مركز خدمة عملاء هيونداي ترحب باى شكوى من مالكي هيونداي

[kewies]

يا شباب : كنت سمعت عن طلاء دواسات الفرامل و الدبرياج و البنزين بطبقة من النيكل لحمايتها من التأكل مع استمرار الضغط بالحذاء فهل هذا صحيح و اعملة فين و يتكلف كام و هل هذا يؤثر على الضمان .. للسيارة اتوس 2008 ؟ مع الشكر

[memo1271971]

ما هو نوع البنزين الخاص بالسياره فيرنا 1500موديل 2006
أنا كنت بأستعمل بنزين 92 هل يمكن أغير ل90

[Hyundai-CRM]

أضافة أي طلاء لدواسات الفرامل أو البنزين و كذلك الدبرياج من شأنه أن يعرض للكثير من الأخطار و لاسيما أن الغطاء الكاوتشي للدواسات روعي فيه قدرته علي التماسك مع أحذية السائق و ذلك لتفادي أي أنزلاقات بين قدم السائق و الدواسة ... لذا أنصح بعدم طلاء أو تغيير الغطاء الكاوتشي للدواسات.

تحياتي

[Hyundai-CRM]

حسب كتيب التشغيل المرفق بالسيارة يمكن أستخدام بنزين 90 فما فوق ... و لكن من تجربتنا مع الـ 90 أنه يسبب تسقيف للماكينة أحيانا و ذلك طبعا متعلق بجودة البنزين ... فيفضل أستخدام 92

تحياتي

[kewies]

شكرا على الرد و الاهتمام ..

[memo1271971]

ألف شكر يا باشمهندس على الرد

[volcano12]

هو لو زجاج العربيه حصل فيه سرطان واتفشفش ... ده يرجع تبع الضمان عشان عيوب صناعه و لا ايه؟ أصلى قريت فى الجرايد يا فى التليفزين انه هيبقى تبع الضمان!!

هى العربيه بتاعة ابن عمى.. و الكلام ده كان حصل مع اخته برده (فيرنا) من سنه يا اتنين.. بعد ما جابوها برده

العربيه النترا 2008 ماشيه 2000كم

[Hussein_Ramdan]

لو سمحت انا عرفت ان معظم عربيات الفيرنا فيها مشكلة الحدفة اليمين او الشمال مش فاكر بس المهم انها معظمها بتحدف وفى ناس بتقول المشكلة دى بتتحل بتغير الجنوط وفى ناس بتقول تروح الضمان وترجع بنفس الحدفة يعنى مالهاش حل
اية اخر الاخبار بنبسة لموضوع الحدفة دى

[kemks]

السلام عليكم
بالنسبه للحدفه عندي في العربيه بتاعتي فيها نفس العيب و ظبط زوايا بس بعديها بحاجه بسيطه بتهيقلي اسبوع و رجعت تاني علي طول يا تري دا عيب في العربيه ولا ايه

العربيه اكسنت موديل 2000 استيراد الخارج بس شكلها نفس شكل الفيرنا فيفا بالظبط خارجيا حتي في الفوانيس الاماميه و الخلفيه

وعندي مشكله ثانيه و لمبه check مضائه و الاستهلاك عالي للبنزين حيث داخل البلد تستهلك كل 100 كيلو في حدود 18 لتر بنزين و كان السبب حساس الاكسجين كما قال لي مركز صيانه في بورسعيد حيث لا يوجد لهيونداي مركز صيانه في بورسعيد و العيب كان كالتالي

P0422 Main Catalyst Efficiency Below Threshold Bank 1

وبقول مهندس المركز عليا تغير حساس الاكسجين اللي هوا حساس الشكمان اللي علي الفرن
و دورت علي الحساس في بورسعيد و ملقتش غير مستعمل لكن لا امل و لمبه (check( لازالت مضائه

و عند خلع الحساس القديم قطعت الاسلاك

و كشفت عند مركز اخر كان العيب
P0135 Oxygen Sensor Heater Circuit Malfunction (Bank 1 Sensor 1))

المشكله ان الاسلاك مقطعه فالله اعلم العيب طلع كده عشان الحساس مش متوصل علي كمبوتر العربيه ولا ايه

ارجو الافاده هل الحساس موجود في التوكيل و كم ثمنه و هل العيب كده عيب حساس و لا ايه بالظبط

علما باني غيرت فلتر البنزين و البوجيهات و السيور

شكرا و ارجو الافاده

[Hyundai-CRM]

الزجاج في الضمان شرط أن يكون سبب (الفشفشة) من الزجاج نفسه يعني مش طوبة أو خبطة

تحياتي

[Hyundai-CRM]

عربيتك خليجي ... و فيها Catalyst و ده جزء بيركب بالشكمان علشان التلوث .. هاتها لأي مركز خدمة و نقدر نعرف ايه مشكلتها.
و ممكن تكلمني علي 0126778884 علشان أشرح لك أكتر

تحياتي

[Hyundai-CRM]

الحدفة ممكن تكون من العجل (يعني كاوتش أو جنوط) ... أو التعليق ... أو الطريق نفسه اللي العربية حدفت عليه ... أرجو أبدال الأطارات X و جرب.

تحياتي

[volcano12]

الزجاج في الضمان شرط أن يكون سبب (الفشفشة) من الزجاج نفسه يعني مش طوبة أو خبطة

تحياتي

ألف شكر لرد حضرتك... يا بشمهندس عاطف و ألف شكر لمجهوداتك الرائعه هنا
و انا ان شاء الله حوصلوا الكلام ده ... :)

[zoza]

اول كلامى اشكر المهندس عاطف واحد ممثلى المبيعات فى فرع غبور بعمارات العبور وهو مشكورا الوحيد الصادق والذى يتعامل مع العميل بشافافيه تامه
وابداء الحكايه بعد معاناه شديده واللف على المعارض لشراء سياره فى حدود امكانياتى المتواضعه وبعد ان بيعت سيارتى الممتازه الانوس التى لاتعوض وبالسؤال الكثير استقر بى المطاف غلى العربيه الماتريكس ونظرا لانى جمعت باقى الثمن بصعوبه شديده فكنت حريص على وضها فى مكان امين بعيدا عن غش معارض السيارات وتجار السيارات الذين لايعرفون الحرام حيث انى اكتشفت اثناء بحثى فى المعارض ان اصحاب المعارض يقومون بتغيير كاسيت السياره بكاسيت عادى وكذا الكاوتش بمستعمل .....الخ وكأى واحد خايف على فلوسه اقترح على احد الاقارب ان اتعامل مباشرتا مع الوكيل حتى لايكون هناك اى شك فى اى شيء . وبالفعل ذهبت الى فرع العبور وهناك لقيت ترحيب شديد وسرعه فى إجراءت تسديد قيمة السياره بالكامل حتى يتم التسلم فى مده اقصها 10/5/2008 والحقيقه انى من يوم 1/5 وانا اتصل بيهم ويكون الرد العربيه فى الطريق وحتى يوم الخميس 8/5 كان الرد الله ورسوله اعلم . وعندها تذكرت الموظف الامين الذى كلمته واوضح لى انى لايمكن ان استلم قبل 15يوم على احسن الاحوال .
والغرض من رسالتى هذه انى ليست حزين على انى سوف اتاخر فى الاستلام شهر او اثنين ولاكنى حزين على انى لجات الى الوكيل الوحيد وصاحب التاريخ المديد فى مصر ولاحظت انه لايعرف اى شيء عن السيارات التى يتم تجهيزها عنده حيث انى عندما سألت الموظف عن موقف السياره الحالى قال لى انا مقدرش اعرف سيارتك فين ووصلت فين الا لما يبلغن السواق انه راكبها وجى المعرض . طب والنبى ده كلام ينفع مع وكيل بالحجم ده ؟؟؟؟؟؟؟؟؟ المفروض انى لما احجز سياره يدينى رقم الشاسيه وانا مأتصلش خالص بالمعرض انا ادخل على موقع غبور واكتب الرقم واعرف منه مكان السياره فين ولما اشوف على النت تمام وصول للمعرض اذهب لااستلم فورا .......
فى النهايه انا قمت بتاجير سياره حتى ان يريد الله ان احد يرف سيارتى فين او احد السائقين يتصل بالمعرض يقوله انا معايه عربيه رقم كذا شوفو ده بتاعت مين .....ولاعزاء للمصريين

[Hussein_Ramdan]

حاجة غريبة
ماهو عشان المبيعات كبيرة بيعملو كدة
والله انا شايف ان غبور دة المفروض يكون افضل توكيل فى مصر عشان هو اكثر مبيعا ومكسب عشان طبعا معظم العربيات بتتجمع عندو يعنى المكسب دوبل
مش عارف فى اية ولما تيجى تتكلم معا بتاع المعرض يقولك هو النظام كدة مش انتا لوحدك ويحسسك انك رايح تشترى حاجة بخمسة جينة مش مثلا ب80 الف وان الواحد جمع الفلوس بتعب والشغل وكل دة وتلقى الموظف بيتعامل معاك ببرود