مرجع لجميع اعطال و مشاكل الانوس و حلولها

[Ahmed-SAMIR]

*العطل :
=====
- عصاية الفتيس عايمة وكل حارات الغيارات مش بتلقط الا الغيار التالت والرابع

*السبب:
=====
- جلبة تيفلون بتحكم حركة ماسورة معدنية بتناول الحركة من عصاية الفتيس لمجموعة تروس الفتيس نفسها (تحت الكونسول)

أو البديل عصاية الفتيس كلها استيراد بالكرسى اللى محملة عليه بـ 150-250 من الحرفيين

*التكلفة:
=====
- 50 جنيه تكلفة خرط الجلبة + 100 جنيه مصنعية فك وتركيب عصاية الفتيس كلها (لو حد عملها قبل كده أنا مستكتر المصنعية لو حد ممكن يفيدنى بالتكلفة )

*زمن الاصلاح:
========
- ساعتين فى المخرطة وساعة مابين الفك والتركيب

[atto]

حل مشكله ضورى فى المويتور

العطل
العربيه مش بسحب
لاحظت تاكل شفه الترس كاتينه الصغير الى بيتركب فى الكرنك غيرت ثلاث مرات فى سته شهور

خدت بالى من ان شفه عمود الكرند وسعت
ا

هل فيه حل غير فك الموتور

انا بتشغل على التاكسى بعد الشغل والظروف مش تسمح بحل الموتور دلوقتى
ارجو المساعده

[atto]

العطل
العربيه مش بسحب
لاحظت تاكل شفه الترس كاتينه الصغير الى بيتركب فى الكرنك غيرت ثلاث مرات فى سته شهور

خدت بالى من ان شفه عمود الكرند وسعت
ا

هل فيه حل غير فك الموتور

انا بتشغل على التاكسى بعد الشغل والظروف مش تسمح بحل الموتور دلوقتى
ارجو المساعده

مش معقوله مفيش رد او حل

رفع للمساعده

[waleed metwaly]

فكرتك رائعة
عندى مشكلة فى العربية وعايز حد يحلها
معايا دايو لانوس أتوماتيك 99 ....العربية مش بتعدى سرعة 120 ك/م

[atto]

مش معقوله مفيش رد او حل

رفع للمساعده

حمد لله انا جبت الحل

وهقوله للفائده


قالى احنا ممكن نطلع عامود الكرند من خلال فك من الفتيس وفك الكرتيره من تحت


عمود د الكرنك هيخرج معنا عادى

انا هشوف المكيانيكى
ربنا يسهل انا هوديه للخراط ونشوف

[yasserino]

ان عندي لمبة الشك بتنور ولما امشي بيها شوية بتختفي وترجع تاني عملت ليها سكان وقاللي الفني ان حساس السي او عايز يتغير لكن عموما انا شيلتلك الايرور والحساس ده ثمنه حوالي 150 - 200 جنيه
فكيت الحساس بنفسي ونظفته بمجفف فيديو جاف وراحت مشكلة اللمبة للأبد

انا عندى نفس المشكله من فضلك ممكن تقولى او تفيدى مكانه فين عشان الموضوع ده مصدعنى

[Ayman.elsawy]

سخونة العربيه عند فتح الكبوت بالرغم من ان مؤشر الحراره طبيعى تحت النص

[mizobibi]

سيارة شيفورليه لانوس 2016

معايا سيارة شيفورليه لانوس 2016 زيرو اول لما جبتها لقيت صوت تشحير و وونة او صفارة لما العربية بتمشي علي سرعات هادية او لما بتلف شمال تسمع صوت تشحير اكن صاجة بتكحت في حاجة ووديتها التوكيل و طلع الصاجة اللي مغطية الطنبورة هي اللي بتكحت

[ashraf14]

انا عندى لانوس 2005
كان فى خبط يمين امام
رحت ل 2 بتوع عفشه قالوا لازم نغير المساعدين
رحت للثالث طلع الصاموله اللى فوق المساعد مفكوكه
مجرد ان ربطها راح الصوت حالص

[wael hessin]

الطاره بتحدف بعد ال100

السلام عليكم ورحمة الله وبركاته
انا عربيتى لانوس 2016 لسه ماكملتش 1000 كيلو سافرت بيها السخنه الأسبوع اللى فات العربيه وانا رايح كنت ماشى 120 وأكتر والعربيه كانت مظبوطه بس وانا راجع اخدت مطب ومن بعدها العربيه بتحدف شمال من بعد ال100 كيلو أرجو الإفاده من الساده الخبراء

[m.said.eng]

التكييف عندى باظ

بعد اذنكم .. ديه اول مشاركة ليا هنا ... عندى لانوس 2005 و التكييف كان شغال زى الفل السنة اللى فاتت لحد اخر السنة لقيت فى صوت صفارة و لما روحت للميكانكى قالى بلية الكباس تقيلة لازم تتغير عشان السير بيلف اقل من سرعته ... جيت السنة ديه غيرت البيلة و ركبت السير لقيت التبريد كل شوية بيقل روحت اسال ... قالى لازم تغيير الكباس كله و تمنة 1700 .. عشان انت لما بتقفل التكييف بيفضل يسرب حوالى لمدة دقيقة او دقيقتان و نزلت سمعت الصوت بتاع التنفيس فعلا و قالى مافيش حل للمشكلة ديه غير انك تغييرة ... هل ده صحيح و لا لاااااااااااا ؟؟؟؟ ارجو المساعدة

[riri4]

جرب تشوف حد تاني لان مره رحت عند واحد قالي ان الكباس عايز يتغير بسبب صوت الكباس كان فيه ترزيع ورحت لواحد تاني عمله طقم أصلاح وبقي زي الفل ..

[msadeka]

موضوع رائع ومميز

كل الصنايعية بقو بيشتغلو الناس ومبقاش فى ضمير

وغير كدة ان معظمهم بيتعلمو فينا وفى عربياتنا

[ledo4ever]

انا عندى مشكلة صغيرة
انا معاياد دايو لانوس 2003
المشكلة ان المساحات بتاعت الازاز بتشتغل على سرعة واحدة
اول سرعة حتى لو رفعت الدراع لاقصى درجة
هل الموتور بايظ .. و هل بيتصلح ولا بيتغير و بيتغير بكام
حد يفدنى ؟؟؟؟؟؟

[محمد القيسي]

ايه رايكم يا جماعة نعمل موضوع مثبت فى منتدى الدايو و كل واحد يكتب فيه المشكله او العطل اللى حصل معاه فى عربيتو الانوس و يكتب طريقة الاصلاح باختصار دون الخوض فى تفاصيل كثيره و ردود متبادله بين الأعضاء و اهم حاجه اختيار عنوان مناسب و مختصر يدل على نوع العطل تسهيلا للبحث

سبب الاقتراح انى لاحظت تكرار المواضيع و تكرار الاجابات

يعنى لو فيه حد عندو مشكله معينه محتاج يبحث فى كل مواضيع القسم و احيانا يتم ذكر بعض الأعطال خلال موضوع بعنوان مختلف و ممكن واحد يكسل يدور فيعمل موضوع مكرر

أما اذا تم تثبيت الموضوع و كانت كل المشاركات مختصره فسوف يتكون لدينا مرجع لكل الأعطال يستطيع كل ملاك السيارة الرجوع اليه عند الحاجه دون اضافة مواضيع اخرى مكررة

============================
برجاء وضع شكل ثابت لكل المشاكل وهى كالتالى
* بداية ظهور المشكلة
* المحاولات الفاشلة لحل المشكلة
* الخبرات الجانبية اثناء حل المشكلة (ايه الجديد اللى اتعلمته / ايه اللى المفروض اخد بالى منه / نوع قطع الغيار اللى فيها مشكلة والنوع الكويس / حاجه اتفكت جنب المشكلة واتعلمت منها حاجة)
* الطريقة النهائية لحل المشكلة
* اذا امكن اضافة صور للمشكلة قبل واثناء وبعد حلها
* التكلفة النهائية لحل المشكلة مفصلة قطع غيار / مصناعية (برجاء ملاحظة عدم الاعلان عن اى ورشة ابوس ايدكم علشان اللى بيحصل فى المنتدى - كفاية كده)
* على جميع الاعضاء الألتزام بعدم الرد على اى عضو الا فى الضروره القصوى (انا داخل اشوف اعطال وحلولها ومش عايز اقرأ أى تعليق)
* الردود تكون للأستفسار عن العطل بعينة فقط وليس لعطل شبية (عندك عطل تانى اكيد هاتلاقى موضوع بنتكلم فيه عن العطل بتاعك فى المنتدى أو ممكن تبدأ موضوع جديد)

مشرف القسم