تجربة الشد مع الجيتا

[yasserelsayad]

شوفوا بئة شد نيسان تيدا مع كيا سيراتو :f_eyeb1[1]:

[youtube]http://www.youtube.com/watch?v=vevnyr8hsyy&feature=related[/youtube]

انا يوم الوقفة بتاعت العيد طالع مين تيدا سيدان وجربتها 3 مرات مع واحد صحبى

[yasserelsayad]

على فكرة انا معايا التيوتا الجديدة ماتورها 142 حصان وللاسف لازم بنزين 95 او اعلى
ومكنتش اعرف ان الجيتا قليلة كدة فى الاحصنة
بس بدون خلاف الجيتا سيارة محترمة

التويوتا 122 حصان بس

[yasserelsayad]

يا رجاله عاوز اقول فيه ناس بتعرف تطلع قوة الماتور وامكانيات العربيه وفيه ناس بتدوس بنزين وخلاص ومن الواضح انك محترف تطلع قوة العربيه كلها وبتقابل ناس بتسوق على قدها طب ما انا بطلع من كل العربيات بدايوا لانوس مع انها مش بتعدى 189 نفسى اشوفها 190 وبالرغم من كدة ما فيش حد بيحصلنى هههههههههههههههههه طب ما انا مرة كنت راكب باسات وواحد راكب لانسر وكنت بشد معاه وبعد 120 بدا يبعد ولما وصلت 200 كان اختفى من ورايا والطريق كان فاضى وهوة كان حارق ومولع فى عربيته اختفى لدرجه انى كنت عاوز ابعت حد يدور عليه ويواسيه فى الى جراله

انا ولا محترف ولا حاجة خالص .. انا بجرى بس وهى السيراتو اصلا مش محتاجة حد محترف انت دوس وهى بتجرى

[yasserelsayad]

ازيك يا ياسر وحشنى كتير

بما انى ماليش فى موضوع الشد ده فمينفعش اتكلم فيه من الاساس

انا قلبى خفيف ياعم وخصوصا السيراتو غاليا عليا

مش ناوى تاخد عربيتى تفتحها احسن دى نايمة خلاص

ابو ليلى حبيبى
عايزين نعمل مقبلة كدا قريب عشان انا بقالى كتير مشفتكمش
خليها مش متفتحة احسن بتبقى امان عشان ميبكونش فيه اغراء ليك عشان تجرى

[yasserelsayad]

يا رجالة أنا من هواة الجرى بس معلش عاوز أقولكم حاجة انا بسوق و أنا معايا رخصة من حوالى 22 أو 23 سنة العملية مش سحب مواتير و بس الله يخليك بجد الملفات ممكن لا قدر الله العربية تعوم منك من غير ما تدرى و لا تحس و على السرعة دى العربية مش حا تسعفك لانها خفيفة على الارض شوية الجيتا ممكن تعدى منة بس لو الطريق مفتوح تماما هو لو اخد ملفات حادة حا يبقى ثابت أنت العربية مش حا تكون بنفس الثبات العربية التقيلة على الارض نعمة مش حا تحسها الا فى الطريق المفتوح ووقت المواقف المفاجأة أنا بقولك خبرتى كشخص ساق عربيات كتير جدا جدا و طبعا و أنا فى الكلية كنت متهور و كان أصدقائى معاهم عربيات مختلفة و لو اقولك أن ال بى أم ال 320 موديل 84 مرة أرتفعت من على جنب فى ملف على عجلتين و لولا ستر ربنا و العربية تقيلة كانت أتقلبت من شدة الملف الى كان بغباء طبعا و السرعة بجد خلو بالكم لا قدر الله الموضوع بيحصل فى ثوانى و مهما كنت سائق متمرس المغامرة لها حدود حفاظا على نفسك و على سيارتك

يا باشا الطريق فيه ملفات وحتت مفتوحة وكل حاجة وانا الحمد لله بعرف اخد الملفات بالعربية السيراتو على سرعات عالية وربنا بيستر باردوا

[yasserelsayad]

معلم يا ياسر كالعادة :)

بس تفتكر ان الموضوع ده هيعدى الرقم القياسى بتاع موضوع السيفيك اللى فات؟ :)))))

أرجو من الناس بس قبل ماتعلق تخليها فاكرة ان ياسر بيتكلم على التساااارع والشد فقططططططططط

وليس اى عوامل أخررررررررررررررى

أصل صوتنا كان إتنبح فى الموضوع اللى فات وكان فى ضرب نار :)

أصلى ياياسر :))

لا ان شاء الله مش هيتقلب زى موضوع السيفيك انا بس برد على ناس معينة

[yasserelsayad]

يا ناس الحقونى سيراتوا ايه بس الى تقارن بيجيتا دة الى بيعمل حادثه بيجيتا ولا ببسات على سرعه 180 بينزل ينفض هدومه من عفرة الطريق والى بيعمل حادثه بسيراتوا على 120بنروح نصلى عليه فى عمر مكرم

ربنا هو اللى بيستر مش العربية .. فى ناس بتموت وهى ماشية 100 وعندى واحد صحبى عربيته جيتا كان ماشى 120 تقريبا وعامت بيه على المحور ودخلت فى السور اللى فى النص وبقت توتل لوس عشان عايزة ربع ورانى والفتيس اتكسر

[yasserelsayad]

ليه الناس بتفتح مواضيع عن التسارع والشد ومش بتفتح مواضيع عن عوامل الامان او الخامات او الفخامه او الاوبشنز او او

ليه التسارع رقم واحد عند الناس

السيراتو اسرع من الجيتا طبعا

الجيتا بطه بلدى متزغطه

بس عربيه صح الصح ومن الاخر...وكفايا شكلها من جوه ومن بره

انت مصمم باردوا تغير اتجاه الموضوع :)

[heshamzaky]

و الله يا جماعة أنا بتكلم معاكم بعقلية مختلفة شوية يعنى مرة زمان كدة من حوالى 10 سنين أدام المنصة بالظبط فى الاوتوستراد شفت عربية لانسر لونها أخضر كان سايقها شاب الله يرحمة بقى طبعا كان بيجرى و مش شايف ادامة لبس فى عربية أمن مركزى دغدغ السلم الخلفى بتاعها و العربية الكبوت أتقشر زى علية السلامن كدة و طبعا الولد مات الى صعب عليا منظر ابو الولد و هو بيبكى بحرقة و بيدولة موبيل الولد و هو ملفوف فى كلينكس علشان الدم الى علية الراجل كان منهار جدا أبنة ضاع و طبعا لو على الولد أكيد هو كان متخيل انة مايكل شوماخر و الكلام دة كان يوم جمعة كنت رايح أتفرج على الاوتو كروس فى 6 أكتوبر تقريبا يا رجالة بالراحة و الله لو كنت حريف سواقة لو العربية لعبت منك معلش مش حا تتلم الا بستر ربنا و أمكانيات عربية كويسة و مهارة سائق و دى بتيجى بعد عدد سنين سواقة طويلة انا كنت بجرى بالعربية زى السهم و كنت متخيل فى دماغى أنى احسن سواق و مفيش حجد بيعدى منى و بعربيات ممتازة و لما كذا مرة الغرور أخدنى و العربية لفت منى على سرعات فهمت يعنى اية أنى ما أكونش متحكم فى العربية و لم اكن اتخيل لوهلة أن دة ممكن يحصل الى بيزعل هم الاهل أرجوكم خلو بالكم و أجرى بس أرجوك خلى بالك لا تثق فى السيارة بنسبة مائة بالمائة الا لو راكب ألمانى و عربية كبيرة و برضو مش كل الثقة لان الستار هو ربنا و ربنا يسترها معانا جميعا

[shod90]

ياسر باشا انت بتلاقى الناس دى فين و بتجرى معاهم فين ههههههههههه .. انا هموت و الاقى سيفيك ولا 316 اجرى معاها هههههههههه .. الا قولى صحيح من خبرتك فى الشد كدا اية احسن عربية فى التسارع ؟؟
1)سيراتو
2)استرا
3)مازدا3
4)308
5)سيفيك
6)316
7)النترا
8)البرافو ال120 حصان
9)ليون


طبعا مقارنة صعبة بس اكيد اكيد انت شديت مع معظم دول !! هههههههههه

[Mzeid]

السلام عليكم
إزيك يا ياسر عامل ايه و أخبار الدراسة ايه ؟


انا هكون حيادي و مش هنحاز لأي طرف من ال 2 بس أحب أوضح عوامل عديدة في موضوع الشد و المقارنة بين العربيات

1- قوة محرك العربية بالأحصنة
2- مقدار عزم المحرك نفسه
3- منحنى القدرة و العزم مع المحرك و دة بيفرق في ميعاد نقل السرعات
4- وزن السيارة و دة بيفرق في نسبة القدرة للوزن
5- طريقة القيادة و طبعا بتفرق من واحد للتاني يعني زي ما بنقول امكانيات سواق
6- حالة السيارة الميكانيكية يعني لو محتاجة صيانة و لا لا يعني كام مرة عملنا صيانة و غيرنا فلتر هواء أو نظفناه و حسينا بعدها أن العربية فاقت و بقت أحسن و برضه الزيت نظامه ايه
7- الكاوتش هيفرق اكيد لو ضغطه مش مضبوط
8- تفتيح المحرك يعني واحد اشترى عربيته و مضغطش على محركها بعد التليين شوية عكس واحد بدأ يشد عليه علشان يدي معاه طبعا الأول محركه هيكون نايم و التاني فايق
9- نظام نقل الحركة في السيارة سواء كان مانيوال أو أوتوماتيك و نسب التخفيض في كلا الحالتين

[yasserelsayad]

ياسر باشا انت بتلاقى الناس دى فين و بتجرى معاهم فين ههههههههههه .. انا هموت و الاقى سيفيك ولا 316 اجرى معاها هههههههههه .. الا قولى صحيح من خبرتك فى الشد كدا اية احسن عربية فى التسارع ؟؟
1)سيراتو
2)استرا
3)مازدا3
4)308
5)سيفيك
6)316
7)النترا
8)البرافو ال120 حصان
9)ليون


طبعا مقارنة صعبة بس اكيد اكيد انت شديت مع معظم دول !! هههههههههه

دول اللى جريت معاهم من اللى انت كاتبهم

1)سيراتو
2)النترا (تقريبا هى والسيراتو واحد)
3)سيفيك
4)مازدا3
5)316 (على العالى بتكون اقرب من المازدا)

[yasserelsayad]

السلام عليكم
إزيك يا ياسر عامل ايه و أخبار الدراسة ايه ؟


انا هكون حيادي و مش هنحاز لأي طرف من ال 2 بس أحب أوضح عوامل عديدة في موضوع الشد و المقارنة بين العربيات

1- قوة محرك العربية بالأحصنة
2- مقدار عزم المحرك نفسه
3- منحنى القدرة و العزم مع المحرك و دة بيفرق في ميعاد نقل السرعات
4- وزن السيارة و دة بيفرق في نسبة القدرة للوزن
5- طريقة القيادة و طبعا بتفرق من واحد للتاني يعني زي ما بنقول امكانيات سواق
6- حالة السيارة الميكانيكية يعني لو محتاجة صيانة و لا لا يعني كام مرة عملنا صيانة و غيرنا فلتر هواء أو نظفناه و حسينا بعدها أن العربية فاقت و بقت أحسن و برضه الزيت نظامه ايه
7- الكاوتش هيفرق اكيد لو ضغطه مش مضبوط
8- تفتيح المحرك يعني واحد اشترى عربيته و مضغطش على محركها بعد التليين شوية عكس واحد بدأ يشد عليه علشان يدي معاه طبعا الأول محركه هيكون نايم و التاني فايق
9- نظام نقل الحركة في السيارة سواء كان مانيوال أو أوتوماتيك و نسب التخفيض في كلا الحالتين

انا الحمد لله تمام والماشى الحال .. انت عامل ايه يا كبير ؟؟
انا معاك فى كل اللى قولته وكلامك تمام مش محتاج مناقشة

[yasserelsayad]

و الله يا جماعة أنا بتكلم معاكم بعقلية مختلفة شوية يعنى مرة زمان كدة من حوالى 10 سنين أدام المنصة بالظبط فى الاوتوستراد شفت عربية لانسر لونها أخضر كان سايقها شاب الله يرحمة بقى طبعا كان بيجرى و مش شايف ادامة لبس فى عربية أمن مركزى دغدغ السلم الخلفى بتاعها و العربية الكبوت أتقشر زى علية السلامن كدة و طبعا الولد مات الى صعب عليا منظر ابو الولد و هو بيبكى بحرقة و بيدولة موبيل الولد و هو ملفوف فى كلينكس علشان الدم الى علية الراجل كان منهار جدا أبنة ضاع و طبعا لو على الولد أكيد هو كان متخيل انة مايكل شوماخر و الكلام دة كان يوم جمعة كنت رايح أتفرج على الاوتو كروس فى 6 أكتوبر تقريبا يا رجالة بالراحة و الله لو كنت حريف سواقة لو العربية لعبت منك معلش مش حا تتلم الا بستر ربنا و أمكانيات عربية كويسة و مهارة سائق و دى بتيجى بعد عدد سنين سواقة طويلة انا كنت بجرى بالعربية زى السهم و كنت متخيل فى دماغى أنى احسن سواق و مفيش حجد بيعدى منى و بعربيات ممتازة و لما كذا مرة الغرور أخدنى و العربية لفت منى على سرعات فهمت يعنى اية أنى ما أكونش متحكم فى العربية و لم اكن اتخيل لوهلة أن دة ممكن يحصل الى بيزعل هم الاهل أرجوكم خلو بالكم و أجرى بس أرجوك خلى بالك لا تثق فى السيارة بنسبة مائة بالمائة الا لو راكب ألمانى و عربية كبيرة و برضو مش كل الثقة لان الستار هو ربنا و ربنا يسترها معانا جميعا

والله انا مش بعتبر نفسى سواق والله الموضوع عادى خالص
والحمد لله مش بجرى فى طرق معرفهاش وبيكون الوقت متأخر والطريق سريع اصلا او مكشوف كله زى المحور والصحراوى والطريق بتاع اكتوبر دا باردوا بس مش كتير حسب ظروف الطريق
وانا عارف امكانيات كل عربية عندنا ومش مفيش اى ثقة عمياء لاى واحدة فيهم عشان اى حاجة ممكن تحصل وممكن تكون مش انت السبب ممكن يكون خطأ الغير

[heshamzaky]

والله انا مش بعتبر نفسى سواق والله الموضوع عادى خالص
والحمد لله مش بجرى فى طرق معرفهاش وبيكون الوقت متأخر والطريق سريع اصلا او مكشوف كله زى المحور والصحراوى والطريق بتاع اكتوبر دا باردوا بس مش كتير حسب ظروف الطريق
وانا عارف امكانيات كل عربية عندنا ومش مفيش اى ثقة عمياء لاى واحدة فيهم عشان اى حاجة ممكن تحصل وممكن تكون مش انت السبب ممكن يكون خطأ الغير

طيب كدة الحمد لله و اقولك نصيحة بجد أنا بخاف من الطريق الفاضى المفتوح أكثر من الطريق العادى بجد لآن الناس كلها بتكون واثقة زيادة فى الاسفلت و الطريق الفاضى يعنى لو أتنين سايقين هما الاتنين بيفكرو بنفس الطريقة فحرصهم بيقل هما الاتنين و ربنا يوفقك و خلى بالك دايما و ربنا يسترها معانا أجمعين