صوت خبطة في الفلونس

[wael-mohamed]

شوف حضرتك متندمش ولا حاجة.
اولا الصوت خبطة والا تكة.
التكة دي بتحصل ساعات في الجنب الشمال عند السواق علشان في سولونويد بيفصل ويشتغل في علبة الفيوزات الي تحت الزراير بتاعت اضاءة الطبلو
اما لو صوت طقة بيبقى من العفشة علشان العربية جديدة والعافشة ناشفة بيربطوا العفشة ويشحموها بتروح للابد
الكلام ده حصل معايا اول ماشتريت العربية جديد بالضبط بس عربيتي الشكل القديم.
وان شاء الله تتحل ومتزعلش نفسك.

[Omar Youssry]

انا عندي بسمع صوت تكة كدة من ناحية الباب الشمال هي خفيفه بس موجودة ومش عارف ايه سببها
رشيت d40 في مكان قفل الباب و ما راحتش بس الصوت كأنه من جوا الباب أو ناحية القايم اللي في النص
محدش عنده فكرة ممكن تكون ايه
خايف ميسمعوهاش في التوكيل و الجميل انها مش مرتبطة بالطرق الغير ممهدة ببقي ماشي على أسفلت وبسمعها

[aratux]

انا عندي بسمع صوت تكة كدة من ناحية الباب الشمال هي خفيفه بس موجودة ومش عارف ايه سببها
رشيت d40 في مكان قفل الباب و ما راحتش بس الصوت كأنه من جوا الباب أو ناحية القايم اللي في النص
محدش عنده فكرة ممكن تكون ايه
خايف ميسمعوهاش في التوكيل و الجميل انها مش مرتبطة بالطرق الغير ممهدة ببقي ماشي على أسفلت وبسمعها

عربية حضرتك موديل ايه و انهي فئة؟
فيها فتحة سقف؟

[aratux]

بالنسبة لاخر التطورات، غيرولي فتحة السقف في التوكيل، لكن ما زالت الاصوات موجودة و زاد عليها صوت زنة مزعجة من التابلوه و القايم الشمال و صوت خبط حديد من الجنب اليمين
العربية ماكملتش 3 الاف كيلو
بيحاولوا معاية اروح تاني للمرة السابعة يحاولوا يصلحوها
تنصحوني اروح و لا ماضيعش وقت و اطلع على حماية المستهلك؟

[AbuHusam]

هاقولك حاجة وما تستهزأش بيها.. ارقي العربية.. شغل فيها سورة البقر كاملة وبعدا مباشرة الرقية الشرعية.. اذا تحسن الوضع او اختفى الصوت ولو مؤقتا تكون المسألة بعيدة عن المصنع والتوكيل. وفي هذه الحالات يكون الحل النهائي الحاسم هو عرضها على معالج بالقرآن.. بالقرآن وليس بأي شيء آخر ﻻ اوراق وﻻ طﻻسم واﻻ يبقى دجال. جرب وشوف.. تحياتي

[kamelyosef]

حصلت عندى خبطه فى نفس المان زيك و اكتشفت انها من مكان تثبيت الحزام فى القايم الى بتعلى منه الحزام و تنزله
تحس انه مش ثابت اوى هو و الفبره لزقت عليه شريط لاصق و الخبطه راحت

[omarhelalyehia]

باشمهندس محمد تحياتى اولا .....صلى على النبى كده و ان شاء الله الأمور تتحل و هى الدنيا كده تجيب حاجة عشان تتبسط بيها تلاقى نفسك نتيجة لعيب بسيط مش واضح مخنوق منها ....لكن ان شاء الله خير ....انا اخويا كان لسه شارى لوجان 2015 و راح يعمل صيانة ال10000 فى مركز معتمد اسمه فرنش موتورز...المهم بعد الصيانة لقى عداد العربية عامل 110000 بدل 10000 ...المهم العربية دخلت تانى الصيانة و يحاولوا يرجعوا قراءة العداد ل10000 مش عارفين ....سوفت وير لأ وحدة الكنترول لأ...المشكلة دى قعدت شهر.....و مش حاقدر اوصف لسيادتك كمية القلق اللى كان فيها اخويا من الموضوع ده .....بس فى الأخر بتوع فرنش موتورز دول حلوها بالاتصال برينو فرنسا و طلعت المشكلة فى السوفت وير و اتحلت بعد شهر من المعاناة ....الغريبة انه قرر ان كل الصيانة اللى جاية بتاعته حايعملها فى فرنش موتورز دول لأنهم بيهتموا فعلا و ناس فاهمة شغلها و بتهتم ( رغم انه خلال المشكلة راح قدم فيهم شكوى فى التوكيل ) و خلوقين .....فمعلش تعالى على نفسك كده و جرب تروح لهم و ان شاء الله تلاقى الحل عندهم ....لكن المهم حالة الضيق اللى عندك دى تنتهى لإنه كله مقدر و مكتوب.....وصلى على النبى و توكل على الله و خللى موضوع حماية المستهلك ده اخر كرت....و ان شاء الله تتحل و تنبسط من العربية

[M. Hassan]

الصوت عندي أنا كمان (العربية لسه معملتش 3000 كيلو)
أغلب الظن أنه فعلاً بكرة ستارة الباب .. الصوت بيكون أكيد ناحية اليمين، وبيكون كأنه من القايم (Pillar B). شكيت أنه ممكن يكون توكة الحزام، بس مطلعتش هيا. فاعتقد أنها فعلا حاجة في الباب، والباب مفيهوش حاجة غير الستارة.
يمكن الغريب أن الصوت فعلا مش مرتبط قوي بحالة الطريق.

[Hany Saad]

صاحب الشكوى عنده الصوت جاى من ناحيته، حضرتك الصوت من ناحية اليمين
أغلب الظن الصوت ده هيكون جاى من رأس حزام الأمان العلوية اللى متثبتة فى ال pillar B
الرأس دى متحركة لتحت و لفوق علشان تظبط شد الحزام حسب طولك و ليها حوالى ٣ وضعيات ظبط عن طريق لسان بلاستيك....ساعات الراس دى بتكون ناعمة شوية و ممكن تعمل الأصوات دى
طيب نتأكد إزاى:

نجيب قطعة قماش صغيرة و نلفها حول الرأس دى من الخلف ( هنلاقى فراغ بينها و بين قايم الباب) بحيث نحكم حركتها....اللى عنده الصوت من الشمال يعمل الناحية الشمال و اللى عنده الصوت من اليمين يعمل الناحية اليمين
احكم حركتها كويس قوى علشان نتأكد كويس
جرب السيارة لفترة، لو الصوت راح....و ان شاء الله يروح...اطلع على التوكيل بالشكوى و الحل و اطلب تغيير هذه القطعة

منتظر النتيجة

تحياتى

[dralaaabood]

الحل بسيط بس يبقى في امكانيات محترمة في التوكيل
و هو لو عندهم جهاز X-ray يقدروا يكتشفوا لو في اي قطعة حديد داخل القايم منغير ميفكوا اي حاجة
و اعود اقول لازم تكون الامكانية دي موجودة في اي توكيل عشان مشكلة زي دي تبقى سهلة الحل
و ربنا يوفقك و تحلها و تستمتع بعربيتك

[aratux]

شكرا لكل الاخوة اللي بعتولي و ماعرفتش ارد عليهم
الاخوة اللي اقترحوا تشحيم او ستارة باب او غيره, يا جماعة التوكيل بعد شغل شهرين ماعرفش يحلها و عملنا كل حاجة و في الاخر بيقنعوني ان الفلونس كدة بتعمل اصوات كتير و على حد تعبير جد منهم انها عربية noisy و ده العادي بتاعها

المهم بقى عندي مشكلة جديدة و هي زنة من التابلوه و السقف احيانا و امبارح لاحظت ان التويتر اليمين بقى بيعمل صوت زنة هوة كمان مع المزيكا و الراديو


اه صحيح, اكتشفنا ان صوت الخبط المعدني ناحية اليمين طلع ان فيه فني لسبب من الاسباب فك الكرسي الامامي يمين و نسي يربط مسمار ماسك في الارضية, و ده اللي كان بيخبط و يعمل صوت

المفروض اروحلهم تاني يظبطوا الحاجات دي و يشوفوا صوت فتحة السقف بس مستني اعمل حاجة معينة مع الشركة في فرنسا الاول

[aratux]

طيب يا جماعة اخر اخبار, بعد تغيير فتحة السقف الصوت قل بدرجة كبيرة فعلا
و ظبطوا صوت مسمار الكرسي ده
فاضل بس صوت زنة التابلوه قالولي محتاجة يوم كامل في وسط الاسبوع علشان كدة أجلتها

المهم بقى بعد صيانة ال 5000 بقى فيه صوت غبي من دواسة الفرامل عالبا فيه هوا في دورة الفرامل (جودة شغل هايلة من التوكيل ده) و صوت تزييق من الكنبة او البيبان طول ما انا ماشي
رايحلهم بكرة ابو رواش
انا بقيت باقعد في التوكيل الزفت ده اكتر ما باقضي الاجازات مع اولادي

حد رايح ابو رواش بكرة؟ نتقابل بالمرة هناك لأن القعدة هناك مملة جدا