تقرير مبدئى عن الباندينو 2014 اوتوماتيك اول فئه

[mido]

العربية اتوماتيك 2014 اول فئة
من التوكيل مباشرة و السعر 69900
انا بصراحة مش عارف اقارنها بأيه علشان اول مرة اركب صينى فا قارنها بالافيو و بالاونو و دول اللى اشترتهم قبل كده و الاسبرانزا الصغيرة جربتها مرة او اتنين

-العربية فيها الاوبشنز العادية و بدون ABS AIRBAGS و جنوط ولكن فيها ريموت و جهاز انذار ( شايف ان عداهم العيب )
-الازاز ملون و لونه اخضر شوية و مريح جدا
-مفيش كاسيت فبه راديو و فيه aux و الصوت لطيف
-العزل كويس لما بتقفل الازاز
- التقفبل تعبان يعنى تحس انهم كانوا مستعجلين وهما بيقفلوها
-الخامات تعبانة فى المجمل ولكن التابلوه مقبول جدا و فيه حتت كاربون مخليه شكله حلو
-التابلوه و الصالون لونين اسود و بيج و شكله حلو بس هيتوسخ بسرعة
- الناس فى التوكيل بيقولك ده دى المستوردة امال لو تقفيل مصرى :)
-دراع النور البكرة اللى بتلف خفيفة قوى و ممكن وانت بتجيب اشارة تلاقى نفسك نورت النور او الفوجات بالغلط لمجرد انك لمسته
-الدهان مش كويس و فيه عيوب واضحة
-مساحة الصالون كويسة جدا لعربية صغيرة يعنى انا طولى 170 و قاعد مستريح و مطلع الكرسى شوية قدام و الكنبة ورا فيها مساحة كويسة للرجلين
- الكراسى لو انت مليان بزيادة هتبقى صغيرة
-الشنطة تشيل شنطة سفر متوسطة و لو قفلت الضهر بتاع الكنبة هتاخد مساحة كويسة و تحط اللى انت عايزه
-الجنط معدن مقاس 14
-الشنطة ازاز و المكبس الزيت اللى بيطلعها و ينزلها ضعيف شوية فا بتتهبد وانت بتقفلها
-ممكن تفتح قفل الشنطة بالريموت
-الريموت اول دوسة تفتح باب السواق و تدوس تانى عشان تفتح باقى الابواب
-العربية مش بتدور غير على البارك و لو على المور مش هتدور
------------------------------------------------------------------

- التكييف كويس و بيسقع بس احنا مش فى الشتا برضه
-العربية بتحك فى المطبات العالية بس العادية بتعدى مش شايف انها واطية يعنى عادية
-السحب بتاع العربية صعب تصدق انه لعربية 1500 سحبها مش قد كده يعنى عربية صغيرة و 1500 المفروض تكون طيارة..بس انا مجربتش احرق برضه و الrpm مش بعدى بيه 3
-العربية لازم تديها وقتها على ما توصل للسرعة اللى عايزها..انا معدتش ال 100 و كانت كويسة مش بتلعب
-التكييف مش بيأثر على السحب
-صوت الموتور عالى و خشن بس مش مشكلة كبيرة تضايق يمكن لما اغير زيت الصوت يتحسن
-دواسة البنزبن و الفرامل ناشفة جدا بشكل غريب
-العفشة حلوة بشكل ملفت للنظر بس الله اعلم بعد شوية هتبقى ايه
-استهلاك البنزين كويس يعنى عملت 50 او 60 كيلو فى الزحمة و المؤشر منزلش بس هو علامات ديجتال زى الموبيل فا فيه نسبة خطأ اكيد
- مؤشر الحرار الديجتال برضه معدى النص بشرطة مثلا او اتنين فا مش عارف كده عادى ولا هى ساخنة

-------------------------------------------------------------
فى المجمل :

-العربية انا جايبها للزوجة و قعدت ادور على مستعمل كتير فى الاسبرانزا الصغيرة ملقتش بسعر كويس
-اعتقد دى ارخص عربية اتوماتيك فى مصر بعد الشانا و العيب مش فينا العيب فى الجنيه اللى قالل قيمتنا و حاوجنا
-احسن فى كل حاجة من الاسبرانزا الصغيرة ماعدا ان سحبها تقيل شوية
-العربية دى لو استعملتها بطريقة انسانية اعتقد هتعيش خصوصا انى بشوف اسبرانوا شغالة كويس وعاملة 80 الف و اكتر و فى النهاية عربية زيرو هكون مش خايف انها تقف من الزوجة فى اى حته او على كوبرى او اقضى اجازاتى فى تصليح العربية
-ضمان غبور يعنى على الاقل هتلاقى قطع غيار بسهولة

واخيرا.....
- لو انت هتشترى العربية دى ليك و هتبقى عربية اساسية اعتقد ممكن تلاقى حاجة مستعملة احسن بال 70 بس هتتعب فى التدوير شوية

بالنسبة للصور فا شكلها متغيرش عن الباندا

و شكرا :)

[horas3000]

الله ينور عليك
و تقرير ممتاز و محايد
و ربنا يبارك لك فيها
و بصراحه ده اللي توقعته منها

[ELKHOLY22]

مباركه يارب
متابع

[midooo_119]

تقرير ممتاز احيك عليه و ربنا يباركلك فى الزوجه و فعربيتها

[mido]

الف شكر و لو حد عنده سؤال معين انا تحت امركم

[M I D O]

تقرير ممتاز يا باشا وربنا يحفظهالك

[J A G U A R]

تقرير وافى جدا ..
ربنا يباركلك فيها ..

[samakaerror]

الف مبروك و ربنا يكاركلك فيها و يكفيكوا شررها و تكون خير رفيق على الطريق

[mido]

تحديث -1-:)

1- السحب اتحسن بعد ما زبطت الكاوتش عشان كان على 25
2- الاضاءة بالليل ممتازة يمكن من احسن العربيات اللى ركبتها سواء نور عالى واطى و فوجات الناس اللى جاية عليك بتنورلك عشان تطفى :) فيه زرار بيطلع و ينزل الاضاءه بس مجربتوش هو على اقل حاجة
3- عدد المطبات اللى بتحك اكتر من اللى بتعدى

[omaranes77]

ربنا يباركلك فيها

[S O P H O S]

مشكوررر عالتقرير الواقعي

[ibrahimsaad]

الف مبروك ياباشا وربنا يكفيك شرها

[m1988]

مبروك على العربيه انا برده جايبها لمراتى وهى عربيه حريمى وحلوه بس اكتر حاجه مستفزه فيها صوت الماتور عالى اووووى ومستفز ومش لقى ليه حل وفى التوكيل قالولى ده طبيعة العربيه مع الوقت حيقل وهى عامله بيها دلوقتى 2800 ك وايه زيت الصوت ده

[mido]

مبروك على العربيه انا برده جايبها لمراتى وهى عربيه حريمى وحلوه بس اكتر حاجه مستفزه فيها صوت الماتور عالى اووووى ومستفز ومش لقى ليه حل وفى التوكيل قالولى ده طبيعة العربيه مع الوقت حيقل وهى عامله بيها دلوقتى 2800 ك وايه زيت الصوت ده

هو مش ناعم بس ممكن تتعايش معاه

[m1988]

[QUOTE=mido;3875421796]هو مش ناعم بس ممكن تتعايش معاه[/Q

لا ده صعب ولا الاراكب لادا