فتيس سي اليزيه سيء للغاية

[الجنرال]

الحته ديه بصراحه غريبه

طيب بتحصل والعربيه بارده ولا وانت واقف في اشاره وبتطلع

لا بتحصل في اي وقت .. وانا فى اشارة .. في زحمة وبهدي .. ماشي عادي فى امان الله وبهدي علشان مطب .. مفيش حاجة لاحظت انها بتحصل بعدها او مرتبطة بيها

[abou-yahia]

لا بتحصل في اي وقت .. وانا فى اشارة .. في زحمة وبهدي .. ماشي عادي فى امان الله وبهدي علشان مطب .. مفيش حاجة لاحظت انها بتحصل بعدها او مرتبطة بيها

يمكن بتشيل رجلك عن البنزين بسرعه

[islam.3bada]

لا بتحصل في اي وقت .. وانا فى اشارة .. في زحمة وبهدي .. ماشي عادي فى امان الله وبهدي علشان مطب .. مفيش حاجة لاحظت انها بتحصل بعدها او مرتبطة بيها

حضرتك هتجرب تعمل حاجة من الاتنين , ياما هتزود دوسة رجلك على الفرامل شوية (ممكن تكون رجلك على الفرامل خفيفة شوية )
او حضرتك يتشيل رجلك من على الفرامل بدرى شوية , جرب حضرتك و انت بتهدى للمطب تاخر رفع رجلك من على الفرامل ثانية او اتنين هتلاقى الموضوع اختفى اكيد ان شاء الله

[الجنرال]

شكرا على الرد .. هيا للامانة برضه مش مستمرة على طول .. وبتبقى بحالات مختلفة وعلى فترات متباعدة .. هحاول اعمل اقتراحاتكم وربنا ييسر ان شاء الله

[Ahmed Amin]

لكن عموما مش عاجبني انا كمان لكذا سبب:

1- اولا فرامل المحرك Engine Break دي حاجة زي الزفت وكذا مرة ادوس فرامل واحس ان العربية هتفلت مني وتنط وتخبط فى اللى قدامي

ال Engine Break المفروض أنها بتوقف العربية في وقت ومسافة أقل, مش بتخلي العربية تنط.

3- احيانا بلاقي الفتيس بياخر النقل من الغيار الاول للتاني بدون سبب .. يعني هو نفس ضغطه البنزين وبلاقيه مش راضي يغير .. حتى لما بشيل رجلي خالص وارجع ادوس الاقيه لسه فى الغيار الاول.

الفتيس بينقل من الأول للتاني علي سرعة 20 كيلومتر,
دا لو كنت دايس دوسة طبيعية وهادية,,
أما لو كنت بتجري وبتحرك ممكن يأخرها معاك لحد 30 كيلومتر.
طول مانت تحت ال 20 كيلو مش هينقل,,
شوف كدا ولو الوضع اللي عندك كدا يبقي مش عندك مشاكل,
لو الوضع مختلف ممكن تحتاج يتعمل لك Check علي ال ECU بتاعت الفتيس ويتعملها أبديت.

4- احيانا بيبقى تقيل قوي فى اول طلعة .. السحب والتجميع يعني بيبقى حاجة زبالة اني مش عارف اعدي حد او اخلي العربية تجري شوية الحق الاشارة مثلا !!

كل طلعة الأوروبي كدا,
ومع الوقت هتتعود عليها, وهوا فعلاً مش فتيس جري في الطلعة.
لكن مجرد أنك تاخد أول وتطلع بيه وتعدي ال 10 كيلو يعني في أقل من ثانية هتلاقي تجميعه بعد كدا مرضي جداً.
وأنا فهمت من النقطة الرابعة دي أنك بتعامل الفتيس لسه معاملة الكوري.
ومنتظر منه أداء العربيات التانية اللي سوقتها قبل كدا ومش لاقي الأداء دا, فاناقم عليه.!
خد وقتك مع الفتيس وشوف أيجابياته وسلبياته, وخلي ال D للمود العادي,
ولو سواقتك كلها شد وجري وسحب وتجميع أمشي عال Ds

[Ahmed Amin]

2- احيانا مثلا بضطر اشيل رجلي من على البنزين علشان حد كسر عليا وبيعدي وبعدها بدوس تاني .. هو بيفهم اني بغير للغيار اللى بعده .. طبعا ده بيطلع عيني وبضطر اضغط اكتر علشان اخليه يرجع للغيار اللى قبله.

فتيس الأوروبي طريقة تعاملة مختلفة غير الياباني والكوري,
كل فتيس ليه مزايا وليه عيوب.

فتيس الأوروبي مثلاً عزمه أعلي, بيشيل وزن في العربية من غير مشاكل, ممكن تقطر بيه كارفان أو حتي عربية من غير مشاكل.
مفيش عربية صالون أوتوماتيك ياباني أو كوري تقطر عربية, ممكن تكسر الفتيس.!

أما الفتيس في اليابني والكوري أسهل في التعامل وسلس أكتر,
الأوروبي محتاج منك تفهم طريقة عمله الأول عشان الوظايف الزيادة اللي فيه زي ال Sport وال Snow Drive لأن دول مش موجودين في فتيس الياباني والكوري.
ولأن ال ECU بتاعت فتيس البيجو والستروين شغالة طول الوقت بتحسب طريقة دوسة رجلك علي بدال البنزين والسرعة اللي أنت ماشي عليها والغيار اللي العربية عليه.
فا لو أنت بتعدي واحد مثلاً زي ما وضحت وشيلت رجلك مرة واحدة ولاقيتها نقلت من الغيار التالت للرابع ودا ضايقك زي مانا فهمت من تعليقك,, دي طبعاً أنت هتفكرها مشكلة.
لكن حضرتك لو عرفت العربية بتفكر أزاي هتعرف تتعامل معاها صح.

العربية لو أفترضنا أنك كنت ماشي في رينج ال 50 ل 60 كيلو, ودوست عشان تجري شوية,,
بعدين جيت علي أول 70 شيلت رجلك عشان الطريق زحمة أو غرزة أتقفلت.
العربية هتنقل للرابع أوتوماتيك في اللحظة دي. طيب ليه ؟؟
عشان الرابع في الوضع الطبيعي والأقتصادي D بينقل للرابع علي 70 كيلو بالظبط.
وأنت لما شيلت رجلك العربية بتفكر أنك خلاص بطلت جري أو عديت الحاجة اللي كنت بتعديها, فا بتنقل أوتوماتيك لأقرب غيار عالي ممكن تمشي عليه موفر للبنزين ومريح للموتور.
أما لو فضلت دايس فهيا ممكن تفضل تشد وتحرق معاك علي التالت وتعدي ال 120 عليه.

ساعتها أنت هتفكر أيه دا أنا كنت بجري ويدوبك شيلت رجلي ولسه هكمل جري قامت ناقلة غيار, وهتضطر ساعتها تعمل كيك داون عشان تجمع سرعه وتجري تاني ودا هياخد وقت وهيخنقك.

يبقي ساعتها لو أنت عايز تجري من الأساس تجيب ال Sport mode لأنك مهما شيلت رجلك أو حطيتها العربية هتجري ومش هتنقل للرابع إلا علي 90 كيلو متر ودا لو أنت مش دايس جامد علي الدواسة كمان.
ومن أقل لمسة لبدال البنزين سواء علي سرعة وأنت ماشي علي السريع أو في وسط البلد, العربية هتنطلق بيك والتسقيط بتاعها أسرع من الوضع العادي D.
وهتلاقيها كمان لما بتيجي تهدي بتسفط الغيار بشكل أعنف, عشان يساعد بأنه يوقف العربية في وقت أقل مع الضغط الطبيعي علي الفرامل. فا يبقي دواسة الفرامل + ال Engine Brake.

بالنسبة لطريقة التعامل مع فتيس الستروين الأليزيه والبيجو ال 301 أنصحك تقرأ الرد دا,

http://www.nilemotors.net/Nile/374131-a.html#post3875140869

ودا كان رد للي لسه مبتدئ مع الفتيس الأوتوماتيك عموماً, والأوربي خصوصاً بتاع البيجو والستروين.

عشان ندخل في بقي تفاصيل ال Engine Brake وتسقيط الغيارات سواء بأمر منك أو من كمبيوتر العربية علي حسب دوسة رجلك علي الدواسة,
أقراء الردود دي,

http://www.nilemotors.net/Nile/387106-301-3.html

http://www.nilemotors.net/Nile/387106-301-4.html#post3875308810

http://www.nilemotors.net/Nile/396353-301.html#post3875345843

يارب تكون الردود مفيدة ليك, وتزود لك معلومات تريحك وتخليك متأقلم مع طبيعة الفتيس وتفهمه أكتر.

انا مشكلتي اني كنت راكب كوري قبل كده .. بصراحة فرق كبير بين الاتنين (لصالح الكوري) اداء الموتور والفتيس احسن بكتير من الاوروبي

لكن كل دي مش مشاكل .. ده تعود واسلوب سواقة مختلف

أنت كدا جبت زتونة الموضوع.
مبروك علي العربية وياريت النصايح اللي في الردود تفيديك ولو شوية,,
وحاول تستمتع بالعربية علي قد ما تقدر,,
بالتوفيق.

[الجنرال]

متشكر جدا ليه يا احمد ... ربنا يكرمك ويجعله فى ميزان حسناتك

فعلا اللى انت قلته ده مكنتش اعرفه اصلا ..

ربنا يكرمك وهحاول اطبق واتابع الفتيس على طول ان شاء الله