حوار حول دواسة البنزين الكهرباء

[Salamonti]

معنى كدة ان الموضوع مرتبط بظروف الطريق مش ان العجل بيفوت ولا لا

MMamdouh

العربية مافيهاش سينسورز عشان تعرف العجل بيفوت ولا لأ

الفكرة ببساطة انهم حاطين قيم استاندارد لظروف الطريق وعاملين عليها الحسبة بتاعتهم
من الحسبة دي عرفوا إيه العزم المناسب لأحسن انطلاقة بالعربية
ظبطوا كنترول العربية أنه في أول الطلعة العزم مش هايزيد عن الرقم ده مهما السواق عمل

ظروف الطريق تتغير بقا براحتها ويفضل الرقم ده ثابت
واقف على تراب هاتفرك شوية
واقف على زيت هاتفرك كتير
واقف على اسفلت مش هاتفرك وهاتطلع مظبوط وتحس انطلاقتك مظبوطة
واقف على حاجة احتكاكها أقوى من الأسفلت هاتحس ان العربية ضعيفة ومش قد كده

جتلهم فكرة حلوة ونفذوها بشكل بدائي وغير مكلف
أضافوا ميزة على العربية بدون أي تكلفة إضافية

الفكرة باينة أوي انها اختراع صيني بحت قايم على ان واحد قعد يفكر عاوز يعمل حاجة زي التراكشن كنترول بس ماتكونشي مكلفة وترفع سعر العربية
فعملها بالشكل البدائي ده مستغل نفس فكرة الأنظمة الحديثة لكن استغنى عن الذكاء اللي فيها

بعكس التراكشن كونترول اللي قايم علي سينسورز و بيتمتع بالذكاء اللي يديك أحسن نتيجة مهما اتغيرت الظروف والعوامل ولكن عشان يضيفوه في عربية زي ده يبقا هايرفعوا سعرها جامد


أنا امبارح كان معايا عمرو ناجي قابلني عشان كنت باشوف عدة الصوت في عربيته
وركبت معاه وطلعنا خدنا لفة بالعربية و جربنا عملي ووريته اللي انا اقصده والراجل جتله حالة ذهول



ملحوظة إضافية زيادة للي حابب يعرف أكتر:

نفس المباديء البدائية دي مطبقة في الاختراع الـشبيه للــABS اللي عاملينه في العربية
هو بصراحة لا يرقى لأنه يتقال عليه ABS زي بقية العربيات
لأنه مش قايم على سينسورز ولا معطياته بتتغير حسب تغير ظروف الطريق
مجرد عاملين فكرة مكنة تدوس وتسيب بسرعة مع توقيت ثابت وخلاص
مش زي العربيات التانية اللي لما يكون تحتها مية أو زيت تغير توقيت الـABS

العملية كلها يا جماعة ضحك ع الدقون
وعلى فكرة انا خليت احمد مهران فصل الـABS أساسا في عربيتي لما اكتشفت الاكتشاف ده