خطوات وكيفيه تحويل الفيرنا الهاف اوبشن الى الفول اوبشن خطوه بخطوه....

[أشرف فتحى]

السلام عليكم ورحمه الله......

أصدقائى الاعزاء.....

التالى هو موضوع عن كيفيه تحويل السياره الهيونداى الفيرنا قليله الكماليات (الهاف اوبشن) إلى كامله الكماليات وفى كلتا الحالتين فإن الكماليات لا يمكن حصرها ممكن إضافتها ولكن المقارنه فيما تنزل به العربيه اساسا فى مصر......

أولا.... كماليات الهاف اوبشن......

تكييف...باور ....كاسيت شرائط......

ثانيا كماليات الفول اوبشن.....

تكييف ..باور...كاسيت سى دى....سنتر ...ستوب فرامل خلفى..ساعه فى التابلوه...مخدعين راأس خلفيين...مسند زراع للسائق....عداد rbmفى لوحه العدادات.......زجاج كهرباء أمامى وخلفى.....فوانيس شبوره

ثالثا كماليات إضافيه يمكن تزويدها.....

إنزار...وحدات رفع.....مرايات كهربائيه....جنوط اسبور....إضاءه زينون للفوانيس....دى فى دى................الخ



الحلقه الاولى.....

تركيب زجاج كهربائى للاربع ابواب....


مطلوب شراء.....

عدد 4 ماكينه زجاج كهربائى إستيراد

عدد طقم فرش ابواب للأربع ابواب به زراير التحكم فى الرفع والخفض والمجموعه الرئيسيه بباب السائق وبها وحده التحكم فى الاربع ابواب واللوك العمومى بحيث يصبح التحكم فقط من خلال السائق فى رفع او خفض الزجاج ...كذلك المقابض النيكل بديلا عن المقابض البلاستيكيه العاديه...........


الضفائر الكهربيه الخاصه بتوصيل مكن الزجاج وكافه الملحقات بالضفيره الرئيسيه للسياره...


ويراعى فى حاله الرغبه فى تركيب مرايات كهربائيه التالى......

مراجعه الضفيره والتيقن من وجود فيش المرايات بها وفى كلا الجانبين.......

مراجعه الفرش الخاص بباب سائق السياره والتأكد من وجود وحده تحكم فى المرايات الكهربائيه .......وفى حاله عدم وجود زرار التحكم يتم التفاوض مع البائع لجلب هذا الزر...لانه غير متوفر بصفه مستقله....وغالبا ما تتواجد الوحده مكونه من اربع زراير وزرار السنتر للزجاج ويكون مكان هذا الزر طبه سوداء....

يراعى التالى عند الشراء....

مراجعه الفرش من حيث تطابق الشكل واللون والنقشه .....

التأكد من حاله الفرش بالنظر وعدم وجود تقرحات او قطوع او خرابيش بالفرش تفسد المنظر العام للفرش والسياره....

الفصاااااااااااااااااااااااااااااااااااااااااااااا اااااال........بل والتناكه فى الشراء.........(انت بتشترى شراء غناوه وبتشترى حاجه تعتبر كماليات لمزاجك الشخصى....وصدقنى البايع برضو هيبقى كسبان منك مهما حلف او قالك)


بالنسبه للمكن.....

راجع البكر الابيض (التيفلون وتأكد من عدم وجود شقوق او كسور بالبكره .....

راجع حاله الوير نفسه وخلوه من اى قطع او تشعير او عقد.....

قم بالمرور على الكهربائى او الشخص اللى هتركب عنده المكن ليفحصهم لك مره اخرى والتجربه.....

لا تشترى سوى المكن الاصلى الخاص بالسياره وتأكد من ذلك بنفسك.....بلاش افتكاسات الصنايعيه...ويقولك هات مكن التويوتا وبتاع.......هتتعب قلبك على الفاضى.....هيا ..هيا....

[أشرف فتحى]

اماكن شراء المكن والفرش....

اكتر مكان تلاقى فيه الاستيراد بالنسبه للفيرنا هو الحرفيين......

تلف عليهم كلهم تلم اسعار وتتفرج على الحاله.....

أقل سعر هتسمعه هو 1000 جنيه ولغايه 1800 جنيه .....

طبعا الاسعار دى من غير فصال وانت وشطارتك...ولو ملكش فى الفصال زى حالاتى خد معاك حد صاحبك يقوم بالمهمه دى بدالك وخليك انت فى الفنيات....

البيعه بتبقى عباره عن اربعه فرش بالاكر النيكل والزراير واربعه مكنه زجاج كهربا.بضفايرهم....ومتنساش تاخد الطبب بتاعه المقابض اللى بتبقى بتقفل على المسامير فى اليد بتاعه الباب....وشويه مسامير للفرش......

وكان الكهربائى عشان يعمل نفسه ابو العريف قالى حاجه غريبه شويه....

قللى انه بينزل يتفق على اربع ابواب فيما عدا الصاج...

يعنى الفرش بالمكن بالاكر داخليه وخارجيه بالكوالين الكهربا والسنتر ولو الفرش مزود بلمبه ومرايات والسماعات وكلو...ب 1000 جنيه.....طبعا الكلام أونطه لكن مفيش مشكله اننا نجرب....وانا لما سألت على الابواب كاملين بالصاج بتاعهم بكل حاجه على اعتبار انى افك الابواب دى واركب دى لاقيت ان الاربع ابواب بدون فصال ب 3000 جنيه ...يعنى ممكن توصل لالفين مثلا....واهى تبقى اريح وارخص لكن هتحتاج تترش لو اللون مختلف


ملحوظه تانيه........بعد ما توصل مع البياع لأخر سعر هيقولك السعر ده وأخد الفرش والمكن بتاعك
........طبعا الرد معروف...

تقوله بإبتسامه عريضه....تيييييييييييييييييييييت.......




نرجع لموضوعنا....


هتروح على الكهربائى او الفنى اللى هيركبلك الليله دى..وتكون نظفت الفرش على قد ما تقدر واعمل حساب انك هتنظفه تانى بعد ما تخلص......

هيقولك اول حاجه....

- ياباشا دى كده عايزه ضفيره.....

- أمال انا جايبلك ايه؟

- مهو دول الضفاير اللى جوه البيبان يعنى ضفاير الفيش مش الضفيره الرئيسيه.....

- يعنى ايه المطلوب؟لخص...

-هنقسم ضفيره للاربع بيبان ....وعاوزيين سلك وشريط لحام وافايز ومكرونه وفيوزات....

- طب ما تجيبهم...انا هحاسبك عليهم ....بس السلك هاتهولى حجازى 2 مل عشان ميسيحش.....


هتعوز التالى....

20 متر سلك حجازى 2 مل ب 40 جنيه

6 بكره شريط لحام ب 6 جنيه...

فيوزات وترامل ومكرونه ب 4 جنيه

دى كده الخامات ب 50 جنيه.....

الموضوع سهل جدا فى عمله كفك وتركيب......

بيفك الفرش

وصواميل مكنه الزجاج المانيوال بطبه 10 او 8

والزجاج بيبقى على حماله تيفلون بيضا بمسمارين براس كبيره بيتفكوا وبيتفك لوح الزجاج مؤقتا....

بيفك الشاسيه اللى عليه الحماله التيفلون وبيطلع بالوير والمكنه المانيوال من الباب

بيركب الشاسيه والمكنه الكهربا ولوح الزجاج ويربط المسامير والصواميل....

بيقسم الضفيره بعد ما يفك طبعا فرش العتب والفيبر وكده ويعديهم من تحتيه...

ولو كنت مش مركب سنتر لسه وهتركبه فبيقسم ضفيره السنتر فى نفس الوقت وبيلف الجميع بشريط لحام وافايز صغيره كده ويمشيهم تحت الفيبر...والى داخل الابواب......


يجى بعد كده يوصل الفيش ويركب القرب بتاعه السنتر لو لسه هيركب....ويقفل الفرش ويوصل الكتاوت والفيوزات بتاعه السنتر والزجاج ويجرب على كده......


طبعا نلاحظ سرعه نزول وطلوع الزجاج...وصوت الاحتكاك إن وجد ......واهتزاز الباب إن وجد... ونجرب كل المفاتيح.....

ناخد وقتنا ومنستعجلش.......

نراجع على مسامير الفرش لان الصنايعيه بيستسهلوا وميركبوش كل المسامير.....

نراجع على الفيبر متركب مكانه كويس ولا متركب غلط.........ولو مش متركب كويس خليك وراه لغايه ما يعدله......

نتأكد إن مفيش حاجه متعلقه تحت الدركسيون ولا مدلدله ولا من غير افيز عشان لو فكت هندوخ وراها ولو عندك اى ملحوظات اطلبها......متتكسفش...

وسيبك من حلفان الصنايعى انه تعب وطلع عين (.......)فيها وانه مفطرش من الصبح وا اتغداش وان مراته طرداه من البيت ...بسبب عربيتك........

ولو قالك سيب العربيه وتعالى استلمها بليل.....نصيحه لوجه الله..خليك جنب عربيتك ولو حتى لغايه الصبح..أهى ليله وتعدى...بس هتبقى ضامن عربيتك حصل فيها ايه........

والف مبروك على الزجاج الكهرباء

[ahmed_su]

موضوع هايل
مبروك يا اشرف بك

[أشرف فتحى]

موضوع هايل
مبروك يا اشرف بك

الله يبارك فى حضرتك يا احمد باشا......

يشرفنى مرورك.....ويسعدنى مشاركتك.......

[أشرف فتحى]

نقف بقى شويه عشان لو فى اى استفسارات ....تحت أمركم ........

وأسف انى مصورتش الخطوات دى ..........

مكنتش حاطط فى بالى انى هعمل بيها موضوع ..لكن هحاول افيد إخوانى من تجربتى المتواضعه

[mr_sameh]

بجد ممتاز

[mohamed_mohsen]

شرح أكثر من رائع
ألف مبروك يا أشرف باشا
بس ممكن أعرف وقفوا علي حضرتك بكام
و الصنايعي هياخد كام؟

[أشرف فتحى]

شرح أكثر من رائع
ألف مبروك يا أشرف باشا
بس ممكن أعرف وقفوا علي حضرتك بكام
و الصنايعي هياخد كام؟

الله يبارك فيك يا ابو حميد.......

معلش انت عايز سعر ايه بالظبط؟

بالنسبه للفرش والمكن والضفاير ممكن تجيبهم فى حدود 1000 والتركيب والخامات حوالى 300 جنيه إن شاء الله .........

ويا محمد باشا لو حبيت ننزل سوا نشترى الحاجات دى...هوفر عليك اللف على المحلات بس الغدا على حسابك.......

[أشرف فتحى]

فى حاجه كمان يا شباب مقلناهاش فى الفروق ما بين الهاف اوبشن والفول اوبشن....

الاريال الكهرباء...وده لسه مركبتوش بس اعرف انه بيبقى فى حدود 120 جنيه ...

وحاجه تانيه كمان هى عدم إمكانيه فتح الشنطه من الداخل ودى حلها تحويل فتح الشنطه الى كهرباء وكمان ممكن نزود فتحها عن طريق الريموت....

ودى هتبقى فى حلقه الانذار والسنتر...إنتظرونى قريبا......

[mohamed_mohsen]

إن شاء الله لو نازل هكلم حضرتك ضروري ننزل سوا

[SAMEHNOSHI]

موضوع اكثر من رائع
متشكر على المعلومات القيمة و متابع البقية باهتمام

[أبو صلاح]

طول عمرك برنس يا برنس

[أشرف فتحى]

بجد ممتاز

ربنا يخليك.....

موضوع اكثر من رائع :ta_clap[1]:
متشكر على المعلومات القيمة و متابع البقية باهتمام

أشكرك على ذوقك ....

الله ينور

عليك يا جميل.....

طول عمرك برنس يا برنس

حبيب قلبى يا ابو حميد....منور الموضوع........

[أشرف فتحى]

ترررررررررررررررررن....ترررررررررررن....

خلص وقت الاسئله .....

نبتدى الحلقه التانيه........

تعديل عداد الار بى ام........

المطلوب.....

عداد استيراد من الحرفيين ويكون ديجيتال مش انالوج...وفيه ار بى ام وخالى من الخرابيش وبضمان التجربه...........

يعمل كام؟

فى حدود 200 جنيه أو أقل ...مش أكتر وأول ما هيتكلم هيقولك 250 جنيه......

نخلى بالنا ان العدادات انواع...... فى نوع بيبقى انالوج ببكر زى الفيفا او اللانوس وده ميركبش عندنا ...

والنوع التانى ديجيتال وشكله تحفه الاطار الخارجى قراءه السرعه بالميل والداخلى ما يعادله بالكيلو متر....يعنى زى المسطره ما بتبقى بجنبين جنب بالسم والاخر بالبوصه....شيك وجميل وكل حاجه بس فيه مشكله .....

عداد الكيلو متر او عداد الرحلات هيبقى برضو بالميل.....

يعنى ايه المشكله؟

لما تيجى تحسب انت مشيت قد ايه على الزيت ده...أو ميعاد تغيير فلتر الهواء او حتى سير الكاتينه...لازم تجيب اله حاسبه وتحسب دول يعملوا كام كيلو........وانا مش بحب اللخبطه ولا بحب الاله الحاسبه......

النوع الاخير هو الديجيتال اللى السرعه فيه بتكون بالكيلو متر عادى....

طبعا مفهوم انه لو كان مؤشر العداد بيتحرك أو مش على الزيرو أو فى صوت شخلله فى العداد بلاش منه....وراجع على اللمبات اللى راكبه ...متكونش ناقصه ولا حوالين الشاشه البيضا لون اسود او تفحييم حريق لمبه او اى سى او وجود ماس فى اى مكان فى البورده.....

تجيب مفك قصير براس صليبه.....

صحيح...منا نسيت أولك انك أنت اللى هتركبها على طول من غير كهربائى.....ولا اى خامات ...كل الحكايه مفك صليبه قصير....

أول حاجه هتلاقى الوش الاسود اللى ورا الدركسيون على طول متثبت بمسمارين لفوق فكهم واخلع الوش على مهلك عشان فى زى سنين بيباتو فى الفيبر بتاع التابلوه ...سايسهم عشان ميتكسروش....

بعد ما خلعت الوش هتلاقى العداد قدامك بيقولك فكنى.....

هتفك اربع مسامير فى الاربع اركان بتوع العداد.....

كده يبقى العداد حر الحركه......

تخرجه بره بالراحه وتبص وراه....

هتلاقى العداد مرتبط بفيشتين...هما يبانوفيشه واحده لكن هما فيشتين....
جمد قلبك ......فكهم ....

هات العداد الاستيراد وكب الفيشتين واعكس الخطوات السابقه......

ممكن تنظف العداد عادى بفوطه نظيفه ولو عايز شكله يبقى بيبرق كأنه جديد...هات حته بوليش كريم صغيره ولمع وش العداد ..(الباغه)

طبعا بعد التركيب هتقول طب انا كده عملت ايه؟

كده حضرتك اول ما تدور هيبقى معاك الار بى ام شغال بدون اى تعديل فى الاسلاك.....

عداد شيك وشكله جميل ....

طب فين المشكله بقى؟؟

أقولك......

العداد مسجل الكيلو متر بتاع العربيه الاستيراد اللى كان راكب فيها.....

يعنى....انت مثلا عامل 40 الف كيلو متر

والعربيع الاستيراد كانت عامله 90 الف كيلو متر

هتبقى قرأه العداد عندك 90 الف مش 40

طب الحل.....

حاجه من اتنين......

الاول وده اللى عملتو....حسبت الفرق بين عدادى وعداد ااستيراد وضيفته على كل ما سيتم تغييره ...بمعنى ..رحلت الكيلو متر بتاع الصيانه بقيمه الفرق

يعنى عدادى كان المفروض هغير زيت على 45 الف....يبقى اغيره على 95 الف على العداد الجديد......

الحل التانى ...مكلف لكن ده حسب إختيارك.....

المفروض فى ناس بتوع عدادات وبيبرمجلك العداد على الرقم اللى انتا عايزه...يعنى تغير العداد من 90 الى 40 الف وتكمل عادى

والحركه دى بيستخدمها النصابين والتجار فى البيع بالغش...لكن الecu متسجل عليها الكيلو متر الحقيقى للعربيه...وعشان كده احسن مكان تكشف فيه على عربيه...بيبقى التوكيل


أى سؤال انا تحت أمركم.......

[Nile_Storm]

لا لا لا موضوع جميل جدا جدا جدا
تسلم ايدك اشرف باشا
بقالي كتري ملقتش مواضيع حلوه
و ياسلام بأه لو عرفت تظبطلنا حبه صور