أهمية أراء ملاك الشيفروليه اللانوس 2011

[engaass]

السلام عليكم ورحمة الله
أحب اوضح حاجة صغيرة
1- بما ان الشوارع بتاعتنا مش المانيا يعني والصحراوي عندنا مش الاوتوبهان ( طريق غير محدد السرعة في المانيا ) اذا انت عرضة لحفر ومطبات وبلاليع فانت في الغالب عايز عربية صيانة عفشتها متكونش غالية
2- وبما ان السواقين اللى حوليك مهماش لويس هاميلتون وشوماخر اذا انت عرضة للتريح على عربيتك والخبطاط الصغيرة اللي في غالب عبارة عن فانوس وغمازة اشارة وجرايد الباب وكفة مرايا ودي طبعا حاجات صغيرة فبتالي عايز عربية تكون قطع غيرها رخيصة ومتوفرة ولها بدائل كتيرة
3- بما ان البنزين زبالة واسعارة بتنط نطاط غريبة اذا انت محتاج عربية بتقبل تتعامل مع اي نوع بنزين ( موضوع ضبط فيشة الاوكتين ) حسب امكانياتك
4- بما ان التوكيلات في بلدنا معظمها ضعيف اذا انت محتاج عربية اي مكانيكي يعرف يتعامل معاهها
5- وبما ان اسعار العربيات في بلدنا بغزالة فانت محتاج عربية يكون سعر اعادة بيعا كويس وتكون مطلوبة في السوق
6- وبما ان العربية اللانوس متجربة ومعروف عيوبها قدر مجموعة من السادة الاعضاء الافاضل في هذا المنتدى مثلا ايجاد حلول ل 90% منها وهي حلول سهلة وبسيطة وغير مكلفة في تنفذها
انا بقول الكلام ده بعد تجربة شخصية تتلخص في ركوب الاتي ( أوبل كورسا _ تويوتا ستارلت _ ديهاتسو تيريوس _ اوبل فيكترا _ جولييت 1 _ كيا سيفيا _ بولو _ ثم جولييت2 (2002 حتى الان ) تاني لقناعتي بانها عربية ( (good value for money) مع العلم ان اقصى عربية قبل كده كانت بتقعد معايا على اقصى تقدير 8 شهور من الزيرو وتتباع نتيجة اي عامل من العوامل السابقة على سبيل المثال .
اسف على الاطالة ( مصطفى )

رد عملى من الاخر

[emad_banda]

انا معاى لانوس 2010 العربيية جميلة جدا
مفبش فيها اى مشاكل
لكن ساعات بسمع صوت وانا بلف الدركسيون تحت
اية الصوت دة يا جماعة

[mohamedibk]

الواحد مبسوط جداً من مشاركات الزملاء والتى نجدها فعالة فى هذا الموضوع والتى سوف تكون مفيدة وهامة لجميع المقبلين والذين يفكرون فى شراء تلك السيارة
وبالغ تحياتى لكل من يشارك معنا فى هذا الحوار الجميل
اخوكم / محمد

[mailo]

انا معاى لانوس 2010 العربيية جميلة جدا
مفبش فيها اى مشاكل
لكن ساعات بسمع صوت وانا بلف الدركسيون تحت
اية الصوت دة يا جماعة

لو قصدك لما تلف الدركسيون للاخر بتسمع صوت زنه
متألقش ده صوت عادي في كل ال lanos

[mero100]

فعلا لو الصوت عباره عن زنه لما بتلف الدركسيون للاخر يمين أو شمال : دة صوت طبيعي و هوة صوت ماكينه الباور ... و الصوت دة بيدل علي كفاءة عمل مااكينه الباور ....بس سمعت انه غلط ان الواحد يفضل يكسر الدركسيون للاخر بقوة و الصوت دة يعلي .

[kashtoot]

مناقشة هايلة مليئة بالمعلومات القيمة و المفيدة
جزاكم الله خيرا

[nemo_1806]

علي فكره انا معايا لانوس2010بس يعتبر مغيرتش حاجه الا المرايه الشمال فعلا انا كنت فاكر ان حد حاول يسرقها وطبعا التقفيل المصري اللي زي الزفت وطبعا مبروحش التوكيل خالص بس بشتري قطع الغيار منهم وبركبها بره وعلي فكره انضف قطع غيار عند منصور واوسخ صيانه عنده والحمد لله يعتبر مريحاني شويه بس في مشطله عندي ان سحب العربيه ضعيف علي الاول بس بعد كده بتفتح في السحب والمشكله دي مش عندي انا بس دي في معظم الشيفروليه الانو بعكس الدايو وياريت اي حد يجاوبني عليها

[mohamed2300]

انا شايف ان اللانوس جميله جدا بس مع شوية تعديل يعني تجيب لانوس مستعمله وتغير المكنه بتاعتها بالمكنه ال 2 كامه وشوية تظبيط في التابلوه بالكاربون فايبر هتبقي حكايا لكن اللوجان دي تعدل فيها ازاي اللانوس شكلها جميل جدا ولو بتتكلم علي الصيانه اللي هتدفهي في صيانة اللانوس هتدفع اضعافه في صيانة اللوجان ومن حيث الصوت غير اللبادات الليتحت الرفارف بس

[mustafavet]

لو يرجع الزمن تانى وقت ما اشتريت عربيتى زيرو
طبعا مش هشترى لانوس نهائياً أو اى حاجة تقفيل مصرى
افضل انك تشترى اى عربية كسر زيرو لانسر او ما شابه ذلك
وفى اى حال من الاحوال أبعد عن اللانوس نهائياااااااااااااا
او بمعنى اصح اى تقفيل مصرى.
صدقنى والله رميت فلوسي فى الأرض
انت مش ملاحظ حاجه؟
انى بدافع بكل ما استطيع من قوة عن شراء هذه العربية المنكوبة؟
وده مش من فراغ
ولكن للأسف ملقتش حد يلح عليا كده زى ما انا بعمل مع الناس
لأن الحاحى ده مش من فراغ
انا وقتى معظمه مع العربية المنكووبه دى وسألت فيها بحكم المشاكل اللى فيها
اللى كل يوم يبان فيها شيء
وناس كتير اووووووووووووووووى بنفس المشاكل
عماله تفتح بؤها بالرغم انها زيرو موديل 2010 ومش بدفع ولا شلن لأنها فى الضمان
ومضطر أقبل رخامة الضمان والصيانة الدورية الغالية وقطع الغيار الأصلية من التوكيل والمبالغ فى سعرها
علشان لما بيحصل حاجه فى العربية بيغيروها على حسابهم بس انا عارف لما الضمان هيخلص انا اللى هعمل الحاجات دى على حسابي بص يا سيدى بأختاصار شديد انا هقولك انا غيرت ايه لغاية دلوقتى بالرغم انى أستاذ سواقة وبحافظ على عربيتى جدا بمعنى انه عيوب صناعه وذلك بشهاده مهندسي التوكيل
1- طنابير أمامية
2- ركبتين ( الشمعدان) الجزء اللى شايل المساعدين.
3 عدد 2 مساعد يمين وشمال
4- سويتش الأستوب والله العظيم غيرته مرتين
5- حساس الماب map برضو غيرته مرتين.
6- مراية شمال لأن الوير اللى فيها فرط لوحده والصدفة لقيت فى التوكيل 4 عربيات بنفس العيب.
7-ضبط الزوايا ده كل اسبوعين اروح اعمله لانها بتحدف بشكل مستفذ جهه اليمين.
8-العربية واوطيه مووووت الشكمان لحمته كذا مره بالرغم ان باخد المطب بالأسلوب السليم
عموما انا مش فاكر حاجات كتير بس كل ما هافتكر هقولك
على فكره انا عامل شكوى فى حماية المستهلك من اول شهر لأستلامى السيارة من هذه العيوب الفظيعة.
وبعد ده كله عاااااااااوز تشترى
عرفت ليه انا مش عاوز حد يخيب الخيبة اللى انا فيها
م/خالد

فعلا العيوب دي صحيحة بس فقط في الشيفورليه لانوس ودا باعتراف التوكيل
لكن عمرها ما كانت في الدايو لانوس علشان كدا هتلاقي ناس كتير بتعترض

[mustafavet]

انا ممكن اقولك راي غريب شوية
رينو لوجان + تامين اول سنتين = لانوس بلا تامين

[ahmedeg1]

فعلا العيوب دي صحيحة بس فقط في الشيفورليه لانوس ودا باعتراف التوكيل
لكن عمرها ما كانت في الدايو لانوس علشان كدا هتلاقي ناس كتير بتعترض

و طبعا زى ما فى ناس عندها عيوب فى عربيتها

فى ناس معندهاش العيوب دة و الحمد لله بقالها معايا سنه و نصف و عامل بيها 27000 ألف كيلوا و بغير زيت بس و بوجيهات

[ahmedeg1]

على فكرة الموضوع مش بالصعوبة دى خالص...

المحافظة على العربية له 3 عناصر:

جدول الصيانة... و دة موجود فى كتالوج العربية و موجود هنا فى المنتدى و لو سالت اى حد من الاعضاء حيقولك كل قطعة بتتغير عند كام كيلو

قطعة الغيار الاصلية... و دى و الحمد لله متوفرة و بسعر مناسب... و بالنسبة لقصة المضروب فا دى حلها تشترى من محل ثقة و مضمون و برضة دة معروف للاعضاء هنا

الفنى اللى بيقوم بالخدمة... و برضة اسماء الناس الكويسة اصحاب الخبرة و الفهم معروفة للزملاء

اللى بيواجة مشاكل فى عربيتة باستمرار بيكون اما نتيجة عدم اتباع تعليمات جدول الصيانة بالتالى قطع كتير بتتجاوز عمرها الافتراضى و تاثر بشدة على اداء العربية او تسبب تلف مكونات اخرى فى سكتها... دة بيحصل نتيجة "الفهلوة" من بعض الناس اللى بتعتبر ان القطعة "كويسة و شغالة" بالرغم من انها تجاوزت مدة خدمتها لمجرد ان "شكلها كويس" او "مش عاملة مشكلة"

او نتيجة شراء قطع غيار مجهولة المصدر سعيا وراء التوفير او شراء قطع غيار استيراد فى حاجات مينفعش فيها استيراد (طلمبات البنزين و البوبينة و الطنابير الخ الخ)

او نتيجة صيانة العربية عند واحد كفتجى بيعجن اى حاجة و السلام و الحاجة اللى يصلحها اما تبوظ تانى او يلف جمبها حاجتين تلاتة و غالبا برضة المشكلة دى بتحصل نتيجة محاولة التوفير فى مصاريف الصيانة

للوهلة الاولى حتحس ان صيانة العربية بالطريقة دى مكلفة جدا... لكن هى فى الحقيقة رخيصة جدا... لان الحاجة بتشتريها مرة واحدة و بتغيرها مرة واحدة و مبتجيش جنبها الا فلا الصيانة التالية... انما لو جبت قطعة غيار تعبانة حيبقى اكنك رميت فلوسك على الارض و حتروح برضة تجيب الاصلى فى الاخر... و يا سلام لو اللى بيركبلك القطعة دى واحد بطيخة... حيخربلك الدنيا و تلاقى نفسك عايز تصلح حاجة تانية و لما تصلحها تكون القطعة التعبانة تلفت و عايز تغيرها تانى...

و هنا ممكن واحد يفكر يجيب القطعة استيراد طالما هى بتبوظ كتير فا يجيب بوبينة او طلمبة استيراد تشتغل شهر ولا اتنين و تتوفى و تلاقى اشاعة ان "قطع غيار الكورى غير معمرة" و الكلام اللى بالك فيه لمجرد ان اللى بيشترى عايز يوفر تمن القطعة الاصلية فا اشتراها 4 او 5 مرات و كل مرة بيدفع مصنعية جديدة للميكانيكى او بيجرب ميكانيكى شكل مع كل تغيير

هنا صاحب العربية بيزهق من العربية و يبقى عايز يخلص منها... مع ان دى مش مشكلة العربية خالص... العربية زى ما بتحافظ عليها بتحافظ عليك... حتسترخص فى قطعة الغيار او تروح لميكانيكى نص لبة انت اللى حتتعك فى المشاكل

طبعا كل دة بينطبق على العربية الزيرو... اللى شارى مستعمل و مكنش موفق فى اختيارة و كان من نصيبة عربية مهملة (بيطلق عليها كنبة) حيفضل برضة فى الدوامة دى لان العربية بتبقى خرابة... هو مش مستحيل انها ترجع عربية محترمة بس دة حيصرف فلوس كتير ووقت كتير... و برضة دى مش مشكلة العربية

من الاخر لو عربيتك زيرو و مشيت على جدول الصيانة كما ينبغى و جبت قطع الغيار الاصلية و اتعاملت مع ميكانيكى خبرة و محترم العربية حتعيش معاك سنين و سنين و حتريحك على الاخر.... و لو شاريها مستعملة بس حالتها نضيفة و "بيتى" زى ما بيقولوا و عملت كدة حتوصل لنفس النتيجة... اى حاجة غير كدة معاك ربنا

mmamdouh

الله ينور عليك يا محمد
ويزيدك من علم الله

[elbeheri]

طيب عايزين النتيجة النهائية ؟ العربية ناجحة ولا فاشلة ولا وسط والاسباب

[engaass]

مفيش عربية فاشلة وعربية ناجحة
كل واحد بيحاول يجيب العربية طبقا لمتطلباته
والنتيجة فى الاخر اذا كانت كويسة فده معناه انه قدر يختار العربية الانسب ليه والعكس صحيح
وده معناه انك قبل ما تشترى تشوف ايه هى متطلباتك الاول

[noorcairo]

اولاً :- السلام عليكم.
ثانياً :- الفرق بين العربيتين واضح جداً وهو ان العربية الانوس عربية كوري تقفيل مصري والسيارة الكوري مهما كانت كويسة وعالية فهي ليست بكفائة الأوروبي . وعلي فكره انا معايا لانوس2 ( 2008 ) وكنت معايا رينو 18 موديل 1982 إستيشن وكانت قطع الغيار غاليه شويه مقارنه بقطع الغيار في العربيات الكوري وليس الياباني مثلاً بس كانت بتستحمل جدااااااً الشوارع المصريه معلش أصلها ملعاش بخت في مصر
اما الرينو فهي عربية مكوناتها اوروبية ( رومانيه ) تقفيل مغربي واما بالنسبه لقطع الغيار فأسعارها مثل قطع غيار الرينوه القديم شويه وليست متغيره بإستمرار ونادر ما تكون منها قطع غيار صيني إلا بالنسبة للسيارات القديمة ومش من عند الوكيل.
ثالثاً :- انصح كل شخص يفكر في شراء شياره ان يتأكد أولاً من الوكيل والصيانه والمتابعه بالوكيل مع العلم بانني ألتزم بعمل الصيانه بالتوكيل وذلك لأسباب ان الميكانيكي المصري او الصنايعي لايفقه شيء في تكنولوجيا السياره ويخدها بالدراع والعافيه وعن تجربه مش معايا بس مع اشخاص آخرون أعرفهم .
رابعاً :- إذا كان اي حد يريد شراء قطع غيار أرجو ان يقوم بالشراء من الموزع المعتمد للوكيل أو الوكيل لانه يضمن القطعه التي تركب بالسياره. اه اسف طولت عليكم شويه ....
علي فكره انا معايا اللانوس 2 وحصل لي حادث صغير في الرافرف الامامي شمال عند الفانوس قمت بفك الفانوس وعدلت التطبيقة الي حصلت لجوه بيدي ولكم ان تتخيلوا ضعف الرفارف والصاج الخ ونفسي اجيب الرينو علشان انا اتعوت علي ركوب الاوروبي محترم جداً ومن غير زعل كفايه عفشتها وسمك الصاج وقوة الشاسيه ولحماته .