أهمية أراء ملاك الشيفروليه اللانوس 2011

[MMamdouh]

خالى بالك يا محمد باشا اننا يطلق علينا اسم user لكن انت بيطلق عليك super user
انت فاهم يعنى ايه عربيات - وعامل تعديلاااات كتيرة موووووووت فى العربية - وبتقدر تفرق بين قطع الغيار الاصلى والمضروبة - تعرف اماكن كتييير تشترى منها قطع غيار - صيانة العربية بالنسبة ليك متعه مش عبء زى عند اغلبنا
وعليه انا متأكد ان مع سواقتك الرياضية جدا ممكن تكون (أو أكيد بسم الله ماشاء الله) عربيتك احسن من عربية اى حد فينا

على فكرة الموضوع مش بالصعوبة دى خالص...

المحافظة على العربية له 3 عناصر:

جدول الصيانة... و دة موجود فى كتالوج العربية و موجود هنا فى المنتدى و لو سالت اى حد من الاعضاء حيقولك كل قطعة بتتغير عند كام كيلو

قطعة الغيار الاصلية... و دى و الحمد لله متوفرة و بسعر مناسب... و بالنسبة لقصة المضروب فا دى حلها تشترى من محل ثقة و مضمون و برضة دة معروف للاعضاء هنا

الفنى اللى بيقوم بالخدمة... و برضة اسماء الناس الكويسة اصحاب الخبرة و الفهم معروفة للزملاء

اللى بيواجة مشاكل فى عربيتة باستمرار بيكون اما نتيجة عدم اتباع تعليمات جدول الصيانة بالتالى قطع كتير بتتجاوز عمرها الافتراضى و تاثر بشدة على اداء العربية او تسبب تلف مكونات اخرى فى سكتها... دة بيحصل نتيجة "الفهلوة" من بعض الناس اللى بتعتبر ان القطعة "كويسة و شغالة" بالرغم من انها تجاوزت مدة خدمتها لمجرد ان "شكلها كويس" او "مش عاملة مشكلة"

او نتيجة شراء قطع غيار مجهولة المصدر سعيا وراء التوفير او شراء قطع غيار استيراد فى حاجات مينفعش فيها استيراد (طلمبات البنزين و البوبينة و الطنابير الخ الخ)

او نتيجة صيانة العربية عند واحد كفتجى بيعجن اى حاجة و السلام و الحاجة اللى يصلحها اما تبوظ تانى او يلف جمبها حاجتين تلاتة و غالبا برضة المشكلة دى بتحصل نتيجة محاولة التوفير فى مصاريف الصيانة

للوهلة الاولى حتحس ان صيانة العربية بالطريقة دى مكلفة جدا... لكن هى فى الحقيقة رخيصة جدا... لان الحاجة بتشتريها مرة واحدة و بتغيرها مرة واحدة و مبتجيش جنبها الا فلا الصيانة التالية... انما لو جبت قطعة غيار تعبانة حيبقى اكنك رميت فلوسك على الارض و حتروح برضة تجيب الاصلى فى الاخر... و يا سلام لو اللى بيركبلك القطعة دى واحد بطيخة... حيخربلك الدنيا و تلاقى نفسك عايز تصلح حاجة تانية و لما تصلحها تكون القطعة التعبانة تلفت و عايز تغيرها تانى...

و هنا ممكن واحد يفكر يجيب القطعة استيراد طالما هى بتبوظ كتير فا يجيب بوبينة او طلمبة استيراد تشتغل شهر ولا اتنين و تتوفى و تلاقى اشاعة ان "قطع غيار الكورى غير معمرة" و الكلام اللى بالك فيه لمجرد ان اللى بيشترى عايز يوفر تمن القطعة الاصلية فا اشتراها 4 او 5 مرات و كل مرة بيدفع مصنعية جديدة للميكانيكى او بيجرب ميكانيكى شكل مع كل تغيير

هنا صاحب العربية بيزهق من العربية و يبقى عايز يخلص منها... مع ان دى مش مشكلة العربية خالص... العربية زى ما بتحافظ عليها بتحافظ عليك... حتسترخص فى قطعة الغيار او تروح لميكانيكى نص لبة انت اللى حتتعك فى المشاكل

طبعا كل دة بينطبق على العربية الزيرو... اللى شارى مستعمل و مكنش موفق فى اختيارة و كان من نصيبة عربية مهملة (بيطلق عليها كنبة) حيفضل برضة فى الدوامة دى لان العربية بتبقى خرابة... هو مش مستحيل انها ترجع عربية محترمة بس دة حيصرف فلوس كتير ووقت كتير... و برضة دى مش مشكلة العربية

من الاخر لو عربيتك زيرو و مشيت على جدول الصيانة كما ينبغى و جبت قطع الغيار الاصلية و اتعاملت مع ميكانيكى خبرة و محترم العربية حتعيش معاك سنين و سنين و حتريحك على الاخر.... و لو شاريها مستعملة بس حالتها نضيفة و "بيتى" زى ما بيقولوا و عملت كدة حتوصل لنفس النتيجة... اى حاجة غير كدة معاك ربنا

MMamdouh

[mohamedibk]

السادة الأفاضل بعد السلام عليكم ورحمة الله وبركاته

أه بالنسبة للسيد العضو أرجو تحديد الهدف من هذا الإستطلاع أو الإستفتاء أحسن حد يفتكرك شغال في شركة منافسه للأنوس ولا حاجة :)

إلى الاخ /bshndi
بعد التحية ,,,
الهدف من هذا الموضوع الراى الشخصى لملاك هذه السيارة لمساعدتى ومساعدة الاخرين الذين يرغبون فى شراء سيارة اقتصادية
انا امكانياتى بصراحة فى حدود 70000 جنيه
وبشوف ايه انسب الاختيارات بالنسبة لى من الاتى ( لانوس - لوجان )
كل واحدة لها مميزات وعيوب
حتى الان بالنسبة لى شخصياً اللانوس افضله وذلك عشان قطع غيارها الاصلية رخيصة بالنسبة لسيارات فى فئتها السعرية وسهلة البيع ولا تفقد الكثير من قيمتها وسهلة الاصلاح وهناك ميكانيكة كثير بتفهم فيها كويس ومؤدية الغرض المطلوب منها .
ما اللوجان ممتازة جداً وتتفوق فى اشياء كثيرة عن اللانوس ولكن فى نقط فى غير صالحها مثل غلو قطع الغيار الأصلية اعادة البيع مش سهلة وتفقد الكثير من قيمتها عند البيع وصيانتها برده غالية ومش اى حد بيفهم كويس فى الرينو
وانا عامل هذا الموضوع لكى يستفيد منه كل شخص
وليس بهدف الدعاية والاعلان حتى لا يعتقد ذلك
وشكراً
اه ملوظة هامة لك
اقراء مشاركاتى جيداً فى هذا الموضوع قبل ان تقول لىأه بالنسبة للسيد العضو أرجو تحديد الهدف من هذا الإستطلاع أو الإستفتاء أحسن حد يفتكرك شغال في شركة منافسه للأنوس ولا حاجة

[Hadidy0]

ايه يا جماعة ،فى ايه متصلوا على النبى وكمان زيدو النبى صلاة
يا أ/ mohamedibk مفيش حد يقصد حاجة وأ/ bshndi كان بيهزر معاك ياعنى :)
على فكره انا كمان كنت محتار بين اللانوس واللوجان-وممكن تشوفو مشاركاتى فى الموضوع-وبصراحة النقاش ده عرفنى شوية حاجات عمرى مكنت هاعرفها
ربنا يخلى لينا المنتدى الجميل ده :)

[mohamedibk]

ايه يا جماعة ،فى ايه متصلوا على النبى وكمان زيدو النبى صلاة
يا أ/ mohamedibk مفيش حد يقصد حاجة وأ/ bshndi كان بيهزر معاك ياعنى :)
على فكره انا كمان كنت محتار بين اللانوس واللوجان-وممكن تشوفو مشاركاتى فى الموضوع-وبصراحة النقاش ده عرفنى شوية حاجات عمرى مكنت هاعرفها
ربنا يخلى لينا المنتدى الجميل ده :)

عليه افضل الصلاة والسلام
خلى بالك يا حديدى ياحبيبى
الراجل ماقلش حاجة غلط
ولكن ممكن بسهولة حد يفتكر اننى بعمل فى شركة منصور شيفروليه او فى شركة رينو لوجان او اى شركة اخرى مضادة للانوس
وانى داخل اطلع القطط الفطسانة فى الانوس
والاخ / bshndi رايه على دماغى من فوق
عشان كده انا مش زعلان
احنا كلنا اخوات هنا فى المنتدى

[mero100]

تحياتي للجميع :-)

يا جماعه اي شيء في الدنيا له مزايا و له عيوب ....احنا بنتكلم في سيارات في فئه سعريه حتي 70.000 جنيه ... بالتالي في السعر دة السيارات بتبقي شعبيه ... او لو حد بيتضايق من كلمه شعبيه ف نقدر نقول اقتصاديه ... ارجو نتتفق علي هذا المبدأ

اللانوس... الفيرنا ... اللوجان....بروتون ساجا ....و بالنسبه للصيني : اسبيرانزا .. Byd .... كل هذه السيارات ذات الفئه السعريه بتتراوح من 65000 الي 70000 تقريبا .... كل سياره منهم بها ميزة و عيب .... اللي حتلاقيه ف واحدة مش حتلاقيه في التانيه من ناحيه الميزة و العيب ....هيه دي السياسه التنافسيه بين الشركات ...( مع تحفظي علي الصيني لكن بقاله وجود في السوق المصري )

فيه نقطه مهمه اوي بتحكم الموضوع اللي بنتتكلم فيه دة .... و هيه المشاكل الفرديه ... بمععني ممكن واحد فينا جاب عربيه و حصل معااه موقف ....ف منقدرش نعمم الموضوع او المشكله و نقول يبقي االعربيه الفلانيه و حشه ....

انا ذكرت في مشاركة ليا في نفس الموضوع من كام صفحة فاتوا ان سيارتي شيفروليه لانوس و وصلت لمرحله اني حبيع العربيه رغم انها مكملتتش معايا حوالي 5 شهور ... لاني حساس جدا للسيارات و العربيه محتاجة تظبيط ... من حيث مثلا ظبط زوايا - تربيط عفشه محترم - ظبط ابواب و زجاج - و هكذا .... طبعا توكيل منصور كرهني في اللانوس رغم اني بحبها جدا و جبتها بعد عده مقارنات استمرتت شهرين بالنسبه لي ...
صديق ليا معاه فيرنا 2010 ... كلمته و قلتله قراري بالبيع و بكل امانه و بدون تحيز يا جماعه .... قاللي لو العيوب دي هيه االلي حتخليك تبيع العربيه و تجيب فيرنا مثلا ... قاللي يبقي انت غلطاان .... لان كل السيارات في هذه الفئه السعريه متقاربه في المشاكل .... بمعني انها سياارات لا ترضي طموحاتنا الكامله في امتلاك سياره زيرو تكون سياره العمر مثلا . وانه هوة غير طنابير بعد سنه في الضمان .... يعني الفروق بين االموديلات مش فروق خرافيه يعني ... االكلام علي اللانوس كتير و علي مشاكلها لانها قديمه ... بنتتج من زمان من االتسعينيات ...

انا بقول تجربتي ... ممكن واحد تاني مععاه نفس الموديل بتاعي و موااجهش نفس العيوب اللي بشتكي منها و ممكن بردو يكون ااتععامل مع توكيل منصور و اتبسط جدا ... دي فروق فرديه ... صديقي معاه فيرنا و بيعاني من نفس مشكله ان التوكيل مش كويس .... بردو فروق فرديه .

الناس بتقبل علي اللانوس او الفيرنا لان السيارتان اصبحتا معروفتان جدا و صيانتتهم سهله و قطع غيارهم معقوله نسبيا و مشاكلهم معروفه و النقطه المهمه اوي هوه سعر ااعاده البيع...( مهم جدا النقطه دي ) .... عشان لما مثلا تبيع بعد 3 سنين و تحب تجيب حاجة اعلي متخسرش كتير ...يبقي اللي خسرته هوة تمن الركوب .

ااتعلمت هناا موضوع فيشه الاوكتان و بصراحة دي ميزه حلوة في اللانوس و لما جربتها استريحت جدا من حيث السحب .

اللي فهمتته في الاخر ان توكيل منصور مبيعرفش يعمل صيانه للانوس ...و بيشخصوا المشاكل غلط ... مش زي توكيل ابو غالي
مع العلم ان ممكن يكون المشكله او العيب حاجة بسيطه .
مثال : الفرامل ععندي كانتت عاوزة اخذ هواء و اللي فاكره اان فيه مهندس في منصور قاللي ان مشكله الفرامل دي من ضمن المشاكل االلي في اللنوس اللي ملهاش حصل و اللي ااحنا خااطبنا فيها general motors و حتي االان مجاش رد.
و اكتشفت ان الموضوع لاايزيد عن انه كان محتاج يتاخد هوا صح للفرامل .... طبعا المهندس دة ( مهندس لامؤاخذة ) ... عاوز شكوي محترمة عشاان يصحي ويفوق ويشتغل صح ... بدل ما هوة بيعذب الناس ومش عاوز يشوف شغله .

االلي قصدي اقوله ممكن كلمه واحدة تسوأ منتج و ممكن كلمه ترفع منتج

زي الاخ اللي في قسم الاسبيرانزا ... و جاب m 11 و قعد 32 صفحة يمدح فيها و ف مزاياها و فيه اعضاء هاجموه و قالوله حرام عليك تغري الناس دي كلها عيوب .... عارفين؟... الععضو دة خلاني من كلامه كنت حبيع و اجيب m11 ....لان سعرها تقريبا حوالي 75000...., و فيها اوبشنز كتير ..... لما سأالت عليها و علي مشااكلها و مدي توافر قطع غياارها ....حمدت ربنا اني مخدتش القرار دة ....خصوصا بععد ما شفت أراء بعض الملاك من الموديل دة .

و اخيرا بكل امانه : اللانوس و الفيرنا و اللوجان .... عربيات كويسه جدا من جهه مواصفتها وسعرها.... لكنهم مش فئه ممتازة

اللي عاوز يشتري يقارن بين التلاته ااو بين اي عربيه و التانيه من حيث :

1- المشاكل العامه بين المستخدمين ... ( و ليس المشاكل الفرديه )

2- سهوله الصيانه عند ااي ميكانيكي او مركز خدمه

3- تواافر قطع الغيار و سعرها

4- سعر اعادة البيع

5- و اخيرا اعتقد ان التقفيل المصري ...بختك يابو بخيت :-))

طولت عليكم .... لكن لاازم نتكلم باستفاضه عشان الكل يستفاد و محدش يحس انه اتدبس في عربيه بسبب رأي حد .

اخوكم / عمرو

[mohamedibk]

الله ينور عليك يا عمرو
عشان الواحد يبقى عارف ايه الحاجات او المشاكل العامة المتوقع حدوثها لقدر الله عندما يشترى تلك العربية وازاى يتعامل معها وانا حاسس ان تلك المشاكل دية مش كبيرة وغير مكلفة اوى بالدرجة التى سمعنا عنها فى تلك المناقشة
وانا مبسوط منك ومن الزملاء الذين شاركوا معنا فى هذا الحوار الممتع
الذي سوف يكون هدفاً صادقًا وصحيحاُ يصب من أجل مصلحة الجميع
وتحياتى اليكم
اخوكم / محمد

[medododo]

فئة السيارة السعرية لا تتوقع منها الكثير
ولكن الحكاية استخدام وصيانة دورية
ومش هيكون في مشاكل جامدة
ان شاء الله

[medoampir]

السلام عليكم ورحمه الله

mohamedibk انا وصلتنى رسالتك

قبل ما اقول رايى لازم تكون عارف ان ده مش راى محترف
يعنى انا يدوب بسوق العربيه

انا معايا لانوس 2010
- بقالها دلوقتى سنه و 8 شهور
- عامله 9000 كيلو

- غيرت صباع حراره بعد اسبوع من الشراء (وده كان عيب فى الموديل كله لانى لما رحت التوكيل وانا داخل بقول للامن سلام عليكم رد وقالى عداد الحراره مش كده سبت العربيه فى التوكيل واستلمتها بعد ساعتين
- عملت صيانه 5000 (270 جنيه)
- تحتك بالمطبات الغير قانونيه فقط اذا كنت مركب ناس اوزان كبيره (محكتش غير فى المطبات اللى الاهالى بيكونو عاملينها فى المناطق الشعبيه وده وانا مركب 3 كبار ومحمل الشنطه بوزن كبير)
مش عايز اقولك بقى انا معظم الوقت سواقتى فى شوارع زفت زى بولاق الدكرور وارض اللواء وفى السفر اسافر الى بلاد بالشرقيه والمنوفيه لن اذكر اسمائها لانها مش على الخريطه اصلا)
- اقتصاديه جدا فى البنزين
- طبعا بم اننى سائق غير محترف لم اتخطى سرعه 150 ك/س مكنتش قلقان من العربيه وكنت راكب انا و 3 اصحابى
- سحبت مع اسبيرانزا وفيرنا من وضع الثبات الفيرنا تسبق فى الاول لكن اللانوس بتسبقها بعد مسافه قصيره


ده كل اللى اعرفه والله على ما اقول شهيد


- اه ومره شديت مع بى ام 318 موديل 1999 جيت اسقط غيار ملقيتش الواد على الطريق مش عارف راح فين

[mohamedibk]

السلام عليكم ورحمه الله

mohamedibk انا وصلتنى رسالتك

قبل ما اقول رايى لازم تكون عارف ان ده مش راى محترف
يعنى انا يدوب بسوق العربيه

انا معايا لانوس 2010
- بقالها دلوقتى سنه و 8 شهور
- عامله 9000 كيلو

- غيرت صباع حراره بعد اسبوع من الشراء (وده كان عيب فى الموديل كله لانى لما رحت التوكيل وانا داخل بقول للامن سلام عليكم رد وقالى عداد الحراره مش كده سبت العربيه فى التوكيل واستلمتها بعد ساعتين
- عملت صيانه 5000 (270 جنيه)
- تحتك بالمطبات الغير قانونيه فقط اذا كنت مركب ناس اوزان كبيره (محكتش غير فى المطبات اللى الاهالى بيكونو عاملينها فى المناطق الشعبيه وده وانا مركب 3 كبار ومحمل الشنطه بوزن كبير)
مش عايز اقولك بقى انا معظم الوقت سواقتى فى شوارع زفت زى بولاق الدكرور وارض اللواء وفى السفر اسافر الى بلاد بالشرقيه والمنوفيه لن اذكر اسمائها لانها مش على الخريطه اصلا)
- اقتصاديه جدا فى البنزين
- طبعا بم اننى سائق غير محترف لم اتخطى سرعه 150 ك/س مكنتش قلقان من العربيه وكنت راكب انا و 3 اصحابى
- سحبت مع اسبيرانزا وفيرنا من وضع الثبات الفيرنا تسبق فى الاول لكن اللانوس بتسبقها بعد مسافه قصيره


ده كل اللى اعرفه والله على ما اقول شهيد


- اه ومره شديت مع بى ام 318 موديل 1999 جيت اسقط غيار ملقيتش الواد على الطريق مش عارف راح فين

medoampir
الله ينور عليك يا اخ ميدو امبير على مشاركتك الجميلة ورأيك الشخصى فى ذلك الموضوع

[mero100]

شكرا للعضو ميدو امبير علي المشاركة اللطيفه :-)

لكن فيه استفسار....انت لما غيرت صباع الحراره ..كانت المشكله ايه اساسا؟.... و ذلك حتي نستفيد كلنا

و شكرا ميدو

[m0hsen]

اللانوس تكسب في التاريخ والشكل واعادة البيع ورخص قطع الغيار واستفتي قلبك

+11111

[mero100]

شكرا للعضو ميدو امبير علي المشاركة اللطيفه :-)

لكن فيه استفسار....انت لما غيرت صباع الحراره ..كانت المشكله ايه اساسا؟.... و ذلك حتي نستفيد كلنا

و شكرا ميدو

[azeweel]

أنا معايا لانوس2011 الحمد لله كويسه جدا ومفيش مشاكل ومسإلة القرب من الأرض هى مش واطيه بالدرجه وانت بتأقلم نفسك مع المطبات وربنا يوفقك فى الإختيار الصائب واللى ترتاحله نفسيا فى الأول هيكون الأقرب للشراء

[medoampir]

شكرا للعضو ميدو امبير علي المشاركة اللطيفه :-)

لكن فيه استفسار....انت لما غيرت صباع الحراره ..كانت المشكله ايه اساسا؟.... و ذلك حتي نستفيد كلنا

و شكرا ميدو

كان امبير الحراره مش بيتحرك خالص - دايما على الزيرو
حتى لو سافرت مسافه اكتر من 100 كيلو

[MOSTAFA . AHMED]

السلام عليكم ورحمة الله أحب اوضح حاجة صغيرة 1- بما ان الشوارع بتاعتنا مش المانيا يعني والصحراوي عندنا مش الاوتوبهان ( طريق غير محدد السرعة في المانيا ) اذا انت عرضة لحفر ومطبات وبلاليع فانت في الغالب عايز عربية صيانة عفشتها متكونش غالية 2- وبما ان السواقين اللى حوليك مهماش لويس هاميلتون وشوماخر اذا انت عرضة للتريح على عربيتك والخبطاط الصغيرة اللي في غالب عبارة عن فانوس وغمازة اشارة وجرايد الباب وكفة مرايا ودي طبعا حاجات صغيرة فبتالي عايز عربية تكون قطع غيرها رخيصة ومتوفرة ولها بدائل كتيرة 3- بما ان البنزين زبالة واسعارة بتنط نطاط غريبة اذا انت محتاج عربية بتقبل تتعامل مع اي نوع بنزين ( موضوع ضبط فيشة الاوكتين ) حسب امكانياتك 4- بما ان التوكيلات في بلدنا معظمها ضعيف اذا انت محتاج عربية اي مكانيكي يعرف يتعامل معاهها 5- وبما ان اسعار العربيات في بلدنا بغزالة فانت محتاج عربية يكون سعر اعادة بيعا كويس وتكون مطلوبة في السوق 6- وبما ان العربية اللانوس متجربة ومعروف عيوبها قدر مجموعة من السادة الاعضاء الافاضل في هذا المنتدى مثلا ايجاد حلول ل 90% منها وهي حلول سهلة وبسيطة وغير مكلفة في تنفذها انا بقول الكلام ده بعد تجربة شخصية تتلخص في ركوب الاتي ( أوبل كورسا _ تويوتا ستارلت _ ديهاتسو تيريوس _ اوبل فيكترا _ جولييت 1 _ كيا سيفيا _ بولو _ ثم جولييت2 (2002 حتى الان ) تاني لقناعتي بانها عربية ( (good value for money) مع العلم ان اقصى عربية قبل كده كانت بتقعد معايا على اقصى تقدير 8 شهور من الزيرو وتتباع نتيجة اي عامل من العوامل السابقة على سبيل المثال .اسف على الاطالة ( مصطفى )