تجربة أضافة stp علي البنزين

[SYD]

السلام عليكم ورحمة الله وبركاته

من اول يوم سقطت فيه المكنة ال1400 وانا بفكر احط منظف انجيكشن علي البنزين عشان انظف الرشاشات مكان البلاوي الي كانت فيها لو تفتكروا موضوع حكايتي المفصلة مع السيات ابيزا

شك في الرشاشات
دخل الورشة جاب رشاش وركبه في السلندر الأولاني وبردو نفس النتيجة
بس الملاحظة بقي ان الرشاش طالع عليه كمية وساخة (زي مايكون رواسب او طين ولونه طبعا اسود)

من يومها وانا نفسي احط منظف انجيكشن وعصام الميكانيكي يقولي ملوش لازمة

كل ما تحصلي مشكلة اقول انا لازم احط منظف انجيكشن وارجع اكسل او حد يقلل من اهميته

انا مقتنع ان تانك البنزين هو بيت الداء
لو التانك متسخ او البنزين مش كويس هيسببوا مشاكل لا حصر لها

في النهاية وبعد تجربة تنظيف البوابة قولت مابدهاش وروحت معدي علي محطة موبيل on the run طريق اكتوبر واشتريت STP Complete Fuel System Cleaner
ثمنه 69 جنيه



ساعتها كان التانك عندي بعد ال3/4 وقبل النص بشوية
قولت انا هحط المنظف من غير ما افول عشان يبقي مركز

وبالفعل فتحت غطاء التانك وحطيت المنظف علي كمية البنزين الموجودة - تقريبا 28 لتر -
وروحت خابط مشوار من عند دريم لاند لحد الدقي ورجعت لحد الهرم تحديدا ميدان الرماية عشان افول العربية عشان اخف شوية المنظف
ودي كانت خطتي
اني اخليه مركز واخبط مشوار طوالي (لأني خدت الدائري من عند دريم لحد الدقي) وبعد كدة افول واخلص التفويلة بيه إن شاء الله

دخلت محطة موبيل on the run الرماية وفولت 92 وقولتله عبي التانك الأحتياطي (الأضافي)
لقيته وصل لحد 27 لتر ب 50 جنيه قولتله استوب

انا التانك عندي بعد ما رجعت من الدقي لحد الهرم كان تقريبا في النص بين النص وال3/4 يعني فاضل فيها 15 لتر + ال10 بتوع الأحتياطي يعني المفروض افول ب25 لتر

المهم حاسبت ومشيت من المحطة
انا اساسا كنت روحت الدقي عشان اقابل واحد زميلي في الشغل وفي نفس الوقت جاري وصاحبي
وصلته البيت وقعدنا شوية في العربية بنتكلم
وانا كل شوية اقوله
"انت شامم ريحة بنزين"
يقولي
"لا"
"انت شامم ريحة بنزين"
"لا"
"انت شامم ريحة بنزين"
"ااه"
روحت نازل جري من العربية وفاتح الباب ورا يمين وقعدت اشم
فكيت الكنبة وقعدت اشم

نزلت تحت العربية وببص
!!!!!!!!!!!!!!!!!!!!!!!!!!!!!!!!

العربية تحتها بقعة بنزين كبيرة
تحت التانك بالظبط

وقتي
روحت فاكك الكنبة تاني

وفاتح شنطة العربية
جبت العدة

وروحت فاكك ناحية الطرمبة
لما فكيت الغطاء المدور المعدني الأسود

لقيت ترشيح بنزين حوالين الطرمبة

المفروض كنت اربط الغطاء المدور

افتكرت كلمة احمد مبارك بتاعة السهم وعدلة الطرمبة
قولت ياواد طب ماتفك بالمرة اعدل الطرمبة واربط مرة واحدة

وكانت المفاجأة

اول لما فكيت
لقيت نافورة بنزين ضربت والبنزين عمال يعلي ويشر من حوالين التانك وبدأ يغطي ايدي والطرمبة
لدرجة انه عبي مكان الفيشة
وبدأت افقد السيطرة

روحت في ثانية قولت بلا عدل بلا هباب
فكرة منيلة (فكرتي طبعا اني افك واعدل وانا مفولها علي تمة عينها مع كامل احترامي الشديد لرأي احمد مبارك)

وبدأت اربط زي المجنون

احب اقولكم علي حاجة
لما فكيت الطرمبة عشان انظفها - قعدت افك فيها كتير اوي - لو تفتكروا في التقرير تنظيف قلب طرمبة البنزين - بالصور

6- هتفك الغطاء الرابط للعوامة ودة رقم 1 في الصورة ومربوط قلاوظ زي غطاء الجركن
فكه بصراحة صعب حبتين لأنه مربوط بأحكام شديد
وانا معلم علي اماكن الفك بالمفك العادة
يستحسن تستخدم حاجة غير المفك يكون ليها حرف حنين شوية عشان ماتكسرش الغطاء

وللأسف وانا بركب استهونت واكتفيت بربطها لفتين او تلاتة وانتهينا
وكان ساعتها ايهاب اسماعيل windsofchange ليه رأي اني اسيب الغطاء مفكوك لحد لما افول واشوفها هتجيب بنزين ولا لاء وبعدها ابقي اركبه

ورغم اني فولت بعد ماركبت الطرمبة لكن يبدو اني ماشمتش كويس

المهم
ان بسبب البنزين انه غرق الغطاء والعوامة والدنيا كلها
فالقلاوظ بتاع الغطاء بقي خفيف وانا بربط ودة اداني الفرصة اربطه باحكام شديد جدا جدا زي الفبريكة
لأني لفيت الغطاء حوالي 8 او 9 لفات كاملة من الربط
غير طبعا عامل الخوف لأني كنت واقف في بركة بنزين بجد وكنت خايف موت حد يعدي جمبي مولع سيجارة

وبالفعل
صاحبي اقترح عليا نزق العربية نرجعها ورا بعيد عن البنزين
منها أأمن
ومنها نختبر ونشوف هينزل بنزين تاني ولا لاء

بالفعل الحمد لله مالقيتش اي أثر لبنزين تاني
وفضلت سايب الغطاء بتاع الطرمبة مفتوح (عشان اطير كل البنزين) وجيبت مناديل ورقية وقعدت انشف البنزين من علي العوامة ومن علي التانك
(بسبب البنزين لما نظف التانك حوالين الطرمبة لقيت السهم الي كان بيقولي عليه احمد مبارك)

بس المشكلة اني بشم ريحة بنزين جوة العربية
انا عارف انه بسبب البنزين الي وقع ساعة لما فكيت
اتمني الريحة تروح بسرعة

المهم
نرجع لموضوع منظف الأنجيكشن

الحمد لله بمجرد ما حطيته ومشيت بيه حوالي 5 كم بدأت احس بالفرق وهو ان العربية بقي سحبها احسن بكتير
مؤشر البنزين في الطابلوه بدأ يظبط لما فولت (بقي بيوصل للشرطتين الي في الأخر خالص)

منتظر إن شاء الله لما التانك يخلص
واغير فلتر بنزين
وارجع اقولكم باقي التقرير
انا يادوب لحد دلوقتي مشيت بيه حوالي 25 كم وهو مركز
و100 كم وهو مخفف بعد التفويلة

اشوفكم قريبا إن شاء الله

والله المستعان
،
،

[Ahmed_Gallant]

السلام عليكم
دايما فى زيت وبنزين وشحم فى كل ما موضوع يابنى اهمد بقى روشتنا معاك
المهم يا سيدى انا مستنى منك التقرير والنتايج المحسوسه من الاستخدام
تانى حاجه كنت عايز اعرف ايه اللى خلى البنزين يخرج يغرق الدنيا زى ما بتقول مش المفروض ان التانك لما يكون متفول يبقى مظبوط على فتحه الطرمبه وكده كده الطرمبه واخده الحيز بتاعها
تالت حاجه فى اى دخنه طالعه من العربيه سوده او اى تغيير فى الاربى ام
رابع حاجه شكلى هأجل موضوع الكهربائى اسبوع كمان لان عندى نتورك يوم الجمعه اللى جايه والسبت كمان

[SYD]

السلام عليكم
دايما فى زيت وبنزين وشحم فى كل ما موضوع يابنى اهمد بقى روشتنا معاك

مانت عارف مفيش حاجة كدة بتمشي سالكة
لازم يكون فيها حوارات ومشاكل

المهم يا سيدى انا مستنى منك التقرير والنتايج المحسوسه من الاستخدام

لحد دلوقتي انا حاسس ان العربية سحبها تحسن نوعا ما
وانشاء الله بعد انتهاء التانك والتفويلة الجاية هقولكم التقرير النهائي

تانى حاجه كنت عايز اعرف ايه اللى خلى البنزين يخرج يغرق الدنيا زى ما بتقول مش المفروض ان التانك لما يكون متفول يبقى مظبوط على فتحه الطرمبه وكده كده الطرمبه واخده الحيز بتاعها

بص يا سيدي
انا فولتها لحد لما قالت جاي (يعني علي الأخر علي الأخر)
فطبيعي ان لما الطرمبة اتفكت البنزين ماصدق لقي فتحة يخرج منها
بس الفتحة طبعا كبيرة شوية
وبالتالي طفح من الطرمبة
وغرق التانك (ماوصلش طبعا لأرضية العربية من جوة والا كانت هتبقي مشكلة)
ونزل من علي جوانب التانك وغرق الأرض تحت العربية

تالت حاجه فى اى دخنه طالعه من العربيه سوده او اى تغيير فى الاربى ام

ولا اي حاجة من دي
الدخنة صافية
العادم ريحته مقبولة
بتكثف بخار مياة وانا بسخنها الصبح والحمدلله بفضل الله
نوعا ما ماسورة الشكمان نظفت ومش بتهبب ايدي لما بسد الشكمان

رابع حاجه شكلى هأجل موضوع الكهربائى اسبوع كمان لان عندى نتورك يوم الجمعه اللى جايه والسبت كمان

ما يهمكش يا باشا
انا كدة كدة غير مستعد حاليا لأي صيانات تاني
لأني عندي يوم الجمعة الجاية زيارة لعصام هيعملي شغل في العفشة
وهعملكم بيها تقرير انشاء الله لأن المهندس ايهاب في انتظار نتيجة ظبط العفشة عشان حوار كدة بينا

والله المستعان
،
،

[alzelafy]

ان شاء الله يا سيد باشا شركه سيات تكون على علم بالمجهود الخارق اللى انتا بتعملو امن اجل تطوير منتجاتهاو يبعتولك جواب شكر مصحوب بحته زيرو 2012

[agaty1st]

من يومها وانا نفسي احط منظف انجيكشن وعصام الميكانيكي يقولي ملوش لازمة
نصيحه متسمعش كلام اي ميكانيكي في المواضيع دي مهما كان شاطر و خصوصا في مواضيع الزيت و الأضافات دي


في النهاية وبعد تجربة تنظيف البوابة قولت مابدهاش وروحت معدي علي محطة موبيل on the run طريق اكتوبر واشتريت STP Complete Fuel System Cleaner
ثمنه 69 جنيه
المنظف ده فعلا أكتر من ممتاز و انا بستعمله كل فتره و ده مش بينظف الكربراتير و الأنجكشن بس ده بينظف كمان البوجيهات و الصبابات و وش البساتم من الكربون اللي عليهم و في كليب على الموقع بتاع STB مصورين فيه المكنه من الداخل قبل و بعد استخدام الأضافه



ساعتها كان التانك عندي بعد ال3/4 وقبل النص بشوية
قولت انا هحط المنظف من غير ما افول عشان يبقي مركز

وبالفعل فتحت غطاء التانك وحطيت المنظف علي كمية البنزين الموجودة - تقريبا 28 لتر -
وروحت خابط مشوار من عند دريم لاند لحد الدقي ورجعت لحد الهرم تحديدا ميدان الرماية عشان افول العربية عشان اخف شوية المنظف
ودي كانت خطتي
اني اخليه مركز واخبط مشوار طوالي (لأني خدت الدائري من عند دريم لحد الدقي) وبعد كدة افول واخلص التفويلة بيه إن شاء الله
مع أحترامي للخطه بس ألتزم بخطة المصنع أفضل لأن تركيزه الكبير بيسبب تأكل في أجزاء المحرك لأنه يحتوي على مواد زي مية النار كده فالتركيز على التفويله بيكون محسوب بحيث أنه ميضرش المحرك


اول لما فكيت
لقيت نافورة بنزين ضربت والبنزين عمال يعلي ويشر من حوالين التانك وبدأ يغطي ايدي والطرمبة
لدرجة انه عبي مكان الفيشة
ربنا يكون في عونك بس أعتقد مفيش علاقه بين المنظف و فوران التانك

،

[SYD]

شكرا هيثم باشا علي مشاركتك
بس انا مش بقول ان المنظف له علاقه بطفح البنزين
السبب اني كنت مفول علي الأخر وقمت فاكك الطرمبة فطبعا البنزين ماصدق لقي حتة يخرج منها ورااح مغرق الدنيا

وبالنسبة للتركيز
انا بردو التزمت بتوصية المصنع - مكتوب عليها انه يجوز يتحط علي half tank - ومشيت بيه شوية
وبعدها انا فولت عشان اخف تركيزه

بس الحمد لله اداءه فعلا كويس

والله المستعان
،
،

[ehab_mansour]

بخصوص المنظف فاتكلمنا فيه قبل كده انا و انت
ولكن بخصوص موضوع قفل غطاء الطلمبة فده كان لازم يحصل ان ينزين ينزل يغرق الدنيا كده لأنك مقفلتهاش كويس و ده كان حصل معايا في الابيزا برضه و حاول وقتها اكتر من مرة ميكانيكي يربطهالي كويس و مفلحش فيها و ريحت دماغي و بقيت أفول العربية لحد اول فصل لمسدس و بس

ياريتك تكون ربطتها كويس لأن ريحة البنزين دي مقرفة جدا و كمان مبتعرفش تفول العربية كويس
وربنا ييسرلك الحال

[SYD]

بخصوص المنظف فاتكلمنا فيه قبل كده انا و انت
ولكن بخصوص موضوع قفل غطاء الطلمبة فده كان لازم يحصل ان ينزين ينزل يغرق الدنيا كده لأنك مقفلتهاش كويس و ده كان حصل معايا في الابيزا برضه و حاول وقتها اكتر من مرة ميكانيكي يربطهالي كويس و مفلحش فيها و ريحت دماغي و بقيت أفول العربية لحد اول فصل لمسدس و بس

ياريتك تكون ربطتها كويس لأن ريحة البنزين دي مقرفة جدا و كمان مبتعرفش تفول العربية كويس
وربنا ييسرلك الحال

والله يا بشمهندس انا قفلتها نوعا ما كويس الحمد لله
بس حاليا مش هقدر اقيم مدي الأحكام
الحمد لله البنزين منع
والريحة كمان منعت
بس انا مضطر استني لحد لما التانك يخلص (عشان المنظف)
وبعدها انشاء الله هفول بنفس منطقي السابق (افول التانك الأساسي - وبعدها افول التانك الأحتياطي)

بالنسبة للأحكام الربط
انا ممكن افكها تاني واحط شحم علي قلاووظ الغطاء عشان يسهل الربط
بس عموما البنزين حل محل الشحم وسهلي الربط اوي الحمد لله
انا فضلت ادق عليها لحد لما خلاص مابقاش فيها ربط تاني وخوفت بقي بصراحة اشرخ الغطاء وخصوصا ان في الخطة انشاء الله تغيير طرمبة البنزين لأن بجد يبدو عليها الضعف والتهييس
بلاحظ نتشة كدة صغيرة مني وانا ماشي بالعربية وشاكك انها من الطرمبة

والله المستعان
،
،

[SYD]

جاري تجربة الأستهلاك
مدي تغيير معدل الأستهلاك بالمنظف من عدمه

بس انشاء الله يكون في توفير
لأني لاحظت اني عملت لحد دلوقتي 150 كم من التانك الأحتياطي ولسة مادخلتش علي التانك الأساسي

بس بردو مش متأكد لأن المؤشر عندي مش بيبين كمية الأستهلاك وقتي
لازم تبات واستني لتاني يوم عشان احكم علي الأستهلاك
لما انزل النهاردة انشاء الله هتأكد
ولما اوصل الشغل انشاء الله هقولكم علي الأستهلاك

والله المستعان
،
،

[matrix012]

معلش شوية اسئله غبيه شويه
ينفع المنظف ده مع الموتور الهاف انجيكشن ؟
افول التانك على الاخر وافضى المنظف ده فى التانك ؟ ينفع بعد ما افول 80 ؟؟؟؟؟
هل لما افضى المنظف فى التانك هينضف الموور والكربراتير والبوجيهات ؟ يعنى مش هضطر انى ارش اسبراى على الكربراتير بعد كده ؟؟؟؟؟
لازم امشى مشوار طويل شويه بعد ما افضى المنظف علشان النظافه تكمل !! ؟؟
المنظف ده فعال فى موضوع انى كل ما اغير زيت موتور وبعديها بيومين الاقى الزيت اسود مهما كان نوع الزيت ؟؟؟؟؟؟؟
وشكرا وربنا يستر طريقى وطريقكم

[ehab_mansour]

المنظف ده بيضاف لأيه ؟ للبنزين طبعا
يبقي المنظف ده ليس له علاقة سوي بدورة البنزين عموما و مكوناتها و هي :-
1- التانك و تنظيفه و فك الرواسب الغير مرغوب فيها
2- طلمبة البنزين ولا يؤثر عليها
3- فلتر البنزين و أعتقد انه لو فيه شوائب يستطيع المنظف فكها و خروجها محروقة مع البنزين هيحصل و لكن لو فيه شائب كبيرة عالقة مش هيعمل معاها حاجه
4- مواسير البنزين عموما لو فيها مواد غير مرغوب فيها بتتفتت و تتحرق مع البنزين
5- الرشاشات و دي اهم جزء بينظفه المنظف ده لأنه من الصعب تنظيفه سوي بجهاز الألتراسونيك و ده أخر جزء له علاقة بالبنزين و دورته

5- في العربيات الكاربيراتير و النصف انجيكشن (ذات الرشاش الواحد) فأعتقد انها بتنظف هذا الرشاش و ايضا بتنظف الجزء الخاص برش البنزين في الكاربيراتير و اللي معرفش اسمه ايه و شكرا

ممكن بعد كده يكون له تأثير علي البوجيهات و لكن لا أعتقد ذلك لأن البوجيهات بتتنظف بالحرق و بدرجات حرارة عالية جدا داخل المحرك ولا تدخل لأي مواد في هذا الموضوع

اي كلام أخر هيقولوه فده دعاية فقط وليس له وجه من الصحة ده في اعتقادي و استنتاجي الشخصي و التجربة

ملحوظة أخري وهي ان دائما المنظفات دي بيكون فيها نسبة محسن للبنزين و ده بيجعل العربية أفضل وقت استخدام المنظف و بشكل كبير عن بعد استخدامه (أكنك حطيت بنزين 95 بدلا من 92 )

[agaty1st]

جاري تجربة الأستهلاك
مدي تغيير معدل الأستهلاك بالمنظف من عدمه

بس إن شاء الله يكون في توفير
لأني لاحظت اني عملت لحد دلوقتي 150 كم من التانك الأحتياطي ولسة مادخلتش علي التانك الأساسي

بس بردو مش متأكد لأن المؤشر عندي مش بيبين كمية الأستهلاك وقتي
لازم تبات واستني لتاني يوم عشان احكم علي الأستهلاك
لما انزل النهاردة إن شاء الله هتأكد
ولما اوصل الشغل إن شاء الله هقولكم علي الأستهلاك

والله المستعان
،
،

يا باشا هايفرق معاك جامد في الاستهلاك و الأداء و صوت الموتور و أتفرج على الكليب ده

http://www.stp.com/maintenance/see-the-difference

[matrix012]

المنظف ده بيضاف لأيه ؟ للبنزين طبعا
يبقي المنظف ده ليس له علاقة سوي بدورة البنزين عموما و مكوناتها و هي :-
1- التانك و تنظيفه و فك الرواسب الغير مرغوب فيها
2- طلمبة البنزين ولا يؤثر عليها
3- فلتر البنزين و أعتقد انه لو فيه شوائب يستطيع المنظف فكها و خروجها محروقة مع البنزين هيحصل و لكن لو فيه شائب كبيرة عالقة مش هيعمل معاها حاجه
4- مواسير البنزين عموما لو فيها مواد غير مرغوب فيها بتتفتت و تتحرق مع البنزين
5- الرشاشات و دي اهم جزء بينظفه المنظف ده لأنه من الصعب تنظيفه سوي بجهاز الألتراسونيك و ده أخر جزء له علاقة بالبنزين و دورته

5- في العربيات الكاربيراتير و النصف انجيكشن (ذات الرشاش الواحد) فأعتقد انها بتنظف هذا الرشاش و ايضا بتنظف الجزء الخاص برش البنزين في الكاربيراتير و اللي معرفش اسمه ايه و شكرا

ممكن بعد كده يكون له تأثير علي البوجيهات و لكن لا أعتقد ذلك لأن البوجيهات بتتنظف بالحرق و بدرجات حرارة عالية جدا داخل المحرك ولا تدخل لأي مواد في هذا الموضوع

اي كلام أخر هيقولوه فده دعاية فقط وليس له وجه من الصحة ده في اعتقادي و استنتاجي الشخصي و التجربة

ملحوظة أخري وهي ان دائما المنظفات دي بيكون فيها نسبة محسن للبنزين و ده بيجعل العربية أفضل وقت استخدام المنظف و بشكل كبير عن بعد استخدامه (أكنك حطيت بنزين 95 بدلا من 92 )

دايما ردودك وافيه ومفيده جدا الله ينور عليك يا هندسه
شوف بقى حضرتك فاضى امتى علشان نتقابل

[ehab_mansour]

دايما ردودك وافيه ومفيده جدا الله ينور عليك يا هندسه
شوف بقى حضرتك فاضى امتى علشان نتقابل

انا مش ناسي مقابلتنا و لكن اعذرني لأن عندي زنقة شغل ربنا الاعلم بيها يعني نايم امبارح الساعه 2 صباحا و كمان المفروض هسافر الاسبوع ده و مش عارف اعمل ايه و لكن صدقني وقتما تتيح الفرصة هكلمك ان شاء الله
و اسف مرة تانية

[SYD]

المنظف ده بيضاف لأيه ؟ للبنزين طبعا
يبقي المنظف ده ليس له علاقة سوي بدورة البنزين عموما و مكوناتها و هي :-
1- التانك و تنظيفه و فك الرواسب الغير مرغوب فيها
2- طلمبة البنزين ولا يؤثر عليها
3- فلتر البنزين و أعتقد انه لو فيه شوائب يستطيع المنظف فكها و خروجها محروقة مع البنزين هيحصل و لكن لو فيه شائب كبيرة عالقة مش هيعمل معاها حاجه
4- مواسير البنزين عموما لو فيها مواد غير مرغوب فيها بتتفتت و تتحرق مع البنزين
5- الرشاشات و دي اهم جزء بينظفه المنظف ده لأنه من الصعب تنظيفه سوي بجهاز الألتراسونيك و ده أخر جزء له علاقة بالبنزين و دورته

5- في العربيات الكاربيراتير و النصف انجيكشن (ذات الرشاش الواحد) فأعتقد انها بتنظف هذا الرشاش و ايضا بتنظف الجزء الخاص برش البنزين في الكاربيراتير و اللي معرفش اسمه ايه و شكرا

ممكن بعد كده يكون له تأثير علي البوجيهات و لكن لا أعتقد ذلك لأن البوجيهات بتتنظف بالحرق و بدرجات حرارة عالية جدا داخل المحرك ولا تدخل لأي مواد في هذا الموضوع

اي كلام أخر هيقولوه فده دعاية فقط وليس له وجه من الصحة ده في اعتقادي و استنتاجي الشخصي و التجربة

ملحوظة أخري وهي ان دائما المنظفات دي بيكون فيها نسبة محسن للبنزين و ده بيجعل العربية أفضل وقت استخدام المنظف و بشكل كبير عن بعد استخدامه (أكنك حطيت بنزين 95 بدلا من 92 )

الله ينور عليك يا باشمهندس
مفيش رد احسن من كدة ممكن يتضاف

هو فعلا خاص فقط بدورة البنزين وهو حتي من اسمه Fuel System Cleaner
يعني منظف لنظام البنزين
تانك - فلتر - طرمبة - مواسير - رشاشات
وفي فيديو علي الموقع بيوضح انه بينظف كمان غرفة الحريق والأجزاء الداخلية للموتور الي بيمر فيها البنزين
والمنظف عبارة عن مواد كيميائية بتفتت اي رواسب او شوائب في البنزين
وانا اعتقد انه يجب تغيير الفلتر بعد انتهاء مفعول المنظف

شكرا علي الردود والمشاركة يا بشمهندس

والله المستعان
،
،