اكسسوار لــــــوجى ..

[Egyzizo]

انا اولا ركبت طقم دلايات ب 50 جنية ثانيا شمعت العربية كلها ودا كلف حوالي 400 او اقل لاني بصراحه لسه محاسبتش علية

يا ترى كنت واقف أثناء عملية التشميع ؟؟
ايه الخطوات اللى عملوها ؟؟
أنا أعرف ان برطمان الشمع فى حدود 20 جنيه ، فليه هم بيعملوها غالى قوى كده
أكيد فيه حاجة إضافية بتتعمل ..

[Egyzizo]

دى صورة الشاشة عند بداية التشغيل :
وهى من الشمال لليمين : وضع عرض الصور ، وضع تشغيل الأغانى ، تشغيل الفيديو ، عرض صور مع موسيقى، الساعة والمنبه والتاريخ ، اعدادات ، وآخر حاجة وضع الألعاب



ودى الصورة والفلاشة راكبه (وفوق فتحة الفلاشة فيه فتحة لكارت ميمورى)



صورة وضع الساعة والتاريخ



صورة الكاميرا راكبة فى الاكصدام
والمكان اللى هى راكبة فيه ده اللى هو النص بالظبط المفروض وراه فانوس إضائة فوق النمرة ، وكانوا عايزين يركبوها على جنب بعيد عن الفانوس مش فى النص بالظبط ، بس أنا لقيت ان شكلها هيبقى وحش ، فخليتهم يشيلوا الفانوس ، وهو بيتشال بكلبسات وشلته عندى وخليتهم يركبوا الكاميرا فى النص بالظبط، وتم ثقب الاكصدام عن طريق شنيور فيه بنطة مخصوصة على مقاس الكاميرا تماماً.
ويراعى عند ربط الكاميرا ان تكون عمودية تماماً على الأرض علشان خطوط تحديد المسافة بينك وبين العربية اللى وراك تكون مظبوطة فهى محتاجة فن فى الربط لأن الاكصدام فيه ميل خفيف ومش عمودى فيراعى التغلب عليه وجعل الكاميرا عمودية أثناء الربط.




ودى صورة الكاميرا فى وضع المراشيدير والعربية اللى ورايا بعيدة




وهنا قربت من العربية اللى ورايا والمسافة بينى وبينها أقل من 2 متر



وأقرب من كده بتظهر أهمية الكاميرا لأن فى الوضع ده مش بتشوف حاجة خالص فى المراية العادية وكله يعتمد على توقع أبعاد العربية ، لكن مع وجود الكاميرا الوضع يختلف

فى الوضع القادم لو بصيت فى المراية العادية أو حتى لو بصيت وراك اللى هتشوفه فقط هو راس السائق اللى فى العربية الخلفية عشان كبوت اللوجان عالى ، لكن فى الكاميرا بتشوف التالى :



وفى الوضع السابق فيى ميزة مهمة جداً برضه أنك بتتغلب على موضوع الـ Blind spot بتاعة المرايات ، يعنى لو فيه حاجة واطية يعنى عيل معدى مثلاً مستحيل هتشوفه
وده حصل وأنا باصور من شوية ، عيلين كانوا بيلعبوا وقربوا من العربية وأنا مش واخد بالى وماشفتهمش غير فى الكاميرا ولما لفيت علشان أقول لهم امشوا يا عيال عشان أعرف أصور مالقيتهمش ، ولما بصيت فى الشاشة تانى لقيتهم قاعدين ورا العربية ، ستر ربنا انى كنت واقف.


وبالنسبة لعرض الفيديو فكويس جداً وبرضه بتسمع الصوت على سماعة الشاشة أو على سماعات العربية عن طريق الـ FM

وبالنسبة لتشغيل الأغانى فهو عشرة على عشرة ، والميزة اللى أنا مبسوط منها عن الـ FM modulator انك بتقدر تختار الألبوم اللى انت عايزه فقط ، مش كله ورا بعضه

وجربت برضه ربط الشاشة بالموبايل عن طريق البلوتوث وبتظهر نمرة المتصل على الشاشة ، والرد بيكون من زرار الموبايل لكن الكلام بيكون عن طريق الشاشة فى الميكروفون الموضح بالصور.

وبالنسبة للألعاب فلسه ما جربتهاش.


الحقيقة كل ده كان عرض للامكانيات بس الوقت كان غير كافى للتقييم الفعلى

[abdulmageed]

تسلم ايدك يا زيزو
صور جميلة وشرح اكثر من رائع

[alfa_we]

تسلم ايدك يا باشا على الصور والشرح الهايل دا

[MoHaMed HaMeD]

شرح تمام ياباشا والف مبروك

[Egyzizo]

الله يبارك فيكم .. ان شاء الله بكره أخلص موضوع الفرش .. السروجى هيفصل فرش جلد أسود فى رصاصى وهيفرش الأرضية والشنطة ، وربنا يسهل يا رب ويطلع حلو ولو عجبنى هاحط صوره برضه.

[elnopy]

يا ترى كنت واقف أثناء عملية التشميع ؟؟
ايه الخطوات اللى عملوها ؟؟
أنا أعرف ان برطمان الشمع فى حدود 20 جنيه ، فليه هم بيعملوها غالى قوى كده
أكيد فيه حاجة إضافية بتتعمل ..

لا للا سف انا طبعا مش فاضى اقف وهو شغال وبعدين دا قعد يومين شغال فيها

[Dr.Karim Emam]

الحقيقة أنا برضه لاحظت ان اللون الفيرانى التراب بيبان فيه
ولما بامسحه باحس انه مش بيتشال بسهولة
فجبت شمع سيارة اسمه ابرو abro car wax تمنه 20 جنيه
المفروض انه يخللى التراب والأوساخ ما تلزقش فى العربية ويديها لمعة
وأنا استخدمته على نص الشنطة وسبت النص التانى وسبت العربية من غير غطا عشان لما أشيل التراب الصبح أقارن وأشوف اذا كان فعلاً فعال فى موضوع سهولة ازالة التراب واللا لأ.

و لقيت فى فرق ولا لأ؟
و ازاى بيتحط الشمع ده؟

[Egyzizo]

و لقيت فى فرق ولا لأ؟
و ازاى بيتحط الشمع ده؟

فعلاً فيه فرق كبير وواضح
يعنى أنا حتى الآن مازلت فى مرحلة اختبار لنصف الشنطة المتشمع والنص اللى مش متشمع ، وهاستنى على كده شوية لغاية ما أعرف امتى مفعول التشميع بيروح.

أولاً : لما بانزل الصبح وأشوف التراب على الشنطة بألاقيه أكثر كثافة بشكل واضح جداً فى النصف الغير متشمع عنه فى النصف المتشمع ، لأن الجزء المتشمع مش بيسمح للتراب ان يلزق عليه فالهوا بيطيره ويكون التراب طبقة رقيقة على عكس الجزء الغير متشمع

ثانياً: عند مسح التراب بالفوطة ، يكفى جدا انك تهش التراب مش مسح بالمعنى المفهوم علشان النصف المتشمع ينضف ، أما النصف الآخر فبالمسح تلاقى التراب بيتنقل من مكان للتانى وتحس انه لازق ، ولازم تمسح مرة ، وبعد كده تنــطــر الفوطة عشان تشيل التراب اللى عليها وتمسح تانى ..

(ملحوظة : الفوطة عادية مش زفرة)


أما استخدامه فمافيش أسهل منه ..
هو بيبقى برطمان فيه الشمع زى الكريم كده وبييجى معاه سفنجة ، بتحط السفنجة فى الكريم وتمسح بيها العربية فى حركة دائرية لغاية ما تغطى الجزء المراد تشميعه ، وبعد كده تنتظر عشر دقائق لغاية الشمع ما ينشف على العربية ، وبعد كده بفوطة قطن ناعمة (ممكن فانلة داخلية قديمة مثلاً) بتمسح الشمع الناشف ، هتلاقى لمعان مبهر للجزء المتشمع عن الأجزاء الأخرى.

وفيه أنواع كتيرة فى السوق وكله شغال ..

[amr.elsayed]

شوفوا الموضوع دة وادعولى

http://www.nilemotors.net/Nile/23055-a.html

[Egyzizo]

موضوع عظيم والصور ممتازة .. بس أنا شايف ان بما إن عربياتنا لسه زيرو وبخيرها ، فالبوليش والكومباوند مالهومش لازمة علشان هيبقوا حاميين عليها وكفاية الشمع فى البداية ..

[ash257]

بصراحة موضوع الكاميرا والشاشة ده تحفة .. إختراع بصراعة ربنا يباركلك في العربية ويديك خيرها ويكفيك شرها ويمتعك بيها في الخير إن شاء الله

[Egyzizo]

شكراً يا آش على تشريفك الموضوع ..
وفعلاً يوم بعد يوم بأدرك قيمة الكاميرا الخلفية ومش عارف من غيرها كنت أعمل ايه خصوصاً وأنا طالع من 128 ومش واخد على العربيات اللى مابتشوفش أولها من آخرها.

[Egyzizo]

الفرش يا جماعة طلع تحفــــة ..
أنا كنت حاطط ايدى على قلبى ، خصوصاً ان السروجى أخد منى فقط الخطوط العامة فقط واتصرف بعد كده من دماغه ، بس الحقيقة طلع فنان ، وكويس انى سبته يتصرف ..
احنا كنا متفقين على فرش أسود فى رصاصى ، قام راح لف على أسود يكون فيرانى غامق مش أسود غطيس علشان يبقى نفس لون تابلوه العربية ، وكمان التحبيبة اللى فيه هى نفس التحبيبة اللى فى التابلوه ، فتحس ان الفرش فابريكه لأن هو والتابلوه حاجة واحدة ..
ده غير الاتقان فى العمل وعمل غرزة بارزة كده على الحواف مديه الفرش فخامة ..
وعمل فرش جلد كامل للأرضية ميه ميه ، وكذلك عمل فرش للشنطة فيه تجزيعة لطيفة. مع عمل حواف مرتفعة حسب طلبى.

وبالنسبة للأسعار فالسعر شامل كل حاجة (فرش وأرضية وشنطة) كان ألف جنيه فقط لا غير ، وأنا شايف ان ده سعر ممتاز على حسب ما شفت الأسعار فى القاهرة والأسكندرية.
أنا رحتله يوم التلات ، فك الكراسى والكنبة عشان يشتغل فيهم براحته ، وحطلى كرسى بتاع عربية 128 علشان أروح العربية
وجيت له بالعربية الأربعاء صباحاً عمل فرش الأرضية والشنطة وركب الكراسى من الساعة 11 صباحاً إلى الساعة 2 ظهراً.

مش هاعرف أوصف .. وهاسيبكم مع الصور ، بس تأكدوا ان الحقيقة أحلى بكتييييير ....

[amr.elsayed]

بسم الله ما شاء الله
لذيذ اوى الفرش يا زيزو ولونه جميل وهادى
الف مبروك يا باشا وربنا يباركلك فى عربيتك