هل تستحق السيراتو الجديده كل هذا الاهتمام وهل تستحق 126 الف ؟

[PoweRPassioN]

يا اخواني المشكلة مش مشكلة ان الناس هتفضل تقول الياباني ياباني والكلام ده
احنا واحد + واحد بيساوي اتنين

هلى اللي بيتكلم ان الكوري بقه زي الياباني ده
عارف كل حاجه في التقفيل والخامات وطريقة التصنيع علشان يقارن ويحسم المقارنة كده

انا هتكلم على اللي انا اعرفه وشوفته بعيني

انا كنت ركب نوبيرا كوري
وعربيه جامده وفيها ماتور جامد بجد
ولكن فرق الخامات واضح جدا بينها وبين الياباني حتى لو شاريد صغيرة

فرق الخامات مش فرش وتابلوه وشكل وخلاص
لأ
الفرق اللي انا بتكلم عليه ده
فرق في كفائة الدهان
فرق في خامة الصاج نفسه وقوته
فرق في جلفنة الحديد نفسه
فرق في خامة قطع الغيار وعمرها الأفتراضي
فرق في قوة التحمل في الظروف الصعبة مع اداء عالي في المواتير

يعني انا مش عارف هيا الناس كل حاجه في العربيه الشكل وخامة التابلوه
يا جماعه مشكلة الوضع الحالي في العالم فعلا
والمشكلة الفعليه لليابان خصوصا
ان اليابان بتعمل سعر قليل مقارنة بجودة خاماتها اللي بتقدمها في عربياتها
يعني من الأخر بيبقى صعب على اي ماركة في العالم انها تعمل عربيه بنفس سعر الياباني ونفس جودة الخامات

وده اللي الكوري مش قادر يعمله
الكوري علشان ينافس مع الياباني لازم سعره يكون اقل
وعلشان يكون اقل لازم يعمل خامات اقل كفائة وجودة
وكمان في حاجات مش بتتعمل اصلا زي جلفنة الصاج الداخلي ودي شوفتها بعيني
وانا مره قاعد مع سمكري ومن غير ما اقوله حاجه فكنا بنتكلم على الصدأ والكلام ده
قالي لوحده كده
المشكلة ان الناس مهياش فاهمه حاجه
الكوري بسعر الياباني والناس بتشتري الكوري مع ان الصاج بتاعه مش متجلفن زي الياباني من الداخل
وراح داخل جوه المحل وجابلي حتتين صاج واحده لعربيه كورولا وواحده لعربيه كوري مش فاكر ايه
المهم قالي شوف ده الصاج من الداخل في الكورولا متجلفن حتى تحت بنط الحديد بتاعت العربيه لو فكيت الصاج من بعضه بتلاقيها برضه متجلفن
يعني العربيه حتى لو اتخبطت ودخل ميه في المكان مش هتمسك صدأ
اما في الكوري من الداخل صاج عادي مرشوش بس
يعني لو اتكحت بس ودخل ميه يمسك صدأ عالطول

وده فرق من ضمن الفروق الغير ظاهرة لنا على الأقل
وفيه غيرههم برضه كتير

هيا دي مربط المشكلة فعلا

يعني انا مثلا عندي في السيريون اللي كان كتير من الناس اللي شايفين العربيه غاليه
عندي حروف الفجاوي الخلفية متجلفنة ومتنية كده بطريقة جميلة
بحيث ان ميحصلشي اي نوع من انواع الصدأ لا قدر الله في المنطقة دي
لأنها اكثر عرضه للمياه
شوف بقه اي عربيه كوري
وشوف الفجاوي بتاعتها هتلاقيها بحرف عادي
وبعد فتره لازم تمسك صدأ

+111111111111

[NaderNabil]

يا أبو عبد الله الدنيا إتغيرت دلوقتي...و التكنولوجيا الكورية بقت في تطور ملحوظ و يضاهي أعرق الماركات...اللي خلا الجينيسيس تتفوق علي الليكزس و المرسيدس و البي إم!!! معقولة العربية دي مش هاتكون متجلفنة من جوة مثلاً؟؟

ممكن خبرتك مع الكوري و اللي إنحصرت في النوبيرا هي اللي خلتك تقول كده....بس ده شئ طبيعي خصوصاً ان العربية موديلها قديم و مبني علي سيارة أقدم و أقدم....يعني تكنولوجيا ماتت من زمان...و معاد تصنيعها للدول الفقيرة زي حالتنا...

ده بالنسبة لموضوع كوري و ياباني...

لكن بالنسبة للسيراتو....انا شايف انها أفضل المتاح في السعر ده ...ليه؟

1- موتور قوي و ممتاز و موجود بقاله فترة في السوق و متجرب...
2- إشتراكها في الكثير من قطع الغيار الميكانيكية مع السيراتو القديم و إلانترا...و ده يعني سهولة الحصول علي قطع الغيار و بأسعار معقولة و خارج التوكيل
3-تصميم عصري جداً سواء من الداخل أو الخارج...و مبهر بشدة...من نوع الEye Catcher....وده في رأيي مش موجود في الكورولا مثلاً (بس في الأخر الشكل أذواق)
4- العربية fully loaded...بمعني ان مش متشال منها أي حاجة هما بس كام إيرباج زيادة...لكن فيها برضو 2 إيرباج!
5- توكيل محترم جداً و عن تجربة...

خامات و تصنيع و كده...أكيد أقل من الياباني...و ده يبرر فرق السعر ما بين الإتنين!

بس تعال نحسبها....دلوقتي انت جبت السيراتو هايلاين ب 126000 جنيه....المقابل لها في اللانسر و الكورولا بحوالي 160000 ألف جنيه....يعني الفرق تقريباً 30000 جنيه...ماشي؟

طبيعي ان العمر الإفتراضي للكوري أقل من الياباني...يعني انت هاتغير قطع في السيراتو أسرع من الكورولا....بس في نفس الوقت انت شيلت تمنها من تمن العربية....يعني ال 30000 جنيه فرق دول هايبقى منهم جزء بسيط جداً من اللي هاتدفعه تغيير حاجات زي العفشة والذي منه علي مدار عُمر العربية معاك....

[أبو عبدالله]

يا نادر انا بتكلم على الحال دلوقتي
انا مكنتش متابع العربيات اساسا في التسعينات علشان تفرق معايا الدنيا اتغيرت ولا لأ
انا بتكلم بتجديد وليس بكلام مرسخ قديم

انت ضربت مثال بالجينيسيس مثلا
هيا متفوقتش للدرجة يعني
يعني مش معنى ان جهة معينة اعطتها تقييم عالي
يبقى التقييم الكل للعربيه اعلى فعلا
الكلام ده لو كل الجهات او اغلبها بتعطيها تقييم اعلى من لكزس وبي ام فعلا
وبعدين لو افترضنا جدلا برضه كده
هل انت بتعتبر الكوري اللي هنا نفس تقفيل ونفس خامات عربيه بتنافس اللكزس
انا لا اقول ان الكوري مفيهوش تكنولوجيا والتصنيع بتاعهم قديم
انا بتكلم ان علشان تنافس الياباني سعرها هيعدي عن الياباني وساعتها محدش هيشتريه فعلا
انا لا اشكك في قدرتهم في التصنيع الجيد
ولكن انا بتكلم ان اليابان معروفة بمسألة جودة الخامات وابتكاراتها في ذلك وكل ذلك مع السعر القليل نسبيا مقارنة بباقي الماركات
وهو ده سر نجاح اليابان فعلا ان دائما خامتهم كويسه جدا وبتعطي الغرض منها على اكمل وجه وبسعر منافس جدا

واقل دليل شوف كده زي ما انا قلت في المشاركة السابقة
شوف اي عربيه كوري في السوق بتاعنا وشوف الفجاوي بتاعتها وقولي هتشوف ايه وزياريت يكون بقالها كام سنه كده
وهات عربيه ياباني وشوف الفجاوي بتاعتها وقولي انت شوفت ايه

وبعدين موضوع الجلفنة ده شئ انا شوفته بعيني
وممكن تشوفه عند اي سمكري كويس بيفهم
هتلاقي الكوري مرشوش الرش العادي اللي انت بتشوفه في اي عربيه ولكن لو حكيته هتشوف الصاج بلونه المعروف
ولكن في الياباني لو حكيته هتلاقي الصاج مجلفن

والكلام ده في العربيات بتاعت دلوقتي يعني مش من زمان او قديما

[meemo the beast]

بصراحه اضحكتنى يا رجل بجمله ام فتيس بايظ دى.........مين اللى قالك المعلومه الغريبه دى
على فكره الكورولا 1600 الشكل القديم الكامله كانت ب 145 الف
ودلوقتى الكورولا الشكل الجديد الكامله ب 149 الف
فين بقا القفزات اللى بتتكلم عليها
اعتقد حضرتك بتتكلم بمنطق ان الكورى بقا يقدر يتفوق على اليابانى وده مش موضوعنا
احنا موضوعنا اهل الكورى يقدر يحاول ينافس حتى ولو من بعيد مع اليابانى وليس التفوق
تحياتى

الله ينور عليك يا أحمد و بعدين مع احترامي لآراء الجميع لكن بالطريقة دي احنا اللي بنطمع التجار فينا و مش سعرها بس اللي مبالغ فيه دي أسعار السيارات كلها في مصر أعلى من معدلاتها في كل الدول المجاورة

[SAMEH_FOUAD]

بقولوكوا اية ياجماعة انتوا بتتكلموا عن السيراتو كأنكوا ركبتوها وجربتوها انا اصلا مش بحب الكورى نهائى انتوا عمالين تقولوا فى تقدم مستمر وانا مش شايف اى تقدم خالص عربيات مابتستحملش تقفيل وحش جدا سيارات غير معمرة ومعلش لو هانقول على كلامكوا ان الكوريين بيتقدموا طيب واليابانيين واقفين مكانهم يعنى خلاص اكتفوا بكدة اكيد لأ طبعا زى مادول بيطوروا دول كمان بيطوروا دة غير انكوا فية حاجة مش واخدين بالكوا منها
لما الصينين حبوا يصنعوا عربيات عملوا سيارات شبة اليابانى ومواتيرهم كلها من اليابان عمركوا شوفتوا عربية صينى نازلة بماتور كورى مع ان كان هيبقى اوفرلهم بكتير ماتور يابانى من كورى فرق كبير فى الصيانة وقطع الغيار
تانى حاجة :الكورى قايم اصلا على اليابانى فى الشكل والتابلوة والكراسى وكل حاجة
معلش النيو سيراتو تابلوة 95% شبة السيتى الجديدة صح ولا لأ ,ثانيا فية عيب جامد قوى صغر الكنبة الخلفية بطريقة ملحوظة يعنى انا ركبت الصراحة ضيقة قوى قوى والعربية تحس ان شكلها مش متناسق فيه احاجة غلط وبردة الاخ اللى بيقول ان فوانيس الهوندا سيفيك مش عجباة اصلا فوانيس السيراتو الخلفية شبة الهوندا سيفيك اوى
عامة ياجماعة انا من رائى ان اخر اى عربية كورى صغير الحجم مايعديش 90 الف جنية بعد كدة حرام
وبعدين انا عندى سؤال جاوبونى علية؟
لو عندكوا هيونداى سوناتا سعرها 160 الف وقامدك بنفس السعر جيتا و هوندا سيفيك واكتافيا وتويوتا كورولا وجولف.هاتفكر تشتريها ولا اية ؟ياريت حد يجاوبنى

[Ahmed Anwer]

بخصوص حكاية الجلفنة ،،

أنا كنت بسأل مهندس سيارات عن النقطة دي ،،

فقلي اللي بيقول الكلام ده لسه في عصر البولونيز و ال 128

اللي البارومة بتسرح فيهم لوحدها

دلوقتي كل العربيات الحديثة صاجها معالج ،،

عموما مش هيا دي المشكلة ،،

اهه ، نادر ضرب مثل بالكورولا الجديدة ،، الفول اوبشنز ب 160الف ،،

رغم انها المفروض يتكون ارخص يا علي الأقل بنفس السعر لانها جنوب افريقي و لست ياباني مثل الجيل السابق

يعني برده حتي الآن محافظين علي فرق سعر مناسب جدا لسيارتين في نفس الفئة ،،

ده بفرض ان فيه فرق فضائي في الجودة ،، ففيه برده فضائي في السعر

و عموما عشان نرجع لوجهة نظر صاحب الموضوع ،،

دلوقتي ليه شايفينها مبالغ في سعرها

أولا ،، الشكل الجديد بكام و الشكل القديم كان بكام ؟؟

اظن زاد سعرها بالزيادة المعقولة و كمان مقابل مواصفات مكنتشي موجودة في الشكل القديم

ثانيا ، المتاح في نفس السعر ،،

و مفيش في نفس السعر منافس جبار اللي نقدر نقول عليه طب ما يبقي دي احسن ،،

يبقي علي ايه نحكم ان سعرها مبالغ فيه ؟؟

كون ان احنا العربيات في مصر غالية ،، فبالتالي احنا بنقارن الغالي بالاغلي منه ،،، فده ميخلهاش مبالغ في سعرها

بخصوص الياريس برده اللي بيقولوا هتبقي معمرة لا ،، مش هتبقي معمرة زي مامتخيلين ( بفرض ان العربية المفروض اعمل حسابي هورثها للاحفاد ) باختصار لانها عربية انتري ليفل ،، و اول عربية في قائمة تويوتا الطويلة ،، مش عيب فيها بس العربيات الانتري ليفل مبتبقاش معموله عشان الهلك و الفخامة بتكون معموله عشان استخدام المدينة البسيط

[أبو عبدالله]

منور يا استاذ احمد
وانا مش هتكلم كتير لأني قلت كل اللي عندي
ولكن انا هرد بس على موضوع جلفنة الصاج دي
انا شوفتها بعيني في عربيات جديده وشوفت الصدأ بعيني في فجاوي العربيات الجديده
يعني مع احترامي لكلام اللي حضرتك سألته كلامه مش مظبوط
وده فعلا اللي بيحصل
وبعدين لو كان في معالجة مكنش كل العربيات اللي بشوفها كوري بتمسك صدا في الحواف بتاعت الصاج بتاعها كده
وابقى شوفها بنفسك في العربيات اللي بقالها اكتر من سنه او سنتين وانت هتعرف

[badry]

الشكل........ الشكل............ الشكل..............

إيديني أي عربية مفهاش أمان أو كماليات.......أو فيها كماليات بسعر خيالي.........أو صيني و مش معادية أي كراش تست..........بس أهم حاجة الشكل.............

هيا دي فلسفة المستهلك المصري الناصح قوي......

[som3aa]

بقولوكوا اية ياجماعة انتوا بتتكلموا عن السيراتو كأنكوا ركبتوها وجربتوها انا اصلا مش بحب الكورى نهائى انتوا عمالين تقولوا فى تقدم مستمر وانا مش شايف اى تقدم خالص عربيات مابتستحملش تقفيل وحش جدا سيارات غير معمرة ومعلش لو هانقول على كلامكوا ان الكوريين بيتقدموا طيب واليابانيين واقفين مكانهم يعنى خلاص اكتفوا بكدة اكيد لأ طبعا زى مادول بيطوروا دول كمان بيطوروا دة غير انكوا فية حاجة مش واخدين بالكوا منها
لما الصينين حبوا يصنعوا عربيات عملوا سيارات شبة اليابانى ومواتيرهم كلها من اليابان عمركوا شوفتوا عربية صينى نازلة بماتور كورى مع ان كان هيبقى اوفرلهم بكتير ماتور يابانى من كورى فرق كبير فى الصيانة وقطع الغيار
تانى حاجة :الكورى قايم اصلا على اليابانى فى الشكل والتابلوة والكراسى وكل حاجة
معلش النيو سيراتو تابلوة 95% شبة السيتى الجديدة صح ولا لأ ,ثانيا فية عيب جامد قوى صغر الكنبة الخلفية بطريقة ملحوظة يعنى انا ركبت الصراحة ضيقة قوى قوى والعربية تحس ان شكلها مش متناسق فيه احاجة غلط وبردة الاخ اللى بيقول ان فوانيس الهوندا سيفيك مش عجباة اصلا فوانيس السيراتو الخلفية شبة الهوندا سيفيك اوى
عامة ياجماعة انا من رائى ان اخر اى عربية كورى صغير الحجم مايعديش 90 الف جنية بعد كدة حرام
وبعدين انا عندى سؤال جاوبونى علية؟
لو عندكوا هيونداى سوناتا سعرها 160 الف وقامدك بنفس السعر جيتا و هوندا سيفيك واكتافيا وتويوتا كورولا وجولف.هاتفكر تشتريها ولا اية ؟ياريت حد يجاوبنى

اولا ردا على سؤالك بالنسبة لو قدامك سيفيك و جيتا تشترى سوناتا , الاجابة انا عملت كدا فعلا و اشتريت السوناتا ب 180 من سنتين و كان قدامى كل العربيات دى + الاوكتافيا

ثانيا حضرتك ايه مجال خبرتك مع الكورى و اليابانى و على اساس كدا قلت الكلام دا؟
السبب ان الناس هنا فى مصر معظم العربيات الكورى اللى سمعوا عنها او جربوها تقفيل مصرى لان معظم العربيات الكورى اللى فى مصر تقفيل مصرى!!!!!!!!!!!!
اساسا الناس بتقارن اللانسر البوما بالالنترا !! حد فكر يقارن اللانسر الجديدة (الشارك) باللنترا؟؟ لا طبعا!! مع انها بنفس التمن بالظبط فى امريكا يمكن اللانسر ارخص حاجة بسيطة كمان!!
طيب غبور ازاى بيبيعها ب 98-110؟؟ لانه بيشيل منها تقريبا كل حاجة , لانه لو نزل واحدة كاملة ب 140 الف مثلا زى اللى بتنزل فى امريكا الناس هتقول غبور اتجنن و هيقولوا حرامى و مش بعيد يقيموا عليه الحد!!!
الناس هنا فى مصر مش متقبلة ان عربية كورى توصل لسعر عربية يابانى و خلاص عشلان صعب تغير فكر حد مهما العربيات اتطورت و خدت جوايز بره و غليت بره و كل حاجة و حتى لو حطوا فيها خامات زى اليابانى , طيب لو سمحت عندك النت دور كدا على سعر الالنترا فى امريكا و قارنها بسعر الكورولا و الشارك لو لقيتها ارخص ابقى قول عليا بهذى (هى ارخص من الكورولا فرق بسيط حوالى 500 دولار بس على ما اذكر) , طيب و السوناتا اللى بتسال عنها قارنها بالاكورد و الكامرى , لو ملقيتهاش بنفس تمن الكامرى و ارخص هى و الكامرى من الاكورد بحاجة بسيطة قول على بهذى برده!!
يعنى مثال ابو عبد الله فى النوبيرا زى الدهان وحش دا سببه ان العربية مجمعة فى مصانع ابو الفتوح و مدهونة هناك , خاماتها رخيصة؟ ايوه فعلا لان سعرها رخيص و دا اللى بيعملوا الكوريين , بيستخدموا خامات جيدة جدا ارخص قليلا من خامات اليابانى و اقل سنة فى الجودة فى مقابل السعر الارخص و الكلام دا فى بعض العربيات بس مش كلها.

طيب حاجة اخيرة بص على ال 3 مركات اللى مبيعاتهم مقلتش غير حاجة بسيطة اوى فى الازمة المالية فى امريكا ( 2 منهم كورى و سوبارو اليابانى)
فى شهر يناير 2009 زادت مبيعات هيونداى 14.3 % عن يناير 2008 بسبب مبيعات زيادة فى السوناتا و السانتافيه و كيا زادت 3% و سوبارو 8% و بقية الشركات قلت بتاع 30-40% .
على فكرة شركة كيا مملوكة بنسبة 100% لهيونداى
معلومة تانية هيونداى اعلنت شكل جديد كليا من السوناتا نازل 2009 فاكد دا اثر جامد جدا فى مبيعات السوناتا
فى شهر فبراير 2009 هيونداى قلت 1.5% فقط و كيا زادت 0.4% و سوبارو زادت 1.4% بسبب الالنترا و عربيات تانية suv
فى شهر مارس هيونداى قلت 4.8% و كيا قلت 0.6% و سوبارو قلت -2.6%

بقية المركات زى هوندا مثلا قلت حوالى 30-40% فى التلت شهور دول و تيوتا قلت نفس النسبة.

http://www.autoblog.com/2009/02/03/by-the-numbers-january-2009-not-so-happy-new-year-edition/

http://www.autoblog.com/2009/03/03/by-the-numbers-february-2009-wish-it-were-a-leap-year-edition/

http://www.autoblog.com/2009/04/01/by-the-numbers-march-2009-aint-no-joke-edition/

اعتقد مينفعش نقول الشركات الكورى متقدمتش بمجرد بس علشان العربيات اللى موجودة فى مصر كورى يا اما مجمعة محليا , يا اما تكنولوجيا قديمة و كل حاجة قديمة .

بالنسبة للشكل المسروق و الكلام دا هحطلك صور عربيات كتير يابانى و قولى مسروقين و لا لأ , و بالمناسبة صحيح انت عارف مين اللى صمم الكيا السيراتو الجديدة؟؟
Peter Schreyer

http://www.kia-world.net/index.php/2008/08/22/video-forte-design-study-with-kias-chief-designer-peter-schreyer/

معلومات عامة اللى صمم الكيا دى هو peter و peter دا كان بيشتغل فى volkswagen و هو اللى صمم الEOS و عربيات من اودى كمان زى ال audi tt
!!!!!!!
دى العربيات اللى شارك فى تصميمها بحسب الكلام اللى هنا

http://www.conceptcar.co.uk/news/design/cardesignnews71.php

PETER SCHREYER DESIGN TRACK RECORD

Volkswagen Design / Projects:

Concept Cars:

* Concept 1 (New Beetle)
* Concept C (Eos)
* Concept R (Roadster)
* Concept T (Buggy)
* GX 3 (Three Wheeler)
* Microbus
* Ragster

Passenger Cars:

* Golf IV & Variant
* Jetta
* Passat B 5 & Variant
* Lupo & Seat Arosa
* New Beetle
* Golf V & Golf Plus
* Golf GTI & Golf R32
* Jetta
* Passat B 6 & Variant
* Eos
* Compact SUV

Commercial Vehicles:

* LT 2
* LT 3
* Constellation (24 ton truck)

Racing:

* Race Touareg


Audi Design / Projects:

Concept Cars:

* Quattro Spider
* Audi TT & AUDI TTS
* AL 2 & AL 2 open end
* Steppenwolf
* Allroad Quattro
* Avantissimo
* Rosemeyer

Passenger Cars:

* Audi A2
* Audi A3 & A3 Sportsback
* Audi A4 & A4 Avant + Audi Cabrio
* Audi A6 & A6 Avant + Allroad
* Audi A8
* Audi TT & Audi TT Roadster

Racing:

* R8 racing car LeMans

Lamborghini Design / Projects:

* Murcielago
* Gallardo

http://www.autoblog.com/2006/07/24/kia-nabs-volkswagen-s-advanced-design-boss/

مستنى ردك

[myr999]

يا اخوانا المشكلة ان احنا فى مصر امخاخ زلط وخلاص يقولو لك بيجو 79 gr طب لو 80 او 88 الاحدث يقول لك لا 79 تويوتا 92 طب لو 95 الاحدث لا لا دى زبالة وال 99 العيون اوعى تاخدها ولو ببلاش ياراجل دة قدامى 79 gr متباعة ب 35 الف اصلها فورانساوى طب ياعم دى البارومة كالتها ومافيش اى كماليات وشكلها اصبح غبى وحماى عندة 131 قلت لة بتعمل معاك بنزين اد اية قال 150 فى الصفيحة طب هى لية دايما بتجيب بارومة فى الابواب والشنطة قال لى كل ال131 كدة فقلت لة تجيب كام قال 35 الف قلت لة كويس هات اى حاجة حديثة حتوفر بنزين وزيت ومتور ناعم وتكييف وفروق كبيرة جدا يقولى لا طبعا اسيب الزلطة دى واجيب يابانى ولا كورى ورق اما فى السعودية يقولك على الكامرى الى هيا بينها وبين الكورولا بلاد يقولك دى للتاكسى ماركبش غير الامريكى خلاصة ماسبق هو الفرق بين عقلية متحجرة غير مرنة عجبتة كذا يبقى كذا وكل الى بعد كدة اى كلام وكل واحد يحط رجل على رجل ويسحب نفس من الشيششة وينفث ويتحدث كالعالم ببواطن الامور وعالم العلماء ونابغة النوابغويقولك العربية دى كورى زبالة ودى فورد وتوكلها معفن ودى لانسر بعد ال140 حترقص بيك ودى ميجان تكنولوجيا حتضيعك وتدف دم قلبك عليها ودى اوبل قطع غيارها نار وبعد موديل مش عارف اية متجبش عشان الجزاء الخاص بالكمبيوتر بيتحرق وغالى ومش حاتلاقية والكورولا جنوب افريقى والفتيس الجديد مشاكة فى التوكيل مش عارفين يعملو حاجة الخ الخ انا من رائ الى عاجبة عربية يجبها وخلاص سلام

[M.Mekawy]

والعربية تحس ان شكلها مش متناسق فيه احاجة غلط وبردة الاخ اللى بيقول ان فوانيس الهوندا سيفيك مش عجباة اصلا فوانيس السيراتو الخلفية شبة الهوندا سيفيك اوى

الجملة دى تدل ان حضرتك حتى لم ترى صور العربية على النت :) حتى تبدأ فى اصدار أحكام.
هو للامانة القصوى , المفترض ان سعر العربية يقل حوالى 3-4 الاف جنيه فى كل فئة حتى تمسح الالنترا من على الوجود , أما بالنسبة الجدل السفسطائى المصرى الدائم حول اليابانى ام الكورى , فهو ليس محور هذا الموضوع , الراجل سأل سؤال واضح مالوش اى علاقة باليابانى ام الكورى , ولا ايه ؟

[SAMEH_FOUAD]

حضرتك ايه مجال خبرتك مع الكورى و اليابانى و على اساس كدا قلت الكلام دا؟

اكيد طبعا تجربة مع الكورى من اول الافيو ونوبيرا وكيا شوما وفيرنا ولانوس
وكلهم كانوا زيرو ومعمروش حتى سنة والافيو دية كانت مع صاحبى مش معايا هما بالظبط 3000 كيلو والعربية بقت بتخرف ولا ثبات ولا اى حاجة وسالنا كمان شباب معها افيو عشان بس نشوف العيوب دية موجودة عندنا احنا بس ولا اية طلعت موجودة فى كل العربيات ومن ساعتها صاحبى حلف مايجيب كوررررررررررررررررررررررى ابدا

[myr999]

اية الكلام الغريب دة انا معايا سيفيا عملة معايا 200الف كم مو99 لا افتح الكبوت الا عشان السيور كل 80 الف كم +الزيت + البوجيهات والصيف الى فات كنت مسافر على سرعة 180 كم وكنا 4 فى العربية ومشغل التكييف والثبات كويس جدا وان شاء الله لما اغير لازم اجيب كيا قليلة الاعطال قطع غيار رخيصة السيور ب 130 تيل فرامل 50 جنية استهلاك معقول للبنزين اعتمادية جدا وكنت راكب اوروبى قبل كدة زيرو فيلشيا والله ماركبشى الاوكتافيا بعد معانتى مع سكودا

[SAMEH_FOUAD]

ربنا يباركلك فيها السيفيا حلوة مش وحشة وانا عارف ان الكورى فى التسعينات كان اشد من دلوقتى ودة اللى انتوا مش مقتنعين بية ان افضل سيارات تركبها والله موديلات التسعينات قوة وتحمل وقلة اعطال وثبات ومواتير جامدة وربنا يباركلك فيها بس فعلا الشوما وحشة اوى

[samcar]

اه بصراحه تستحق وتستحق اوى وهاقولك ليه
اولا الشكل التحفه اللى فى وجهة نظرى احلى من السيفيك ( مبحبش شكلها من ورا ) واحلى من الكورولا والمازدا 3 والشارك ( اذواق )
ثانيا الكماليات فيها كماليات عشان اجيبها فى اليابانى هدفع 188 فى السييفك و 160 فى الكورولا و 155 فى الشارك
ثالثا الموتور القوى اللى بنفس قوة السيفيك تقريبا
رابعا ضمان كيا 5 سنين او 100 الف
كل المميزات دى حضرتك شايف انها متقدرش تنافس ؟
وبتسأل هل ممكن تحاول تنافس ولو من بعيد ؟
بيتهيألى تقدر وتقدر وممكن تعدى كمان
بلاش تعصب لليابانى وخلاص لان مش كل اليابانى زى بعضه ولا كل الكورى زى بعضه
الكورى اتقدم كتير وبيتقدم واحنا عايشين على نغمة اليابانى والكورى
ابسط مثال شوفوا هيونداى جينسيس عملت ايه فى العالم كله لما نزلت واتفوقت على كام عربيه المانى مش يابانى
وتحياتى ليك

يا راجل موتور سيراتو ايه اللى ينافس السيفيك ؟؟؟؟؟؟؟؟؟؟؟
بامانه انت ركبي السيفيك ؟؟؟؟؟