ما هو تقييمك لوكيل رينو و مراكز الخدمه

[Islam_galal]

أنا تعمدت أقلل درجات التقييم لتقليل الخطأ الناتج من أن بعض الناس تميل لوضع تقييمات متفائلة و العكس

برجاء المشاركة ممن يتعامل بشخصه مع الوكيل لضمان نزاهة الإستطلاع (شكرا)

[Sharky]

أنا بتعامل مع توكيل رينو العبور
و تقيمى له إنه توكيل ممتاز و مريح جدا بالنسبة لى فى إهتمامه بالعميل و حل مشكلاته فى أسرع وقت

[crazylambada]

طب هو عنواه فين
و هل بيقبل بالسيارات الخليجي

[Sharky]

أرجو من العضو mohameduoser
تحديد لنا ما سبب إختياره لتوكيل رينو بالسئ و ما هى سيارته الرينو حتى نستفيد و إللى أعرفه إن حضرتك حاجز سيفيك ؟

بالنسبة لقبوله السيارات الخليجى
التوكيل بيقبل أى سيارة و ممكن حضرتك تكلمه على 16202 علشان تعرف بالظبط العنوان

[Sharky]

يا ريت كل إللى يقيم يقول ليه حط التقييم بتاعه
حتى نستفيد كلنا

شكرا يا إسلام على مجهودك و فكرتك

[احمدعبدالعزيز]

انا اتعملت مع فرع الاسكندريه - الصحراوى العامريه

اولا : المكان راقى جدااا وشيك وتحص انك فى مركز خدمه فى اوربا مثلا ..
ثانيا : المهندسين والفنين كفاءة عاليه وناس محترمة جدا .
العيب الوحيد اللى اناشوفته انهم غالين جدا .

على فاكره انا كنت بعمل صيانه النوبيرا هناك مش عند الوكيل لانها خرجت من الضمان .

[Sharky]

انا اتعملت مع فرع الاسكندريه - الصحراوى العامريه

اولا : المكان راقى جدااا وشيك وتحص انك فى مركز خدمه فى اوربا مثلا ..
ثانيا : المهندسين والفنين كفاءة عاليه وناس محترمة جدا .
العيب الوحيد اللى اناشوفته انهم غالين جدا .

على فاكره انا كنت بعمل صيانه النوبيرا هناك مش عند الوكيل لانها خرجت من الضمان .

إيه دا يا زيزو إنت بتعمل صيانة النوبيرا عند توكيل رينو ؟

[limo]

بالنسبه لتقيم التوكيل نفسه
انا بروح لفرع المقطم وهو ممتاز فى سواء بالاهتمام بالتصليح او راحه واستقبال العملاء من اتاحه لهم المشاريب مجانا ووضع لهم اثنين كمبيوتر بdsl وخدمه توصيل العميل بسياره زى بتاعه ملاعب الجولف الى الشارع العمومى
وطبعا الاحترام المتبادل بينهم وبين العميل
بالنسبه لتقيم مراكز الصيانه (الميكانكيون العرب )
انا بصراحه لم اشاهد منهم اى موقف يستدعى انى اسيئ فى التصليح بس انا بحس انهم عايزين يغيروا اى حاجه فى العربيه حتى لو كانت شغاله وماشيه

ده غير اختلاف تغير الاجزاء المستهلكه عن التوكيل فى مواعيد الصيانه مثل زياده تغير فلتر البنزين فى صيانه العشرون الف والتوكيل مبغيروش
يمتازوا عن الوكيل انك بتخش مع العربيه وهيه بتصلح
فى النهايه انا برتاح لتوكيل المقطم اكثر

[احمدعبدالعزيز]

إيه دا يا زيزو إنت بتعمل صيانة النوبيرا عند توكيل رينو ؟

صيانة النوبيرا فى توكيل رينو افضل من الصفوه لان فى اسكندريه اول من اشتغل مع الدايو كان الشركة المصريه العالميه للتجاره والتوكيلات ( المناعى )سابقا وبعدين اخد توكيل كيا ورينو حاليا ....

[crazylambada]

متشكر يا استاذ شركي

[Abo_Lina]

الاول فيه فرق بين الوكيل و مراكز الخدمة عشان مندخلش في ممشكلة
الوكيل هو Eim وده له فرعين واحد في العبور وواحد في المقطم

تعاملي مع مركز المقطم و كل الي هاقوله انهم ناس محترفة يعني واحد و واحد يساوي اتنين.. و عربيتي الجاية هاتبقى منهم

[Ramy_Tantawi]

توكيل محترم جداً جداً ويستاهل ياخد اكتر من ممتاز ومش مبالغه انا اتعاملت مع فرعي التوكيل المقطم والعبور من حوالي شهور مش من زمان الحقيقه فرع المقطم لا يعيبه اي شيء غير بس اعمال البناء اللي شغاله هناك بقيلها حوالي سنه مخليا الدنيا زحمه جداً هناك لكن على المستوى الحرفي نقدر نقول ان الاتنين لا يقللوا عن بعض ابداً .............

انا من انصار دايما ان رينو في مصر محترمه كا سيارات ودي ممكن يختلف فيها اتنين وارد جداً اقصد على مستوى السياره نفسها كويسه او لأ تختلف الآراء بالطبع على فكره انا عشت في السعوديه فتره الرينو هناك اكتشفتها بالصدفه البحته وانتشارها هناك محدود جداً وده لعدة اسباب لكن في رأيي عشان توكيلها مش مهتم بيها ابداً لكن في مصر لئن وراها توكيل محترم محافظ على اسمه واسم الشركه اللي واخد منها الوكاله كويس جداً اعتقد ان ده اللي فارق رينو في مصر عن بره.

[Sharky]

أرجو من العضو mohameduoser

تحديد لنا ما سبب إختياره لتوكيل رينو بالسئ و ما هى سيارته الرينو حتى نستفيد و إللى أعرفه إن حضرتك حاجز سيفيك ؟

حتى الان كل من تعامل مع التوكيل بيشكر فيه و مازلنا فى إنتظار رد العضو mohameduoser حتى يفيدنا بنوع سيارته الرينو و ما هو سبب إختياره لتوكيل رينو بالسئ و خاصة إنه الوحيد حتى الان الذى ذكر ذلك

[Abo_Lina]

فعلا نحب نسمع الرأي الاخر ياريت العضو ده يحكيلنا تجربته و ايه السلبييات الي وجهها..وماتقلقش االناس هنا كلها بتساعد في حال وجود اي مشكلة مع التوكيل

بس انت احكيلنا واحنا معاك

[tot]

عندي سؤال بالنسبة للتصليح ، يعني لا قدر الله لو فيها سمكرة و كده ، هل العربية بتدخل على طول ولا بالحجز ، و هل بيتعاملوا مع شركة تأمين ، يعني الشركة تحاسبهم على طول و انت تستلم عربيتك من غير ماتدفع او حتى تدفع فرق نسبة التحمل بس ولا ايه،