اخيراًً

[toni]

اخيراً يا رجاله استلمت عربيتي(لانوس 2010) كنت عايز الفيراني بس لقيت واحده نبيتي عجبتني خدتها الحمد ل الله
العربيه زي الفل بس فيها شوية ملحظات عايز اخد رأيكوا فيها
1- مكنة الرفع بتاعت الزجاج بتاع السائق بتزيق زي ما يكون فيها تراب
2- في صوت تكه ورا شمال مجنني مش عارف جاي منين
3- التابلوه مش بيقفل غير لما يترزع شويه(فوايد التقفيل المصري)
4- الكاوتش انا ضبطه على 28 هل ده صح؟
5- الفتيس فيه عضه كده لما ابقى برجع بضهري وعايز اديها اول (ده ممكن يكون عيب مني علشان انا مش عارف اتعامل مع السوستة)
وعايز نصيحتكوا في فترة التليين وده اللى انا ناوى اعمله في اول 1000 ان شاء الله
- مفيش تكييف
- بنقل كتير علشان الفتيس يلين
- مش بعدي ال 80 ال2.5 -3 rpm
كمان عايز نصيحتكوا على مكان اركب فيه فرش(يفضل في مدينة نصر) دي اول حاجه اعملها بعد لما ارخص بكره ان شاء الله

اسف للأطالة

[MMamdouh]

مبروك عليك

الكاوتش بيتظبط على 32

امشى بالعربية عادى و شغل تكييف براحتك... انت مش عاملها عمرة عشان تمشى بطىء كدة

مرشدير اللانوس حساس بطبعتة و محتاج عناية و انت بتعشقة... و لازم طبعا تبقى العربية متوقفة تماما

MMamdouh

[dramyd]

الف الف الف مبـــــــــــــــــــــروك العربية وربنا يحرسهالك ويكفيك شرها ويديــــــــــــــــــك خيرهــــــــــــــــــــــــــــــــــــــــــــــ ــــــــــــــا

1- مكنة الرفع بتاعت الزجاج بتاع السائق بتزيق زي ما يكون فيها تراب

استنى شوية وان شاء الله هتلين او او انت هتركب انزار للعربية خلى اللى بيركب وهيشيل فرش الباب يزيتلك السلك ويشحمو وهيبقا تمام.

2- في صوت تكه ورا شمال مجنني مش عارف جاي منين

بعد صيانة 1000 كيلو وتربيط العفشة هتبقا تمام ان شاء الله .

- التابلوه مش بيقفل غير لما يترزع شويه(فوايد التقفيل المصري)

المشكلة فى الافل عاوز يتريح شوية ممكن اللى هيركب الفرش يعملهولك

4- الكاوتش انا ضبطه على 28 هل ده صح؟

28 فى الصيف
30 فى الشتاء

- الفتيس فيه عضه كده لما ابقى برجع بضهري وعايز اديها اول (ده ممكن يكون عيب مني علشان انا مش عارف اتعامل مع السوستة)

بعد صيانة 1000 كيلو وتربيط العفشة هتبقا تمام ان شاء الله

وعايز نصيحتكوا في فترة التليين وده اللى انا ناوى اعمله في اول 1000 ان شاء الله

مفيش تكييف

بنقل كتير علشان الفتيس يلين

الطبيعى بتاعك بس وحدوحدة علية وهو هيلين

مش بعدي ال 80 ال2.5 -3 rpm

متجريش

كمان عايز نصيحتكوا على مكان اركب فيه فرش(يفضل في مدينة نصر) دي اول حاجه اعملها بعد لما ارخص بكره ان شاء الله

انا معرفش فى مدينة نصر بس فى شارع دمشق جمدين وشطرين اوى دول اللى بركب عندهم

واخيرا مبروك يا باشا واهلا بيك فى المنتدا

[popahly]

بالنسبة للمرشدير دى كانت مشكلتى فى اول مركبت العربية وكنت بعانى من الصوت دا ودا لأنى كنت بستعجل أول مدوس دبرياج على طول بعشق النقلة الخاصة بالمرشدير والأخوان هنا نصحونى بدوسة دبرياج وصبر لمدة ثوانى معدودة قبل معشق المارشدير وفعلا مفيش صوت خالص بعد مطبقت النصيحة دى

[faron525]

مبروك عليك

الكاوتش بيتظبط على 32


mmamdouh

حضرتك متأكد ان الكاوتش يبقي علي 32 ارجوا الرد للاهمية

[MMamdouh]

28 فى الصيف
30 فى الشتاء

الكلام دة مش صح... ياريت اللى يقول نصيحة يكون متاكد ان كلامة صح

MMamdouh

[Akram]

الكاوتش لو هتملاه هواء يبقى 28 صيف ( علشان التمدد من الحرارة ) و 32 شتاء,
و لو هتملاه نيتروجين يبقى 32 صيف أو شتاء .

[dramyd]

الكلام دة مش صح... ياريت اللى يقول نصيحة يكون متاكد ان كلامة صح

يريت تسدق انى انا مش بقول حاجة مش صح وانا طول عمرى بظبط كدة وطول حياتى ولو تعرف انى اللى بيسفرو فى الصيف بالنهار بيظبطو على اقل من كدة عشان السخونة والكوتش وانا اول مره اعرف انى بيتظيط فوق 30 دى

[MMamdouh]

حضرتك متأكد ان الكاوتش يبقي علي 32 ارجوا الرد للاهمية

طبعا متاكد...

نزل كتالوج المستخدم بتاع اللانوس (حتلاقية موجود فى المواضيع المثبتة) حتلاقى فية مكتوب 32

نزل السservice manual بتاع اللانوس (حتلاقية موجود فى المواضيع المثبتة برضة) حتلاقى فية مكتوب 32

ممكن انزل دلوقتى اصورلك الستيكر اللى فى درج العربية و فيه مكتوب 32 برضة

على فكرة انا مش من النوعية اللى بتحب تفتى ولا تقول اى كلام من الهوا

MMamdouh

[Akram]

محمد باشا , زي ما انت عارف إن الكاوتش لما بيتملي هواء فيتمدد في الصيف و لو كان على 28 و كشفت عليه في النهار بلاقيه بيزيد عن كده بسبب التمدد , و على فكرة انا عندي مقياس خاص بيا ,

و لو الكلام فيه حاجة مش مضبوطة يا ريت توضحلي .

[MMamdouh]

يريت تسدق انى انا مش بقول حاجة مش صح وانا طول عمرى بظبط كدة وطول حياتى ولو تعرف انى اللى بيسفرو فى الصيف بالنهار بيظبطو على اقل من كدة عشان السخونة والكوتش وانا اول مره اعرف انى بيتظيط فوق 30 دى

انا مليش دعوة بكل الكلام دة... انا ليا كتالوج العربية... و الكتالوج بيقول الصح... و الكتالوج بيقول 32 صيفا و شتاء

قصة بقى انك انت شخصيا بتنفخ على حاجة تانية دى ترجعلك انت.... مش معنى انك انت بتعمل حاجة يبقى دى حاجة صح... ما انا ممكن احط زيت تموين بدل زيت الموتور... هل دة صح؟؟؟

القصة مش ان حاجة ينفع تتعمل... القصة هل هى صح ولا لا... و الصح موجود فى الكتالوج

MMamdouh

[MMamdouh]

بالنسبة للمرشدير دى كانت مشكلتى فى اول مركبت العربية وكنت بعانى من الصوت دا ودا لأنى كنت بستعجل أول مدوس دبرياج على طول بعشق النقلة الخاصة بالمرشدير والأخوان هنا نصحونى بدوسة دبرياج وصبر لمدة ثوانى معدودة قبل معشق المارشدير وفعلا مفيش صوت خالص بعد مطبقت النصيحة دى

+1

MMamdouh

[Akram]

يا جماعة احنا بنتكلم على هواء و لا نيتروجين .

[MMamdouh]

محمد باشا , زي ما انت عارف إن الكاوتش لما بيتملي هواء فيتمدد في الصيف و لو كان على 28 و كشفت عليه في النهار بلاقيه بيزيد عن كده بسبب التمدد , و على فكرة انا عندي مقياس خاص بيا ,

و لو الكلام فيه حاجة مش مضبوطة يا ريت توضحلي .

كلامك عن تمدد الهوا مضبوط... عشان كدة حتلاقى دايما بين قوسين على اى بيان عن ضغط الكاوتش (valid for cold tires only) يعنى المقاسات دى صح للعجل البارد فقط... و دة السبب ان لما واحد يقف فى محطة بنزين و يقيس العجل يلاقى الضغط 99 و حاجات غريبة كدة لان الهوا اتمدد و الضغط زاد... و لما يضبط لعى الصح يلاقى تانى يوم العجل مهوى

اللى نستفيدة من القصة دى حاجتين:

1- ضبط الهوا بيكون للعجل البارد... يعنى تضبط عجلك عند واحد يكون فى اخر الشارع بتاعك مثلا مش اكتر من كدة و الا الضبط حيبقى غلط

2- يفضل استعمال النيتروجين عشان نتخلص من حوار تغير الضغط دة الى الابد

انا كنت بعمل زيك بس بنفخ 30... مع 30 العربية مش بتدبدب لكن العجل كان بيصفر مع الفرامل و الملفات... لما بنفخ 32 التصفير بيروح بس العفشة بتدبدب... بعد النيتروجين و الحمد لله كل حاجة تمام

فى عربية والدى نفخت نيتروجين 32 لما ركبتلها كاوتش جديد (اكتوبر او نوفمبر 2009) ب 20 الارع فرد و لحد النهاردة الاربع فرد مضبوطين و نقصوش حاجة

MMamdouh

[M.Zaher]

- مفيش تكييف
- مش بعدي ال 80 ال2.5 -3 rpm

اسف للأطالة

امشى بالعربية عادى و شغل تكييف براحتك... انت مش عاملها عمرة عشان تمشى بطىء كدة

خد بالك من الحته دي
وشوف الموضوع ده بالمره

http://www.nilemotors.net/Nile/140336-a.html

و ده كمان
Break In Secrets--How To Break In New Motorcycle and Car Engines For More Power