128 بتسخن مع السرعات العالية

[zenger]

هتزيد ازاى و هى واقفة فى مكانها لازم تكون ماشية علشان يكون فى عملية حرق و يكون بالطبيعى فى عملية اخراج العادم اللى هى فيها مشكلة اصلا فكل ما تزود السرعة بتزيد كمية الحتراق جوا الموتور و معاها بتزيد كمية العادم اللى مش بتخرج بشكل سليم اصلا فلازم تكون ماشية

[semsem_uno]

موضوع سخونة ال28 الشائع وبدون مراجعة الاخوة الاعضاء لانهم قالوا كل حاجة ممكن يكون السبب هو الباك بريشر بتاع غازات العادم مابتخرجش بسهولة من غرف الاحتراق وبتعمل فقد في القدرة وسخونة للمحرك وبالاخص كلما رفعنا عدد اللفات
انت ممكن تكون غيرت الموتور بموتور اكبر يعني العربية كانت 1100 وبقت 1300 والفرن والشكمان بيجمع علي ماسورة واحدة مش ماسورتين ..دة يسخن العربية لانة بيعمل موجات متضاربة من غازات العادم تعوق سرعة خروجها ..لو كدة يبقي لازم تغير الفرن من احادي لثنائي ..اما لوكانت العربية زي ماهي وما غيرتش فيها حاجة يبقي راجع علي مواسير العادم مايكونش فيها ضيق او انسداد..لو كل دة سليم يبقي لازم يتعمل كشف علي وش السلندر والبلوك باستخدام برادة الحديد الممغنطة ممكن يكون شرخ بسيط بس دة بيصاحبة زيادة في ضغط دورة التبريد لهروب غازات الاحتراق الي الدورة وممكن يكون برضة انبعاج او تقوس وش السلندر او البلوك نتيجة زيادة الحرارة وبيكون نفس السبب..مع افتراض ان دورة الاشعال سليمة وبحالة جيدة وان الكربراتير ما حدش لعب فية والخليط مضبوط وماحدش فتي وقال نغير البيكات علشان توفر بنزين بمقاس اقل

والله استاذ ما شاء الله
عمرها ما جت في دماغي
فعلا المنفولد بتاع ال1300 غير ال1100

[zakiali]

موضوع سخونة ال28 الشائع وبدون مراجعة الاخوة الاعضاء لانهم قالوا كل حاجة ممكن يكون السبب هو الباك بريشر بتاع غازات العادم مابتخرجش بسهولة من غرف الاحتراق وبتعمل فقد في القدرة وسخونة للمحرك وبالاخص كلما رفعنا عدد اللفات
انت ممكن تكون غيرت الموتور بموتور اكبر يعني العربية كانت 1100 وبقت 1300 والفرن والشكمان بيجمع علي ماسورة واحدة مش ماسورتين ..دة يسخن العربية لانة بيعمل موجات متضاربة من غازات العادم تعوق سرعة خروجها ..لو كدة يبقي لازم تغير الفرن من احادي لثنائي ..اما لوكانت العربية زي ماهي وما غيرتش فيها حاجة يبقي راجع علي مواسير العادم مايكونش فيها ضيق او انسداد..لو كل دة سليم يبقي لازم يتعمل كشف علي وش السلندر والبلوك باستخدام برادة الحديد الممغنطة ممكن يكون شرخ بسيط بس دة بيصاحبة زيادة في ضغط دورة التبريد لهروب غازات الاحتراق الي الدورة وممكن يكون برضة انبعاج او تقوس وش السلندر او البلوك نتيجة زيادة الحرارة وبيكون نفس السبب..مع افتراض ان دورة الاشعال سليمة وبحالة جيدة وان الكربراتير ما حدش لعب فية والخليط مضبوط وماحدش فتي وقال نغير البيكات علشان توفر بنزين بمقاس اقل

ماشاء الله .. حضرتك عندك علم مش عند أي حد .. أكيد حضرتك مهندس ميكانيكا .. صح ؟؟؟

[Egyzizo]

الموضوع ده كان جامد قوى ..
وأنا دورت عليه لأن المشكلة دى بدأت تحصل معايا ..
العربية 128 موديل 1986 ، 1100 سى سى ، لما أزود السرعة عن الـ 80 ، مؤشر الحرارة يقترب من المنطقة الحمراء ولما أنزل ألاقى المياه بتغلى فى القربة، والكلام ده جديد وماكانش بيحصل قبل كده.

اللى حصل معايا إنى من حوالى شهرين حصل تطحين للزيت وغيرت جوان وش السلندر ، والميكانيكى قال لى ان وش السلندر فيه بارومة وجاب أنبوبتين لحام عاملين زى الأمير كده وقعد يلحم فيه وقال لى إن اللى عمله ده هيمشينى شوية ، بس هاحتاج مستقبلاً لتغيير وش السلندر.

فسؤالى هو : هل فعلاً من أعراض تلف وش السلندر هو سخونة العربية لما تجرى فقط ، بينما وسط البلد تكون السخونة طبيعية؟

وهل ينصح إنى أبدأ بالموضوع ده واللا ممكن تكون المشكلة فى الشكمان زى مشكلة صاحب الموضوع ، مع العلم ان موتور العربية 1100 ستاندارد وما تغيرش ولا حاجة بموتور أكبر.

ملحوظة : أنا مش عارف الموضوع ده بدأ امتى لأنى آخر مرة كنت بامشى فوق الـ 80 بالعربية دى كان من سنة لما كنت باسافر بيها وماكانتش مشكلة السخونة موجودة ، ومن ساعة ما جبت عربية تانية الـ 128 بقيت استخدمها جوه البلد فقط وماجاتلهاش فرصة انها تجرى من ساعتهاا، يعنى كان آخرها بيبقى 60 واللا حاجة لظروف وسط المدينة.

[Egyzizo]

هل من مساعدة بشأن المداخلة السابقة ..

حسنة قليلة تمنع بلاوى كتيرة.

[mashei]

نفس المشكلة دي عندى في 128 كانت زي الفل اكتر من سنتين وبعد كدة بدأت موضوع السخونية في الجري بعد ال 100 المؤشر بيدخل علي الجزء الاحمر تحت ال100 المؤشر قبل النصف بشوية غيرت كل حاجة ممكن تتغير (رداتير-مروحة-شكمان كامل-طرمبة مياة-نصف عمرة مغير فيها جوان-شنبر-كوعة مياة-عمود كامة جديد) الميكانيكي قال لي وش السليندر مش محتاج خرط كل دة والحرارة زي ما هي بقيت امشي بيها تحت ال100 بس الفكرة اني في الشروق وموضوع تحت ال100 دة رخم :d وشكرا

[mashei]

وكمان في المطالع الطويلة بتسخن برضوا زي نفق الأزهر او طريق السخنة

[H_Daim]

وكمان في المطالع الطويلة بتسخن برضوا زي نفق الأزهر او طريق السخنة

شكمان ... غير العلبتين والخط

[محمود جوبا]

انا محمود عندى عربيه 128 موديل 1990

عندى فى عربيتى نفس المشكله لما بجرى العربيه بتسخن لدرجه توصل للاحمر ولو مشيت براحه على سرعه ضعيفه بسب زحام او شئ اخر بعد الجرى تبرد شويه وعملت كل حاجه غيرت الريداتير وجبت 3مسوره نحاس البستانى وغيرت طرمبه الميه وغيره المروحه القديمه لنها من كتر مبتبطلش علشان العربيه مبتبراتش باظت وجبت مروحه الى بتتحط فى السياره الحديثه جبت ثرمثتات 62 غيرت صباع الحراهعملت جوان السلندر ونضفنا فتحات الميه حطيط جونين فوق بعض غيرت بدل المكنيكى ميه عملت التكيهات وقالى مفهاش حاجه (الاسطى مختار الى امام كبرى التجنيد) الميه من كتر ما بتسخن بتتبخر وبتنفص ومن كتر السخنيه العربيه عاوزه عمره او نص وبقالى 3 سنين وزهقت خالص ياريت لو حد يعرف لمشكلتى علاج يقلى انا بدات افكر اغير الماتور كلو يمكن اخلص وشكرا

[shrief_007]

مشكله فرامل كانت حاصله معايا غيرت سيرفو وماستر وخزن ورا وزيت فرامل وجلد خزن امامى وبعدها اتحلت المشكله كانت العربيه بعد نص سعه مش الاقى صوتها على والامبير رفع ولاقى العربيه كأنها بتجر فى نصها مكنتش عارف المشكله منين لحد ما قفشت ومردتش تتحرك من مكانها عرفنا ساعتها ان المشكله من الفرامل

[Marwa Galal]

السلام عليكم و رمضان كريم...

انا مش عايز اطول عليكم بس الموضوع ببساطة ان العربية عندي بتسخن مع السرعات العالية يعني من 80كم وانت طالع لحد لما المؤشر الخاص بالحرارة بيجي للاخر. فروحت اشتريت رداتير نحاس 3 ماسورة حسب نصيحة الميكانيكي ولكن دون ادني فرق فقالي غير المروحة و بعد كده الترموستات ولكن دون جدوى قالي بس يبقى جوان وش السلندر قولت له ماشي غيرنا جوان دون جدوي قالي يبقى عايز يتقشط فروحت عند الخراط و قشطه و غير الكامة كمان لان كان فيها ركبتين بايظين و ظبط التكيهات و قفلنا و لكن دون جدوى العربية بتوصل للاحمر فوق 80كم ولكن جوه البلد عادي بيبقى المؤشر على 90 فالحل يا اهل الخبرة علشان خلاص هاتجنن!

انا المشكلة دي لسة ظاهرة قريب عندي العربية كانت كويسة ومفيهاش حاجة علي طريق السفر المؤشر بيوصل لقبل العلامة الحمرا بحاجة بسيطة ادخل البلد ترجع للنص تاني انا لسة جايبة رادياتير جديد من فترة ومن اقل من شهر كده غيرت كاوتشة الردياتير علشان كان بيسرب ميه وسافرت بيها بعديها ومكنتش بتعمل كده..الصوت الوحيد الغريب في العربية اللي باسمعه لما بابقي فوق ال 100 يعني 120 او 140 صوت صفير وسرسعة كده كإن في عرسة بتزيق في العربية

[dbabis8]

تقريبا ده صوت بلى العجل روحى لواحد بيظبط زوايا هيعرفلك اى عجلة فيهم و تغيرى بليتها عند العفشجى

[Marwa Galal]

تمام طيب وموضوع الحرارة ده اروح للميكانيكي ؟!