يا فضيحتك يا تويوتا!!! تحيا كيااااا

[cameeron]

طبعا يا جماعة انا عملت الموضوع ده بس عشان اثبت للناس اللي كانت بتعيب في كيا والسيراتو خصوصا وكانو في بعض الاحيان بيقولوا الياباني مفيش زيو وناس تانية تقولك الالماني...المهم كلام كله جميل وعلي راسنا من فوق , لكن لما اسمع خبر انهاردة في الاهرام و جريدة الفجر صعقت بصراحة وانا مش هطول في الكلام اللي عاوز يعرف الموضوع بتفاصيلة يجيب الفجر المهم الخبر و بختصار شديد بيقول ان شركة تويوتا سحبت كزا مليون عربية من السوق الامريكي وايضا من السوق الاوروبية ومن ضمنها كورولا 2009 وانواع اخري غير الكورولا مثل الكامري وغيرهم بسبب عيب خطير جدا وهو ارتداد دواسة البنزين طبعا ده عيب قاتل وخطير , واعتقد ان الشركة في طريقها لخسائر ضخمة ونقص لثقة العملاء لدي الشركة .. و قال المتحدث باسم الشركة في مصر ان العربية هنا مفيهاش مشاكل وكدة وربنا يستر..

اولا يا اخى انا ضد العنوان اللى انت كاتبه ان دى فضيحة لتويوتا انها تكتشف عيب و لو قاتل فى عربياتها و تسحب العدد ده من عربياتها فهى مش فضيحة اطلاقا بقدر ما هى اعتراف من شركة محترمة بالخطا و الخطا وارد لكل الشركات بكل موديلاتها لا و مش اعتراف بالخطا و بس و بتكلف نفسها ملايين الدولارات لاصلاحه فده شئ بالتاكيد يحسب لها مش عليها ده اولا

ثانيا لا اول و و لا اخر شركة بتسحب موديلاتها علشان عيب و كبرى الشركات بتعمل كده كل سنة تقريبا و اظن انت معايا ان تويوتا من كبرى الشركات و الا بقت صغرى خلاص؟

ثالثا تاكد تماما ان الشركة اللى بتعترف باخطائها هى شركة عارفة هى بتعمل ايه كويس غير شركات تانية نايمة فى العسل و لا عمرها هتعترف بحاجة برغم ان عربياتها مليانة بلاوى و بتحاول تغطى البلاوى دى بشوية كماليات فالصو او تاجر واد مصمم ماجبتوش ولادة و يعملهم عربية شكلها خرافى و ما خفى كان اعظم

[tarekabosdera]

سبحان اللـه يعني علشان الناس طلعو محترمين يعني تعملو كده

!!

ده في نا هنا واضح جدا انهم من هيونداي بالتحديد جايين اولا يشمتو ثانيا يعملو صيت شويه للهيونداي

يا جاعه فرق كبير اوي اوي اوي مش ممكن اصلا نقارن الهيونداي بكل عربياته بشركه زي تويوتا

ده تهريج و اللـه

قال يعني الهيونداي بقا هي الكامله يعني

عجبي !!!!!!!!!

سيارات هيونداي يا سيدي الفاضل مش محتاجة سيط ولادعاية عشان الناس تعرف انها جيدة

يكفينا انها رابع اكبر شركة في العالم ودخلت المنافسة بكل فئات السيارات .

وعمرنا ما سمعنا ان هيونداي سحبت عربيات بالملايين !!!!

[TeMoON]

سيارات هيونداي يا سيدي الفاضل مش محتاجة سيط ولادعاية عشان الناس تعرف انها جيدة

يكفينا انها رابع اكبر شركة في العالم ودخلت المنافسة بكل فئات السيارات .

وعمرنا ما سمعنا ان هيونداي سحبت عربيات بالملايين !!!!

وعجبى عليكى يا هيونداى يلى بئة ليكى اسم وبيتنافس بية فى السوق
مع احترامى لكل مالكى هيونداى فى مصر انتم مش راكبين عربيات دى اقل ما يقال عليها عربيات لانها وعن تجربة عربيات لا تستحق ان تحمل شعار هيونداى الكورية فى مصر ودا طبعا يرجع لسيد رئيس مجلس ادارة مجموعة غبور وان هو ينزل عربية متنفضة من جميع وسائل الامان الى كل الشركات فى العالم بتحاول توفرها فى جميع موديلات سياراتها
لا واية العربية غالية كمان بيتكلم فى 90 الف جنية فى حين ان العربية دى متكلفة تصنيع بكل قطع الغيار بكل مصاريفها 50 الف جنية بالكتير وقال اية عمل تخفيض فى سعر الالنترا ومش هاين عليه يوفر عوامل امان فيها وعجبى

[Ahmed Samy]

النهاردة قريت ان تويوتا خسرت 2 مليار دولار نتيجة السحبو المبيعات قلت بنسبة 16% من تاريخ قرار السحب بجد أنا زعلان أنا متعاطف مع تويوتا جدا دلوقتي لأنه موقف صعب فعلا و العيب بسيط بجد ولو انه ممكن يكون قاتل في بعض الأحيان

[ayman2]

وعجبى عليكى يا هيونداى يلى بئة ليكى اسم وبيتنافس بية فى السوق
مع احترامى لكل مالكى هيونداى فى مصر انتم مش راكبين عربيات دى اقل ما يقال عليها عربيات لانها وعن تجربة عربيات لا تستحق ان تحمل شعار هيونداى الكورية فى مصر ودا طبعا يرجع لسيد رئيس مجلس ادارة مجموعة غبور وان هو ينزل عربية متنفضة من جميع وسائل الامان الى كل الشركات فى العالم بتحاول توفرها فى جميع موديلات سياراتها
لا واية العربية غالية كمان بيتكلم فى 90 الف جنية فى حين ان العربية دى متكلفة تصنيع بكل قطع الغيار بكل مصاريفها 50 الف جنية بالكتير وقال اية عمل تخفيض فى سعر الالنترا ومش هاين عليه يوفر عوامل امان فيها وعجبى

كلام سليم تماما
حتى الأكسنت الجديده كل اللى عمله غير الشكل الخارجى فقط بدون اى اضافات طالما فى ناس بتشترى من غير مواصفات امان وباسعار عاليه وبتقول شعر فى السياره يبقى هايغير ليه ده حتى يبقى حرام

[mohamedhamam]

تويوتا من الشركات المحترمة و الدليل على ذلك أنها بتعترف بالخطأ الموجود و تعمل جاهدة على اصلاحه و وصلت للمرتبة الأولى على مستوى العالم فى الفترة الماضية و احتلت المرتبة الأولى بدلاً من جنرال موتورز الفترة الماضية و ستعود بسرعة و بغض النظر عن أى شىء فاليابانيين لديهم اصرار و تحدى و مثابرة لا توجد عند أحد و يحترمون أنفسهم جيداً قبل احترامهم للأخرين و هذا هو سر تفوقهم و نجاحهم و الذى لا يعرفه الكثيرون أن الصناعة الكورية مبنية و تعمل طبقاً للمواصفات القياسية اليابانية و هذا من أسرار نجاحهم خلال الفترة الماضية

[Sharky]

المستفاد من الخبر

ان الناس اللي بيقولوا ان اللي اخترع التويتا كانوا سكان قارة أطلنتس المفقودة المفروض يفوقوا بقى و يعرفوا انها "عربية" و اللي عاملها "بني أدم" بيغلط برضه

فعلا هو دا المفروض اللى نستفيده من الخبر
الجملة دى أفضل ما قراته فى مشكلة تويوتا

[aliabutaleb]

النهاردة قريت ان تويوتا خسرت 2 مليار دولار نتيجة السحبو المبيعات قلت بنسبة 16% من تاريخ قرار السحب بجد أنا زعلان أنا متعاطف مع تويوتا جدا دلوقتي لأنه موقف صعب فعلا و العيب بسيط بجد ولو انه ممكن يكون قاتل في بعض الأحيان

بس مبيعات الليكزس زادت في نفس الفترة وبنسبة مش هينة :)
مش فاكر كام بس تقريباً حاجة وعشرين في المية

[Ahmed Samy]

بس مبيعات الليكزس زادت في نفس الفترة وبنسبة مش هينة :)
مش فاكر كام بس تقريباً حاجة وعشرين في المية

ربنا يوعدنا يا أبو حمزة نزود مبيعات الليكزس واحدة كمان

[Ahmed Samy]

فعلا هو دا المفروض اللى نستفيده من الخبر
الجملة دى أفضل ما قراته فى مشكلة تويوتا

بس مين يسمع

[Atrees]

انا اللي اعرفة ان المشكلة دي بتظهر في الدول شديدة البودة فقط ودة نتيجة تكون ندي علي اسطح الاحتكاك في الدواسة يعني العيب مش حيظهر في الدول الحارة والمعتدلة ----- وكدة معناة ان شركة تيوتا محترمة جدا
برجاء قراءة الخبر بالتفصيل واسباب المشكلة لعدم التضليل - علي فكرة انا معايا سيراتو يعني كوري والعربية اتشتمت بالهبل بس دة مش معناة انها افضل من الياباني والالماني والامريكي - بس هيا في تقدم ودخلت مرحلة المنافسة ودة مافيهوش شك و زي الياباني في الثمانينات كان بيتقال علية كلام وحش كلها 5 سنين ويركب الكوري مكانة وكلها 10 سنين والصيني يركب مكان الكوري وهلما جراااااااااا

انا اسسسسسفففففففففففف الفونط طلع كبيييير قوي --- اسف علي شكلة



______________________
تم تصغير حجم الأحرف و دمج المشاركة
مشرف عام.4

[Eng.Sameh]

لما الشركة تسحب العربيات عشان تعالج العيب اللي فيها .. يبقى ده حاجة ممتازة مش عيب .. ولا يسيبوا الناس عايشة بالعيب احسن وكل واحد ونصيبه زي عفشة الكيا اللي عمالة تخلي الناس تتقلب ولا حد سأل ..

ولا عمر كيا او هيونداي تتقارن بتويوتا رغم اني مبحبش تويوتا بس مفيش مجال للمقارنة .

[Ahmed Samy]

لما الشركة تسحب العربيات عشان تعالج العيب اللي فيها .. يبقى ده حاجة ممتازة مش عيب .. ولا يسيبوا الناس عايشة بالعيب احسن وكل واحد ونصيبه زي عفشة الكيا اللي عمالة تخلي الناس تتقلب ولا حد سأل ..

ولا عمر كيا او هيونداي تتقارن بتويوتا رغم اني مبحبش تويوتا بس مفيش مجال للمقارنة .

أولا : العيب مش في السحب ...العيب في الغلط اللي خلاهم يسحبوا العربيات

ثانيا : السحب مش عملية أخلاقية ...ده سيستم و غصب عنهم لازم يسحبوا العربية المعيوبة

ثالثا: ما اعتقدش انها حاجة ممتازة لأن المبيعات بتقل 16% و الأسهم بتاعة تويوتا في الأرض

رابعا : ان الكيا بتقلب بسبب العفشة دي اشاعة ...أنا اتقلبت علشان غلطت بس أنا أفرق في حاجة عن غيري اني انا شخصيا اللي اتقلبت (لا سمعت و لا شوفت ولا حلمت بالليل) و ان انا عارف ان ما فيش عربية ممكن تحصل قوة تقلبها الا على سرعة كبيرة يعني سرعة 60 و 80 دي ما تقلبش عربية لأنه مش هايكون في طاقة كفاية أساسا و أخيرا أنا عندي الشجاعة اني اتحمل غلطتي نفسيا ..مش أرميها على العربية .

و على فكرة أنا اتقلبت بسبب حفرة برضه خدتها بالفردة اليمين و أنا معدي 140 و المقص و الجنط و كله سليم.

خامسا يا هندسة : كــــــــــــــــــام عربية كيا سيراتو اتقلبت ؟؟؟ و كام تويوتا اتقلبت ؟؟؟

وبعدين هو كام مليون كيا جابت مقص ؟؟؟؟ 8 مليون باين ؟؟؟؟؟؟


انا مش قصدي ابدا أقول ان كيا أحسن و أختلف حتى مع صاحب الموضوع في المبدأ

ولا يمكن حتى هدم تاريخ تويوتا بسبب الحكاية دي

بس مش معنى كده اننا برضه نقعد نمجد فيها عمال على بطال حتى وهي بتعترف بأنها في مشكلة "تصنيعية"

[TeMoON]

تحيا تويوتا
تحيا كيا
مش تحيا هيونداى مصر
بس كل الى عاوز اقولة ان شركة كيا لما تكتشف العيوب بتاعة عربياتها ودا برة طبعا مش فى مصر هتحاول تتلاشى العيوب دى وتعمل زى تويوتا كدا ودا طبعا برة مصر مش جوة مصر فا انا مش هحكم على كيا لان هنا مصر ليها مواصفات خاصة جدا جدا فى كل حاجة
وربنا يئوم البشمهندس غازى والدكتور احمد سامى بالسلامة بس بعد الى سمعتة من البشمهندي غازى والى حصل للدكتور احمد سامى الله الغنى عن كيا وهيونداى وعن كوريا كلها انا هركب توك توك احسن
وعلى رأى كريم عبد العزيز انا ما بحبش القطورات انا هاجى بالتوك توك يابن عمى

[hobiko]

حضرتك كلام حضرتك كلام جميل
ولكن النقطة الاخيرة مش معاك فيها
أولا احنا مش عاملين نفسنا حكام ولا احنا هنا في المنتدى بنتكلم في السيارات على اساس ان احنا حكام
فأيه اللي دخل المسألة دي في كلامنا اساسا
لو كده يبقى محدش يتكلم في المنتدى كله على العربيات بالموجب او السالب لأن احنا مش حكام
ومش هقبل اي كلام من اي احد عن اي سيارة بما فيها السيراتو لأن احنا مش حكام

يا أخي الفاضل احنا هواة وبنتكلم وبنتحاور ولو المسألة المفروض تمشي زي ما بتقول يبقى محدش هيقبل كلام الأخر على اساسا انه مش حكم وميقدرشي يحكم ده لو احنا اساسا عاملين محكمة علشان الموضوع ده

كلامي كان واضح صريح جدا
ان واضح ان فيه مشكلة في السيراتو وده شئ تنبيهي يدعو للقلق والحذر وليس اجزام بشئ لأني مش مسؤول عن منظمة وبأصدر قرارات فيها بمنع السيراتو من البيع مثلا
ولكن مش معنى اني مش هقدر اجزم بشئ اني متكلمش فيه
لان كمية الحوادث اللي سمعتها في خلال شهرين فاتوا كبيرة جدا والمشكلة مش الحوادث فقط
وانما المشكلة في انها كلها عبارة عن سيراتو مقلوبة وعلى سرعة عادية كل العربيات بتمشي عليها وبدون تدخل السائق او طريقة القيادة في الموضوع
فده لازم يجعلني ابتدي اخد حذر من العربيه ومش محتاج حكم يأتي يحكم لي بهذا الكلام لأني رايته بعيني وسمعته بأذني
وبعدين لو حضرتك عملت احصائية صغيرة للحوادث هنا في المنتدى واللي موجوده في خارج المنتدى في عالمنا الخارجي للسيراتو هتعرف انا بتكلم في ايه



طيب بالله عليك يا أخي تقدر تفسرلي حادثة اخونا الفاضل الأستاذ مغازي بأيه
في حين ان دي مش أول حادثة اسمعها ان سيراتو اتقلبت على سرعة 100 كم بدون اسباب واضحة او طريقة سواقة
وتفسر بأيه ان العربيه تتقلب بمقدمتها كمان يعني من وش العربيه مش جمبها
دي لوحدها تخليك تفكر وتراجع تحليلك للموضوع كله بجد

حضرتك الكورولا 2006 اللي الناس بتشكك في ثباتها وطلع عليها كلام من هنا للصبح انها بتعوم وبتقلب ومش عارف ايه
حضرتك العربيه كان اخويا راكبها وماشي على 140 او 150 كم والعجلة الشمال الامامية فرقعت بدون سابق انذار والعربية حدفت منه وطلعت فوق الرصيف وخبطت بجمها عمود نور ولفت حوالين نفسها ومتقلبتش برضه
مع العلم انها اعلى في الأرتفاع من السيراتو والكاوتش بتاعها ومقاس الجنوط لا يقارن بالسيراتو نهائي


وبعدين الموسسة الأمريكية دي تفتكر انها اختبرت العربيه بتقلب ولا لأ ؟؟؟؟؟
وتفتكر السيراتو هناك نفس مكونات هنا ونفس الجودة ... ؟؟؟؟

بالله عليك بقه مش بذمتك لأن حرام الحلف بغير الله
مش ده كلام موضوعي

زميلي الفاضل

لما قلت لحضرتك ماينفعش تحكم أنا مكنش قصدي كلمة حكم بمعناها الحرفي و إن احنا في محكمة و كدة

١) أنا عارف كويس أوي إن كلنا هواه بس في إلي من عند mechnical background و إلي عنده خبرة في العربيات و إلي ركب كتير و كدة

بس لما تيجي عند إن العربية فيه عيب صناعة في تصميمها ذي ما حضرتك قلت بيخليها تقلب لوحدها عند سرعة قليلة يبقى أنا مصر على كلامي حضرتك ماتقدرش تحكم بحاجة ذي كدة لإن حضرتك كل معلوماتك سمعت و شفت و مفيش أي دليل من أي حتة في العالم بتأيد كلام حضرتك

٢) حضرتك بتقول إن المشكلة كلها cerato كتير مقلوبة على سرعة عادية وبدون تدخل السائق او طريقة القيادة في الموضوع

مش عارف حضرتك جبت الكلام دة منين إذا كان مهندس غازي نفسه ربنا يقومه بالسلامة قال بالحرف الواحد

و لازم تعرف ان مافيش عربيه المقص بيتكسر لوحده و هي ماشيه..ّّّّ!!! ده مش صحيح أبدااا

و مفيش عربيه بتتقلب و الكلام ده لوحدها, لازم فيه سبب, علشان الناس اللي قالت ان العربيه قلابه... ده كلام مش صحيح

العربيه مش سوبر ولا بلاستيك, هي عربيه عاديه جداا و بتاخد منها على قد امكانياتها و ده الطبيعي, و كقيمه مقابل المال, هي عربيه بتحقق هذا المبدأ...

٣) بالنسبة للإحصائيات حضرتك لما تقدر تقولي فيه كام عربية نيو cerato إتباعت في مصر و كام واحدة عملت حوادث و إيه هي الحوادث إلي مسؤول عنها السواق و إلي المسؤولة عنها العربية و تقارن النسبة دي بنفس النسبة لأي عربية تانية من نفس الفئة نبقى نتكلم عن الإحصائيات

٤) بالنسبة للإختبارات الأمريكية NHTSA NCAP و يا ترى اختبرت الستبلتي بتاعة الاعربية ولا لأ أيوا هي اختبرت الإستبلتي بتاعة العربية و كمان roll over safety

و بالمرة بما إن حضرتك بتقول مفيش مجال أساساً للمقارنة أحب أقولك لأ فيه و نص عشان في الإختبارات دي تفوقت نيو cerato الكوري على كورولا ٢٠١٠ الياباني في إختبارات التصادم و كمان إختبارات roll over safety

بص على اللنك دة بتاع الإختبارات دي و ادعيلي

http://www.nilemotors.net/Nile/110636-ncap.html

اه صحيح إيه أخبار عيب الصناعة إلي في علبة دركسيون السريون الياباني

تحياتي (يا رب ما يطلع في الكلمة دي حاجة حرام )