التغير فى شكل ومواصفات سيارات كيا .... خطا ام صواب ؟ موضوع للمناقشة

[ابو ليلى]

السلام عليكم ورحمة الله وبركاته

تعتبر كيا الشركة الوحيدة على قدر معلوماتى اسرع شركة فى تغير الموديلات بمعدل كل سنتين تغير فى شكل ومواصفات العربيات .

من وجه نظرك عيب ولا ميزة ؟

[moha4tec]

الشركه بتعمل كده .عشان تزود نسبه البيع بتاعها و تفضل تشغل فى تفكير المستهلك و تغريه عشان يشترى منتجاتها
و طبعا التجاره شطاره .و بسم الله ماشاء الله كوريا كلت السوق فى اغلب انحاء العالم

[Land_Cruiser]

من وجهه نظرى اكيد عيب لان السيارات من السلع اللى المفروض انها معمره على الاقل عندنا يعنى الانسان بيشتريها بمبلغ كبير و اللى يتوقعه انها هتفضل معاه مش اقل من خمس سنوات مثلا و طبعا فى ظل التغير السريع فى الموديلات و ظهور اجيال كتيره فى فترات قليله بيضايق اللى المالك الحالى لانه من اول يوم للشراء هيبدأ فى حساب هو فاضل كام يوم و ينزل موديل جديد و اكيد نزول موديل جديد بيكون له تبعيات سيئه على المالك الحالى لأنه مبدأيا سعر عربيته هينزل جامد لظهور جيل جديد ثانيا هيبقى فى مشكله فى المستقبل من ندره قطع الغيار و ده لسببين ان الشركه هتبتدى تغير فى خطوط انتاجها لكى تخدم الموديل الجديد و السبب التانى ان الموديل القديم ما قعدش فى السوق اصلا فتره طويله علشان يلحقوا ينتجوله قطع غيار بزيادة بحيث تبقى موجوده بوفره بعد انقراض الموديل. القديم . انا بس مش متأكد من معلومه ان الشكل بيتغير كل ٣ سنوات اللى حضرتك ذكرتها لانى اعتقد انها خمسه سنوات. الفكره كمان ان كثير من الموديلات بتكون ناجحه و فى اقبال عليها و سعرها كويس و مع ذلك برضه بيوقفوا انتاجها. احنا عندنا يمكن كمان نقطه بتزود المشكله عندنا و هى ان العربيات دى بتجيلنا بضعف او اكتر من ضعف تمنها بسبب الجمارك و الضرائب و دى بيؤدى الى ان الخساره بتبقى اكبر و كمان فى نفس الوقت انخفاض الاجور مقارنه بالخارج و كل ده بيخللى تأثير المشكله دى علينا جامد اكتر من الشعوب التانيه اللى العربيات عندهم رخيصه و دخولهم مرتفعه و ده بيسمح. لهم ان الطبيعى بتاعهم انهم يغيروا العربيات كل سنتين تلاته بدون مشاكل فده ممكن ما يخليهمش يحسوا بنوعيه المشاكل دى بدرجه تخليهم حتى ما يوجعوش دماغهم حتى فى تصليح العربيه لما تبوظ فبيرموها و يجيبوا واحده جديده و فى الحاله دى هتبقى موديل و شكل جديد اما احنا زى ما احنا عارفين ممكن تلاقى ناس معديه من جنبك راكبه العجلات الحربيه اللى من ايام الفراعنه عادى

[MohammedAladel]

لو تغيير جذرى وفرق جامد فى الإمكانيات مع فرق جامد برضه فى السعر آه كده ماشى عشان الناس اللى اشتروا الشكل الى قبله ميزعلوش لو نزلت هى عربية مواصفاتها قريبة وشكل أحلى وسعر مش فارق قوى
بس دا سوق أحنا جايز فى مصر العربية سلعة معمرة وبرا برضه بس مش زى عندنا

أنا شفت ميجان يا جماعة ووتويوتا وشوية عربيات كويسة جدا بتتعمل خردة وتتكسر ويعاد بيعها مواد خام ! وإحنا لسة ال 128 شغالة وياريتها لما بتبوظ بنعملها إعادة تصنيع أحنا بنرمى على طول لو الحاجة باظت بنرميها

هما عشان عندهم إعادة تصنيع مفيش حاجة بتترمى

[MohammedAladel]

وهما مش هيقولوا آه والنبى أصل المصريين سوقهم كذا يبقى استنى شوية عليهم

طيب نقول العكس بقى لما شركة ترخم وتفضل تنزل موديل قديم مع إن فيه الجديد والناس تسيب الجديد وتروح للقديم !!!

زى لانسر شارك وقت ما نزلت ولانسر بومة اللى ما زالت حتى الآن والله أعلم فيه منها ع الزيرو

والناس ماسكة فيها برضه !!

يبقى العيب فى مين دلوقتى ؟

[A.Adel]

السلام عليكم ورحمة الله وبركاته

تعتبر كيا الشركة الوحيدة على قدر معلوماتى اسرع شركة فى تغير الموديلات بمعدل كل سنتين تغير فى شكل ومواصفات العربيات .

من وجه نظرك عيب ولا ميزة ؟

كل سنتين إزاي ؟؟
أنا اللي أعرفه ال cerato نازلة 2009 تقريبا و لسة مكمله لحد 2013
ولا حضرتك تقصد فرق الفتيس
ال soul نزلها facelift في 2012
و ال carens زي ما هي أظن

[ابو ليلى]

طبعا كلامى مقصود بيه السوق المصرى وليس الاوربى ولا الخليجى
لان هناك بينزل موديلات مش بتنزل مصر من الاصل
السيراتو من وقت ما كانت شوما وبدايتها الحقيقية على ما اتذكر ( ياريت تصحيح المعلومة لو خطا )
2008 وتم تغير الشكل + المواصفات
اوخر 2008 الاعلان عن نزول السيراتو 2009 وبرضه تغير الشكل والمواصفات
اوخر 2009 نزول الشكل الجديد الحالى وبرضه شكل وموصفات
اوخر 2010 تغير مواصفات من فتيس 4 سرعات الى 6 سرعات
وتم الاستقرار الى الان اوخر 2012 على الشكل الحالى وتغير كماليات كل فترة
2013 مكانش ليها لزوم تنزل لان على شهر 3 بالكتير هيكون الشكل الجديد
k3 نزل السوق الخليجى وبالتالى مصر
وتم التغير برضه فى البيكانتو
شكل + مواصفات فى فترات قريبة
دى الامثلة اللى فاكرها حاليا ويبقى السؤال عيب ولا ميزة ؟

[rockeromda]

استراتيجية كيا-هيونداي

رأيي المتواضع:
كيا وهيونداي شركة واحدة ولاحظت ان لما كيا تنزل موديلات جديدة بيكون قبلها هيونداي سابقة او العكس... هما دارسين السوق كويس: الالنترا الجديدة والار بي الجديدة ياخدوا السوق سنتين وبعدين الريو الجديدة والسيراتو والكارينز في 2013 و2014
وفي النص شوية فيس ليفت على لعب في ليدات واكصدام وسبورتس باكيدج وخلافه ...هما عايزين يكونوا موجودين على طول
المهم احنا عايزين ايه؟
يعني كل واحد مننا هل هو مستريح مع عربيته واللا هيغير لفئة اعلى او مختلفة او لمجرد التحديث؟ هو بيديلك الخيارات واحنا في ايدنا نشتري او لا

[NoRmAl]

أنا شايف ان دا أفضل للشركة لأن مبيعتها هتزيد وجدا
هي كدا بتارجت العملاء الجدد والحاليين
الي مشتراش السيراتو أو أي عربيه كيا علشان شكلها مكنش عاجبة أو خامتها مش قد كده
هيفكر تاني ويعيد حساباته
والي أشترى وبيطمح للجديد برده هيزمزء ويمكن يغير
للعملاء أصحاب العربيات القديمة طبعا طاااااااااامة كبرى معنويا وماديا
معنويا أسأل جميع الاعضاء وقلنا دا في المقابله
كان بينزل للسيرتو شبكه جديدة ولا مرايه أشيك كله كان بيفكر يغير ما بالاك بشكل وهمي جديد
ماديا مفيش كلام أنزل بيع عربيتك تاني يوم الشكل الجديد ينزل وأسمع يا بيه دى الشكل القديم بملىء الفم
فهي عيب وميزه
موضوع جميل يا أبو ليلى

[ابو ليلى]

الشركه بتعمل كده .عشان تزود نسبه البيع بتاعها و تفضل تشغل فى تفكير المستهلك و تغريه عشان يشترى منتجاتها
و طبعا التجاره شطاره .و بسم الله ماشاء الله كوريا كلت السوق فى اغلب انحاء العالم

طيب دى الميزة بالنسبة للشركة بس عاوز رائيك بالنسبة للمستهلك

الخساره بتبقى اكبر و كمان فى نفس الوقت انخفاض الاجور مقارنه بالخارج و كل ده بيخللى تأثير المشكله دى علينا جامد اكتر من الشعوب التانيه اللى العربيات عندهم رخيصه و دخولهم مرتفعه و ده بيسمح. لهم ان الطبيعى بتاعهم انهم يغيروا العربيات كل سنتين تلاته بدون مشاكل فده ممكن ما يخليهمش يحسوا بنوعيه المشاكل دى بدرجه تخليهم حتى ما يوجعوش دماغهم حتى فى تصليح العربيه لما تبوظ فبيرموها و يجيبوا واحده جديده و فى الحاله دى هتبقى موديل و شكل جديد اما احنا زى ما احنا عارفين ممكن تلاقى ناس معديه من جنبك راكبه العجلات الحربيه اللى من ايام الفراعنه عادى

رائيك يحترم وسلمت يداك

وهما مش هيقولوا آه والنبى أصل المصريين سوقهم كذا يبقى استنى شوية عليهم

طيب نقول العكس بقى لما شركة ترخم وتفضل تنزل موديل قديم مع إن فيه الجديد والناس تسيب الجديد وتروح للقديم !!!

زى لانسر شارك وقت ما نزلت ولانسر بومة اللى ما زالت حتى الآن والله أعلم فيه منها ع الزيرو

والناس ماسكة فيها برضه !!

يبقى العيب فى مين دلوقتى ؟

كده العيب واضح انه فى المستهلك المصرى
بس فى بعض الناس معاها انها تغير وبتحب التميز وممكن تكون شايفها ميزة

[ابو ليلى]

أنا شايف ان دا أفضل للشركة لأن مبيعتها هتزيد وجدا
هي كدا بتارجت العملاء الجدد والحاليين
الي مشتراش السيراتو أو أي عربيه كيا علشان شكلها مكنش عاجبة أو خامتها مش قد كده
هيفكر تاني ويعيد حساباته
والي أشترى وبيطمح للجديد برده هيزمزء ويمكن يغير
للعملاء أصحاب العربيات القديمة طبعا طاااااااااامة كبرى معنويا وماديا
معنويا أسأل جميع الاعضاء وقلنا دا في المقابله
كان بينزل للسيرتو شبكه جديدة ولا مرايه أشيك كله كان بيفكر يغير ما بالاك بشكل وهمي جديد
ماديا مفيش كلام أنزل بيع عربيتك تاني يوم الشكل الجديد ينزل وأسمع يا بيه دى الشكل القديم بملىء الفم
فهي عيب وميزه
موضوع جميل يا أبو ليلى

تسلم يا محمد طبعا العيب لينا والميزة ليهم
تفتكر كيا بتصرف كل ارباحها على التطوير اللى بمعدل سريع
معروف ان اى موديل جديد بيكونو شغالين عليه فترة 4 سنين قبل نزوله كحد اقصى
يعنى معدل التغير والمصروفات عالى جدا على اى شركة وفى احتمال مش قليل
ان مش كل العربيات تنجح .....يعنى فى مخاطرة برضه .

[Formulator]

الصراحة أنا مش شايف أى تغيير فـ المواصفات الفنية؟؟!!! أو أساسيات العربية بمعنى أصح؟!!
يعنى
كل التغيير فـ الأوبشنز أو facelift لنفس الموديل؟!
أو تغيير شكل كامل زى الـK3 كده.. مع الإحتفاظ بنفس الشاسيه والمواتير والجيربوكسات والعفشة والفرامل (بتاع الهونضاى)!!
لكن بتفضل تكنولوجيا الـAutomotive.. زى ماهى، أو بتطوير ضئيل جدا؟!!!
(بتكلم على تغيير فـ العربية كـ ميكانيكا وهندسة.. شغل صناع عربيات- عربيات بقى) ههههههههههههههههه

يعنى مثلا يابوليلى..
رأيى بصراحة -وبدون تقليل فـ الكيا أو الكورى- فـ كل الموديلات (على مدى السنيــــــن) من أول السيفيا-شوما-سبكترا-سيراتو1-سيراتو2
ولحد الـK3 مفيش غير التغيير ده:

اوخر 2010 تغير مواصفات من فتيس 4 سرعات الى 6 سرعات

هو ده اللى يتقال عليه تغيير هندسى (بلغة العربيات مش بلغة البلوتوث)؟!!
لكن التاتش والـDVD والبارك-سنسور ده شغل سامسونج و LG والسونى والكلام ده؟؟؟!! ههههههههههههههه

- لكن تقوللى السيراتو موتورها 1.6 فيه VVT على كامة الـintake.. لكن السبكترا 1.6 لأ
طب ماشى: يعنى 3-5 حصان زيادة؟!!

- لا لأ.. أصل فتيس الشوما الأوتو مكانش فيه Step، ونزل فـ السيراتو؟؟؟!!!!!!
يبقى انت كده بتهرج؟؟ ما الإثنين 4-سرعات أوتو عادى؟!!!
وكده بقى... ههههههههههههههههههههههه

أقولك مثلا الـK3 فيها أيـــــــــه تطوير (فنيا- Technically) عن السيراتو؟!!
4 حصان فـ الموتور؟! وشكرا على كده يابرنس!! lol
طب ده مش إستهبال؟؟ خصوصا لما تلاقيها نازلة بفرق سعر جااااااااامد؟!!

- ياراجل ده فـ الكام موضوع اللى عاملينهم Hossam-Optrawy وحد تانى عن الـK3
الشباب ياعم عمالين يحلموا بالأوتو-بارك والفوانيس الليدات والكراسى الكهرباء (اللى غالبا مش بتنزل مصر)
ماهو مش لاقيين حاجة يتكلموا فيها غير الشكل والأوبشنز ياكبير!! دا حتى العفشة نفس التورشن-بيم بنفس الـsetup الفاشل؟!!
(أيه يارجالة هو محدش قالهم من الـgeneration اللى فات ان العفشة ناشفة والثبات وحش.. وياريت تطلعوا المساعدين برا وتدخلوا السوست جوا)؟؟!!!
ههههههههههههههههههههههه

الحاجات دى ماينفعش يتقال عليها All New Cerato/ K3 مثلا.. يبقى بيشتغلوا الناس؟!!
- بتكلم جد والله ياباشا، لو فيه فـ كلامى حاجة anti-korean قوللى!! lol

Edit: للأمانة الكورى فـ الأجيال الجديدة (والكيا تحديدا) بقوا يعترفوا بالـABS والإيرباجز.. بصرف النظر بقى عن ستاندرد ولا أوبشن-على خفيف كده- هههههههه

Rgds،

[Formulator]

آه واللى هيقوللى ما كل عربيات الفئة دى كده (أو مافيهاش تغييرات).. هأزعله جامد على فكرة
- مش بـ حاجة يعنى.. دانا فـ القسم بتاعكوا ههههههههههههههههههه
بس هأجيبله بقى الفروقات بين الأجيال بتاع عربيات كتيييييييييييييير فـ نفس الفئة؟!! هتزعله أوى!!
وأطلعله ماركات فيها تغيير جذرى فـ الشاسيهات والعفشة والمواتير-الجيربوكس...etc
يابانى - أوروبى، وممكن كورى كمان!! (الـDaewoo-شيفروليه) ههههههههههههههه

حد جاى؟؟!!!

[2CODE]

ميزه لاني بحب التطوير وانا اكتر واحد بشجع التطوير لان في كل تطوير في مميزات جديدة والا لم يكن اسمه تطوير

وبسم الله ما شاء الله كيا كل ماتنزل نسخة جديدة بشكل جديد بتكون جديدة كلياً عن القديمة وبكده هي مش بتسرقك لا هي بتحدث موديلاتها وبتصدر المميزات الجديدة اللي تم عملها من قبل فريق العمل في العربية الجديدة

[ahmad--ezzat]

بص
مع احترامي لكل اللي في المنتدي
محدش يقدر يقول دي عيب ولا ميزه لان انت متعرفش ايه فكر الشركه وبتعمل كده ليه

ولكن كل اللي نقدر نعمله اننا نبص للشركات التانيه...بي ام ...مرسيدس...اوبل....فيات...نيسان....هوندا....ونشوف هل كيا ماشيه زيهم وزي موديلاتهم ولا لا

وانا اعتقد ...مجرد اعتقاد...ان كيا عندها اسهال في الموديلات والتجديد...حتي مبتديش لسلعتها فرصه انها تاخد نجاح مع الناس