البنزين مرة كمان وكمان

[mostafa123]

فيه نقطة عاوزين نفكر فيها بصوت عالي شوية .. وهي تحتمل الصواب أو الخطأ .

مش ممكن علشان لسه العربية معداش عليها 5 سنين أو ممشيتش كيلومترات كتيرة فمش حتبان مشكلة الحرارة دي بشكل كبير لأن كفاءة دورة التبريد لسه في عزها زي ما بيقولوا .. أقصد مش زي العربيات القديمة يعني (الردياتير لسه سالك - الكفاءة العالية لمنظومة التبريد - عدم وجود تسريب أو ترسيبات في منظومة التبريد بصفة عامة ..إلخ) .

وبالتالي مش حتبان مشكلة سخونة للعربية .. ومن خلال متابعتي معتقدتش أن في حد من ملاك العربية اشتكى من سخونة السيارة بشكل مش عادي .

وأنا اتفق مع حضرتك أن في أسباب أخرى قد تؤدي إلى زيادة استهلاك البنزين زي الرشاشات أو نوع أكثر كفاءة من البوجيهات أو ضبط خلوص سن البوجيهات (أرجو تصحيح المعلومة لو كانت خطأ).

بس مش حنخسر حاجة لو حد راح الصيانة في التوكيل أو مركز متخصص لضبط التاكيهات .. ونشوف النظام أيه .

الأخ الفاضل باسم
حقيقى أنا ممتن جدا لك ولمشاركتك الفعالة ومحاولة إيجاد تفسير منطقى لإستهلاك البنزين.. وإن شاء الله هنوصل له ..
على فكرة أنا أشتكيت وبلغت فى صيانة الألف بالذات إن العربية لما تقف شوية فى إشارة مثلا ولا الحاجة المروحة تفضل تشتغل وتفصل بدون توقف إلا أن أطلع على الطريق السريع واسير بسرعة وعندها تبدأ حرارة الموتور فى الإنخفاض نتيجة إستقبال العربية لتيار الهواء البارد المستمر.. وأفضل معدلات أداء السيارة تكون دائما فى أول اليوم عند بداية القيادة... أما فيما بعد وبعد أن تأخذ السيارة سخونتها المعتادة يقل الأداء بدرجة قليلة ويقل تماما لما أتزنق فى أشارة ولا حادثة ولا سفلتة طريق..
برضه أفكرك إن الكومبيوتر فى صيانة الألف وصيانة الخمس ألاف قال كله تمام .. الصراحة مقدرش ألوم فى دى لا مهندس ولا صنايعى بس أقدر ألومهم على على حاجة تانية مفكروش فيه خالص وهى ضبط التاكيهات اللى لازم تتظبط.. زى المانيوال ما بيقول.. وده تفصيله فى المداخلة القادمة..
والسلام عليكم

[mostafa123]

ده لينك لمانيوال العربية .. مش عارف هو اللي موجود مع حضرتك ولا لآه

http://www.byd.com/downloads/user_manual/f3_f3r_user_manual.pdf

لما تفتح اللينك استنى شوية عقبال ما يحمل علشان هو ملف pdf

اللي يهمنا في كلامنا ده هو بداية من ص 176 .. وبالأخص أعتقد ص 181 (بند 4) ، وص 182 (بند 19 ، 20) .. اللي ذاكر فيهم عمل فحص على الكرنك ومدى ظبطته وكذلك فحص خلوص التاكيهات .

أنا على فكرة مش متخصص ولا مهندس ميكانيكا .. بس الموضوع ده قتل بحثاً في أحد المنتديات مع زملاء أفاضل متخصصين أكثر مني .. وحبيت أنقل المعلومة التي خلصنا إليها في ضرورة ضبط التاكيهات للمساعدة في انخفاض صوت الموتور بالإضافة طبعاً لانخفاض استهلاك البنزين .

الأخ الفاضل باسم
السلام عليكم
عندك حق تماما.. فالبند 20 بيقول لازم ضبط تاكيهات بعد أول ثلاث ألاف كم.. وطبعا عارفين إنه ممكن نحتاج ضبط التاكيهات
لما يكون هناك سبب زى صوت عالى أو سخونة أو ضعف سحب أو زيادة إستهلاك بنزين.. إلخ
المشكلة فى سيارتى بخصوص إستهلاك البنزين قد تكمن بشكل أساسى فى ضبط التاكيهات وذلك بعد تجربتى بنزين 90 من ناحية وبعد ما فولت بنزين 90 تانى النهارده..

النهارده حسبت معدل إستهلاك البنزين لقيته 220 كم /الصفيحة.. يعنى رجعنا زى الأول تقريبا .. الشئ الوحيد اللى إتغير المرة دى هى السرعة المنتظمة اللى مشيت بيها فى الفترة اللى فاتت.. وهى 90-100 كم/ساعة مع إنى لما كنت ماشى 120-160 الإستهلاك كان أقل والسحب أفضل كمان ..طيب حد يعرف ليه؟؟

أقول لكم معلومة بسيطة بخصوص حركة كده كان بيعملها لى الميكانيكى اللى بتعامل معاه بخصوص سيارتى القديمة.. وأرجو من الإخوة ذوى الخبرة يفيدونا فى الموضوع بس الموضوع ده مجرب على سيارتى القديمة.. الراجل الميكانيكى عارف كويس المشاوير اللى بمشيها وكنت باشتكى من إستهلاك البنزين شوية .. فقال لى أنا هافتح لك التاكيهات سنة بسيطة أوى .. وبرضه ظبط الكهرباء بطريقة معينة وقال لى التظبيط ده ينفع معاك قوى على السرعات العالية (بالنسبة للعربية القديمة طبعا) ومش هياكل معاك بنزين والعربية هيبقى سحبها حلو كمان.. بس فى السرعات المنخفضة والإشارات والكلام ده هتحرق معاك جامد ومش هتبقى إقتصادية خالص.. المهم إن العربية فعلا مظبوطة بالشكل ده لغاية دلوقت وبتعمل على الأقل 240 كم وكتير 260 فى الصفيحة مع إن السيارة موديل 1985 ونظام كاربراتير مش حقن إلكترونى

لو ربطنا ملاحظة الأخ باسم بخصوص ضبط التاكيهات فى الكتالوج مع ملاحظة إن العربية ماشية افضل مع بنزين 90 من بنزين 92 مع ملاحظة إن الإستهلاك بيزيد فى السرعات الأقل ويعتدل فى السرعات العالية نسنتنج من كده إن التاكيهات فى العربية عندى مفتوحة وعايزة ضبط.... صح ولا إيه.؟؟؟

ياريت أعرف رأيكم وياريت لو حد عنده خبرة يفيدنا بدل ما الواحد عمال يعك كده..

والسلام عليكم

[mmmmgogommmm]

واللة يادكتور مصطفى انا حاسس بمدى الضيق اللى حضرتك حاسس بية--------بس اعتقد ان سيادتك وصلت ووصلتنا معاك للعيب-وهو ضبط التكيهات----ولا اعتقد ان التوكيل هيمتنع عن ضبطها---بامكان سيادتك الاتصال على تلفون انسة داليا وانشاء اللة توصلك باالمهندس مدير المصنع وتفهم منة سبب عدم ضبط التاكيهات رغم انها فى المانيوال الخاص باالعربية---ورغم ان العربية معديةل3000كم الاانها متظبطتش--واعتقد هو هيرد على سيادتك وهيظبطهالك وهيدى تعليمات لجميع مراكز الصيانة تظبط التاكيهات للعملاء على 3000كم وبكدة تبقى سيادتك استفدت وافدت من بعدك-----------باالمناسبة انا مستمتع بالحوار الدائر لحل مشكلة البنزين--لانة حوار راقى وعلمى ونموذج لاساليب التفكير المنظمة

[ozama22]

الدكتور مصطفى
تحية طيبة
كلامك صح لابد من ضبط خلوص البوجيهات على 1 بعد 5000 كم حيث انها مضبوطة على 8 يعني مفتوحة واكلام دة عملوالي المهندس اسامة مبروك في مركز الاسكندرية عند عمل صيانة 20000كم

[lonedoctor]

الدكتور مصطفى
تحية طيبة
كلامك صح لابد من ضبط خلوص البوجيهات على 1 بعد 5000 كم حيث انها مضبوطة على 8 يعني مفتوحة واكلام دة عملوالي المهندس اسامة مبروك في مركز الاسكندرية عند عمل صيانة 20000كم

وقعت قلبى يا استاذ اسامة تقصد ضبط خلوص التاكيهات وليس البوجيهات
كل عام وانت بخير تقبل الله منا ومنكم
يبقى كدة كلامنا طلع صح
والحمد لله نجحت التجربة
كل التهانى لملاك ال byd
نرجو النشر فى موضوع منفصل وتحكى لنا كل التفاصيل بكل دقة
نطالب بنقل المهندس اسامة الى فرع القطامية
مع خالص تحياتى

[ozama22]

وقعت قلبى يا استاذ اسامة تقصد ضبط خلوص التاكيهات وليس البوجيهات
كل عام وانت بخير تقبل الله منا ومنكم
يبقى كدة كلامنا طلع صح
والحمد لله نجحت التجربة
كل التهانى لملاك ال byd
نرجو النشر فى موضوع منفصل وتحكى لنا كل التفاصيل بكل دقة
نطالب بنقل المهندس اسامة الى فرع القطامية
مع خالص تحياتى

الاخ العزيز تحية طيبة
اقصد البوجيهات يا دكتور علشان دة حصل في سيارتي وعلى فكرة انا عملت 400كم والموشر الخاص بالبنزين في المنتصف بالضبط ويمكن كلام حضرتك مضبوط يبقى خير وبركة يقل الالستهلاك اكثر وعلى فكرة أيد كلامى هذا المهندس سمير رياض
ارجوا قراءة المششاركة في نداء الى المسؤلين بالتوكيل وتقبل تحياتي

[lonedoctor]

طيب ده كمان اكتشاف تانى ماتوضح لنا الموضوع كده بالتفاصيل المملة وتحكى لنا تجربتك فى هذا الموضوع

[ozama22]

طيب ده كمان اكتشاف تانى ماتوضح لنا الموضوع كده بالتفاصيل المملة وتحكى لنا تجربتك فى هذا الموضوع

يا دكتور انا منتظر امون السيارة مرة اخرى علشان الدقة في تحديد الاستهلاك بالضبط للكيلو متر/لتر وانا صراحة لسة واصل من شوية من السفر ومكسل انزل امون السيارة الان وعلى فكرة كل اللي حصل وانا باعمل صيانة 20000كم وانشاء الله غدا انشر لكم التفاصيل بعد ما امن السيارة
وارجوا تقبل تحياتي وسامحني على عدم اتكملة بالتفاصيل اليوم