الرجاء المشاركة بمعدل أستهلاك الوقود وعدد الكيلومترات "نيو سيراتو"

[NoRmAl]

السلام عليكم

يا ريت يا جماعه نشارك بمعدل استهلاك الوقود "الى بيظهر من كمبيوتر العربيه"
معدل الاستهلاك الحالى
وعدد الكيلو مترات الحالى أيضا

ويا ريت رأيك فى معدل الاستهلاك
هل لاحظت شىء معين يؤدى الى زياده الاستهلاك أو نقصانه
ويا ريت تذكر مشاويرك اليوميه طرق سريعه أم مدن
أى ملاحظات أخرى خاصه بالبنزين فقط

*عربيتى عامله 5000 كيلومتر.

*معدل أستهلاك الوقود من 9.50 الى 10.00 لتر لكل 100 كيلومتر.

*الطريق معظمه مدن "مشوار كليه - بيت يومى".

*لاحظت أن السواقه مش فارقه مش عارف أزاى يعنى أسبوع كامل جربت كل يوم حرق وشد وأسبوع أخر هادى جدا جدا دون أى شد مفرقش معايه فى أستهلاك الوقود!

*أستخدام التكيف يوميا طوال الرحله رايح جاى.

شكراً

[alzwawy]

السواقه بتفرق طبعا يا نورمال انا و انا علي الطريق السريع كان 8 لتر بس و انا هنا 12 ناو و انا عامل 3500 و سواقتي في الغالب شد و غرز و كده يعني سواقه متهوره شويه ف بتفرق و دايما في الزحمه في مدينه نصر تقريبا كل يوم هناك ف علشان كده الاستهلاك بيزيد و انا جوه البلد بس

[sefo]

انا الاستهلاك عندى عالى بس انا مبعتمدش على معدل الاستهلاك اللى فى كمبيوتر السياره
انا بفول واظبط الراجل فى 3 جند علشان يفولها على الاخر لان اخر عشره لتر بيكونو ببطء شديد جدا من بعد ما المسدس بيفصل ويفض صاحبنا باصص على ال3 جند وعمال يسايس فى العربيه لغايه لما اشوف البنزين بعينى فى زو التنك وديه ادق وسيله للتمويل
وامشى بالسياره لغايه ادنى نقطه علشان المتوسط يشمل كل الظروف
وبعدين افول بنفس الطريقه تانى
واحسبها بانى اضرب المسافه المقطوعه ما بين التميلتين وده بمساعده عداد الرحلات اللى بصفه بعد التمويله الاولى واقراءه اثناء التمويله التانيه وديه هى المسافه المقطوعهاضربها فى عشرين(صفيحه البنزين)واقسمها على عدد اللترات اللى تم وضعها فى المره الثانيه وده ادق متوسط ممكن يتعمل لحساب الاستهلاك
انا قطعت 450 كيلو واستهلكت 53.5 لتر
يعنى 450 * 20 /53.5 =168
وديه كانت مفاجأه وحشه جدا ليا اتأكدت بعدها ان كل اللى قال على المنتدى ارقام 240و 250 كان بيحسب خطا او مبيفولش على اخر التنك لان ده طبعا عاوز صبر من عامل المحطه
ملحوظه المسافه اللى قطعتها ديه كان فيها 200 كيلو على الصحراوى والباقى داخل المدينه واغلبها بدون تكيف لانى مكماتش 1000 كيلو
وده اللى مدينى امل ان السياره تتحسن بعد صيانه الالف
اسف للتطويل

[morasystem]

أحم ... انا أول واحد أرد مش كدة :-)
عريتى عاملة 6700 كيلو

أقل معدل استهلاك داخل المدينة 10 لتر فى ال 100 كيلو

أقل معدل استهلاك على الطريق 7 لتر فى ال 100 كيلو

بنزل من اكتوبر لعين شمس مرة كل اسبوع ... يعنى بمشى على المحور و كوبرى اكتوبر و المهندسين (طرق و مدن) و انا نازل بيبقى المعدل 9 لتر فى ال 100 كيلو و انا راجع بيكون المعدل أقل من كدة يعنى حوالى 8 - 8.5 لتر فى ال 100 كيلو

لما بحب أحرق فده بيكون لفترات قصيرة يعنى بدل ما يبقى المعدل 10 مثلا يبقى 10.2 بالكتير

لما بيكون مشوار قصير أوى ممكن تلاقى المعدل حوالى 11 أو 12 لأن كل ما تمشى مسافة أطول كل ما المعدل بيقل ... كذلك كل ما تمشى أسرع المعدل بيقل ... و كذلك لو مشيت على الرابع لفترة طويلة ده بيوفر فى البنزين

مرة فى سفرية على الصحراوى لإسكندرية عملتها و جبت معدل 6.7 مع إنى كنت ماشى على سرعة ما بين 100 و 150

حاجة أخيرة و هى إن معدل الاستهلاك الفورى لاحظت إنه ملهوش علاقة بال أر بى إم على قد ما هو ليه علاقة بالنقلة ... يعنى لو انت على الأول و 4000 لفة تلاقى الموتور 24 لتر مثلا ... و لو انت على الرابع و الموتور 4000 لفة تلاقى إن معدل الاستهلاك اللحظى بقى مثلا 9 لتر ... و لو رفعت رجلك عن دواسة البنزين المعدل اللحظى ينزل فورا .... معدل الاستهلاك اللحظى أثناء التسخين أو حالة السكون 0

[yasserelsayad]

انا عربيتى عاملة 16200 كيلو
المعدل 10.4 عشان انا بجرى كتير
معظم تحركتى بتكون فى طرق اكتوبر والمحور والمهندسين يعنى تقريبا ازحم مكان المهندسين
تقريبا التكييف شغال علطول فى اى مشوار

[Beeso]

أنا عربيتي عملة 13,000 كم وتقريبا على طول الاستهلاك في range 10 في ماعدا من كام يوم كده نزلت مشوار في المنيل زحمة قوي ومن ساعتها وهوا عالي وصل 11 (كل الكلام ده على el-fuel econ calculator بتاع العربية )
أنا برده شبه كده كل مرة بفول وبحسب للعربية وبتكون في range 9.8 - 10.5

أنا مشويري دائري واوتستراد الصبح الطريق فاضي ووانا راجع طبعا زحمة وبفتح التكيف شبه على طول

ملحوظة :

المفروض إن اللي يفول عربيته يفول لحد مالدراع بتاع المضخة يقف عشان لازم تسيب شوية مساحة للبنزين لما يسخن يتمدد وحتى في عربيات كتير منهم عربيتي ال BMW القديمة كان فيه حاجة اسمها خرطوم الفايز يعني أول مالبنزن يبدأ يدخل في الزور بيروح واقع عشان السبب اللي أنا قلتهولك فوق (في ميكانيكية كتير قوي كان بيلغوه عشان كده )

الكلام ده مكتوب في الكاتلوج بس مش فاكر فين بظبط

[NoRmAl]

شكرا يا جماعه لكل الى شارك

[M7amD_7amDy]

بصراحة انا مبعرفش أحسبها صح ومحدش يضحك عليا

يعنى ساعات أفول وأعمل ريسيت وأسيبه لحد ما التنك يخلص عشان أبص بقى عامل كام ( بنسى )

وساعات ألاقى المعدل 10 لتر وساعات 11 وساعات 12 :)

أصل أنا بسيب عداد الحرارة علاطول ومش بقلب كتير

المهم الحل اللى توصلتله كالتالى

مبشغلش بالى بالموضوع ده عشان مش لاقى أو مش عارف الطريقة الصحيحة اللى أحسب بيها

أنا بروح أفول وأتكل على الله وسايبها لله

ملحوظة : العامل اللى فى المحطة بيملى التانك لحد ميجيب أخره وبشوف البنزين طالع لحد الزور

هل ده صح ولا غلط عشان بس نبقى عارفين :)

وصباح الفل على الرجالة كلها وأبقو عرفونى بالظبط أبقى أحسبها أزاى

[moha4tec]

السلام عليكم
فول العربيه لحد اول تكه فقط هو ده الصح زى الكتالوج و عموما فى كل العربيات لعدة اسباب منها
1-لتمدد البنزين فى ساعات النهار(خطر الانفجار فى حالات نادره جدا)
2-(استهلاك وقود اعلى)عند ملىء خزان الوقود حتى النهايه تماما وده غلط طبعا يزيد استهلاك الوقود لانه يدخل كميه بنزين اكتر فى ضغطه البنزين الوحده بسبب فرق الضغط العالى اللى فى اتنك وده لحد ما يبقى فى شويه هوا يعملوا اتزان فى فرق الضغط.
3- لازم تسيب شوية هوا عشان العوامه بتاعة التنك متبظش و تفضل سليمه
4 مينفعش تخلص البنزين و تفضى التنك على الاخر عشان لو فى وساخه فى قعر التنك ميشفطهاش و يبوظ الحساسات و يخلى سحب العربيه ضعيف و عاوزه تنضيف
5-اصلان الراجل بتاع البنزينه لما بيتكتك بمسدس البنزين ,الحركه دى بتدى قرايه اعلى و بنزين اقل عن تجربه مع ناس كتير
(يعنى تدفع فلوس =البنزين لحد اول تكه )و على النقيض بعد التفويله للاخر من غير هوا .لا =او اقل من قيمة الفلوس المدفوعه.
يعنى لما تفول للزور بتهدر فلوس مع الوقت و بنزين.
ارجو انى اكون افدتكم
والسلام ختام

[Hesham_91]

متوسط الاستهلاك مع سواقة عنيفة بالتكييف 9.7 ده علي سرعات بين ال 80 و 130 و لما الدنيا

بتبقى زحمة قوي -بتمشي ببطئ- بيوصل ل 10.5 ...مرة علي طريق مصر

اسكندرية كنت سايق هادي عشان الرادار اخري 100 الاستهلاك وصل 5.4 مع التحويلات

[Amr A.salam]

طريقة حساب الاستهلاك سهلة جداً

أول لما اللمبة بتنور بفول لغاية أول فصلة للمسدس وبدفع في حدود 84 جندي في 45 ليتر

ومتعود أصفر العدادات كلها في البنزينة وانا بمون

وبفضل ماشي لغاية ما اللمبة تنور تاني ....تدخل تفول بر ضه لغاية أول فصلة وتقرأ العدادات قبل ما تصفرها

دايماً عداد الكيلومترات بيديني من 380-420 كيلو متر حسب المشاوير والزحمة

يعني 400 كيلو متوسط ......على ال45 ليتر يبقى في حدود 9 كيلومتر لكل ليتر

يعني من 180 - 200 كيلو في الصفيحة

الكلام دة والتكييف ما بيتقفلش تقريباً

[Tamer86]

سلام

هو المصروف لازم يتحسب باللتر\100كم؟
هو فعلا انا ابتديت افكر ان العداد بتاعي غير عدادتكو؟؟

ليه تحسبو و تتعبو نفسكو؟

اصل العداد بيديك المصروف المتوسط و المسافة المقطوعة برحلتين A,B و كمان المسافة التقريبية لحد التنك ما يخلص؟؟ ولا ايه؟
وبعدين الارقام في العداد بتكون الكم\ليتر مش ليتر\100كم معرفش ايه لازمة تحويلها؟

انا عربيتي بقت 17000كم

و تقريبا جربت كل طرق الحساب و لقيت ان العداد بيديك نسب قريبة جدا من الواقع

مثلا عداد المسافة حتى البنزينة قبل ما يديك 60كم الارقام صحيحة بنسبة 90%
و ده بعد مقارنة مع عداد المصروف الوسطي
و كمان جربت احسبها اكتر من مرة و قارنت بين التفويلة و المسافة المقطوعة

و النتيجة:

داخل المدينة 9-11 كم\ليتر = 180 -220 كم\صفيحة (الاختلاف ده بسبب الشد أو الزحمة)
high way بين 13-14.5 كم\ليتر = 260-290 كم\صفيحة
(طبعا ده يرجع للسرعة
يعني كل ما زادت السرعة عن 100 زاد المصروف) لانها فا فيهاش غير 4 سرعات

و لما مشيت طريق السفر بسرعة بين 100-90 و كان مصروفها 16.5كم\ليتر (330 كم\الصفيحة)
بس كان الـECO أخضر طول الوقت تقريبا و المحرك مستريح أوي

[Beeso]

أنا لسا مفول امبارح بليل ولاايت فعلا المرة ده العربية استهلاكها زاد شوية عشان مشيت في زحمة أكتر من كل مرة ووصل ل 9 كم/لتر مع إنه كل مرة كان بيوصل 10 واسعة أكتر بس يمكن عشان أنا برده مكنتش بشغل التكيف على طول زي دلوقتي

[All_New_Cerato]

240 per each gallon with fine drive mood
210-220 per each gallon with agressive drive mood

[COOLCHEETOS]

هى فرقت جامد لما كنت بابقى ماشى خايف بالعربية لان صاحبى عمل حادثة واتقلب بسيراتو وكان بياكد ان العربية فيها عيب فى الثبات فكنت بامشى بالراحة تكييف علطول فكانت بتستهلك :
على الطرق السريعة حوالى 6.5-7 لتر كل 100 كيلو
وداخل المدن كفاية شارع الهرم ووسط البلد فبيبقى حوالى 10-11 لتر كل 100كم
انما دلوقتى بعد ماوثقت فى العربية اخيرااااااااا وثباتها بالتجربة روعةعلى السرعات من 140-200 كم/س تحفة رجعت سواقتى سواقة عنيفة وشد جامد
على الطرق السريعة حوالى 10 لتر كل 100 كم
داخل المدينة فبيبقى من 11-12 لتر وساعات 12.5 لتر كل 100كم
انا عامل حوالى 14 الف كيلو بالعربية