ازاي ترجلش دوسات وفرامل اليد للفيرنا بالصور+الشرح

[aymn6666]

بقولك يا اكسلانس لو سلك دواسة البنزين مسحناه (مش رشينا ) بحتة فيها زيت wd-40 هايخلي دواسة البنزين انعم ؟

الرش علي السوسته هوالي حيخلي السوسته اخف
وممكن ترش داخل الجراب بتاع السلك او المسوره الي ماشي فيها السلك

[BUNSH]

تسلم وجزاك الله كل خير ..

[aymn6666]

فين الاعضاء الي كانوا شيفين ان الموضوع في حجات مش مظبوطه

[pido9]

الللللللللللللللله ينور،،،، انا لسه عامل فرامل اليد اول امبارح و النهاردة هاعمل الباقى إن شاء الله

[MohammedAladel]

طيب هل موضوع رجلشة دواسة الفرامل ينفع مع أى عربية ؟؟؟ لأنى على حد علمى أعرف إن فيه دواسة سلك ودواسةكهرباء ولا دا للبنزين وأنا مش واخد بالى ولا إيه بالظبط

[Kareem Fawzy]

مجهود رائع ما شاء الله على حضرتك

[aymn6666]

الللللللللللللللله ينور،،،، انا لسه عامل فرامل اليد اول امبارح و النهاردة هاعمل الباقى إن شاء الله

الله ينور بس ابقي قلنا علي الاحساس بعد التظبيط

[aymn6666]

طيب هل موضوع رجلشة دواسة الفرامل ينفع مع أى عربية ؟؟؟ لأنى على حد علمى أعرف إن فيه دواسة سلك ودواسةكهرباء ولا دا للبنزين وأنا مش واخد بالى ولا إيه بالظبط

ينفع في اي عربيه ليها صوبع رجلاش
بس حتته ان دواسه الفرامل كهرباء مسمعتش بيها
لاكن فيه دواسه بنزين كهرباء
وانت ممكن تبص علي دواسه عربيه حضرتك وتعرف لو ليها رجلاش بسهوله

[pido9]

عملت فرامل اليد من جوه و فيه فرق كبيييييييييير و بعدين لما حاولت اعمل الدواسات معرفتش ادخلها اصلا هههههههه فكل اللى عملته انى رشيت دبليو دى فورتى على كل المفصلات اللى جوه و خلاص

[pido9]

ولا عرفت اعمل اى حاجة المكان ضيق اوى و مش عارف اوصل للمسامير و الوير بتاع البنزين مترجلش عالاخر و مع ذلك برضه مرخى جامد

[aymn6666]

ولا عرفت اعمل اى حاجة المكان ضيق اوى و مش عارف اوصل للمسامير و الوير بتاع البنزين مترجلش عالاخر و مع ذلك برضه مرخى جامد

طيب فك الفيبره الي تحت الدركسيون دي اربع مسامير فقط

http://www.nilemotors.net/Nile/315788-a.html

حتلقيني في الموضوع ده فاكك الفيبره دي

الوير بتاع البنزين مرخي والرجلاش علي الاخر غريبه
طيب صوره كده

[l0new0lf]

طيب فك الفيبره الي تحت الدركسيون دي اربع مسامير فقط

http://www.nilemotors.net/nile/315788-a.html

حتلقيني في الموضوع ده فاكك الفيبره دي

الوير بتاع البنزين مرخي والرجلاش علي الاخر غريبه
طيب صوره كده

لأ مش غريبه
لو الوصف مضبوط و صح هيكون حاجه من ال3
يا اما الواير حصل فيه تمدد
يا اما جراب الواير مش متثبت من الجمبين (ناحية صامولة الرجلاش فوق الموتور و ناحية الدواسه)
يا اما حد قصر الجراب بتاع الواير

[l0new0lf]

ايوه طبعا فردتين التيل بيتحركو ناحيه الطنبور
لا مفيش تحميل عارف ليه ((لأ فيه تحميل و بص على الرسمه اللى تحت و انت تعرف ليه))
علشان انا بعمل حساب الرجلاش تمام وعلشان ابقي متاكد برجلش العربيه وهي دايره
((انت مصمم على انه فيه علاقه بين دوارة العربيه و بين الرجلاش و على فكره انت الوحيد فى العالم اللى شفته مصمم على الموضوع ده))
عرفت ليه بدور العربيه
علشان يطلع شغل فنادق
لا تعليق

نشرح بالهداوه

منظومة الفرامل فى العربيه بتنقسم لقسمين
قسم بيشتغل هيدروليك (فرامل العجل الامامى و الخلفى)
و قسم بيشتغل ميكانيكى (فرامل اليد عن طريق واير)
طيب الفرامل الامامى و الخلفى كل واحده ليهم التيل الخاص بتاعها
هل فرامل اليد ليها تيل مخصوص؟
الاجابه لأ, لانها مشتركه مع الفرامل الخلفيه فى التيل بتاعها

اذن المفروض انى لما احب اضبط فرامل اليد لازم اعمل حاجتين و بنفس الترتيب:
اولا: اضبط رجلاش التيل اللى فرامل اليد بتشغله ((و ده بيكون من صباع الرجلاش فى العجله نفسها (رقم 2 فى الرسم) و لازم اضبط رجلاش العجلتين
ثانيا: اضبط البوش و الشد اللى بيكون فى الواير نفسه و ده عن طريق صامولة الشد اللى تحت ايد فرامل اليد ( اللى انت شارحه)
و زى ما انت شايف ان عمليتين الضبط (رجلاش التيل و شد الواير) عمليتين ميكانيكيتين مالهومش علاقه بالهيدروليك نهائى
يعنى السيرفو بتاع الفرامل مش هيعمل معايا اى حاجه
يعنى كون انك تشغل العربيه ليس له اى دخل لا من قريب ولا من بعيد بعملية الضبط

دى اقرب رسمه لفرامل الفيرنا اللى عندك و مشتركه معاها فى نفس المكونات الاساسيه و الفرق الوحيد ان بيكون فيه ضابط اوتوماتيك بيضبط رجلاش الفرامل مع استعمال الفرامل و تآكل التيل بيكون موجود بس مش موضح فى الرسمه

طيب ندخل على الرسمه و تعريف الارقام على الرسمه كالآتى:
1- (لون رصاصى) قبقاب تيل الفرامل نفسه
2- (لون بنفسجى) صباع رجلاش التيل
3- سوستة رد التيل العلويه
4- سوستة تثبيت التيل
5-(لون احمر) ذراع فرامل اليد (واصل بين واير فرامل اليد و تيل الفرامل)
6- طرف واير فرامل اليد
7-سوستة رد التيل السفليه
8- (لون بنى): الماده الحاكه فى التيل نفسه


- فى الحاله العاديه انك بتضبط رجلاش الفرامل من رقم (2) و ساعتها هيكون رقم (1) محمل على رقم (2) و رقم (5) يادوب لامس رقم (2) من غير اى تحميل

- لما بتشد فرامل اليد رقم (6) بيسحب رقم (5) و بالتالى رقم (5) بيبدأ يحمل على رقم (2) و بيبعد التيل اليمين (1) عن رقم (2) للخارج
و فى نفس الوقت رقم (2) بيزق فردة التيل الشمال (1) للخارج و يحصل تلامس بين رقم (8) و الطنابير (مش موجوده فى الرسم) و يحصل احتكاك مقاوم لحركه الطنابير و بكده تقف الطنابير عن الدوران

- فى الوضع اللى انت بتعمله :
اولا: لما بتشد واير فرامل اليد (من الصامولة اللى تحت فرامل اليد) بيفضل شادد رقم(5) اللى بيفضل محمل على رقم (2) عشان يخرج رقم (1) و يقربه من الطنابير و فى نفس الوقت بيعمل شد فى رقم (3) و رقم (7) طول الوقت لان دول شغلتهم انهم يبعدوا التيل عن الطنابير
يعنى واير فرامل اليد محمل طول الوقت ((يعنى عكس كلامك اللى فوق بالضبط))
ثانيا: نظرا لعدم تساوى التآكل فى تيل الفرامل بين الفردتين اليمين و الشمال (و ده لاسباب كتيره ابسطها ان لو كل حاجه سليمه يعنى مفيش تيل محمل عن التانى و ان رجلاش الفردتين مضبوط بالميللى, لما بتكون فى الملفات و دايس فرامل و انت بتلف يمين (مثلا) هتلاقى ان العجله اليمين بتمشى مشوار اقل من الشمال فى نفس الملف يعنى الشمال بيحصل فيها تآكل للتيل (لطول مشوار الحركه) اكتر من اليمين)
لما انت بتشد واير فرامل اليد عشان تقلل المسافه بين التيل و الطنابير اللى بيحصل انك لو ضبط فرده ممكن تلاقى الفرده التانيه محمله او اخف من اللى انت ضبطها (و ده انت كاتبه فى موضوعك الاصلى) و ده معناه انك بالاضافه انك عامل شد مستمر فى واير فرامل اليد, مستحيل تعرف تضبط الفردتين مع بعض بالطريقه بتاعتك دى.

انا شرحت كل حاجه ببساطه
و ارجو ان معلومة ازاى نضبط فرامل اليد تكون وصلت
و لو عندك شك او اى استفسار فى حاجه اسال من غير حرج
و لو لقيت فى اى مانيوال صيانة اى نوع من العربيات بيقول ان اللى انت بتعمله صح ياريت تشيره لنا على الاقل يبقى عرفنا او اتاكدنا من معلومه جديده

دمتم بود

[AHMEDCAR]

ياباشا رجلاش البدال ده معمول علشان لما تغير الماستر الرئيسى نفسه

لكن اللى حضرتك عملته ده تعالى قبل الى مشوار و العربيه بارده ارفع فرده قدام و حركها هتلاقيها حره او تقيله سنه بسبب اللى الرجلاش اللى عملته لكن بعد مشوار محترم بالعربيه تعالى حرك نفس الفرده هلاقيها تقيله معاك او مابتتحركش زى الاول خالص

عموما الرجلاش اللى قدام ده هيأثر على الطنابير و التيل اكتر حاجه و بعد كده البلى بتاع العجل

[nicegypt]

طيب فك الفيبره الي تحت الدركسيون دي اربع مسامير فقط

http://www.nilemotors.net/Nile/315788-a.html

حتلقيني في الموضوع ده فاكك الفيبره دي

الوير بتاع البنزين مرخي والرجلاش علي الاخر غريبه
طيب صوره كده

استاذى العزيز .. اولا انا مستغرب ان حضرتك بتقول انك مش بتزعل من النقاش
وشايف عكس كدة تماما !! خلينى اقولك ان الناس اللى ردت على حضرتك سواء " l0new0lf " واحمد كار
الناس دى بتتكلم عن خبرة وباردو بمجهودات شخصية واشتغلو ف عربيتهم بأيدهم وقصدهم هو النصيحة فقط اللى حضرتك
مازلت غير متقبلها .

اولا بالنسبة لموضوع تدوير العربية عشان رجلة فرامل اليد .. تصدق بالله اول مقريتها تنحت قدام الشاشة :)
خلينى اقول لحضرتك حاجة .. انا معايا ريجاتا 85 فيها نفس السوستة الطويلة اللى داخل طمبورة الفيرنا
ودى اللى بترجلش منها الدراع المتصل بفرامل يد خلف الطمبورة
بص كدة ف ضهر الطمبورة هتلاقى دراع صغير مربوط ف واير فرامل يد .. اللى حضرتك عملتة ببساطة
انك سبت اصل الموضوع " وهو رجلشة فرامل اليد من السوستة اللى جوة الطمبورة "
وشغلك كلة كان ف الجزء الخارجي وسبت اهم موضوع وهو اللى جوة مش المنظومة اللى برة
اللى بعد اساس الرجلشة .. حضرتك شديت سلك فرامل اليد ع الاخر مش رجلشة .. ماشى كويس بس ازاي ؟
انت كدة شديت الدراع على اخرة والسوستة جوة بتتحرك على نفس مكانها وكدة الحمل بقا على السلك بشكل اكبر .. + حمل على الطنابير وبعد فترة مش هتحس بحاجة لان المسكن هيخلص
لان السوستة بترجع التيل لوحدها فى حالة انة تأكل بحيث يكون اقرب ما يكون من الطمبورة
وتحميلك دة هيخلص على التيل بسرعة والطنابير هتتاكل وهتسخن طبعا .. وكل دة لانك سبت اصل الموضوع وهو رجلشة السوستة
اللى جوة الطمبورةعموما الناس هنا قصدها النصيحة لا اكثر ولا اقل ..
فتقبل اي نصيحة قد تضيف لك ولي معلومة .. دمت بكل ود