رابطة ملاك الكيا برايد - كلاكيت تانى مرة!

[ahmadm]

تقييم كيا برايد سيدان هاى لاين ( من غير تريقة :)

السلام عليكم

انا حابب اشارك معاكم فى الموضوع الجميل دة :)

انا معاية كيا برايد سيدان2003 GLX هاي لاين يعنى عاملة دلوقتى 61000 كم مشتريها كسر زيرو كانت عاملة 19000 كيلو فى 6 سنين تقريبا ما كانتشي بتتحرك الصيانة الدورية تتم فى التوكيل :) طبعا في بعض القطع مش بلاقيها فى التوكيل بس بجيبها من الجندي اوريجينال و بركبها عند ميكانيكي فى فيصل كويس.


انا عارف ان الناس ممكن تضحك علية ان انا بودى العربية التوكيل و كدة بس بجد بجد العربية دية عمرها ما وقفت منى تماما غير مرة واحدة كنت انا قست البطارية الجافة بتاعتها و الراجل قاللى تمام و هى كانت راكبة من سنتين و طبعا ولا كان تمام ولا بتاع ووقفت زي الفرسة الحرنانة يدوب بركن طلعت لقدام و اديت R , و شكرا ما رجعتش لورا اساسا :)

المواصفات :

• 1300 cc أوتوماتيك 72 هورس باور 4 نقلات
  
• الطول 3,935
• العرض 1,605
• الارتفاع 1,460
• قاعدة العجلات 2,345
• سعة خزان الوقود 38 لتر
• باور ستيرينج
• زجاج كهرباء امامي
• مرايات كهرباء
• اريال كهرباء
• زجاج حراري خلفى
• زجاج امامى ملون
• تكييف
• لو الحزام مش راكب لمبة الحزام بتفضل منورة فى التابلوة :) اوبشن جامد طبعا :)

بستخدم زيت 10000 و بغيرة بدرى بس المرة اللى فاتت التوكيل العسل حطلى 5000 لما يخلص هارجع 10 تانى.

اقصى سرعة جبتها بالسيارة كانت 170 فى طريق العين السخة(كان منزل من غير المنزل كان 160) انا و المدام بس اللى كنا راكبين و لو الحمولة كاملة 5 راكبين كنت مسافر الساحل مع الاسرة طريق العالمين 155 طول الطريق.

اسم العربية كوكا دة اسم الدلع بتاعها و انا بحبها جدا :) عشان عمرها ما خذلتنى :) الكيك داون بتاعها موز موز موز العربية بتنطر لما بدوس للاخر.

قطع الغيار بتاعتها رخيصة جدا تعتبر ببلاش عشان كدة انا اى حاجة فيها بيحصلها حاجة برميها و اجيب جديد.

الشنطة مناسبة جدا بتاخد حاجات بجد كتيرة جدا جدا نفسي اعرف هية كام لتر

المشاكل اللى فى السيارة :

التكييف :

مش عارف لية من ساعة ما اشتريتها التكييف بيكون تلاجة بس لو العربية بتجري 30 و طالع لما بقف فى زحمة التكيف اكنة فصل و مروحة بس هى اللى شغالة طبعا بتوع التكيف بيشحنو و خلاص و مش فاهمين المشكلة بس انا وجهة نظري المتواضعة اللى ممكن تكون غلط :) ان المروحة بتاعة السربنتينة صغيرة جدا انا شارى واحدة كبيرة و ان شاء الله هركبها و اشوف

الإسبراتير العظيم:

نفسي حد فنان يعرف يظبط الكهرباء عدل من غير تقديم ولا تأخير طبعا فى التوكيل فلة اخر حاجة محدش بيعرف يظبطة كل ما اروح الصيانة واحد يلعب فية و يخربة التنين و ارجع لرمضان بعد كام اسبوع يظبطة بس مش زاى ما كنت مشتري العربية السحب مش قد كدة خالص طبعا دة مأثر جدا على الكيك داون.


الكربراتير :

مش عارف لية العربية بتاكل بنزين كتير هل السبب الكربراتير ولا اية مش عارف مع العلم ان انا مواظب على الصيانة فى التوكيل و كل حاجة بتتغير فى الميعاد
انا مرة فكيت الكربراتير دة و نظفتة عند واحد كدة بس المشكلة مستمرة اكل البنزين بشراهة.


التحميل على الموتور:

من اسواء حاجة بتجننى فى العربية لما تكون ماشي فى زحمة و انا على ال D فى الفيتيس العربية بيكون ليها عزم و بتمشي من غير متدوس على البنزين بسرعة بطيئة جدا اول لما الطريق بيقف بتدوس على الفرامل و فا الحمل يزيد على الموتور و تبدء العربية تتهز اشيل رجلى تتعدل عليت الموتور من البتاع بتاع السلانسية دة تظبط بس المشكلة ان لما الحمل يروح و اجيب على ال N ال أر بى إم بيعلى فوق الواحد و اكنك دايس بنزين
نفسي اعرف اظبط الموضوع دة الاخ رمضان الميكانيكي قاللى ان دة عيب فى الكيا و الهيونداى الاكسل انا بردو حاسس انها ظبطة محتاجة فنان عشان هية ما كانتشي بتعمل كدة فى الاول.

الدهان:

للاسف بيكللح من الشمس و انا طبعا فابريكة برة وجوة و التكلليح دة بيخلى شكل العربية مش ظريف قوى نفسي اخد قرار الدهان الكامل بس صعببببببب :)

انا مشترك هنا من زمان بس اول مرة اكتب تقييم كدة على قدي ارجو انة يعجبكو ان شاء الله:)

[أحمد الجندى]

أنا سعيد جدا بكل التعقيبات والاعضاء الجدد وليا عودة لكل واحد ان شاء الله

[أحمد الجندى]

انا معايا كيا برايد سيدان
عايز اعرف سعر بلية العجلة الخلفية
وكمان او انا عايز اعرف مقاس سير التكيف ومعنديش القديم اعمل اية؟؟؟؟؟؟؟
انا من اسكندرية ارجو المساعدة وشكرا مقدما

أنا كنت سائل من حوالى 5 شهور فى الجندى اللى فى شارع دمشق وقالى ان بلية العجلة عاملة 40 جنيه .

بالنسبة للسير انت روح لاى حد من بتوع قطع الغيار وقله عايز سير تكييف الكيا برايد سيدان وهو حايجبهالك .

انا جايب مساعدين ياباني ب500 جنية من اسكندرية شارع صلاح الدين نوعهم kyb

طيب قلنا كده بقالهم معاك اد ايه ؟ وادائهم عامل ازاى ؟ وهل هو افضل من مساعدين العربية الاصلى ولا لأ ؟

شغل هااايل يا رجاله وبالاخص الفنان الموهاك

الله يخليك يا جون

السلام عليكم

انا حابب اشارك معاكم فى الموضوع الجميل دة :)

انا معاية كيا برايد سيدان2003 glx هاي لاين يعنى :copy of m-s5: عاملة دلوقتى 61000 كم مشتريها كسر زيرو كانت عاملة 19000 كيلو فى 6 سنين تقريبا ما كانتشي بتتحرك الصيانة الدورية تتم فى التوكيل :) طبعا في بعض القطع مش بلاقيها فى التوكيل بس بجيبها من الجندي اوريجينال و بركبها عند ميكانيكي فى فيصل كويس.


انا عارف ان الناس ممكن تضحك علية ان انا بودى العربية التوكيل و كدة بس بجد بجد العربية دية عمرها ما وقفت منى تماما غير مرة واحدة كنت انا قست البطارية الجافة بتاعتها و الراجل قاللى تمام و هى كانت راكبة من سنتين و طبعا ولا كان تمام ولا بتاع ووقفت زي الفرسة الحرنانة يدوب بركن طلعت لقدام و اديت r , و شكرا ما رجعتش لورا اساسا :)

[/size]

يا باشا مرحب بيك فى الرابطة وتقيمك رائع جدا
أنا كنت عايز اسألك عن التوكيل بما انك الوحيد اللى بيروح بالموديل القديم للتوكيل ... انت بتابع مع التوكيل القديم وليد توفيق ؟ وايه اخبار الصنايعية هناك ومصنعيتهم ؟ وهل فيه مهندسين بيتابعوا معاك وكده ؟ والتوكيل بيبقى زحمة وتعامله كويس ولا لأ .
ياريت تنقلنا خبراتك كلها لأنى واحد من الناس فيه ملاحظات عندى على العربية ونفسى اروح اظبطها عند التوكيل لانه اكتر واحد فاهم فيها ومش حايفتى زى الفتايين بس مقلق من الاسعار والتعامل وكمان قدم العربية هل هايرضو يقبلوها ولا لأ .

[أحمد الجندى]

وأنا ماشى بالعربية مرة واحدة لقيت عداد السرعة والكيلو متر مش شغالين روحت للميكانيكى لقى السلك بتاعهم اتقطع روحت جيبت واحد من حلمى سليمان ب 35 جنيه ركبهولى الميكانيكى واخد 5 جنيه..... عندى ملحوظتين حابب اقولهم الأولى بوادر القصة دى بدأت بان عداد السرعة وهو طالع ونازل بيفضل يرعش الملحوظة التانية السير اللى بيتباع دلوقتى بيحتاج يتعمل بالمطرقة لان الاصلى بيبقى طرف السلك مربع والجديد بيبقى دائرى شوية فلازم يتخبط عليه شوية لغاية اما ياخد شكل القديم علشان يشتغل مظبوط

[أحمد الجندى]

فين شباب البرايد عايزين نبتدى تبادل الخبرات والمعلومات

حابدأ بأول سؤال عربيتك الكيا برايد عاملة كام كيلو ؟ علشان نعرف العربية دى بتستحمل لغاية قد ايه

أنا جبتها وهى 170000 الف وفاضلى بتاع 500 كيلو واقفل ال 180000 .

تانى سؤال : اخبار الفرامل معاك ايه راضى عنها ولا مضايقاك ؟ وهل فيه حد جرب يعدل فى الفرامل بحاجة تانية اشد ؟

العربية أول ما جيبتها كانت فراملها كويسة وبعدين بعد كذا شهر خفت وبقت ضعيفة والميكانيكى اشار عليا انى اخرط التيل والطنابير الخلفى وكانت مشورة زفت لأن من ساعتها اداء الفرامل بقى وحش جدا وادينى اهو لسه مغير الطقم الخلفى كله بس برضو مش بنفس الكفاءة اللى كانت عليها أول مرة

يلا فى انتظار اجاباتكم وتفاعلكم مع الموضوع

[johnghaly]

يا معلم موهاك انا بالنسبه ليا الفرامل كويسه الحمد لله بس بتسفر ساعات واول ما اتلع بالعربيه بتبقى هربانه شويه بس بقول ده طبيعنى عادى
انا بقى عندى شويه استسارات على وحوش البرايد كده والمعلم بتعانا موهالك طبعا
اولا عندى اخويا معاه برايد بردو والمرش بيعلق ومش لاقى مرش او بالاخص خايف يركب مرش جديد يكون تعبان تنصحونا بى ايه هى لما تيجى تدوره بتغلبه شويه كده وبعدين بدور
ثانيا الصيف داخل هى 99 من غير تكيف ومش عايز يبيع لانه بيحب العربيه دى بسأل بخصوص التكيف عايز يركب وانا مش بحبز بصراحه الفكره علما بانى بردو اللى معايا 99 من غير تكيف السوال فى حد مركب تكيف وعامل اه فى الجرى وكمان قوة التكيف كويسه وسعره لو عايز اركبه وممكن اركبه فين تنصحونى يعنى
ثالثا واخيرا موضوع الطاصات كله طايره انتو عارفين طاصات الكيا الصغيره دى اللى بتقفل بين المسامير ومكتوب عليه كيا مش لاقيه خاااالص
انا اسف انى طولت عليكم بجد وبرجاء الافاده
وبشكر بجد المنتدى الجميل ده وصاحب الفكره موهاااااااااك باشاااا

[أحمد الجندى]

يا معلم موهاك انا بالنسبه ليا الفرامل كويسه الحمد لله بس بتسفر ساعات واول ما اتلع بالعربيه بتبقى هربانه شويه بس بقول ده طبيعنى عادى

بالنسبة للتصفير فزى ما قلتلك قبل كده دى ممكن تبقى محتاجة تتشحم وخد بالك الشحم انواع فيه المصرى اللى لونه اسود وده تعبان وفيه نوع تانى لسه شايفه فى طقم الفرامل الجديد لونه احمر وده زى ما بيسميه الصنايعية بتاع الخواجة بس بيبقى غالى

اولا عندى اخويا معاه برايد بردو والمرش بيعلق ومش لاقى مرش او بالاخص خايف يركب مرش جديد يكون تعبان تنصحونا بى ايه هى لما تيجى تدوره بتغلبه شويه كده وبعدين بدور

كان نفسى اجاوبك بس ماعنديش علم بالحتة دى

ثانيا الصيف داخل هى 99 من غير تكيف ومش عايز يبيع لانه بيحب العربيه دى بسأل بخصوص التكيف عايز يركب وانا مش بحبز بصراحه الفكره علما بانى بردو اللى معايا 99 من غير تكيف السوال فى حد مركب تكيف وعامل اه فى الجرى وكمان قوة التكيف كويسه وسعره لو عايز اركبه وممكن اركبه فين تنصحونى يعنى

أنا بعد ما اشتريت عربيتى اتعرض عليا واحدة موديل 97 وفيها تكييف بس بصراحة ماجربتهاش ده غير صاحبى اللى معاه البرايد هاتش باك 1300 سى سى فيها برضو تكييف فالحكاية ممكنة بس الرك على اللى حاتركب عندهم يكونوا بيفهموا وعندهم ذمة

ثالثا واخيرا موضوع الطاصات كله طايره انتو عارفين طاصات الكيا الصغيره دى اللى بتقفل بين المسامير ومكتوب عليه كيا مش لاقيه خاااالص

طيب انت جربت تسأل عند بتوع الاستيراد ؟

[أحمد الجندى]

معلومة جديدة عرفتها عن الفرق بين الكيا برايد هاتش باك موديل 96 وبقية الموديلات من 97 لغاية 99 ، وهى وجود rpm و جراب فى الباب فى الموديلات الاحدث

[أحمد الجندى]

دى مشاركة كنت كتبتها لواحد بيدور على عربية فى الفئة السعرية بتاعة البرايد بس كلامى كله كان عن السيدان حاحاول انى اعمل مقارنة بين البرايد الهاتش باك ومنافسيها

1- الكيا برايد سيدان 1300 سى سى فيها التكييف والباور اللى انت طالبهم وواسعة واستهلاك البنزين يادوب واعتمادية وقليلة الصيانة وقطع غيارها رخيصة الثمن وسعر اعادة البيع كويس جدا وفى منها اتوماتيك كمان واهم شىء انها ارخص واحدة فى الاختيارات لان اعلى حاجة فيها مش حايتعدى 36 الف عيبها انها فقيرة من حيث الشكل من جوة لو انك بتهتم .

2- هيونداى اكسنت 1500 سى سى بلاش ال 1300 لانه مافيهوش باور ، عربية كويسة وبرضو اعتمادية وقليلة الصيانة وقطع غيارها رخيصة وسعر اعادة البيع كويس جدا بس ما فيهاش اتوماتيك وكمان العربية واطية شوية من الارض التابلوه بتاعها حلو بس للاسف بيشقق بسرعة من الشمس وبما اننا بنتكلم عن 1500 فسحب البنزين حايبقى اعلى شوية وكمان حاتبتدى معاك فى السعر من حوالى 38 الف .

3- رينو كليو 1200 سى سى فيها تكييف وباور اعتمادية جدا امان جدا انت عارف بقى الاوربى شيك جدا من جوة يادوب بتشم بنزين مشكلتها فى سعر قطع الغيار غالية شوية مقارنة بالباقيين بس هى معمرة وكمان اعادة البيع مش قد كده واهم حاجة الصيانة اللى مش اى حد يعرف يشتغل فيها وممكن غلطة تدفعك قد كده ده غير انها ضيقة شوية فى صالونها وسعرها ممكن يبتدى معاك من 34 اللى هو الشكل القديم .

4- الكيا سيفيا 2 مش 1 ودى 1500 سى سى فيها برضو تكييف وباور واعتمادية جدا وثابتة جدا وامان وشكلها شيك وواسعة من جوا وقليلة الصيانة وقطع غيارها رخيصة وفيها اتوماتيك وسعر اعادة البيع كويس بس مش زى البرايد والاكسنت كمان العربية واطية شوية ودى ممكن تبتدى معاك من 39 الف .

[أحمد الجندى]

فين الناس ؟

[johnghaly]

مووووجودين معاك يا بطل الكيا البرايد يا موهاك

[أحمد الجندى]

أنا شايف الناس نايمة خالص مفيش غيرى أنا وانت بس

[mera_eid]

قطع الغيار كيا كلها موجودة

انا مبسوطة انى معاكم فى المنتدى
ومبسوطة انى بادخل معاكم فى الموضوع الهايل بتاع الكيا دة

.................................................. .....

الإعلانات التجارية ممنوعة طبقاً لنظام المنتدى دون الرجوع والتنسيق مع إدارة المنتدى.


لقد خالفت القواعد لذا تتطلب انذارك مع وقف العضوية لمدة شهر

يرجى مراجعة قواعد المنتدى


مشرف 7ب

7/5/2011

[johnghaly]

شكرا اوى على الاضافه دى يا ميراا

مواهااام اااانت فين؟؟:)

[أحمد الجندى]

موجود يا باشا بس الناس مش عايزة تتفاعل ولازم نفضل نزق فى الموضوع كل شوية ، ما تشوف كده الاسئلة اللى كنت سألتها قبل كده وتجاوب عليها علشان تنشط الموضوع كده