أسباب سوء سمعة الميجان (الحلقة الخامسة : اسئلة و اجوبة )

[Ahmed Selim]

متستعجلش يا معلم......
المقابض اللى بتشد منها الباب عشان تقفله وانت جوه العربية بيقشر من طرفه فعلاً مع كتر الأستخدام
بس خللى بالك من حاجة........انا كنت متعود أخلى العيال اللى فى البنزينة يغسلو الأبواب من جوة وكنت بعمل كده مش أقل من مرتين فى الشهر أن مكنش أكتر.....ممكن ده يكون أثر على المقابض عندى
وطبعاً زى ما كلنا عارفين هيطلع ناس دلوقتى يقولو أن من الخطر جدا أنك تمشى بعربية مقابضها الدخلية بتقشر لأن العربية ممكن تتقلب وانت ماشى على 30

[Sharky]

طب ما أنا عندى فكرة أحلى يا شاركى..............

أيه رأيك نخليه يجيب أصحابه مقابلة رينو اللى جاية ونحاول نساعدهم ونشوف عندهم أيه ؟؟

فكرة ممتازة و حتى كمان نسفيد من المشاكل عندهم و نعرف إتحلت إزاى علشان لما تحصل لنا نبقى عارفينها

[farahat]

لا يا أحمد باشا ، المشكلة مش من عندك ولا حاجة ولا من كتر الغسيل، إغسل يا عم و نضف العربية براحتك :)
الفكرة إن المقبض دي مصنوعة من بلاستيك و غالباً بيكون من خامة ABS عشان يكون مقاوم للحرارة و ملمسه بيكون نعم جداً بعد الحقن (بعد ما يتشكل يعني ) و صلب و مقاوم للخدوش ، بس عيب إن شكله بيكون بلاستيك يعني فقير نوعاً ما، طب الحل إيه ؟
الحل إن احنا نحط عليه طبقة من التغليف ( coating ) تديله المظهر الراقي و هو لسة بلاستيك ، و ال-coatings دي أنواع منها بيدي ملمس جلد و منها بيدي ملمس كاوتش و منها بيدي ملمس قماش أو قطيفة ، و كل الحاجات دي بتتدهن أو بتتلزق على البلاستيك ، المشكلة إن مع التعرض لدرجات الحرارة العالية بيبتدي اللزق دة يفك و مجرد فرك بسيط لل-coating دة بيتشال و يقشر .
هو دة إلي بيحصل مع المقابض بتاعة الميجان و مش بس المقابض كمان الكونسول إلي فيه الكاست و التكيف واخد نفس الخامة بس مش بيتعرض للإحتكاك كتير عشان يقشر (بس لو جربت هيقشر لأنه بيتعرض لنفس التأثير الحراري من الركنة في الشمس مدة طويلة ) ، و هو دة نفسه إلي كان بيحصل في العربيات الفيكترا و هو نفسه موجود في ال-BMW الشكل الحالي و غيرها كتير ، و د مش عيب عربيات معينة د عيب خامات و ملائمة الخامات دي للظروف الجوية إلي بتستعمل فيها .

موضوع قواعد الموتور مسمعتوش من حد قبل كدة بس جايز ، و لو حصل فعلاً أنا مهتم فعلاً أعرف حصل ازاي و ظروف معاملة العربية لأن دي حاجة مش سهل تبوز إلا إذا كنت العربية بتتعرض لطرق غير ممهدة و الموتور بيتنطط كتير في مكانه .

العفشة بقى أنا هقول رأي بصراحة هي يمكن عمرها أقل شوية من الألماني مثلاً بس أكيد أطول من الكوري و الحاجات التانية بس دة كمان في مقابل حاجة مهمة جداً .. إن العفشة ناعمة جداً جداً جداً (عمرك ما تحس بالمطبات الصغيرة أو عين القط و لا تسمع للعربية صوت على الأسفلت ) ، و هي أنعم من أي عربية شفتها قبل كدة ، حتى الياباني (مع احترامي لكل العربيات ) ، يعني أعتقد لو حضرتك متعود في عربية ياباني تغير عفشة كل ١٠٠ ألف كيلو مثلاً مثلاً يعني و هتغيرهم في الميجان كل ٧٠ ألف كيلو أنا برضه شايف انها أحسن و أريح لي خصوصاً إنها هتكون أنعم و ماسكة في الأرض أكتر ١٠٠ مرة (العربية لحد ١٩٠ مكنتش حاسس فيها بأي رجة ما شاء الله و بعمل غرز كمان على الدائري مع النقل !!)

[farahat]

فكرة ممتازة و حتى كمان نسفيد من المشاكل عندهم و نعرف إتحلت إزاى علشان لما تحصل لنا نبقى عارفينها

يا جدعان ما تضغطوش على الناس بالشكل دة، دول لا ناقة لهم ولا جمال في الموضوع دول هدفهم يوضحوا للناس في المنتدى المشاكل إلي سمعوها عشان يفيدوا غيرهم ، و لازم نشكرهم على هذا الشعور .

و لو يحبو فعلاً يشرفون و يفيدونا أكتر يبقى يا ريت و نشيلهم فوق راسنا ، و لو ميحبوش و يحبو يناقشوا يبقى أهلاً و سهلاً و هو دة إلي احنا بنعمله بموضوعية شديدة عشان كلنا نستفيد ، و لو عايزين يقولوا لنا عربياتكم وحشة و خلاص و هي كدة برضه شكراً على وجهة نظركم فينا .

تقبلوا تحياتي

[Ahmed Selim]

شكراً يا فرحات على الشرح

وعلى فكرة أحنا مش بنضغط على حد أحنا الناس دى صعبت علينا وعاوزين نساعدهم........بس مش أكتر

[Sharky]

لا ضعط و لا حاجة يا أستاذ فرحات بالعكس الهدف من المنتدى هنا إن كل واحد يعرف مميزات و عيوب العربيات

لكن إللى بيحصل إنك تلاقى واحد داخل يقول العربية وحشة و مليانة عيوب طب عرفت منين يقولك سمعت أو عند واحد صاحبى و بيشتكى منها طيب إيه العيوب و لا حصلت إزاى و لا أعراضها إيه أو أى حاجة عنها تلاقيه عالطول مايردش و يختفى من الموضوع و لا كأنه دخل شارك فيه و إدا معلومة رغم إنه تلاقيه بيشارك عادى فى المنتدى فى المواضيع التانية !!!

يبقى دا دليل على إن المعلومة إللى بيقولها غلط و ماشى مع الموجة و خلاص
و يجى يقولك فى الأخر الناس فى المنتدى بتشكر فى رينو ليه طب ما تقولنا إنت بالدليل إيه هى عيوب الميجان

و فى الأخر كده ماإستفدش العضو من المعلومة لإنه ماعرفش المعلومة كاملة سببها إيه و قد تكون بنسبة كبيرة خاطئة أو راجعة لعدم فهم صاحب المشكلة للعربية و الاوبشنز إللى فيها

المفروض إللى يقول على عربية فيها عيوب يقول العيوب إيه وأعراضها إيه و إتصلحت إزاى و لا ماتصلحتش أصلا و إتكلفت كام و هل هى عيوب دائمة ولا خاصة بعربية معينة نتيجة لظروف تشغيلها و بكده يبقى العضو إستفاد صح


أنا سألت النهاردة م/ محى مدير صيانة العبور على موضوع شداد الموتور و إن دا عيب دائم فى الميجان و إن سعره زاد
الراجل زهل من الكلام
و قالى مين قال كده دا سعر الشداد السفلى أقل من 150 جم و ماحصلش أبدا إنه جالوا شكوى دائمة منه و قال مش علشان واحد و لا إتنين غيروها يبقى دا موضوع دائم فى العربية و قالى كل عربية و ليها ظروفها و طريقة مشيها لكن دا مش عيب شائع فى الميجان و لامنتشر فى العربيات

و على فكرة إتكلمنا شويه عن العيوب الشائعة فى الميجان قالى ماجش حاجة تقريبا كل العربيات إشتكت منها غير البطارية و علبة الدريكسيون و الكويلات و قالى إن الكويلات تم تغييرها و إنتهت مشكلتها و إنها مش تصنيع شركة رينو دى تصنيع شركة فرنسى إسمها ساجيم و من بعد ما غيروها لم ترد لهم أى شكاوى منه

و قالى إن إللى بيقول إن الميجان مليانة عيوب و مشاكل ياريت يقول إيه هى و نشوف فى التوكيل كام واحد حصلوه المشكلة دى و هل هى شائعة و لا فردية و لا هى مشكلة خاصة بقيادة مالك العربية و لا عيب فيه

و قالى كمان إقتراح حلو إنه ممكن أى حد بيقول مشاكل الميجان كتير يروح يقعد فى توكيل فولكس إللى جنب توكيل رينو فى العبور نصف ساعة و يشوف مقدار الشكاوى و المشاكل عن العربيات دى قد إيه !!

و بالنسبة لشكوى كمبيوتر العربية بهنج و بيتغير قالى مافيش و لا عربية ميجان II تم تغير لها كمبيوتر عربية نهائى نتيجة تهنيج او عيب صنع

بالنسبة للشكمان قالى إن عندهم عربيات رينو من 94 و ماتغيرش لها شكمان أصلا و دا ممكن يحصل فى حالة حاثة جامدة

بالنسبة لشكوى العفشة قالى مافيش حد جه يغير حاجة فى العفشة إلا لو كان خد بالعة أو خبط فى رصيف أو حصل حاجة غير طبيعية لكن عمر ما العفشة إتغيرت من السواقة الطبيعية فى البلد

بالنسبة لشكوى الكارت بيهنج قالى من شهرقبل رمضان جالوا شكوتين من كارت العربية و راح له مهندس من التوكيل و شاف الكارت لقاه مش شغال فعلا و طبعا خد دش من مالك العربية عن إزاى كارت العربية يبوظ فجاة و بعد الكشف على الكارت إتضح إنه ناقصه حاجة جوة مهمة فما سألوه صاحب العربية هل الكارت دا وقع منك فجاوب أيوه وقع من بنته من الدور الخامس !!
طب لما نزلت جبته لقيته مفتوح و لا مقفول قال لأ لقيته مفتوح قالولوا طيب فيه حاجة طارت منه قال مختش بالى

و الشكوى التانية نفس الفكرة الكارت ما بيشغلش العربية و أتضح إن صاحب المشكلة نزل بالكارت فى البحر و قعد أول يوم شغال لكن بعد كده فصل لإن الكارت دخل جواه ملح و ترسب عليه

يعنى واضح إنها مشاكل ملاك مش مشاكل العربية و يجى بعد كه يقولوا الكارت بيهنج و بيملح و عربية زبالة !!!!!

[Ahmed Selim]

أيه ده وقع من الدور الخامس وباظ ؟؟؟؟؟؟؟؟

الكلام ده مستحييييييييييييييييييييل يحصل فى عربية يابانى خالص ويا سلام لو عربية من الصانع اليابانى الأشهر فى العالم تويوتا............الكارت لو وقع من القمر للأرض ولا يحصله حاجة :)

من غير ضرب بس ياللى فى بالى :)

[megane_man]

سؤال هي الناس متوقعة من الميجان انها تكون عربية مفيهاش عيوب ولا أيه أدي كلام مهندس التوكيل عن مشاكل العربية ولا هيتقال انه بيقول كده علشان يخبي وميخوفش الناس من العربية انما لما مهندس توكيل تاني يقول ان العربية زي الفل ومفيهاش حاجة هتتغير في 2009 يبقي كلامه مصدق طبعا انتو فاهمين قصدي علي مين وأنا معاكو انه ندعو الناس الي عندها مشاكل للمقابلة الجاية ونشوف أيه المشاكل الي عندهم ونستفيد

[احمد عبدالله]

جزاك الله خيرا يا أستاذ فرحات

[bishoy02010]

الكويلات هيا إيه الكويلات ديه !!!

[elshinawy80]

تحبوا يقى تسمعوا اخر اشاعه
واحد صاحبى عرف انى جبت ميجان فاستغرب جدا و طبعا كان بيلومنى على انا عملتوا فى نفسى و بيقولى ان الميجان عند السرعات العالية 180 او اكتر الدركسيون بيقفش و مش بيحود لا يمين و لا شمال زى القطار يعنى ماشى دغرى ههههههههههههههه
شغاااااااااال يونيفرسال

[محمد ابراهيم 1]

فعلا موضوع الدركسيون ده بس بيحصل معايا بعد سرعة 280 مش 180

[alfbaa]

اشاعه

احد اهم الاشاعات عن الميجان ان صاجها ورق (بالذات الرفارف) .........! واحد صحبي حلفلي انه شاف عربيه بيجو 504 بتركن وريحت على باب الميجان فالباب ادمر تماما

في اشاعه سمعتها بتاع 10 مرات : قال واحد معاه ميجان بيركن خبط في الرصيف جامد شويه فالاير باج كلها ضربت واتخرب بيته .............. يعيني

كمان على طول اول ما تجيب سيره الميجان ادام واحد من اللي عربيتهم ياباني ومافيهاش كومبيوتر معلومات(زي اغلب الياباني) يقولك اااه اوعى من الميجان والكومبيوتر والحاجات اللي بتهنج دي

برضه اول ما تقول ميجان .....ااه اتخرب بيتك في قطع الغيار الفرنساوي وكان ماله الياباني مالها الكورلا بس ...!


ابقى قابلني لو عرفت تبيعها ............. حد يجيب عربيه فرنساوي


يا عم رينو ايه ؟لو هتجيب فرنساوي امرنا لله يبقى بيجو وبيجو وبيجو . دي اكبر شركه هناك................!

[waleedraafat]

انا من اول ما نزلت الميجان وانا هموت عليها ومش مقتنع بكلام الناس عنها وخصوصا ان الشعب المصري عموما بيستقي ثقافتة عن السيارة من الميكانيكي والسمكري وبتاع العفشة ودول لو اجمعوا علي سيارة انها كويسة تبقي كويسة والعكس

طيب العربية دي اصلا عايزة واحد متعلم وبيفهم علشان يعرف يتعامل مع تعقيدات تشغيلها ومعظم المصرين بينجحوا في التعليم علي الحركرك ومش فاهمين لغات

وبرغم اقتناعي بها اشتريت الدايو بعد ما الكل خوفني (ماتخدش السهتانة ام كحلة ولبانة تروح التوكيل وتعمل عيانة) وبرغم ذلك اصريت علي ام كحلة ولبانة وسبعة ايرباج وستيب ترونك ، لكن في نفس التوقيت تغيرت ظروفي المادية واضطرت لشراء النوبيرا (الاصيلة الي تشيلك وترضي بالقليل) ودلوقتي انا متضايق جدا وندمان شوية علي الاصيلة عشان تخنت وربربت وبقت مزعجة (لسة متجوزين في 2008)

دلوقت بقي الجميل في الموضوع ان الرينو في المستعمل قريب من سعر سيارتي النوبيرا ولو فكرت اغير مش هدفع كتير وهبقي جبت ام كحلة ولباني الي هموت عليها لحد دلوقت (القلب وما يريد) وتبقي سوء سمعة قوم عند قوم فوائد

[أحمد كمال]

حلوة السهتانة ام كحلة و لبانة دي هههههههههههههههههههههههههه