاك العربية دى لو ماتحدناش و اخدنا موقف الخساير هتزداد و لا قدر الله ممكن تيجى فى روح انسان
لازم نجبر الشركة دى على احترام المصريين سواء كشركة فرنسية او الوكيل
لازم يكون فى موقف صارم جداً

عندك حق طبعا وربنا معاك بكره بإذن الله

[Ashraf Fawzy]

أولاً ألف حمد لله على سلامتك و سلامة الأسرة

طبعاً حاجه زى دى مافيش سكوت عليها لو فى أى مشكلة فى العربية ناتجه عن عيب صناعة - وده شئ وارد الحدوث فى أى سيارة أياً كان ماركتها - لكن المهم إنك تقدر تثبت كده عشان تاخد حقك, ياترى عملت محضر بالواقعة عشان التأمين و معاك بيانات صاحب الرينو اللى خبطت فيه.

طبعاً التوكيل هايحاول بكل طاقته يرمى المسؤلية عليك - دى طبيعة التوكيلات عموماً و فى مصر خصوصاً - فطالما إنك متأكد من كل اللى إنت قولته, يبقى تصر على موقفك و تعمل محضر بالواقعة و يوصل الأمر لجهاز حماية حقوق المستهلك و النيابة.

* حذارى إنهم يركبوك الغلط و يستفزوك و يخلوك تتطاول عليهم, و إلا حقك ممكن يضيع.


فى التوكيل هايتعامل معاك بكل ثقة إن الغلطة غلطتك بصورة أو بأخرى, و مش هايرضى يعملك تقرير فنى و يقولك عايز تقرير إنزل صلاح سالم و إتصل إشتكى بـ 19207 و هايسيبك تزعق و تنفعل لغاية ماتقبل بالأمر الواقع و يعملك تخفيض فى تكاليف الإصلاح, قال إيه حركة جدعنه منه.

إنزل بكره معاك حد معاه عربية, وإتصل بشركة بيجو على 19207 و قدم شكوى بالواقعة و قولهم إنك عايز تقرير فنى بحالة الفرامل و أجزاء الفرامل (ده بعد ما هايرفضوا فى المركز يعملولك تقرير), و تخليك معاهم فى الورشه و على إيديهم, يفضل يبقى معاك أكتر من واحد عشان حد يفضل فى التوكيل و عينه على عربيتك عشان لو الأمر إستدعى إنك تروح تعمل محضر فى القسم لرفض التوكيل عمل تقرير فنى.

حاول ماتنفعلش كتير, أطلب تقرير, قالك مافيش تقرير, قله عايز أقابل مدير المركز - المهندس ماهر - هايقابلك و يقولك مافيش تقرير و عليك و على 19207 و صلاح سالم, بكل هدوء قوله و أنا طالع أعمل محضر فى القسم, هايعملوا نفسهم كلهم ثقة, ولا يهمك و لا تضايق نفسك, أطلع إعمل محضر برفض تقديم تقرير فنى, ويفضل يبقى معاك رقم المحضر اللى عملته لما خبطت فى الرينو.

و أطلع على جهاز حماية حقوق المستهلك - فى القرية الذكية جنب أبو رواش على طول - و قدم شكوى فيهم.

خلاصة الكلام, لو إنت فعلاً على حق, ماتسيبش حقك, و ماتزهقش, ومايغركش الثقة الكدابة اللى على باطل.

طبعاً مستنين منك الصور و البيانات أول بأول, و خلى حد من اللى رايحين معاك يصور حديثك معاهم بالموبايل عشان يبقى دليل إثبات لو رفضوا يقدموا تقرير فنى بسبب المشكلة.

الحمد لله إن ربنا سترها عليك, و ربنا يوفقك فى مسعاك و إحنا معاك طالما إنت على حق.


ممنوع الكتابة باللون الأحمر حيث أنه مخصص للمداخلات الإدارية
اذا تكررت المخالفة ستعامل المشاركة بالحذف دون تعديل او تنبيه

مشرف ساحة الأوروبي 1أ
19/6/2014 1:53م