اتحاد مالكي الفيات اونو

[amrbakly]

يا جماعة انا عندي سؤال غريب

هو كاوتشة الكوبلن دية ملهاش حل يعني؟

يعني مفيش كاوتش من نوع ميعن او يركب حاجة فوقة او اي افتكاسة يعني علشان لو اتقطعت و الواحد مخدش بالة ميلبسش تمن الكوبلن

[semsem_uno]

لا يا باشا مفيش حل هي كلها اصلا ب 10 جنيه و جميلة زي الفل و خليه ينضفهولك بالجاز كويس الأول و يشحمهولك و يركب عادي و ركب الكاوتشة و ممكن لو في مشكلة تربطها كويس بكوليه و الواحد بنص جنيه باين او جنيه

[amrbakly]

ما هو دية النصيبة يا عم سمسم

انك تضيع ساعتين عند الميكانيكي و تروح للميكانيكي أصلا علشان كاوتشة بستة جنية كمان مش 10 و بعدين غلبة و شحم و حاجة نيلة

الفكرة انها اتقطعت مرتين في تلات شهور بجد زهقت من ام المطبات و الشوارع المدغدغة

كمان صحيح انا عندي سؤال، انا ساعات بيحصل عندي ان العربية علي السلانسية الاقي نور التابلوة يضعف و مرة واحدة اول ما أدوس بنزين تاني يرجع قوي، مش عارف دية مشكلة اية في الكهربا ؟؟ حد يعرف؟

[shshtawy]

العربيه عاوزه تضبط كهراباء وممكن الكرابيراتير عاوز يتنضف

[amrbakly]

علي فكرة يا شباب انا صحيح لاحظت ملاحظة غريبة في عربيتي

انا كنت اخر مرة مغير زيت حطيت شيل الأصفر و اشتغلت و كنت مسافر و كدة و الزيت قعد حوالي 7000 كيلو علما بأن أخرة 6000، الغريب ان الزيت نزل لسة فية لمعة ذهبية، هو اة بقي خفيف شوية لكنة كان لسة بيلمع، لكن لاحظت ان في اخر ايام الزيت دة العربية بقت بتاكل بنزين اكتر من العادي بشوية

لأني لسة مغير زيت من يومين و معاه فلتر، لاحظت بعدها ان العربية بقت بتاكل بنزين اقل و بتسحب اعلي كتير يعني علي المحور مثلا بقت بتجيب 90 علي الخامس و انا يادوبك مشعر بنزين

و نصيحة بصراحة بعد تجربة شل الأصفر ، زيت ممتاز لا يقارن بية الموبيل إطلاقا تحت اي بند

[semsem_uno]

ده كلام مظبوط فعلا شيل الأصفر ميتقارنش و برده توتال كوارتز علي فكرة
و انا حاطط شل الأصفر و مجرب التوتال في الهيونداي بتعت والدي

[semsem_uno]

عايزين نتقابل يا جماعة ايه رأيكم في الموضوع ده :)

[shshtawy]

نتقابل ياسمسم بس انتا الى هتدفع الحساب

[semsem_uno]

هههههههه
ماشي
بس انا بتكلم بجد

[ayman 2010]

طيب يا جماعة عاوز رد قاطع فى اللى هقولة دة
الأونو ال 1000 سى سى موديل 92 ينفع يركب لها تكييف
واية مدى تأثيرة على المحرك ياريت يا جماعة كلام علمى ومنطقى وينفع نركب تكييف ولا هية كدة كويسة والسلام

[semsem_uno]

انا متهيألي لو ظبط ماتورك ممكن تجيب تكيف الساندن الياباني من توكيله و تركبه و هيبقي كويس و جيبله المروحة الزيادة بتاعته اللي بتتحط قدام و انا مش شايف غلط في تركيبه

[amrbakly]

بص حجيبلك من الأخر، لأني برضة راكب اونو 98 كاربيراتير راكبلها تكييف ساندن

لو ناوي تركب التكييف للخلاص من الرطوبة بليل او الشمس المتوسطة العصر انطلق

غير كدة الصبح تأثيرة ضعيف جدا جوا العربية لكن في النهاية انا بشوف انة احسن من مفيش

بالنسبة للسحب اكيد يتأثر شوية طبعا لكن مش الرهيب، في النهاية التكييف علي الأونو محتاج جري، كل ما حتجري كل ما حتاخد تكييف كويس، هو النسبة ليا علي السفر و الطرق السريعة شويتين زي صلاح سالم و المحور و كدة بيقول حبة، يعني عايز اقولك اني مثلا لما ببقي مسافر اسكندرية بليل و بجيبة علي اول درجة بعد نص ساعة انا تقريبا بسقع منة


خد بالك برضة ان العربية فيها مشكلة مضاعفة الموضوع و هي ان مفيهاش عزل لا بادي ولا قزاز فدة عامل مشكلة انك مش بتتخلص من الحرار الخارجية

كمان التكييف التركيب فية مشكلة بايخة و هو انا خاصية سحب الهوا من جوا العربية و تدويرة مش موجودة و دة بيخلية يفضل يسحب هوا سخن من برا و يبردة و دة اكيد بيضعف عملية التبريد طبعا

اعتقد انا كدة جبت من الأخر لو عندك اي حاجة تانية عايز تعرفها قولي

[h_nouur]

سمسم باشا انا الى قولت على الاونو زفت بقولك انا دورة التبريد عندى مش عارف اعملها اية العربية بتسخن على الطرق السريعة مثلا على طريق مصر اسكندرية كل 80 كيلو تسخن مرة اغير طلمبة الماية وغيرت الخرطوم السفلى الى هو اسمو الاخطبوط وتعبت عقبال مالقيتو و كمان غيرت الطبة بتاعة الماية الى عند سير الكاتينة وكمان اخر حاجة انا عندى دورة تبريد العربية دورة مغلقة يعنى معنديش غطى للريداتير عندى حاجة بلاستيك صغيرة اسمها حنفية الريداتير او عصفورة دية الى بظبط بيها الهوا بتاع الريداتير بسحب الهوا منها بفتحها لغاية لما تطلع الهوا وبعد كدة اول ما تبتدى تطلع ماية اقفلها اهى العصفورة دية طارت منى على طريق مصر اسكندرية و مش لاقيها اعمل اية تعرف حد يبعها مع الاخذ فى الاعتبار انى موديل 2001 وانا محافظ على العربية العربية ما رشتش خالص من برة لسة بحالتها وياريت اى حد يعرف فى الموضوع دة يقولى يا جدعان لحسن انا مخنوق على الاخر

[amrbakly]

h_nouur

يا عمي يبقي كدة اساسا دورة التبريد مش مقفولة

اساسا العصفورة اللي انت مستهون بيها دية مش حاجة اي كلام يعني لأنها بتبخر المية طبعا و كمان بتدخل هوا للموتور بس الموضوع بسيط يتحل

اقفل الفتحة دية خالص و الطريقة سهلة جدا

حتدور العربية و هي باردة و تزود مية و بعدها حتبدأ الفتحة دية تطلع الهوا و بعدها تطلع مية ، هنا بطل العربية و الحم مكانها بالبتاع الفضي اللي مش فاكر اسمة دة او اي حاجة و بس و شكرا علي كدة

و بعد كدة متزودش العربية مية و هي سخنة و بس

و بعدين بدل ما كنت تغير الخرطوم يا عمنا كنت غيرت الريداتير اسهل من الأول

[shshtawy]

كلام سليم ياجماعه لو التكيف هيعمل مشاكل بلاش منه وهو ده الى انا بعمله لانى بجد احب امشى بالعربيه مضبوطه ومن غير تكيف احسن من انى امشى بيها مكيفه وبتنتش وبتكركر على الطريق انا على طول بركب عربيتن جامدين مش الاونو بقى لا دايو نبيرا وميجان والاتنين مش بشغل فيهم التكيف خالص لانهم 1600 اه بس بحس ان اداء العربيه مش مضبوط مع التكييف
ولو فعلا هنشغل يبقى اسيب العربيه وهو وقفه ونشغل التكييف على الاخر ولحد من حش انها بقيت تمام انزل التكيف على اول درجه وابتدى امشى وربنا معانا فى رمضان
وبالنسبه للاستاذ الى مش لاقى العصفوره سوق الجمعه مليان عصفير جميع الاشكال والالوان
وكل سنه وجميع اعضائنا بخير وسلام