عربيتي إتسرقت, والأضرار بعد عودتها, وياريت تساعدوني

[ahmed_afifi84]

السلام عليكم ورحمة الله وبركاته
لله ما أعطى ولله ما أخذ, عربيتي سيراتو 2011 إتسرقت من قدام البيت, بس معرفش يشغلها ولكن قطرها
قطرها إزاي هو ده السؤال؟؟؟؟
قطع أحزمة الأمان وعملها حبل لشد العربية
الحمد لله جبتها بعد ما طلعوا عيني وأخذوا فلوس, وحسبي الله ونعم الوكيل
المهم الأضرار كانت كالآتي
1. أخذوا الاستبن والعدة كلها, وطبعاً انتوا عارفين الإستبن بتاع السيراتو هو جنط أصلي للأسف
2. طفاية الحكومة
3. الولاعة
4. كسروا الكونتاكت والفبرة بتاعتها, علشان يحاولوا يشغلوها
5. لمبة الإيرباج شغالة على طول
6. مع شوية بهدلة في الصاج من برة
رحت التوكيل علشان أكشف على العربية
مبدئياً قالولي عايز طقم إيرباج علشان الحزام مرتبط بالإيرباج, وده حيكلفني 21 الف جنيه, طبعاً كنت صايم وقتها فكان رد فعلي هو الصمت, أو يحاولوا يشوفواً حزامين بدل اللي إتقطعوا, الواحد حيكلفني 4, برضه ديه صدمة تانية
بالنسبة للكونتاكت والفبرة بتاعته حتكلفني 3.5
دلوقتي بالنسبة لطقم الإيرباج, بدل ما أجيب الطقم هل ممكن الاقي حزامين إستيراد ولا أعمل إيه؟ خلاص مبقتش عارف أعمل إيه

[khalid_adel]

كونتاكت وفبره وحزامين هاتهم استيراد وحيبقو ارخص من كده بكتييييييييييييييير
حسبي الله في جشع التوكيلات دي

[القناص المحترف]

اولا قدر اللة وماشاء فعل والحمد اللة انها جت على قد كدة وعرفت تجيب العربية

ثانيا طبعا الاسعار الى بيقولها التوكيل اسعار هلامية وعلشان كدة لازم تطلع على الحرفين هتلاقى كل ال انتى عايزة متوفر استيراد واسعارة حلوة

[Deshahcoka]

باشا طقم الطبل من التوكيل بالكونتاك بسعره باكوا ! او باكو و شوية بس ايه 3 و نص ديه ؟؟؟؟؟؟

ربنا يعوضك و ان شاء الله خير و الحمدلله المال الحلام عمره مبيرحش !

بس يجروها ازاي البجاحة ديه يعني !!!!

الحزام حتلاقي استعمال اكيد هاتهم و ركبهم و شوف ممكن ربنا يكرمك و اللمض تطفي

[sherif moneer]

ربنا يعوض عليك يا باشا
وسيبك من شغل التوكيل ده انته ممكن تشتري نص قدام بالمكنه والطابلوه ب 20 الف
يعني لو استيراد الحاجات دي بس هتقل عن كده بكتير

[ahmed_afifi84]

والله يا جماعة انا شاكر جداً تعاطفكم معايا, وفعلاً حعمل بنصيحتكم وحنزل الحرفيين, لعل وعسى كمان الاقي الجنط الاستبن بالعدة بتاعته

[mohamed handy]

اصبر واحتسب وان شاء الله هتلاقيلها حل بس معتقدش انه هيبقى فى التوكيل لان اسعارهم كالعاده فلكيه

[prooo]

قدر الله وماشاء فعل ....... ربنا يعوض عليك

[Ahmed_Adham]

بالنسبه للسرقه جابو نمرتك من المحضر برضه؟ ورجعت بعد أد ايه ودفعت كام؟

[Deshahcoka]

والله يا جماعة انا شاكر جداً تعاطفكم معايا, وفعلاً حعمل بنصيحتكم وحنزل الحرفيين, لعل وعسى كمان الاقي الجنط الاستبن بالعدة بتاعته

نصيحة الكوالين و الكونتاك هاتم من التوكيل و ركبهم دول بباكوا و نص اخرهم يعني عشان تبقى مطمن معاك مفاتيح جديدة محدش تاني معاه !

الجنط بفردة كاتوش بيعمل في حدود 700 جنيه نضيف و يقل انتا و شطارتك !

[ahmed_afifi84]

بالنسبه للسرقه جابو نمرتك من المحضر برضه؟ ورجعت بعد أد ايه ودفعت كام؟

بالظبط إتصلوا بيا بعد 5 دقايق بعد ما عملت المحضر, دفعت 17 وحسبي الله ونعم الوكيل, وربنا وحده أعلم الفلوس ديه جبتها إزاي, جبتها بعد يومين بالظبط
انا نسيت أقول إنهم كسرولي زجاج العربية

[ahmed_afifi84]

نصيحة الكوالين و الكونتاك هاتم من التوكيل و ركبهم دول بباكوا و نص اخرهم يعني عشان تبقى مطمن معاك مفاتيح جديدة محدش تاني معاه !

الجنط بفردة كاتوش بيعمل في حدود 700 جنيه نضيف و يقل انتا و شطارتك !

والله ربنا يكرمك, انا فعلاً بفكر أعمل كده, وربنا يسهل في موضوع طقم الإيرباج

[Ahmed_Adham]

بالظبط إتصلوا بيا بعد 5 دقايق بعد ما عملت المحضر, دفعت 17 وحسبي الله ونعم الوكيل, وربنا وحده أعلم الفلوس ديه جبتها إزاي, جبتها بعد يومين بالظبط
انا نسيت أقول إنهم كسرولي زجاج العربية

اتصلو بعد المحضر بخمس دقايق؟ حسبي الله ونعم الوكيل.

[ahmed_afifi84]

انا كمان حابب أقولكم كمان على آخر تقاليع الحرامية
الشخص اللي كنت جايبه يتفاوض معاهم أتصل بيهم بعد العشاء على إعتبار إن ده الوقت اللي بيفتحوا فيه الموبايل, مردش عليه أول مرة وبعدها رد عليه وقاله
"معلش علشان كنت بصلي التراويح"
لكم التعليق

[hamaka]

انا كمان حابب أقولكم كمان على آخر تقاليع الحرامية
الشخص اللي كنت جايبه يتفاوض معاهم أتصل بيهم بعد العشاء على إعتبار إن ده الوقت اللي بيفتحوا فيه الموبايل, مردش عليه أول مرة وبعدها رد عليه وقاله
"معلش علشان كنت بصلي التراويح"
لكم التعليق

التعليق الوحيد اللى ينفع يتقاله مينفعش نقوله فى رمضان كله مش فى الصيام بس ، حسبى الله و نعم الوكيل :(.....