تحذير بيجو 301...كارثة على الطريق

[MemO_KinG]

يا جماعة انا كتبت الموضوع على جروب بيجو 301 فانز زى ما قالى استاذ اشرف و نقلت موضوعى ده هناك و جالى ردود كتير منهم الرد ده

Mohamed Hosni
حصل معايا نفس الموضوع ده بس الحمد الله كنت في الجراج ولسه بطلع بالعربية لاقيت الفرامل مش شغالة رفعت الهاند بريك وكانت فعلا العربية بتترجرج بشكل غريب قفلتها وفتحتها ثانى نفس الموال استنيت شويه وكل حاجة رجعت سليمة ورحت التوكيل حاطها على جهاز كشف الأعطال مافيش حاجة خالص ؟
-------------------------------------

الحمد لله ظهر الحق و دى حالة تانية و بالتالى احنا الاتنين معرضين لخطر شديد لمجرد ركوب السيارة و المشى بيها حتى لو على اقل سرعة فى الزحمة هتكون كارثة

انا فاكر فى يوم نجيت من الموت بأعجوبة كان واحد راكب عربية مش متذكر اسمها بس تقريبا مش بيجو و برضه حصل معاه نفس الموقف انا كنت ماشى على رجلى فجأة لقيت واحد على سرعة عالية جاى من بعيد و خبط فى حوالى 5 عربيات و موتوسيكل و اللى وقفه انه خبط فى عربية راكنة اتدمرت تماما من الخلف

و الراجل كان يا عينى هو و مراته فى موقف فى قمة الصعوبة خصوصا ان عربيته اتدمرت من الامام

دى كوارث و بجد احنا ضحايا

مش عايز احس بتخاذل من ملاك العربية عشان الدور جاى عليك

[Adnfalcon]

انت لسه مروحتش التوكيل ؟؟

[MemO_KinG]

ماهو انا روحت للتوكيل يا باشا باختصار لقيت العربية مش فى وضعها اللى ركنتها عليه و الدركسيون متكيس هو و الكرسى و الازاز مفتوح و المهندس واقف قصادها و كان بتوع الامن بلغوه بمشكلة العربية و سبب تأخرى كان زحام شديد بعد نزلة الدائرى المتجه لأكتوبر خصوصا اللجان الكتير اللى شغاله على ودنه

و كل كلامهم ان الغلطة غلطتى و انى كنت سرحان و انى كنت متهور و انى مش عارف ايه طبعاً باسلوب معاملة مستفز جداً و كلامهم بكل ثقة انى انا اللى غلطان

و فى الاخر نصحنى الراجل اللى ربنا ينتقم منه انى اروح القسم اعمل محضر عشان ارمى المشكلة عالتأمين

و بالتالى تبقى المشكلة الاساسية كما هى و ان الفرامل بتاعة العربية ليست ذات ثقة و مسيرها هتقضى على حياة انسان او اكتر بالشكل ده

[Adnfalcon]

طيب انا دمي بيغلي دلوقتي
يعني ايه غلطتك !! اطلع ع حمايه المستهلك مش القسم
و ابعت لفرنسا ضروري

[MemO_KinG]

ماهو ده اللى هيتم بس انا قررت الآتى.....

أول حاجة هروح اثبت محضر فى القسم و هخليهم يعاينو العربية
تانى حاجة هروح بكره مركز تكنو وان اللى فى دار السلام اكشف عالعربية بالكامل و اعرف المشكلة

و بنائاً على تقرير المركز هتصرف سواء بمقاضاة الشركة او باللجوء للتأمين أو اى خيارات بديلة

و برضه هوافيكم بكل جديد

[Adnfalcon]

ماهو ده اللى هيتم بس انا قررت الآتى.....

أول حاجة هروح اثبت محضر فى القسم و هخليهم يعاينو العربية
تانى حاجة هروح بكره مركز تكنو وان اللى فى دار السلام اكشف عالعربية بالكامل و اعرف المشكلة

و بنائاً على تقرير المركز هتصرف سواء بمقاضاة الشركة او باللجوء للتأمين أو اى خيارات بديلة

و برضه هوافيكم بكل جديد

ربنا معاك .. مستني النتيجه

[SYD]

لا يا سعادة الباشا اللى حصل كالآتى

انى نزلت نفق حازم حسن و طالع من النفق و انا على سرعة لا تتجاوز ال90 و شايف المطب من على بعد و شلت رجلى من البنزين و العربية هديت لحد سرعة 60 كان المفروض لو الفرامل سليمة ان العربية تقف بكل سهولة و على فكرة لو مكانش فى مطب يجبر اللى قدامى على الوقوف انا ماكنتش هخبط فيه اطلاقا عشان المسافة بينى و بينه كبيرة و سرعتى مش عالية و اكبر دليل على ان السرعة مش عالية ان الخساير مش قوية اوى و اكبر دليل انى ضغطت فرامل هو رعشة الabs و بالرغم من كده العربية واخدة سرعتها تماما بدون اى وقوف برغم انى لما لقيت مصيرى انى هلبس قمت ضاغط عالآخر و اعتقد انك لو راكب عربية خنفسة و ضغطت عالاخر عالسرعة دى كنت هتقف

انما دى مشكلة فى العربية بل كارثة

و انا لا احمل نفسى اى لوم اطلاقا سوى انى مااحسنتش التصرف بانى استخدم هاندبريك او انقل سرعة اقل

غير كده انا كنت فى منتهى التركيز و قمة الانضباط و انا لو غلطان كنت هروح اى قسم و اقول حد خبطنى و جرى و ماكنتش هعمل قصة

و مايهمنيش اصلا العربية كلها فى داهية بس فى نظرى ان تسيب الفرامل ده كارثة و لو اتكرر عالطريق السريع او فى موقف اصعب هتبقى الخساير اكبر ممكن تودى بحياة انسان

الرد الجاى هيكون فيه موقفى مع الوكيل الصبح هرفعلكم صور

يا أستاذي انت ليه متحامل عليا وبتكلمني بالأسلوب دة؟
انا مقدر حالتك النفسية طبعاً وانك مش متحمل كلمة من حد
بس انا كلامي المقصود منه هو نفس الغرض من موضوعك وهو تحذير الناس
انت عايز عربيتك تتصلح ولا عايز تحل مشكلة ؟؟
انا عارف انك طبعاً عايز تحل مشكلة بدليل انك ذكرت انك مستعد تصلحها برة الوكيل علي حسابك بس اهم نقطة انك تحل مشكلة الفرامل
للأسف الشديد الفرامل ليها مكونات كثيرة جداً وخصوصاً بعد التطور اللي حصل ودخول اكثر من حساس في الموضوع
طبعاً دي مش مشكلة تيل علي الأطلاق
دي وارد تكون عيب في اي حساس من حساسات العجل او الabs او دورة الزيت او السيرفو او المستر العمومي او احد مساتر العجل او احد خراطيم العجل او المواسير العمومية او او او
ومش شرط اكمنها علقت مرة انها تعلق تاني - وفي نفس الوقت وارد انها لو علقت مرة انها تعلق تاني وثالث
احنا ماشيين علي طريق وفي الأول والأخر مش الفرامل هيا اللي بتنجينا - ربنا بستره هو القادر علي حمايتنا - وايضاً لو ربنا قدر لنا شئ فلا مفر من القدر

أكشف علي عربيتك كويس اوي وفي اكثر من مركز صيانة
وقبل ما تتحرك بالعربية قول دعاء ركوب الدابة وادعي ربنا يوصلك بالسلامة
اقصد اعمل اللي عليك والستر في الأول والأخر دة بتاع ربنا

تحياتي ليك

والله المستعان
،
،

[MemO_KinG]

شوف يا فندم انا مش شايف فى ردى عليك اى تحامل او اسلوب لا يليق او تقليل من مقدار حضرتك ولا حتى فيه حالة نفسية

بخصوص تبرير حضرتك للمشكلة و موضوع الحساسات ده هل حضرتك شايف ان ده رد منطقى؟؟؟

يعنى لما بنى ادم يدوس فرامل على سرعة عالية و يلبس فى اى شئ و يصاب بعاهة او يتوفى ساعتها نقول اصل العربية ماليانة حساسات؟؟!!!!

[MemO_KinG]

شوفو انا هقول كلمة اخيرة فى الموضوع ده

انا قضيتى مش قضية عربية اتخبطت

انا قضيتى قضية حياة ناس على المحك راكبين آلة تقودهم للهلاك

و هحارب عشانها بكل أنواع الوسائل و السبل حتى لو هخسر اكتر من تمن حل المشاكل اللى فى العربية

و اللى مش هيدعمنى عشان نحصل على معاملة كريمة و احترام سواء لأى مشكلة صغيرة او كبيرة مايجيش يشتكى بعد كده من سوء الوكيل او من سوء الصناعة

انا هحارب لوحدى و قسماً بالله مش هسكت ابدا و بكره الايام هتثبت انا هعمل ايه

و كلمة اخيرة

اللى يجرب موقفى
هيعمل اكتر منى

[mohamed_fatouh]

ربنا معاك...والله غالب

[mohamed_fatouh]

انا كنت ناوى ابيع اللوجان بتاعتى و اجيب بيجو...انا هنزل دلوقت ابوس العجل بتاعها لانها و الفضل لله اولا عمرها ما عملت حركات النقص دى..احساس رهيب و مرعب انك تركب انت وولادك عربيه خايف منه و متوقع منها الاسوأ. رنبا يستها معانا جميعا...ربنا معاك...و قل اللهم اجرنى فى مصيبتى و اخلفنى خيرا منها.

[SYD]

شوف يا فندم انا مش شايف فى ردى عليك اى تحامل او اسلوب لا يليق او تقليل من مقدار حضرتك ولا حتى فيه حالة نفسية

بخصوص تبرير حضرتك للمشكلة و موضوع الحساسات ده هل حضرتك شايف ان ده رد منطقى؟؟؟

يعنى لما بنى ادم يدوس فرامل على سرعة عالية و يلبس فى اى شئ و يصاب بعاهة او يتوفى ساعتها نقول اصل العربية ماليانة حساسات؟؟!!!!

أولا انا مش زعلان منك ومفيش اي حاجة - احنا هنا أخوات وبنقف جمب بعض في وقت الضيق
ولما بيكون حد عنده مشكلة كلنا بنلتف حوله وبنحاول نحلها معاه

ثانياً انا مش ببرر والله
لأني مش مستفيد اي شئ - بالعكس انا قولت لحضرتك اني متعاطف جداً معاك 0 اولا لأن عربيتك لسة علي الزيرو تقريباً - ثانياً لأنك تعرضت لموقف وانت معاك اسرتك والحمدلله جت سليمة
وخايف من تكرار الموقف بشكل أفظع

انا كل ماهو نالك بحاول احلل معاك اللي حصل - وردي الأول عليك ماكنش فيه اي اتهام ليك بعدم الخبرة او اني بدافع عن السيارة وانها تعمل بحالة جيدة
بالعكس
انا كل كلامي كان بغرض انك تهدئ من روعك وتفكر بشكل منطقي في الأسباب والمسببات
ولو ليك حق تاخده - مالكش حق يبقي هتصلح عربيتك وتعيش حياتك بشكل طبيعي
لأنك لو فضلت خايف من العربية فأنت مش هتركبها مرة تانية

انا شخصياً عملت حادثتين بعربيتي الحالية
ويعلم ربنا كم الألم النفسي اللي كنت عايش فيه - مش لمجرد ان عربيتي اتعجنت وتقريباً غيرت فيها كل حاجة - بس لأني اتعملي قضية ونيابة وحجز وبهدلة وزاد الطين بلة كمان السمكري معدوم الضمير اللي اتعاملت معاه وهو نفسه كان تاجر قطع الغيار اللي كنت بشتري منه
وقفلني من عربيتي لدرجة خلتني افكر في بيعها واني مش عايز اركبها مرة تانية

ومش هكدب عليك واقولك الدنيا كانت حلوة معايا
بالعكس انا فضلت ماشي مقلق من العربية وخايف امشي اكتر من 50
لكن بعد فترة لما صلحت عربيتي ووقفتها علي رجلها مرة تانية
رجعتلي الثقة فيها وفي نفسي

ومشيت بيها تاني وعملت حادثة تاني وصلحتها تاني
ومازلت بحبها وبثق فيها وبأمن علي اسرتي وهي راكبة معايا
لأن الضربة اللي ماتكسرش الضهر بتقويه

مش معني اني عملت حادثتين ان العربية وحشة
بالعكس دة اثبتلي كفاءة العربية
الحمدلله بفضل الله وارجع واقولك ان في الأول والأخر كله قضاء ربنا وان ربنا هو اللي نجاني مش كفاءة عربيتي
لكن لو هناخد بالأسباب - فعربيتي بفضل الله عربية محترمة أثق فيها وبحبها وأأمن علي أسرتي وهي راكبة معايا فيها

ودة اللي انا عايز اقولهولك واوصلهولك من اول مشاركة وتاني مشاركة

انا ماليش دعوة ترفع قضية علي بيجو او تقفل الشركة وتسحب الوكالة من الوكيل بتاعها
انا بتكلم معاك عشانك انت
عشان ارجعلك ثقتك في عربيتك
احتمال الفرامل يكون فيها مشاكل - وان شاء الله تتحل
واحتمال مايكونش في مشكلة اصلاً - وبالتالي لازم اتعايش مع العربية وارجع اثق فيها مرة تانية

لو مش مقتنع بالكلام دة 0 بردو مفيش مشكلة - بيع بيجو وهات اي عربية تانية مشهود لها بالكفاءة

بس احب اقولك مفيش عربية مش بتعمل حادثة - ومفيش حد فينا ماعملش حادثة - ربنا يستر طريقنا جميعاً
والدليل علي كدة حادثة بول والكر اللي اتعملت بعربية بورش
ديانا بعربية مرسيدس

قبل اي تصرف انصحك تاخد يومين تريح فيهم نفسك من اي تفكير عشان تقدر تتصرف بحكمة وتتصرف صح
بعدها تشوف هتصلحها ولا هتعمل قضية ولا حماية مستهلك ولا هتتصل بفرنسا

ربنا معاك ويقدرك ويوفقك للصواب ان شاء الله

تحياتي ليك

[MemO_KinG]

انا متفهم كلام حضرتك يا استاذى الفاضل
انا كل ما فى الامر انى عايز حضرتك تتخيل لما تبقى ضاغط فرامل على الاخر
و فى مسافة بينك و بين اللى قدامك مثلا حوالى 40 متر و العربية بتاعتك تلبس فيه يبقى ده ايه؟؟؟
ده بالنسبة للفرامل طب و بالنسبة للصاج؟؟!!
هل اتعملها اختبار تصادم؟؟
طيب لو لا قدر الله حد غيرى عمل حادثة مثلا الصاج يبقى شكولاتة كده؟؟
طيب بلاش دى انا هسئل حضرتك سؤال و اكيد حضرتك سواق محترف مش مبتدئ

لما تبقى طالع من نفق دائر و ليس مستقيم و امامك مطب على بعد 200 متر ممكن تسرح بالنسبة كأساسيات قيادة او ان الخطأ يكون بأى شكل سهو او غلط منك؟؟

خصوصا ان كشافات العربية دى انا بشهدلها بكفائة عظيمة لدرجة انى لما كنت بشغل العالى و بخلى النور يمتد للأمام كان ناس كتير بتشاورلى عشان اقفل العالى و اشغل الواطى و بالتالى مافيش رملة على الارض الا و شايفها

غير كده انا عشان عربية لسه مرخصها يوم بقالها معايا اسبوع فا بتعامل معاها بقمة التركيز عشان اخد عليها كويس جداً و على مقاساتها

تعرف يا باشا انا كان معايا نوبيرا ماقولكش انى كنت بعاملها زى الكلبة والله

بصراحة كنت بهين العربية دى جداً برغم انها ماشهدتش لها بموقف واحد خذلتنى فيه لولا انى كنت راكنها فى يوم لاقيت عيال بيحدفو طوب على شجرة توت فا طوبة كبيرة كسرتلى الازاز

انا بتكلم عنا عن فرامل عربية زيرو ماشية 210 متر لم تستجيب اطلاقا للضغط و الايه بى اس ييرعش العربية و تفضل على سرعتها

و انا معايا حريم و الساعة 11 بالليل على طريق صحراوى مقطوع يعنى مستحيل ينقطع تركيزى لحظة عن الطريق
و لما حصل الموقف ده انا كنت فى قمة الرعب عالناس اللى معايا مش على العربية

و لحد دلوقتى مشكلتى مش العربية انا عندى استعداد اكسر الضمان و اصلحها بنفسى ماعنديش مشكلة فى التكلفة بس طبعا مش هروح اصلح فى التوكيل الحرامية من جيبى

بس مشكلتى ان الكارثة دى تحصل مع حد لا قدر الله ماشى على سرعة 120 مثلا و على طريق متعرج ممكن يفقد التركيز لما يلاقى الفرامل سابت و ساعتها هنقول عليه يا رحمن يا رحيم

و على فكرة يا باشا انا جالى رد فى الجروب على الفيس من شخص قالى انا العربية عملت معايا نفس موقفك بالظبط بس اللى انقذه انه كان لسه بيحاول يطلع من الجراج فا لحق نفسه بسرعة و ساب العربية ساعتين رجع لقاها اتعدلت و راح الوكيل قاله عربيتك سليمة

عشان كده لازم اخد اجرائات قانونية ضد العربية دى و كنت اتمنى ملاكها اللى بيشتكوا يتحدوا عشان نحصل على خدمة افضل و اعطاء كل ذى حق حقه

ده كل هدفى انما انا ماليش اى هدف تانى بخصوص اى تعويض او غيره و الا كنت هكدب و اعمل محضر بانى اتخبطت و ادفع يا تأمين و بخ على كده

و اسوق العربية بعد ما ترجع سليمة و يحصل الموقف تانى بس ساعتها التأمين بقى هيصرف تكاليف الجبس لذراعى و رقبتى

[SYD]

يا سيدي الفاضل انا متصور كل كلامك والله وحافظ المطب اللي حضرتك بتتكلم فيه دة عن ظهر قلب ومشيت علي الطريق دة مئات المرات (بجد مش مبالغة)
والمطب دة بالذات مرات كتير البسه بسبب قصور العربية الذاتي اللي مهما تدوس فرامل بردو العربية بتفضل ماشية وبتقاوم الفرامل لأن بجد المنحدر شديد
عارف حضرتك قبل ما يعملوا النفق والمطبات والكلام دة - العربية لما كنت امورها في الحتة دي كنت بمشي مسافة ال2 وال3 كيلو علي سرعة تتراوح بين 100 و 110 - طبعاً الكلام دة من اكتر من 12 سنة فهل حضرتك متخيل قدر انحدار الطريق ؟؟؟
وعلي النقيض - لو انت ماشي الناحية التانية واتجاهك للأسكندرية - بفضل أعزق بالعربية عشان اوصل لل80

حضرتك انا خبرة 3 حوادث - مرتين بعربيتي الحالية ومرة سابقة بالعربية السابقة

ياما دوسنا علي الفرامل ومالقتهاش تحت رجلي - واما بسبب مقنع او من غير سبب
اخر حادثة كانت لنفس السبب بتاعك
داخل ملف صلاح سالم اللي بعد حديقة الأزهر ونازل علي السيدة عائشة
الحتة دي منحدرة بردو وفجأة العربية اللي قدامي تقف
مسكت فرامل جامد جداً ومع ذلك لبست فيه والموقف اتكرر مع اللي ورايا ولبس فيا من ورا وعملني سندوتش فول

انا مش بقول كدة عشان اسقط عنك حقك في مقاضاة الشركة او الضغط عليهم للحصول علي افضل مستوي خدمة او ببرر للعربية
بس عايز اقولك ان كل شئ وارد
ومش معني ان العربية مرة مامسكتش فرامل انها هتفضل طول عمرها فراملها سايبة
ولكنها مرة واحدة وارد جداً الزيت يهرب والماستر مايحضرش تحت رجلك - وبعدها بثانية لو جربت تفرمل هتلاقي الفرامل معاك زي الحديد

حقك مفيش شك انك تعمل معاهم مشكلة بسبب ان الفرامل ما مسكتش وكل كلامي السابق مش مبرر ليهم (مبرر ليك انت عشان تقتنع بعربيتك) ولو هما قالوه مش مبرر ليهم طبعاً
مفيش حاجة اسمها عربية زيرو فراملها ماتحضرش او تهرب لثانية
انا كلامي السابق علي عربيات عدي عليها علي الأقل 10 سنين

في النهاية عايز اقولك اكشف علي الفرامل الأول قبل اي شئ
لو لقيت فيها مشكلة - يبقي حقك تعمل ما بدا لك وتبقي كارثة فعلا عربية زيرو مافيهاش فرامل
ولو طلعت سليمة يبقي اما انها هربت لمرة زي ما وضحتلك او ان الطريق فعلا كان عامل مؤثر في انها ماتوقفش وطبعاً لو هربت لثانية فدي كفيلة انها تسبب كارثة وبردو حقك تعمل ما بدا لك

تحياتي

[MemO_KinG]

بشمهندس محمد عايز اسئل حضرتك سؤال
لو حضرتك فى الموقف اللى بتقول عليه و ضاغط فرامل و العربية جريت منك ييجى 30 متر مع رعشة الايه بى اس بدون توقف ده يبقي ايه؟