انطباعى عن الجين 2 من اول 30 كلم

[ahmedsiyam]

الاخ justs
التقشير ده من تحت و هاحاول اجيبلكم صورة

الاخ ابو سيف
مساء الجمال بس هو جرت العادة على اننا ننتقد الصناعة الصينى و ده لانها سيئة فعلا بس موش معنى كده ان الصينى وحش و لكن الصينى اللى بينزل هنا وحش جدا و للاسف بروتون تفوقت عليهم فى شوية حاجات خايبة زيى اللون اللى موجود على الفتيس و بيقشر
موش عايز اقولك مدى الاحباط اللى انا فيه من الحركة دى خاصة ان التقشير ظهر من اول يوم

[ابو سيف]

بصراحه ربنا يكون في عونك انا عارف ان الحاجات التافهه دي بتفقد العربيه الزيرو بالذات رونقها و بتأثر على سعادتك بالعربيه
معلش كلها حاجات بسيطه و مش مشكله انت معاك عربيه اعلى من تمنها بكتيـــــــــــــــــر جدا فلما تيجي في جودة خامات او تقفيل او حاجات تافهه خليها عليك انت

ممكن بقا عشان نفسيا تبقا سايق و انت مرتاح في زي جراب كدة جلد بيركب للفتيس الاوتوماتيك اولا شكله شيـــــــك جدا و هيبقا حلو اوي اوي على العربيه عندك لأنه ذو طابع رياضي و هيحللك المشكله خالص عشان التقشير ميزيدش كمان عن كدة و عشان يكون شكل العربيه من جوا مش عجوز

[ahmedsiyam]

المشكلة فى العصاية بتاعة الفتيس انك كل ما بترجع بيها لوراء فى الغيارات طولها بيقصر و اقصى طول وهى على الـ p
لو ركبت الجراب هايعصلج معايا فى الغيارات
هاحاول ارفع لكم صورة للحركة المسخرة دى بس الحمد لله على كل حال

[timo_crosswind]

ايه حكايه العربيه اعلي من تمنها بكتير انا مش عارف حكمتم علي اي اساس بالعكس العربيه سعرها يعتبر غالي والحكايه مش حكايه الكماليات ولو كماليات فاكيد الصيني يكسب واحد بيقولكم انه متعكنن عشان الفتيس بيقشر من اول يوم نفسا اعرف خامه ايه اللي في منتهي السوء واللي بيتعمل منها حاجات للعربيه بالسعر ده...انا مش ضد العربيه بالعكس انا بحترم فيها حاجات وحاجات تانيه لا واهمها سعرها الغالي والوكيل بتاعها وخاماتها الرديئه...ياخ احمد حقق تاخده من التوكيل وده موضوع متسكتش عليه

[M_HaFeZ]

السلام عليكم
مشكورين يا رجالة على الردود الجميلة دى

الاخ M_HaFeZ
جرب بنفسك فى اى معرض و شوف هى مناسبة و لا لأ بس انا شايف انها واسعة و حلوة جدا بالنسبة للسائق على عكس منظرها الخارجى يوحى بانها صغيرة شوية و عموما عندك النيسان التيدا واسعة جدا
هى موديل 2008 و الكاسيت اعتقد انه اوديو و لسه ماجربتش موضوع الـ mp3 و العربية اوتوماتيك ثمنها 90000 جـم

والله التيدا جميله وعاجبانى بس الفرق ياحمد بين الاتنين مش قليل

[Eng.Sameh]

أنا كمان مع الأخ timo_crosswind ،
لازم تاخد حقك من التوكيل ، ولو ما حلولكش المشكلة ، قولهم انا هبعت للشركة الأم ويا ريت تقول الكلام ده بالذات للاستاذ حبيب ، واعتقد انهم اول ما يسمعو الكلام ده هيرضوك علىخر لأن الشركة الأم مش بتسكتلهم ولو الكلام ده حصل في ماليزيا هيغيروهالك فوراً، وعلى فكره انا مجرب معاهم السلوب ده ونفع جداً واستاذ حبيب هوه اللي اتصل بيه، ولو احتجت معلومات عن كيفية مراسلة الشركة الأم انا ممكن اقولهالك بس لو ما استجابوش معاك، وان شاء الله هتتحل وترروق وتحلى

[Hassan Khalil]

بالراحة يا جماعة .. الراجل مش ناقص سخونية ..
ده لسه في الاول و بيقول يا هادي ..
*******
الف مبروك يابو صيام .. ربنا يبارك لك فيها .. و يحافظلك عليها و تستعملها في الخير دائما ..
اللون النبيتي ما شاء الله جميـــــــــل جدا .. و معلق معايا من ساعة ما شوفته عند نذير في مدينة نصر ..
** *** موضوع التكييف ده عادي .. عند التشغيلة و الفصلة حتسمعه .. و ده كلام زميل ليا معاه العربية من حوالي 6 اشهر ..
**********
عموما الف مبروك .. و ان شاء الله القطك في الشارع في مرة و اخد منك لفة :)

[tutankhamoun]

ايه حكايه العربيه اعلي من تمنها بكتير انا مش عارف حكمتم علي اي اساس بالعكس العربيه سعرها يعتبر غالي والحكايه مش حكايه الكماليات ولو كماليات فاكيد الصيني يكسب واحد بيقولكم انه متعكنن عشان الفتيس بيقشر من اول يوم نفسا اعرف خامه ايه اللي في منتهي السوء واللي بيتعمل منها حاجات للعربيه بالسعر ده...انا مش ضد العربيه بالعكس انا بحترم فيها حاجات وحاجات تانيه لا واهمها سعرها الغالي والوكيل بتاعها وخاماتها الرديئه...ياخ احمد حقق تاخده من التوكيل وده موضوع متسكتش عليه

العربية الجين بتتباع خارج مصر بداية من 110 ألف جنيه مصري
و بنفس المواصفات و بنفس الكماليات .......... هي هي .......... و في مصر أرخص
في حين إن في عربيات تانية بتتباع في مصر بضعف ثمنها خارج مصر
و لو عايز أسامي ماركات و موديلات و أسعارهم خارج مصر ........... أنا تحت أمرك

مشكلة الفتيس اللي قشر دي تفسيرها في الآتي

السيارة رياضية ....... تمام و تم التصميم على هذا الأساس
و بدل ما يعملوا فتيس بلون معين
فغلطوا غلطة كبيرة و قاموا صنعوا يد الفتيس من لون و دهنوها لون أخر و يبدوا أن الدهان أي كلام و من جودة أي كلام فلذلك أتقشر

و أنا عندي و كل أصحابي اللي أعرفهم .......... لم يحدث أي تقشير في عصايا الفتيس
و على فكرة يا أستاذ أحمد .........
لما تروح مرة تانية التوكيل
لازم تتطالبهم بتغيير العصايا أو رأس العصايا على حسب التقشير فين ؟

[zeyad1810]

مبرووووووووووووووووووووووووووووووووك

[ahmedsiyam]

السلام عليكم جميعا

باشكر كل الاخوة الافاضل اللى بيباركوا و مشكورين على المداخلة :)

الاخ M_HaFeZ
انا اتاكدت ان الكاسيت اوديو بس و مابيشغلش حاجة تانية و التيدا غالية فعلا بس و الله الجين 2 حلوة و اسمع كلامى و لو عايز تجرب فى معرض روح جرب و اقعد و شوف الاخبار

الاخ justs
انا على اتصال بالاستاذ حبيب من شهر ديسمبر 2007 و كنت باستفسر منه على حاجات فى العربية يمكن حتى من قبل ما انضم لنايل موتورز و جبت نمرته من موقع بروتون و الراجل الصراحة محترم فوق العادة و من نفسه قالى لما تعمل صيانة الالف ابقى بلغى و عايز يقابلنى بنفسه و من غير حتى مايعرف انى باشتكى من العربية و ان شاء الله ابقى اتصرف معاهم

حسن بك خليل
حبيب قلبى انت موش محتاج تلقطنى فى الشارع انا تحت امرك فى اوقت و العربية عربيتك يا باشا و على فكرة انا كنت حاجز النبيتى او الفيرانى بس من وجهة نظرى النبيتى مجرم جدا :)

الاخ توت
انا بابقى سعيد لما باشوف مداخلاتك المحترمة و اللى بتعكس وجهة نظر واحد فاهم

عموما يا جماعة التكييف كمان موش بيعمل صوت و بس انا وقفت بره العربية امبارح و كان شغال لاحظت انه بيشتغل و بيفصل بسرعة مابيلحقش يعنى لدرجة انى هاضطر اسفا انى اقفله باليل و اشغله الصبح بس لحد لما اروح التوكيل
وبعدين فى صوت عجيب سامعه وراء حاجة بتزيق كده موش عارف ده ممكن يكون البوردة اللى عليها السمعات و لا العدة اللى محطوطة فى الشنطة بيبان الصوت ده فى المطبات الرخمة الاستفزازية المسماة بعيون القط اللى مالهاش تلاتين لزمة اصلا و على الرغم من انى باخدها بالراحة جدا

النهاردة العربية عاملة 210 كلم و ماشاء الله و نمسك الخشب

[ussamalh]

استاذ احمد

السلامة عليكم
استاذ احمد انا اسامة و ممنضم جديد للموقع و ان شاء الله هجيب برتون جين 2
انا بس عاوز اطمنك على موضوع العربية كلم استاذ حبيب الراجل ده محترم جدا و هيجيبلك حقك فى ثوانى .
ثانيا
انا عاوز اقولك و اقول للزملا الافاضل اعضاء الموقع موضوع العيب الى فى العربية ده وراد جد اوأنا ليا زميل جايب
سكودا روماستر جديدة و فيها عيب خطير فى العفشة و التوكيل مش عارف يحله و اشتكه لحماية المستهلك .
يعنى الملخص ان عيوب التصنيع موجود فى كل العربيات من الرخيص و الغالى صينى او المانى او ماليزى .

[m_marmoush]

الف مبروك و ربنا يباركلك فيه و عقبالى كده أن شاء الله لأنى بارده ناوى أجيبها أوتوماتيك

[mino]

الف مبروك .... ربنا يديك خيرها و يكيفك شرها العربيه جميله

[ahmedsiyam]

شكرا يا رجالة على الردود اللطيفة

الاخ اسامة
انا معاك ان عربية ممكن يحصل فيها الكلام ده و انا موش متضايق منها خالص بالعكس انا لو رجع بيا الزمن تانى هاشترى برضه جين 2
و طبعا الاستاذ حبيب راجل ماشاء الله محترم جدا و ربنا يكتر من امثاله بس انا هاروح اشوف هايعملوا معايا ايه الاول لو لوم الامر هابقى اتصل بيه

[AhmedGen2]

ألف مبروك يابو حميد عقبال العروسة :d