الكستبانات و استهلاك البنزين؟

[Sherif Khalifa]

انا عندى مشكلة فى الكستبانات و كل ما انوى اروح اغيرهم يحصل حاجة تعطل الموضوع اخر مرة رحت اشترى طقم استبراد طلع كلة قافش

بس انا ملاحظ ان استهلاك البنزين عندى عالى شوية
على الرغم من ان كل حاجة سليمة
فهل مشكلة الكستبانات ممكن يكون ليها علاقة بالاستهلاك ؟

[samirayad]

نعم

[Sherif Khalifa]

نعم

ازاى ؟
ايه ممكن تكون العلاقة ؟

[khalid9411]

متابع معكم ماهى الكستبنات؟

[samirayad]

ازاى ؟
ايه ممكن تكون العلاقة ؟

الكستبان ....ده مسمى للغة السوق
ولكن فى هندسة الميكانيكا
بيسمى hydraulic tappet أو ممكن تسميهcam follower أى تابع الكامه ...... يعنى أيه برضه .......يعنى تاكيه هيدروليكى ....بيظبط نفسه آاليا
بدون تدخل العنصر البشرى ......
لما بيحدث تقل فى عمل الكستبان خلال غرفه المشكله بالسباكه فى رأس السلندر
بسبب تجمع رواسب زيتيه فى بيت الكستبان ....ونواتج حريق زى الكربون الصلب
لأن الزيت من وظائفه عملية التشتيت والتنظيف لغرف الحريق أثناء صعود وهبوط البساتم
نيجىء بقه للجزئيه اللى تهمنا حاليا
لما بيتقل عمل الكستبان ....بيحصل زياده فى الثغره بين قمة كل كامه ووش الكستبان من فوق
تقدر تقول التاكيهات بقت مفتوحه
ومعروف .....تاكيهات مفتوحه ....يعنى الآتى
1-صدور صوت عالى من منطقة التاكيهات ....بسبب كبر الثغره بين سطح الكستبان من فوق وقمة الكامه وقت النزول للتصادم لفتح الصبابات
2- زيادة أستهلاك البنزين ....نتيجة أختلال آلية عمل الصبابات
3- تلف قمم كامات عمود الكامه مع تكرار التصادم ...وأهمال نظافة منطقة التاكيهات
4- تلف سطح الكستبان نتيجه لتعرضه لحمل تصادمى بصفه دوريه مع أهمال جزيئة النظافه برضه
كل ده بيحصل ....وممكن متحسش أن سحب العربيه وتسارعها تأثر كثيرا

[samirayad]

- زيادة أستهلاك البنزين ....نتيجة أختلال آلية عمل الصبابات

عاوز برضه أضيف للجزئيه دى حاجه
البنزين بيزيد معاك ....بسبب دوسك بزياده على الأكسراتير
لتعويض الحمل المطلوب من المكنه بسبب خلل عملية فتح وغلق الصبابات ....وده شىء لا أردادى ( أى دوسك على الأكسراتير لتعويض الحمل المطلوب )
وطالما دوست زياده على الأكسراتير لفتح البوابه .
يعنى زودت فترة ضخ البنزين

[Sherif Khalifa]

thank you

[samirayad]

best wishes for you

[waleedrahmy]

وكل ده يثبت ان العربية الدايو بتاعتنا دي ثروة

[khalid9411]

هلى يا باشمهندس سمير الماتور بيبقى له صوت معين لما الكوسبونات فيها شئ ولا الصوت بيبقى عادى خالص نعرف امتى انها بايظه وكل سنه وانتم طيبيبن ورمضان كريم

[samirayad]

1-صدور صوت عالى من منطقة التاكيهات ....بسبب كبر الثغره بين سطح الكستبان من فوق وقمة الكامه وقت النزول للتصادم لفتح الصبابات

ده اللى بيحصل من فوق غطاء التاكيهات ....وبيبينلك أن الكستبانات مش تمام

[khalid9411]

اشكرك يا باشمهندس سمير

[Sherif Khalifa]

بنسمع صوت تكتكة عالة
زى ما تكون حاجة بتخبط فى حاجة
و بيروح لما العربية تسخن

[memoo305]

بنسمع صوت تكتكة عالة
زى ما تكون حاجة بتخبط فى حاجة
و بيروح لما العربية تسخن

أنا عندي فعلاً الموضوع ده بألي 3 سنين . بس في واحد ميكانيكي كان رأيه أن طالما الخبط ده بيروح لما العربية تسخن يبقى مافيش مشكلة.
مش عارق بقى الكلام ده صح ولا لازم الواحد يغيرهم .والتغير ده هل يتطلب فك وش السلندر وهل يتم تغير جميع الكستبانات والموضوع ده يتكلف كام؟؟؟
شاكر للأفادة...

[Sherif Khalifa]

الفكرة ان العربية لما بتسخن لزوجة الزيت بتخف فا بتوصل لجميع الاجزاء بسهولة و اعتقد كمان بلوف التاكيهات بتكون اكثر مرونة علشان كدة الصوت بيروح (دا تفسير شخصى)

المشكلة كمان ممكن تتطلع من طرمبة الزيت انها مش بتوصل الزيت لجميع الاجزاء فى الحالة اللزجة للزبت و المنور بارد
بس انا عايز اجرب الحل الاسهل و هوا تغير الكستبنات او لو اكثر توفير التالف منها بس

النغير بيكون عن طريق فك وش التكيهات و عامود الكامات (2 عمود) و بيخرج الكستبان و يشوف اليلف قافش فى ماكنة ولا بيروح و يجى
عندك 16 كستبان
سعر الجديد 45 جم للواحد
15 الى 20 جم للاستيراد