تقييم الm11 من الاول للاخر

[hemaa_82]

المفيد ......
متتعاملش غير مع الفاهم حتي لو كان امين ..." ادي العيش لخبازة لو اكل نصه"
البلية جنب و جنب .... ليها عدلة في التركيب ...
البلية ب 180 جنيه ... موجودة عند زكي جرجس
الكوبلن ب 160 ... برضه عند زكي جرجس
السنسور خدته من التوكيل ب 150

ابانوب في كل ده مخدوش غير 100 بلبل

محمد الكهربائي بيكشف جهاز ب 40 بلبل ... و العربية بعد ما اشتغلت دخلت معاه علي الabs عادي

الشيخ طه بيكشف جهاز ب 50 بلبل


المصروف ...:-

3 بليات ب 560
كوبلن 160 ...
شحم 25 موبيل
90 جنيه كشوفات كمبوتر
15 جنيه زرار جنط
150 سنسور
330 الفساد الاولاني
60 كبس 3 بليات
100 مصنعيات بلبل وابانوب " و رفض تماما ياخد حتي شلن في تركيب تاني مرة ... الحساب خلص مع الاصلاح الاول قبل كسر الكوبلن "

طبعا لا داعي لذكر التكاسي و لا حرقة الدم

و ده درس لطيفو معلومة جديدة و الحمد لله علي لطف قضاءه والانتهاء بحل للمشكلة ....

[hemaa_82]

صحيح .... ترس موتور المساحات اتاكل تاني و باظ ....
خدت متور مساحات تيجو .... بس الفيشة بتاعته غير الام 11 .... ركبت الفيشة بتاعت متوري بدل بتاعت التيجو و جربت اشتغل كويس ...
كل التعديل اللي احتاجته ان مكان تثبيته في شاسيه المساحات مختلف فخرمنا 3 اخرام ليه في الشاسيه .... و ركب و اشنغل تمام

خدت المتور ب 250 جنيه علشان انا زبون و علي الكهربائي خد 50 جنيه تركيب شاكب راكب

[hemaa_82]

الفبرة اللي راكب فيها الزرار الرباعي بتاع الازاز اللي في باب السواق ب 50 جنيه من ابو رواش .... اشتريتها علشان كلبس اللي عندي مكسور و ملزوقة ..

[towfeq]

لا حول و لا قوة الا بالله
لسه قاري المشاركات بتاعتك دلوقتي
بجد ربنا يعينك و يصبرك..فعلا محدش بيتعلم ببلاش..

و زي ما انت قلت..العربيه دي مش اي حد من بتوع الفيرنا و اللانوس ممكن يفتي فيها..عربيه مليانه تفاصيل..هي مش لغز ولا حاجة..بدليل ان الناس في المتحده مثلا و واحد زي ابانوب فاهمين العربيه جدا و قطع الغيار عادي متوفره.

الخلاصه بجد..ودي العربيه للي بيفهم فيها حتى لو بزياده شويتين لانك كده هتريح دماغك و ضامن ان الناس فاهمه هتعمل ايه بالظبط. بدل ما تروح لواحد ملوش فيها و يلبسك في ارقام كبيرة و مشاكل ملهاش لازمه

ربنا يعوضك خير و كويس انها جت في شويه حديد..المهم انت و العيال كويسين

انا خلصت الشوط بتاعي عند خالد العفشجي..العربيه اتحسنت الحمد لله..العربيه بقت ماسكه نفسها بالذات على السرعات العاليه...بس المشكله ان صوت نقر قطمه الدريكسيون ده ملوش حل للاسف..
بالمرة بقى جبت فلاتر و قربه مياه جديدة و بوجيهات و زيت فرامل جديد مكان القديم و قاعده موتور و قاعده فتيس و غيرت زيت بيزول الاخضر (الزيت ده ماشاء الله عليه بجد..حاجة تانيه خالص)

يعني ظبطت الدنيا و الحاجات كلها من عند صقر.ناس محترمه فعلا.

ربنا يطمنا عليك يا هيما و يكفيك شر الناس و شر العين

[shadymt2005]

سعر حامل الاكصدام الخلفى كام

[shadymt2005]

جمعة مباركة ان شاء الله.
التكييف شغال تمام وبيسقع كويسةبس ساعات المروحة تفصل ومفيش هوا ساقع بيطلع لمده دقيقة مثلا او اكتر وترجع تشتغل تانى ولما اغر السرعات مثلا تشتغل على سرعة تانية وممكن متشتغلش .
السنة ال فاتت كان عندى نفس العيب كشفت عليها قالولى ده عيب مقاومة مروحة التكييف ال وراء الدرج ال فى التابلوة وفكيتوه وطبعا ملقنهوش وبعد كده اتظبط لوحده وتمام وبدا الصيف ده يعمل نفس الحوار .
العربية ام 11 وشكرا.

[hemaa_82]

مش عارف اقدر اساعدك ازاي والله .... ماتخلي بتاع التكييف اللي قالك مقاومة يتشقلب مع كهربائي يجيبلك المقاومة ...علشان لو مظبططش تبقي في وشة و ميبيعكش

[hemaa_82]

بسم الله

ازيكم عاملين ايه ....

المهم .... من ساعة حوار ال اي بي اس و البلي و الكوبلن اللي اتكسر و اتغير ... وانا كل ما اوصل لسرعة 80 و اقرص بنزين احس برجة في العربية من الجنب الشمال بس الدريكسيون مبيتهزش ...

عملت عبيط و رحت رصصت ال 4 فرد و جبت الي ورا قدام و برضه زي ما هيه..
رحت لابانوب ..جرب و حس بيها و بقينا حيرانين ...

المهم ... علي مدار اسبو و اكتر طلع عينيه معايا بصراحة ....
طبعا الشك الاساسي كان في الحاجات الي غيرناها لان المشكله ظهرت بعدها ....

فكينا نضفنا و شحمنا ....مفيش
جابلي كوبل شمال بال اكس بتاعه بالصليبة كامل .... مفيش
جربنا صرة ببلية بشمعدان شمال .... مفيش
جابلي بلية جديدة شمال ... مفيش
سقطلي فتيس من عنده ... مفيش ...

و بعد ما عملنا اللي ميتعملش شمال لحد الفتيس نفسه قلنا مبدهاش ....
امبارح جابلي كوباية بصليبة "كوبلن داخلي" يمين .... و اخيرا ظبطت.....

انا حاليا ماشي بالفتيس بتاعه و لسة متحاسبناش لانه رافض ياخد مليم غير لما يحل المشكله ....
هروح بكرة يرجعلي فتيسي و نتحاسب و اقولكم الاخبار ان شاء الله ....


بس بجد يا اخوانا ابانوب و نبيل و لحد اصغر صنايعي في الورشة "يوسف" ...جدعان اخر حاجة و محترمين فشخ و ربنا يكرمهم و يباركلهم ....


نوافيكم بكل جديد ان شاء الله

[ayman66]

انا متابع تقييمك عن الأم 11 بجد رائع جداً من 2009 وحتى عيشت معاك إنتقاد الأخرين للهربية ودفاعك المحترم عنها ,,ولكن اليوم قرأت أخر تعليق لحضرتك وتجربتك مع الأسطوات المحترمين ابانوب و نبيل وانا متبعك مهام من زمان كل ده عظيم ويرفع له القبعة بجد لأنك إنسان صادق ومحترم وربنا يباركلك فى سيارتك لأنى على المستوى الشخصى يحترم هذه العربية جداً ومبحترمش السوق المصرى المفهمهاش للـأسف وظلمها زى عربيات كتير محترمة وإتظلمت ,,ماعلينا تحياتى لحضرتك وللجميلة m11 ولكن ليا طلب عند حضرتك معلش استحملنى يمكن أكون قديم كتير وده أكيد فأن سنى 53 سنة يعنى عجوز ولكن كنت احب ان يكون الكلام سلس يعنى بلاش كلمة فشخ دى لأنى بشعر إن العبارات دى بتصيع جمال الحوار والسياق وعموماً حضرتك باالطبع حر فيما تقوله وسامحنى وبعتذر على تدخلى ,,تحياتى مرة إخرى لحضرتك وربنا يباركلك فى m11 وكل سنة وانت طيب ويارب تكون سنة سعيدة على كل الناس ورمضان كريم علينا جميعا واللهم بلغنا جميعاً رمضان

[hemaa_82]

والله انا اسف لو ضايقت حضرتك ... بس ده انا بشيل كمية كلام ابيح طبعا من الحوارات مع الصناعية لو اتكتبت ممكن المنتدي يتعلم 18+ ....:)

و تاني حاجة حضرتك دي بقت بتتقال في الافلام العربية ... و بقت من مفردات الشعب المحترم من كتر اللي الناس بتشوفه ... وعامة هحاول مكتبهاش بس لو هربت مني ابقي سامحني و عديها

[hemaa_82]

نرجع للمفيد .....
المشتريات

65 تيل امامي
15 مشترك ميه صغير " مش شجرة"
60 خراطة مسح طنابير امامي
25 كاوتش كوبلن داخلي جديد
75 كوبلن داخلي " صليبة و كاس او كوباية"
مصنعيات بالتشحيم و الافزان والذي منه مع كل فكة و تركيبة و بعد شحططهم معايا للحرفين كذا مرة و شغل تقريبا يوميا اكتر من 10 ايام ... خد 280 جنيه

[hemaa_82]

وانا بظبط زوايا لقيت الاويل سيل بتاع الكوبلن اليمن بيرشح زيت... اشتريته من الجندي في الاميرية ب ١٥ بلبل و نبيل ركبه ببلاش

[ayman66]

والله انا اسف لو ضايقت حضرتك ... بس ده انا بشيل كمية كلام ابيح طبعا من الحوارات مع الصناعية لو اتكتبت ممكن المنتدي يتعلم 18+ ....:)

و تاني حاجة حضرتك دي بقت بتتقال في الافلام العربية ... و بقت من مفردات الشعب المحترم من كتر اللي الناس بتشوفه ... وعامة هحاول مكتبهاش بس لو هربت مني ابقي سامحني و عديها

اشكرك على زوقك وبتأسفلك تانى فأنت حر فيما تسرده من مفردات وبجد والله انا مقدر تعبك ومجهودك فى إيصال المعلومة المفيدة لأصدقاء المنتدى كما وان الشخصيات المجتهده مثل حضرتك فى المنتديات المتخصصه كامنتدانا هذا بجد هما البيرفعوا مكانة المنتدى ويكثر من اعضائه ,كله بفضل مجهوداتك العظيمة والأكثر إفادة حتى أصبح موضوع حضرتك ارشيف ننهل منه المعرفة فى مجال السيارات عموماً والسيارة m11 على وجه الخصوص ,بارك الله فيك ويجعله فى ميزان حسناتك

[hemaa_82]

اخجلتم تواضعنا يا استاذي ....

[hemaa_82]

كل سنة وانتم جميعا طيبين ..... الناس نايمة في رمضان