عاوز اشترى تمبرا ساعدونى لو سمحتم

[Bonanza]

يا ريس و الله انا قعدت 3 شهور ادور علي عربية لحد ما طلع روحي، صدقني التمبرا لمدة 3 شهور مشوفتش فيها واحدة عدلة، يعني نسبة و تناسب كنت بلاقي حاجات تانية في الفيات فعلا و بحالة كويسة إلا التمبرا، الوحيدة اللي ما شوفتش منها عربية تفتح النفس

حديك مثال ثاني يمكن الناس تفهمني، مثلا عربية زي المرسيدس الإس القديمة اللي بيسموها التمساحة، العربية دية مستحيل تلاقي منها عربية صالونها يفتح النفس مش معني كدة انها عربية وحشة، أو أن المرسيدس وحشة، إنما معناها ان فعلا العربية دية كانت نقطة ضعفها هي جودة صالونها، علي عكس مثلا الزلكمة نادرا لما تلاقي من الزلمكة عربية صالونها متمرمط، هي الفكرة في كدة مش أكتر

فعلا الحالات الكويسة في التمبرا نادرة جدا

و بعدين الراجل بيقولك معاه 25 يبقي مثلا حيلاقي تمبرا شكلها عامل اذاي؟ يعني اكتر رد كان موضوعي هو رد سمسم، قالة العب في الأونو علشان تجيب واحدة معقولة

إنما 25 و يجيب تمبرا حتخرب جيبة فلوس بعد اول شهر

ماحدش قال انه هايلاقي تمبرا كويسة او حتي نص نص بالمبلغ ده .. كده يبقي بيرمي فلوسة في الارض و هايدفع كتير علي تصليحها ، طبعا زي ما سمسم قال يلعب في الاونو عشان يلاقي حاجة كويسة

علي فكر انا كمان دورت علي التمبرا بس لمده شهر و لقيت حالة كويسة و زي الفل الحمد لله ... كون ان الناس مش بتهتم بيها بردو مش معناه ان العربية وحشة يا ريس

الراجل اللي عاوز يشتري لو ما لقاش عربية كويسة مايشتريش احسن

[abdelmessih67]

الاخ الفاضل أحمد سلام

25 الف زي ما الاخ جاليليو شرح باستفاضة و هو أستاذنا في التمبرا و التيبو مش هتجيب سوى مو 90 أو 91 و بحالة سيئة و ممكن تكون رشة دواخل لكن ممكن في رأيي بالسعر ده تجيب ريجاتا و هي الموديل الاقدم في عائلة التمبرا و ستكون بحالة جيدة .
بالنسبة للتمبرا و أنا لسه شاريها مستعملة مو 98 من حوالي سبعة أشهر فهي عربية برأيي من أروع ما انتجت فيات و لو حبيت تأخذ فكرة عنها أدخل على المنتديات الاجنبية و خاصة انجلترا ستجد أن أغلب ملاكها يشكرون فيها بشدة .

العربية ناعمة جدا جدا و أفضل من الكوري غير ان موتورها قوي 1600 سي سي و العربيات الشاهين و الدوجان بعض منها بيفتخر أنه موتور تمبرا .

أنا شحنت التكييف في التوكيل و غيرت زيت الكمبرسور و بعدها التكييف من شدة برودته بقيت أخليه على 22 درجة مئوية بدلا من LO و كما وطيت المروحة و خليتها على سرعة متوسطة لاني لما شغلته على سرعة منخفضة و سرعة مروحة عالية ما أقدرتش أستحمل البرودة و حسيت بحرقان في زوري و بقيت لما أمسك دراع الاشارة اللي على شمال الدركسيون بأحس اني ماسك حتة ثلج رغم ان مكونات تكييفها كلها فابريكة و بقالها 11 سنة و عاملة 130 الف كيلو .

أسعار قطع غيارها ( بأستثناء علبة الدركسيون و خرطوم الباور) رخيصة و في المتناول .

فلتر هواء مصري ب25 و تركي ب 40
بوجيهات شامبيون أنجليزي ب 70 ngk ب 32 و احيانا ب 28 حسب المحل
كتاوت الدينامو يوغسلافي ب 35 و ايطالي ب 50 .
فلتر الزيت فيه ب 10 و فيه ب 15
طقم الدبرياج من 350 ايطالي ل 500 الماني و في تركي أرخص من الايطالي لكن سئ .

جوز المساعدين الامامي ب 400 و الخلفي ب 350 .
بالنسبة للفوانيس فيه الاستيراد و فيه المصري و في الباغة فقط بتاع شركة الاهرام أو غيرها .

مشكلة التمبرا الوحيدة هي في سعر اعادة البيع و لو ان السنة اللي فاتت قبل الازمة كانت الايطالي مو96 بتتباع ب 46 و 47 الف و ده سعر عالي بالنسبة لعربية مستعملة لكن الازمة خليتها تنزل ل 35 و 36 الف و هذا لا يعني انها عربية سيئة .

مشكلة الشعب المصري أنه بقاله سنين و قرون يتم اقتياده بطريقة القطيع , يعني تطلع هوجة تلاقي كل الناس تجري وراها حتى لو كانت لا معنى لها .

زي هوجة أفلام محمد هنيدي و محمد سعد و بعدها تفيق الناس و تقول : ايه الهبل اللي كنا بنشوفه .

نفس الشئ هوجة العربيات الاسيوية و أغلبها تعبان لكن الاقبال الشديد عليها جعل سعرها مرتفع و كذا سعر اعادة بيعها لكن هذا لا يعني أن قيمتها الفنية أعلى .

تماما زي ما في السبعينات باعت اسطوانة ليلي نظمي : اما نعيمة ......نعمين خلي عليوة يكلمني أكثر مما باعت اسطوانة ليلة حب لام كلثوم عام 1973 و لكن هل معنى هذا ان القيمة الفنية لهذه أعلى من تلك ؟؟؟؟؟؟؟؟؟؟ لا أعتقد ذلك

[wisambasha]

و يا ريت برضو لو ما فيهاش مضايقة , ايه اللى مناسب لمصر ؟؟؟؟

انا شايف ان المناسب لمصر من وجهة نظر السوق العام هو كالأتي

عاوز عربية تبقي (لانسر بومه - تويوتا كورولا - هيونداي)
عاوز موبيل يبقي (نوكيا اي ان والسلام)

[Bonanza]

+111111

استاذ عبد المسيح ازيك و اخبارك ايه ..

اهو استاذ عبد المسيح ده بصراحة هه اللي اقنعني اجيب تمبرا .. رغم اني ماتشرفتش بمعرفتة غير علي المنتدي بس من خلال استفسار ليا عن التمبرا و كانت نفس الاجابة المستفيضة .. بالظبط زي ما عمل صاحب الموضوع


وطبعا جاليليو استاذنا في التمبرا و التيبو عن جدارة

[galilio_mad]

انا شايف ان المناسب لمصر من وجهة نظر السوق العام هو كالأتي

عاوز عربية تبقي (لانسر بومه - تويوتا كورولا - هيونداي)
عاوز موبيل يبقي (نوكيا اي ان والسلام)

ده على اساس ان لو فاتك اليابانى مش حييجى تانى :)

معالى الباشا , فى عربيات كتيييييييير قوى احسن او زى البومة و الكورولا و الايلانترا و اللانوس و النوبيرا
احنا بس اللى حصرنا نفسينا فى شوية موديلات و اقنعنا نفسنا انهم هم دول السوق و هم اللى بيتباعوا بسعر كويس

و افتكر السنين اثبتت ان فى عربيات كتير مستحمله و "تصلح " لمصر ( المانى و فرنساوى و ايطالى و روسى و تركى )

[galilio_mad]

وطبعا جاليليو استاذنا في التمبرا و التيبو عن جدارة

يا باشا ولا استاذ و لا حاجة , ده كله من فضل الله

و بعدين انا كده حأعيش فى الدور و اعمل الرد على المواضيع بفلوس

[osha966]

العيب الوحيد للتمبرا هو شكلها الكلاسيك المش بيعجب الشباب وكمان العفشة الأمامية مش مصممة لشوارع مصر المكسرة

[abdelmessih67]

+111111

استاذ عبد المسيح ازيك و اخبارك ايه ..

اهو استاذ عبد المسيح ده بصراحة هه اللي اقنعني اجيب تمبرا .. رغم اني ماتشرفتش بمعرفتة غير علي المنتدي بس من خلال استفسار ليا عن التمبرا و كانت نفس الاجابة المستفيضة .. بالظبط زي ما عمل صاحب الموضوع

أهلا يا أخ بونانزا , أنا بخير و الحمد لله نشكر ربنا و يا ترى أنت سعيد بأنك اشتريت التمبرا و لا بتدعي علي و تقول ربنا يسامحه ؟؟؟؟؟؟؟؟؟؟؟؟

أرجو ان تكون بأفضل حال و سعيد بالعربية و ربنا يكفينا شرها و أعطالها لكن فعلا لاجل الامانة التمبرا عربية فعلا ممتازة و سعرها أقل من امكانياتها و اللي عرفني بيها هو المنتديات الاجنبية بتاعة السيارت خاصة الانجليزية لان للأسف الفيات حاليا مش واخد حقه في مصر زي زمان

[galilio_mad]

العيب الوحيد للتمبرا هو شكلها الكلاسيك المش بيعجب الشباب وكمان العفشة الأمامية مش مصممة لشوارع مصر المكسرة

بالنسبة للشكل انا موافق ( و ده أثر على سوقها فى اوروبا فى وقت كان كل مصنعى السيارات بيعملوا عربيات شكلها حديث و انسيابية )

العفشة , هاتلى عربية ماشيه بقالها 15 سنة و لا حتى 10 سنين و عفشتها سليمة و مستحملة الشوارع المكسرة

[Bonanza]

أهلا يا أخ بونانزا , أنا بخير و الحمد لله نشكر ربنا و يا ترى أنت سعيد بأنك اشتريت التمبرا و لا بتدعي علي و تقول ربنا يسامحه ؟؟؟؟؟؟؟؟؟؟؟؟

لا والله بدعيلك يا باشا فعلا عربية تمام و شاليتني انا و عائلتي بالكامل ( خمسة افراد ) في مشاوير كبيرة و سفر و الحمد لله زي الفل ... عربية بتاعة شغل والله و تستاهل اكتر من تمنها

[semsem_uno]

بالنسبة للشكل انا موافق ( و ده أثر على سوقها فى اوروبا فى وقت كان كل مصنعى السيارات بيعملوا عربيات شكلها حديث و انسيابية )

العفشة , هاتلى عربية ماشيه بقالها 15 سنة و لا حتى 10 سنين و عفشتها سليمة و مستحملة الشوارع المكسرة

الشكل موضوع زوق بس انا بصراحة شكلها عاجبني والله و تحس انها ممسوكة
و انا مع جاليليو باشا في موضوع العفشة

[wisambasha]

ده على اساس ان لو فاتك اليابانى مش حييجى تانى :)

معالى الباشا , فى عربيات كتيييييييير قوى احسن او زى البومة و الكورولا و الايلانترا و اللانوس و النوبيرا
احنا بس اللى حصرنا نفسينا فى شوية موديلات و اقنعنا نفسنا انهم هم دول السوق و هم اللى بيتباعوا بسعر كويس

و افتكر السنين اثبتت ان فى عربيات كتير مستحمله و "تصلح " لمصر ( المانى و فرنساوى و ايطالى و روسى و تركى )

يا رب تكون فهمتني صح

انا ردي الغرض منه تريقه مش تقرير

[hany121]

وانا اول واحد هيدفع يا Galilio

[galilio_mad]

يا رب تكون فهمتني صح

انا ردي الغرض منه تريقه مش تقرير

عيب عليك يا باشا :)
طبعا فاهم قصدك و للاسف فى ناس كتير معندهاش خبرة و لا معلومات و عايزة تركب عربيات و بتصدق الكلام ده

و يبقى الكورى و اليابانى احسن من كل العربيات التانية و سعره يبقى فى السما و تبيعه فى ثانية
و العربيات الكويسة التانية سعرها ينزل و تسمع العجب العجاب فى مشاكلها و اعطالها

[moudy88]

سنه 2007 زوج خالتي اشترى تمبرا موديل 93 (استيراد معاقين ) وكانت باور وانجيكشن فقط
ولما كان لسه جايبها وكانت من غير نمر .والله العظيم اني قعدت واقف متنح قدامها وفاكرها زيرو ..وقعدت اقلب في دماغي اذا كان فيه تمبرا بتنزل سنة 2007 زيرو !!!

وجربت العربيه ..وانبهرت بيها جدا ..عربيه ناعمه جدا عفشه ممتازه صوت ماتورها يكاد لا يسمع (متعرفش اذا كانت شغاله ولا مطفيه ) وزجاج حراري
كاني راكب كرورلا زيرو ..
المهم ان العربيه حاليا بعد خدمة سنتين في مصرنا الحبيبه بقى حالها زي حال معظم التمبرا في مصر ..الصاج مخبط (من غير خبطات ولا حوادث ) التابلوه اجرب وبقى ملخلخ ومفكك ..صوت الماتور بقى عالي ..مع ان صاحبها من يوم ماشتراها وهو بيركنها في جراج وبيحافظ عليها على قد مايقدر وبيحبها جدا جدا
انا راي في التمبرا .. ان العربيه ممتازه ..لكنها عربيه اوروبيه 100 % وفرفوره..ومش بتاعت بهدله ومن اقل حاجه تبان عليها ..ومش مناسبه قوي لاجواء مصر من مطبات وحفر

ده راي الشخصي ..وعالفكره انا بدور على تمبرا نظيفه لاخويا ومش لاقي ..واللي موجود اسعاره فوق قوي