مشكلة غريبة عاملة زى مسائل الرياضة فى ابيزا 98

[M.Hassan47]

انا ياجماعة عندى مشكلة رخمة اوى فى العربية وغريبة موووت

انا امبارح كنت ماشى بالعربية ومكنش فيها بنزين المهم شحطت وفضلت تقطع لحد ماوقفت خالص
المهم جبتلها حوالى اربعة لتر بنزين ودورت ومستنتهاش تطلع الهوا ولا حاجة مشيت علطول مسافة بتاعت كيلو وفضلت بردو تقطع منى وراحت واقفة خالص منى بقى
ادور مادورش بعت جبت كمان اربعة لتر دارت وتقعد حوالى خمس ثوانى وتروح مبطلة وبعدها بعشر دقايق لما تدور وتعمل نفس الحوار ده

اتصلت باميكانيكى ولعب فى دماغى ان ممكن يكون المفتاح بتاع العربية اتخبط ولا حاجة والشفرة مش شغالة عشان كده بدور وتفصل المهم بشوف المفتاح كده وهو متلكك اصلا لقيته اتكسر وكده كملت بقى سبت العربية مكانها ورحت اطلع على المفتاح جابلى كافر جديد ونقل الشفرة وكله تمام ورحت عشان اجرب العربية مبقتش بدور خالص المهم قطرتها لحد البيت وقاعد اتفرج عليها لعارف العيب من المفتاح ولا من العربية

والراجل بتاع المفاتيح اما كشف على الشفرة لقاها شغالة وقالى اتأكد من العربية
طيب دلوقتى لو جبت ميكانيكى مهو عشان يكشف هايحتاج يدور العربية وممكن يكون العيب من المفتاح

مبقتش عارف ابدأها منين ولا اعمل ايه هاتجنن خلاص
حد يقولى ياشباب

[M.Mostafa80]

هتاخد العربيه لأقرب مركز ويحطها على الجهاز هيعرف اذا كان فى مشكله فى وحده التشفير بتاعت المفتاح ولا فى حاجه تانيه لأن كدا ممكن تكون لقدر الله طلمبه بنزين وفى الحاله دى بردو هيقدر يعرف ويقولك ربنا يوفقك

[ehab_mansour]

السلام عليكم

معلش ليا سؤال هيا العربية كام سيسي وحقن الكتروني(انجيكشن) ولا عادي(كاربيراتير) ولما بتفتح الكونتاكت بتسمع صوت طلمبة البنزين ولا لأ ؟؟؟

رد علي الأسئلة دي وممكن مع بعض نقدر نعرف ايه الحل او ايه اللي معطلها عشان عايز اخلصك من مشكلة المفتاح دي الأول

[M.Hassan47]

يامحمد منا بردو مش عايز بقى اجيب عربية وحمل العربية عليها واوديها واروح واجى بيها انا جبتها لحد البيت بالعافية

هى 1400 يا ايهاب وانجكشن والصوت بتاع طلمبة البنزين شغال معنى كده انها متحرقتش
انا عايز افهم هى الشفرة لما تتنقل من كافر لكافر تانى ايه المشكلة فى كده

[ehab_mansour]

تمام كده طيب الفلاش اللي بيعملو عداد الكيلومتر الكبير الديجيتال اول ما تفتح الكونتاكت واللي بيظهر فيه السيرفس بتاع العربية ده لمدة حوال 5 ثواني بيحصل عادي وبعد السيرفس بيديك عداد الكيلومتر لو ده بيحصل طبيعي لما تفتح الكونتاكت يبقي هقلك علي حاجه تبص عليها وهي انك تروح تفتح الكبوت وانت فاتح الكونتاكت وتسمع فيه صوت زنه خفيفه كده بيطلع من تحت عمة الهواء(اللي فيها فلتر الهواء) ولا لأ لو بيطلع الصوت ده يبقي بوابة الإنجيكشن بتفتح طبيعي جدا وناقص انك تشوف ضغط البنزين لو ما بيفتحش وانت مش سامع صوت حاجه يبقي البوابة ما بتفتحش ممكن تشوف الموضوع ده دلوقتي كده وقلي وهل عندك امكانية وعده زي مفك صليبة وبنسه ولقمه مقاس 10 عشان تفك الغطاء اللي علي الموتور وعمة الهواء وتشوف وانت فاتح الكونتاكت فيه بنزين واصل للرشاشات ولا لأ
معلش انا طولت عليك بس لو انت قريب مني كان ممكن نشوفها سويا لكن انا في عين شمس وانت في الجيزة وربنا يوفقك حاول بس كده ولو فيه حاجه مش فاهمها قلي ونتكلم ماسنجر لو امكن

[ehab_mansour]

معلش نسيت اقلك ان لو الفلاش بتاع العداد الديجيتال شغال مضبوط مع فتح الكونتاكت والبوابة بتفتح يبقي كده الكنترول شغال تمام والمفتاح سليم والشفرة سليمة والله اعلم وناقص فقط البنزين عشان تدور

[M.Hassan47]

شكرا يا ايهاب على ردك السريع
والعداد بيشتغل عادى بعد الخمس ثوانى تقريبا
وهاشوف كده حوار البوابة ده بكره

[M.Mostafa80]

ربنا يكرم والكابل يجى وساعتها هيبقى عندكو ديلفرى تشخيص أعطال
بس أدعولى

[M.Mostafa80]

انا فاكر أن انت قلت انك فى الجيزه تمام كدا
لو كدا بقى فى واحد فى الشارع بتاع الحى اللى فى بين السريات الشارع بتاع الورش أكيد عارفه لسه فاتح جديد شغال فى الفولكس والراجل دا كان شغال مع المهندس سيد اللى شغال فى شارع السودان وأحتمال يبقى عندو الجهاز وأهو هيبقى قريب منك ويظبطلك الدنيا

[ehab_mansour]

كده ان شاء الله المفتاح والشفرة مافيش فيهم مشكلة لأن لو فيهم مشكلة الكنترول مش هيقوم اصلا ولا العدادات هتشتغل

انت عليك وعلي اي ميكانيكي ييجي يشوفلك فيه بنزين في خرطوم البنزين ولا لأ وده وانت فاتح الكونتاكت ثانيا بوابة الإنجيكشن بتفتح طبيعي ولا لأ مع فتح الكونتاكت و كمان يشفلك فيه اشعال جاي للبوجيهات من الموبينه ولا لأ وبكده يبقي مافيش حجه ليها انها تدور وربنا يسهلك الأمر ولما تخلص عرفنا ايه اللي حصل ......

[ehab_mansour]

ربنا يكرم والكابل يجى وساعتها هيبقى عندكو ديلفرى تشخيص أعطال
بس أدعولى

ايه الحلاوة دي انت طلبت تشتري كابل ولا ايه .............. اه من ورايا طيب ماشي بالتوفيق ان شاء الله يا محمد منورنا في القسم ياباشا

[M.Mostafa80]

ايه الحلاوة دي انت طلبت تشتري كابل ولا ايه .............. اه من ورايا طيب ماشي بالتوفيق ان شاء الله يا محمد منورنا في القسم ياباشا

ياباشا مش من وراكولاحاجه دا مجرد أمل قد يتحقق أو لا هو انا أقدر اعمل حاجه من غير ما أقول لحبايبى بردو
وياباشا القسم منور بصحابه

[fadynabil]

ولا أنا مبسوط أوي منكم يا شباب الــ VW منورين والله فعلا الله يرحم أيام محمد إبيزا ،، فكرتوني بالمواضيع بتاع زمان
ويارب المشكله تتحل ويكون الموضوع بسيط ،،، بصراحه أنا ١٣٠٠ كربراتير فمش هقدر أفيدكم بمعلومات بس أنا متابع وفرحان أوي

وشكر خاص لأستاذ إيهاب منصور و m.mostafa80

بجد إنتوا عمركم ما إتأخرتوا عن مساعدة حد وربنا يوفقكم في حل المشكله

[M.Hassan47]

والله عندك حق يافادى فين ايام محمد ابيزا الراجل ده فعلا كان معايا من اول ماجبت العربية وكان معايا فى كل مشكلة لحد ماتخلص ومن يومها والقسم هدى عن الأول بكتير

المهم ياشباب اللى حصل كالتالى الصبح وددتها للكهربائى ووصلنا ببطارية ومدارتش بردو المهم فتحنا الطلمبة وشلنا الخرطوم لقيناها شغالة عادى بس الغريب والمفجأة انها طلعت ميه على بنزين المهم الكهربائى قالى كده الكهربا شغالة بتاعت العربية فارحت جبت ميكانيكى تعبان كده راح فاكك فلتر البنزين ونضفه وفضل بقى يسحب من التانك لحد ماطلع الميه وراح حاطط بقى بنزين بعد كده كشفنا على الخراطيم اللى بتودى للموتور لقناها بطلع بنزين عادى خالص ومفيش مشكلة وبردو مش عايزة تدور جه الراجل بتاع المفاتيح انا كنت فاكره هايشوف الكنترول زى برنامج الأعطال لكن طلع معاه جهاز صغير كده بيخش بيه ويعرف الكنترول على المفتاح وعشان تزيد العقد العربية طلبت البن كود وطبعا انا مش عارفه ولا الراجل فلحل قالى الإيمو وحوارات كتيرة كده فانفض واعتبرته مجاش اصلا
فانا بكره هانضف كده الرشاشات عشان تطلع الميه اللى فيها المهم ان الميكانيكى ده قالى العربية محتاجة بس تتوصل ببطارية وتفضل تدورها كذا مره عشان الرشاشات تنطر الميه وهاتدور عادى وانا مابقتش فاهم حاجة خالص وزهقت

المهم دلوقتى هو انا عايز اعرف المنظف بتاع الإنجكشن او الكربراتير ده اللى هانضف بيهم الرشاشات مش اسمه بردو wd40
تقريبا كده هو ازرق ومزيل للصدا

ويامحمد لو جبت الكابل يبقى اقولك مبروك لأن الميكانيكى بتاعى كان بيدور عليه ولقاه غالى جدا جدا بيعدى جامد فاجاب الصينى تقريبا رخيص وشغال معاه زى الفل

المهم بقى ساعدونى فى المسألة دى
[caution]
تنبيه بمخالفة القاعدة رقم 6 بند أ
ممنوع الكتابة باللون الأحمر
الرجاء مراجعة قوانين المنتدى
______________________
مشرف الأوروبى 1[/caution]

[ehab_mansour]

السلام عليكم

كده تقريبا انت خلصت نصف الحل وهو انك نضفت دورة البنزين لحد الموتور وناقص انك تنضف الرشاشات بالماسورة اللي قبلها وكمان بوابة الإنجيكشن وعشان تكون عارف انت فعلا محتاج wd40 لتنضيف الرشاشات هتتفك عادي بالماسورة بتاعتها وتنظفها و أنصحك تجيب ميكانيكي كويس فاهم عشان يعرف يعمل الحوار ده وبعدين تفك كمان البوجيهات وتغيرها بالمرة وتتأكد من عمل الموبينه وكابلات الكهرباء برضه بالمرة كل ده الميكانيكي هيبص عليه ويتأكد انهم مافيش فيهم مشكلة ولما كل ده يبقي تمام جرب ببطارية سليمة ودور وان شاء الله هتدور بدون اي مشاكل وربنا يوفقك وتخلص من الحوار ده

وما تنساش تبقي تعرفنا أخبارك اول بأول واحنا تحت امرك في اي حاجه نقدر نساعد بيها