تقييم الm11 من الاول للاخر

[hemaa_82]

105000
و لله الحمد

ان شاء الله نغير زيت اول ما اللي فوق يبعت :)

و معايا بوجيهات اركبها بعد الزيت ..... و ممكن اغير مكنة الاستوب لان مع الحر بتخلي دواسة البنزين تفصل احيانا

[hemaa_82]

بسم الله

السلام عليكم ....بقالنا كتير مستنيين اللي فوق يبعت ....
الحمد لله بعت سيكة كدة فقلت مبدهاش ....

غيرت زيت شيل الترا ال10000 .... جالون + لتر + فلتر الكبير + لتر شيل اوتوماتيك احتياطي للبور = 490 جنيه
بالمرة جبت مكنة استوب علشان الفصل المتكرر لدواسة البنزين ... شرا ب 35 جنيه
تركيبها عند محمد الكهربائي اللي جنب ابانوب ب 20 جنيه
بالمرة تركيب البوجيهات عند نبيل اللي مع ابانوب ب 20 جنيه
بالمرةهوفر للصالون و غسل برة و شنطة و متور و تلميع تابلوه و فبر بيبان و كاوتش ب 45 جنيه في الاميرية برضه جنب ابانوب

فاضل الكيماوي بقي علشان الكراسي عفنت بس نرجع نقول لما اللي فوق يبعت :)

نوافيكم بكل جديد

[hemaa_82]

بسم الله

تم تغيير زرار مفرد من زراير الزجاج الكهربا .... 40 جنيه من الملك في الحرفيين ... الزرار بينور ابيض بدل احمر
تم اصلاح اوكرة الباب الخارجية الخلفي شمال ب 40 جنيه ....

[hemaa_82]

ايه الكلام يا اخوانا ..... محدش باين ليه ولا بسؤال ولا بافادة

[ateftop777]

ايه الكلام يا اخوانا ..... محدش باين ليه ولا بسؤال ولا بافادة

السلام عليكم هيما كل سنة وانت طيب ويارب تكون سنة سعيدة علينا ، انا اللي كان معايا مشكلة الطقطقة والحمد الله اتحلت طلع رمان بلي في علبة التروس رحت لواحد شاطر اوي فرتكلي الفتيس وركبة طلع في علبة التروس الغريب مركبين رمان بلي ياباني والتاني كوري والبايظ الكوري غيرته الحمدلله ، وكمان فكيت الرشاشات نظفتها بطريقة من يوتيوب وحساس الشكمان برضه وطلع للعربية دي اتنين حساس شكمان فكيت واحد نظفته التاني للاسف محتاج تنزله تحت قولت لما اروح اغير زيت ابقي افكه وانظفه بمنظف كاربرتير طريقه فكه سهله وتنظيفه كمان انت بس محتاج مفتاح 22 ، وبعتزر عن غيابي انا عملت جروب للفيس لمالكي ام 11 وام 12 قولت يبقي سهل اتابع https://m.facebook.com/speranza.m11
صحيح بعت جبت من الصين زراير المالتي بتاعت عربيتنا وركبتها وتركبها سهل جدا بتفك غطي الكلاس وبعدين هتلاقي السوكت او الفيشه بتاعتهم جاهزة تحت ناس طيبة مجهزين لكل حاجة ، اتمني الكل يشارك بخبراته معانا

[OSHA]

اخواني، كل عام وانتم بخير، بعد 170000كيلو بm11 احب اشكر مجهودكم في التعاون المثمر للمجتمع. كان عند استفسار بخصوص عربيتي الحبيه صونت صوصه اثناء السير علي الطرق الوعره حد يعرف السبب؟؟
شكرا لكم جميعا واخص أ.ابراهيم

[ateftop777]

اخواني، كل عام وانتم بخير، بعد 170000كيلو بm11 احب اشكر مجهودكم في التعاون المثمر للمجتمع. كان عند استفسار بخصوص عربيتي الحبيه صونت صوصه اثناء السير علي الطرق الوعره حد يعرف السبب؟؟
شكرا لكم جميعا واخص أ.ابراهيم

تقصد صوت تزيق كده ، انا عندي نفس المشكلة دي لو ده تقصده لما يكون الطريق مكسر وغير مستوي وبيكون ورا انا هروح عند واحد متخصص عبشة بس خايف يكون في حاجة في المساعدين قولت ابقي اروح مستعد وياريت لو حد صادفته المشكلة دي وحلها يشاركنا بحلها كان ازاي

[OSHA]

ايوه بالظبط، بس علي فكره انا غيرت المساعدين من حوالي سنتين بس الصوت كان من قبل ومن بعد التغير، تقريبا مش مساعدين

[hemaa_82]

ايوه بالظبط، بس علي فكره انا غيرت المساعدين من حوالي سنتين بس الصوت كان من قبل ومن بعد التغير، تقريبا مش مساعدين

السلام عليكم جميعا و ان شاء الله سنة سعيدة علينا و عليكم "مع انه مش باين بس ربنا كبير"
الصوصوة غالبا من جرابات فرامل اليد .... الجرابات بتبقي ممسوكة في حلقات يمين و شمال العربية من تحت قدام العجل الخلفي .... حك الجراب في الحلقة اللي مسكاه هو اللي بيعمل الصوصوة .....
يا اما تتفك الحلقة و تتثبت علي الجراب يا اما تحكم الحلقة حوالين الجراب ....

[hemaa_82]

نزلت امبارح من الشغل ... لاقيت الاكصدام الامامي واقع من الجانبيبن.... الفانوس الامامي شمال ودانه العلوية مكسورة "تاني للاسف" ... الرفرف الامامي شمال مضغوط علي الباب الامامي شمال و مفارق عن الكبوت "موعود الرفرف ده "



الحمد لله و بيدي لا بيد السمكري .... عدلت الرفرف مع الباب و الكبوت ..... ركبت الاكصدام و كلبساته سليمة .... اللي فاضل اروح لشعبان السمكري المحترم اللي في عين شمس يلحملي الودان تاني ....

حسبنا الله و نعم الوكيل في السواق ابو ديل اللي عمل كده علشان يركن او يطلع

[hemaa_82]

روحت لشعبان ربنا يباركله .... الفانوس كل ودانه مكسرة ... لحم اللي ينفع و ثبت الفانوس كويس...و تمام الحمد لله

بس الفانوس طلع اصلا فيه حتة مكسورة من جوة و مش موجود ف الفانوس كدة لو حصل في حاجة هيتغير ....
و الرفرف برضه المرة الجاية هيحتاج يتسخن علشان ياخد البومبيه صح
و الاكصدام طلع فيه شرخ بس نضيف ...

المحصلة النهائية تمام الحمد لله ... بس برضه حسبنا الله و نعم الوكيل في البني ادم اللي عمل كدة في الركنة او الطلعة .... يتوب علينا ربنا

[hemaa_82]

منقول من الزميل omar mario نايل موتورز - NileMotors.net

علبة دركسيون 2500ج
مساعدين 1350
بطاحات 300
2 صباع ميزان 280
كاوتش ميزان خلفى 75 جنية
كاوتش ميزان امامى ملقتهاش ولا هيا ولا بيض المقص
بلى الصرة الاتنين ب 350 نوعهم تايلاندى
العفشجى اخد منى 300
غير طبعا المصاريف الى بتقبلك فى السكة يعنى الحمد الله اتلسعت مبلغ محترم اوى
الاماكن الى اشتريت منها من الاخر علشان متلفش كتير وعلى الفاضى لانى فى الاول غلبت مع قطع الغيار
عليك وعلى العسكرى الى فى التوفيقية او شركة الفتح فى التوفيقية بردو
ولو فى صيانة للعربية مركز المتحدة دة رحتلو رخيص جداااا وحلولى مشكلة ونة الطارة ونقصان المية وناس فاهمة فى شغلها وفى العربية

[hemaa_82]

بسم الله

الكوبلن الداخلي عدي السنة و بيجيب اخر ....بس ماشية .
في صوت بلية عجل بتحتضر ....بس ماشية
في صفارة تيل ....بس ماشية
في قاعدة شبعت موت و بقت بتكرركر علي الاخر بس ماشية ....
اللي زاد و غطي صوت غريب بقي بيطلع من ورا السواق يزيد مع السرعة و ريحة شياط ؟؟؟؟؟ ابص مش شايف حاجة بس الصوت يخض .....
خلاص .... قلت مبدهاش ...
خدت جوز الكبالن الفابريكة ...منهم واحد مريج و واحد سليم و طلعت علي ابانوب
تعالي يا عم جرب علشان خلاص ان الاوان .... هنعمل اللي فوق ده و نسرفس فلتر بنزين و هوا و بوجيهات .... بس الصوت ده ايه بقي .....

طلع جرب و طبعا قالي العربية يعني مخلصة علي القاعدة و اللي قلناه ....

المهم رحت جبت قاعدة ب 575
بوجيهات 3 شمعة ب 100
فلتر هوا 75
فلتر بنزين 50 باين
بلية عجل ب 200
تيل خلفي تقريبا 220

الاجمالي كان 1250 من زكي جرجس

رجعت ...
رفعنا الجنب اليمين ... حل البلية الامامي صوتها نيلة ... الخراط جه و خدها يبيتها ... راشد الميكانيكي تبع ابانوب نقي كاس كوبلن من الفابريكة و حطينا فيه بلية من ال2 الفابريكة تكون محملة كويس و شحم كويس و قفل و ركب جه الشمعدان بعت تغيير البلية ركب قفل ...
افتح ورا غير تيل تمام
غير فلتر بنزين وانت رافع ...
رجلاش خفيف خفيف للهاند بريك
نزل ... الجنب التاني يلا بينا
كشف علي التيل الامامي و غيرلي لقمة من عنده
مفيش حاجة قدام تاني نشوف بقي ايه العفريت اللي ورا السواق ....
مفيش حاجة باينه من برة ....فك العجل ...شيل العجل ....
اوم ايه ؟؟؟؟؟؟ فرع شجرة في تخانة القلم الرصاص بطول نص متر راشق في الكارتيرة الفبر و ورق الشجر بالفروع الصغيرة مستخبية ورا العجلة و عمالة تحك فيها و تعمل الصوت وتنقله للكارتيرة و اسمع احلي حرب فضاء علي فاشوش

طبعا بعد ضحك السنين غيرنا تيل ...
غيرنا فلتر هوا و نضفنا البوابة
غيرنا بوجيهات

سمي الله و دور جرب ...حلاوة الحلاوة

ابانوب واخد 150 في كل ما سبق

[hemaa_82]

بعدها بكام يوم ز لان المصائب تأتي تباعا .... ركنت العربية .... تاني يوم نازل ادور ..... مش راضية تقوم ... مارش و كونتاكت بس مش بتقوم حرق بنزين ....
و لان انا بقالي كذا شهر حاسس ان البطارية هتخستع مكدبتش خبر...
رحت الشغل و اتقسط علي الاسعار و ظبط الدنيا و رجعت علشان اديها وصله واخدها اغير البطارية ....
المهم قلت اجرب .... مفيش معدتش قادرة تدي مارش ...
جبت وصله و ادور ؟؟؟؟؟؟؟ مبتلقطش برضه ؟؟؟؟؟ اخص

كلمت ابانوب .... اقطرها و اجيلك يا عمنا ... قالي لا خليك و هجيلك بالليل .... جالي علي 10 فعلا ... جرب ... مفيش ... طب كدة ؟؟؟؟ مفيش ... طب كدة .... ؟؟؟ دارت ....

طيب يا استاذ محمد هتجيب حساس كرنك و تيجي نغيره الورشة و لو مادارتش هز سلك الحساس اللي هوة ده ....طب عايز كام ... هات 50 جنيه ... و قام واخدهم مديهم للتاكس اللي معاه و قاله يلا يا عم علشان تروح تنام ...
مكدبتش خبر و خدت العربية وطلعت علي الورشة في ساعتها .... ركنت و رحت اشتريت الحساس ب 120 من ال جنيدي جنب ابانوب
و جبت كمان طاسة الجنط كانت ضاعت م بعد حوار كسر راس الكوبلن الامامي ... الكيس في 2 ب 30 جنيه
و ركبت الحساس و مخدش حاجة في الورشة
قلت اقيس البطارية بقي بالمرة ....
طلعت فعلا بتودع ..... قمت رايح زي الشاطر جايب مارشيتيللي ال 70 "62a" ب 800 و بكدة قفلنا كمان باكو و لله الحمد .
نوفيكم بكل جديد ان شاء الله

[sherif309]

لو سمحت هوا ابانوب دة فين ورقم تليفونه كام..
عندى مشكله ومش عارف احلها فى m11
العربيه الصبح بدور بالعافيه بعد 4 او 6 مرات وغيرت البوجيهات والفلاتر لدرجه انى غيرت حساس الكرنك.. المهم بردو نفس العيب وكل اما اروح لميكانيكى يقولى الطرمبه سليمه والبطاريه سليمه والموبينه سليمه وجهاز الاعطال مش جايب حاجه
مش عارف اعمل ايه