دعوة الى التكاتف مع هيونداى ضد حملات الهجوم عليها.... مش حنقبل كل النقد ده

[alivara]

ارجو من جميع اعضاء المنتدى اللذين يملكون سيارات من هيونداى التكاتف ضد الحملات التى يقوم بها الكثير من الاعضاء لافساد سمعة هيونداى فى مصر و لمنع الجميع من شراء سيارات هذه الشركة العظيمة التى تنافس الشركات العالمية كلها
ارجو الا نترك هؤلاء يهاجمون هيونداى و نحن واقفين نشاهد لمجرد ان توكيلها فى مصر سيئ
انا بقول "انا مع هيونداى ضد اى هجوم" و ارجو من كل عضو يريد الانضمام لنا يقول نفس الجملة
لست منوبا لهيونداى و لكنى لا اقبل هذا الهجوم عليها

[Hassan Khalil]

ارجو الا نترك هؤلاء يهاجمون هيونداى و نحن واقفين نشاهد لمجرد ان توكيلها فى مصر سيئ

حضرتك جبت مربط الفرس زي ما بيقولوا ..
هي العربية في وقتنا الحالي ( باعتبار ان الاتجاه العام لملاك السيارات الحديثة هو التعامل مع التوكيل و ليس الميكانيكي ) عبارة عن ايه بدون توكيل جيد ..؟؟؟
لا انكر وجود افراد محترمين جدا - و فاهمين - في غبور .. و علي راسهم المهندس عاطف الذي ساعدني شخصيا في احد المواقف - الغلسة .
لكن ده لا ينفي وجود سلبيات كبيرة في توكيل غبور .. و باعتبار انه يتعامل مع الشريحة الكبري من سيارات مصر .. فهذا يدعوه للتطوير .. و ليس الي سوء الخدمة تحت حجة - ضغط الشغل و العملاء الكتير .
باختصار .. الانتقادات الموجهة لغبور ( و ليس هيونداي) لها ما يبررها.. و لن تكف الانتقادات طالما المستوي زي ماهو .. و ستختفي الانتقادات اذا تحسن مستوي الخدمة .. و تم الارتقاء بمتطلبات رضاء العملاء .
تحياتي

[Shocky]

انا مش من ملاك هيونداى
لكن الناس اللى بتهاجم هيونداى فى الموضوع القديم اللى اتعمل
كانوا من ملاك السيارة اصلاً
هم حتى كانوا بيقولوا كدة عشان التوكيل بس مش اكتر
يعنى اعتراضهم على سوء الخدمة بسبب الاعداد الهائلة من ملاك هيونداى
دى نقطة فى صالح هيونداى وضدها فى نفس الوقت
صالحها لإن هيونداى عرفت تعمل عربية مناسبة لفئة كبيرة اوى من الناس
وضدها لإن التوكيل مقدرش يستوعب العدد المهول من ملاك هيونداى

يعنى مفيش حملة ولا حاجة بس كل الحكاية العدد كبير ع التوكيل مش اكتر
وشكراً لحضرتك

[alivara]

مهما كان مش من حق اى حد انه يقول لواحد ماتشتريش العربية الهيونداى ديه عشان سوء سمعة التوكيل ... اقول هشتري كوري يقولوا لا الكورى وحش اليابانى احسن اروح لليابانى زى ياريس يقولوا لا سعرها غالى عليها مليانة عيوب
مش حتعرف ترضى الشعب المصرى ابدا
و بعدين مين قال ان لما تعملوا حملة كده غبور حيستجيب ؟ على اساس ان نايل موتورز تابع لغبور ؟ او ان نايل موتورز بيبعت الشكاوى لغبور ؟ مستحيل طبعا
هو غبور حيستمر كده و لازم نتعامل معاه على انه كده لاننا ببساطة عايشين فى مصر
و مش معقولة بعد ده كله يعيبوا فى العربيات عشان يظبطوا التوكيل
عفوا لا اقبل اى كلمة على هيونداى حتى لو ما حدش ساندنى

[sokasoon]

حضرتك ماينفعش تفرض رأيك على حد

كل واحد حر فى رأيه وكل واحد له تجربة مع التوكيل او مشكلة فى العربية وقالها ايه المشكلة

وايه المشكلة اننا نعترض على سياسية غبور وتوكيله ونطلب تحسين مستوى الخدمة المتدنى طالما يحدث ذلك

[Hassan Khalil]

يا استاذ اليفارا ..
*اذا كنا حنتكلم علي هيونداي ( و ليس غبور ) ... يبقي حنقول انها عربية كوري .. جيدة الاداء .. و السمعة السيئة اللي طالعة عليها هي في الاساس من حاجتين ... العربيات المتجمعة محليا و بعض العيوب المتكررة التي واجهت قطاع كبير من مالكي السيارات .. و طريقة تعامل غبور مع هذه العيوب بشكل خاص و مع الصيانة بشكل عام ..
-اما من ناحية ياباني و كوري .. فالموضوع واضح و بسيط .. زي ما صناعة السيارات الالماني حتفضل سابقة الكل بخطوة .. الصناعة الياباني حتفضل سابقة الكوري بخطوة ..
و الشاهد علي الكلام ده العربيات الموجودة في الشارع .. مش الجديدة .. لأ .. اللي ماشية بقالها سبع و تمن و عشر سنين ..
و بالنسبة للعيوب الموجودة في الياباني او الكوري .. فكل شئ يوضع في محله .. و لا يصح ان نقول ان تويوتا كلها سيئة لعيب ظهر في الكورولا او الياريس .. و لا نقول الكوري كله سئ لعيب ظهر في الفيرنا او الانترا ..و كل شركات السيارات ( بلا استثناء ) بتظهر في منتجاتها عيوب .. و لكن الحاكم في الموضوع .. كيفية تعامل الشركة مع هذه العيوب .
* و اذا كنا حنتكلم علي غبور ( و ليس هيونداي )..قد تظهر الصورة قاتمة للبعض .. و لكني تعاملت مع بعض الافراد في غبور .. من الممكن مستقبلا ان يغيروا نظرتي التقليدية له .. و الموضوع بدأ بمشكلة تخصني في الصيانة .. و ارسلت المشكلة بكاملها للمهندس عاطف علي الايميل .. مشكورا ..
تاني يوم ..لقيت ناس بتتصل بيا من ابو رواش .. و من قليوب ..
بعدها بيوم لقيت سيارة الخدمة المتنقلة تحت البيت عندي .. و عملوا للعربية كل اللي انا كنت عاوزه .. بدون اي مقابل ..
و سوف اذكر ما حدث تفصيلا في موضوع منفصل
قد ثكون هذه بارقة الامل في تحول مستقبلي لاسلوب خدمة العملاء في غبور ..

[alivara]

كلام جميل اوى و الله كلكم عندكوا حق .. انما انا مش بفرض رأيى على حد لو واحد عنده فعلا عربية هيونداى و اشتكى اوكى مفيش مشاكل , انما المشكلة ان فيه ناس ماعندهاش عربية هيونداى و لا عمرها ركبت هيونداى و بتعيب فيها على الفاضى ! هم ما جربوش العربية او التوكيل عشان ينتقدوا هيونداى , كل واحد راكب ماركة معينة يخليه فيها ينقدها براحته مش ينقد الماركات التانية و هو مش عارف عنها حاجة اصلا
حقول لحضراتكم على حاجة , انا مش بعارض اى حد ينتقد غبور لانه فعلا محتاج تطوير انما معظم الاعضاء ينتقدوا العربيات نفسها , و اقرا كذا موضوع حتلاقى كله ينتقد هيونداى و لو حد حاول يشتريها سقولوله بلاش عشان كورى
حاجة تقرف بجد
ارجو كل واحد بيتكلم كلمة عن اى ماركة يكون جربها مش يفتى كده و خلاص

[Ahmed Samy]

مهما كان مش من حق اى حد انه يقول لواحد ماتشتريش العربية الهيونداى ديه عشان سوء سمعة التوكيل ...

ليه مش من حق اي حد ؟؟؟؟
من حقي اني انصح و من حقك تنصح ....و الشاري يشغل مخه و يقرر

و بعدين مين قال ان لما تعملوا حملة كده غبور حيستجيب ؟ على اساس ان نايل موتورز تابع لغبور ؟ او ان نايل موتورز بيبعت الشكاوى لغبور ؟

حضرتك فيه برامج و مواقع لها تأثير قوي جدا على سمعة السيارات و سياسات الشركات المصنعة ذاتها

و ممكن ييجي يوم (وهاييجي ان شاء الله) اللي يكون فيه نايلموتورز قبلة كل الباحثين عن سيارة و مصدر لمعلوماتهم و عندها سنكون قوة مؤثرة لصالح المستهلك ...انا و انت

مستحيل طبعا
هو غبور حيستمر كده و لازم نتعامل معاه على انه كده لاننا ببساطة عايشين فى مصر

طب ماهو دي تبقى انهزاميه و رفع الراية البيضاء لتوكيل سئ ...

و هو لديه القدرة الكاملة (الكــــــــــــاملة) على تطوير نفسه و خدماته و منشآته و عناصره ليلبي طلبات المستهلك المصري و للا احنا مالناش نفس ؟؟!!

عفوا لا اقبل اى كلمة على هيونداى حتى لو ما حدش ساندنى

حقك بالكامل يا فندم و لا ينكره عليك أحد


تقبل احترامي

[alivara]

المشكلة كلها ان هيونداى عاملة عربيات لجميع فئات الشعب فطبعا كل ما تقل الفئة السعرية للعربية تقل كفاءتها و كمالياتها و ده اللى بيخللى الناس تكره الكورى
لان معظم اللى بيتكلموا عن هيونداى من ملاكها عندهم عربيات فى فئة قليلة زى اكسنت و فيرنا فلازم تلاقى عيوب , و من الناحية التانية تلاقى الماركات اللى كل الناس بتشكر فيها مالهاش عربيات فى فئات سعرية صغيرة زى تويوتا و مرسيدس و بى ام دبليو كل عربيات الشركات ديه فئات عالية عشان كده فيها كفاءة عالية و كماليات كتيرة
نيجى بقى لهيونداى , فى الفئات العالية ماتلاقيش مشاكل (كل ما يزيد السعر تزيد الكفاءة) زى الانترا و سوناتا و توسان كلها عربيات جميلة
قصدى ان الشكوى كلها بتيجى من الفيرنا و الاكسنت ... و زيهم فى نفس الفئة السعرية
هيونداى افتكرت ان ده حيسهل على كل الناس ركوب العربيات بس الناس فهمت غلط و استخدمت ده ضد هيونداى
بمعنى (مش عايز حد يزعل) واحد دافع 70000 جنيه فى عربية فيرنا و عايز بفلوسه ديه من العربية ايه ؟ ثبات زى اوبل , نعومة زى تويوتا , كماليات رهيبة , تسارع زى فيرارى , راحة زى الليموزين! , شكل زى سيفيك او لانسر
يعنى عايز يسوى عربيته اللى ب 70 الف بعربيات بملايين , ده كلام ؟
يعنى هى غلطة هيونداى انها عملتلك عربية على قد فلوسك بامكانيات متواضعة على قد فلوسك و كمان مش عاجبك ؟

[Ahmed Samy]

المشكلة كلها ان هيونداى عاملة عربيات لجميع فئات الشعب فطبعا كل ما تقل الفئة السعرية للعربية تقل كفاءتها و كمالياتها و ده اللى بيخللى الناس تكره الكورى
لان معظم اللى بيتكلموا عن هيونداى من ملاكها عندهم عربيات فى فئة قليلة زى اكسنت و فيرنا فلازم تلاقى عيوب , و من الناحية التانية تلاقى الماركات اللى كل الناس بتشكر فيها مالهاش عربيات فى فئات سعرية صغيرة زى تويوتا و مرسيدس و بى ام دبليو كل عربيات الشركات ديه فئات عالية عشان كده فيها كفاءة عالية و كماليات كتيرة
نيجى بقى لهيونداى , فى الفئات العالية ماتلاقيش مشاكل (كل ما يزيد السعر تزيد الكفاءة) زى الانترا و سوناتا و توسان كلها عربيات جميلة
قصدى ان الشكوى كلها بتيجى من الفيرنا و الاكسنت ... و زيهم فى نفس الفئة السعرية
هيونداى افتكرت ان ده حيسهل على كل الناس ركوب العربيات بس الناس فهمت غلط و استخدمت ده ضد هيونداى
بمعنى (مش عايز حد يزعل) واحد دافع 70000 جنيه فى عربية فيرنا و عايز بفلوسه ديه من العربية ايه ؟ ثبات زى اوبل , نعومة زى تويوتا , كماليات رهيبة , تسارع زى فيرارى , راحة زى الليموزين! , شكل زى سيفيك او لانسر
يعنى عايز يسوى عربيته اللى ب 70 الف بعربيات بملايين , ده كلام ؟
يعنى هى غلطة هيونداى انها عملتلك عربية على قد فلوسك بامكانيات متواضعة على قد فلوسك و كمان مش عاجبك ؟

و مين طلب من الفيرنا تسارع الفيراري و لا ثبات الأوبل

و مين قارن بينها و بين عربيات بملايين و للا حتى بربع مليون ؟!

العربية الرخيصة كفائتها قليلة ..ما حدش معترض

بس مش العربية الرخيصة يكون فيها عيب صناعة مثلا ..و نقول رخيصة

أنا باشتري عربية رخيصة و مكتوب ان فيها امكانيات كذا و كذا

بس مش مكتوب انها بتاكل زيت و هي زيرو !!

و مش مكتوب ان العميل يشتري العربية و يغير الكاوتش !!

اسمحلي هنا و نقف ..

اديني سيارة رخيصة (ولو ان الفيرنا مش رخيصة يعني دي تسوى أقل من كده بس ما علينا) المهم اديني سيارة رخيصة و عرفني عيوبها و انا أقرر......

أو ... على أسوأ الفروض ..لو طلع فيها عيب الاقي توكيل يصلحه

أو على فرض أسوأ من الأسوأ ...يحترمني و يقوللي أنا أسف انا ماعرفش أصلحه و يعترف بعجزه

و لكن يا سيدي الفاضل
لا عربية كويسة
و لا سعر عادل
و لا ضمان حقيقي
ولا وكيل ينفع

فاضل مين ؟؟ أنا و فلوسي

أشوف حد تاني بقى

و مع ذلك ...الناس شايفة و عارفة و بتشتري , خلاص اللي بيشتري وهو عارف يبقى شاري باكيدج على بعضها ...يشرب بقى

بس اللي مايعرفش ............حقه علينا نعرفه

[hmotors]

الحل

المشكلة كلها ان هيونداى عاملة عربيات لجميع فئات الشعب فطبعا كل ما تقل الفئة السعرية للعربية تقل كفاءتها و كمالياتها و ده اللى بيخللى الناس تكره الكورى
لان معظم اللى بيتكلموا عن هيونداى من ملاكها عندهم عربيات فى فئة قليلة زى اكسنت و فيرنا فلازم تلاقى عيوب , و من الناحية التانية تلاقى الماركات اللى كل الناس بتشكر فيها مالهاش عربيات فى فئات سعرية صغيرة زى تويوتا و مرسيدس و بى ام دبليو كل عربيات الشركات ديه فئات عالية عشان كده فيها كفاءة عالية و كماليات كتيرة
نيجى بقى لهيونداى , فى الفئات العالية ماتلاقيش مشاكل (كل ما يزيد السعر تزيد الكفاءة) زى الانترا و سوناتا و توسان كلها عربيات جميلة
قصدى ان الشكوى كلها بتيجى من الفيرنا و الاكسنت ... و زيهم فى نفس الفئة السعرية
هيونداى افتكرت ان ده حيسهل على كل الناس ركوب العربيات بس الناس فهمت غلط و استخدمت ده ضد هيونداى
بمعنى (مش عايز حد يزعل) واحد دافع 70000 جنيه فى عربية فيرنا و عايز بفلوسه ديه من العربية ايه ؟ ثبات زى اوبل , نعومة زى تويوتا , كماليات رهيبة , تسارع زى فيرارى , راحة زى الليموزين! , شكل زى سيفيك او لانسر
يعنى عايز يسوى عربيته اللى ب 70 الف بعربيات بملايين , ده كلام ؟
يعنى هى غلطة هيونداى انها عملتلك عربية على قد فلوسك بامكانيات متواضعة على قد فلوسك و كمان مش عاجبك ؟

يعنى هى غلطة هيونداى انها عملتلك عربية على قد فلوسك بامكانيات متواضعة على قد فلوسك و كمان مش عاجبك ؟

سيدى الفاضل فى فرق بين لما هيونداى تعمل عربية على قد فلوسك بأمكانيات متواضعة وتكون خالية من المشاكل وتريحك ويجى توكيل بلمساته السحرية يخليهالك كابوس عمرك متشوفوا في حياتك خلينى اقولك على حاجة تعقيباً على كلامك

(كل ما يزيد السعر تزيد الكفاءة) زى الانترا و سوناتا و توسان كلها عربيات جميلة
قصدى ان الشكوى كلها بتيجى من الفيرنا و الاكسنت ... و زيهم فى نفس الفئة السعرية

لأ الموضوع مش كده خالص ليه بقه الشكاوى بتيجى من الفرينا والأكسنت هقولك ليه! علشان اللمسات السحرية الى بقولك عليها من التوكيل المحترم الى بيشوه سمعة شركة كبيرة ومحترمة زى هيونداى وبيكره الناس فيها من غير ميقصد فى سبيل التوفير وزيادة نسبة ربحه من لا شئ
وهدى لحضرتك أمثلة حقيقية وموجودة للجميع ممكن يتأكدوا منها

الفيرنا مجمعة محليا (ليس هناك تعليق)!!!
الأكسنت بقه هقولك حكيتها وعليك تعرف تبقى الفيرنا ايه!

تخيل معايا انه عربيه زى الأكسنت دى عربية كورية 100% والتوكيل استوردها لمصر، لحد دلوقتى كل حاجه زى الفل والعربية تمام التمام بس هو عايز يوفر فقرر يركب فيها إنذار وكاسيت ( سي دى ) بدل مايجيب العربية متجهزه بالحجات دى، لأ طبعا لازم العكننة على الزبون وكانت هنا الكارثة مشاكل رهيبة علشان الأنذار رديئ جداً ومش متركب صح والنتيجة واحد زي حلاتى ماشى بعربية نيو اكسنت كانت زيرو بقالى سنة السنتر بايظ والأنذار بدون مبالغه رميته فى الزباله وبس، دى حاجه بسيطة فى نظر ناس كتير تخيل لما تكون شارى عربية زيرو وتحرك سلك تحت التبلوه علشان الباب يفتح!!!!

هتقولى اشتكى ؟ وهما هيعملوا كل حاجة ويحلوا مشكالك
عملت كل الى هتتخيله والى متتخيلوش بس هقولك المشكله فين برضه، "سياسة التوفير وزيادة الربح" مقابل:

1- التضحية بسمعة سيارات محترمة جدا جدا
2- عمالة برواتب منخفضة وغير مدربة
3- الزبون المصرى هيقبل بأى حاجة
4- اجهزة رديئة (إنذار كاسيت واى إضافات)

تخيل بقى الفيرنا الى كلها متجمعة فى مصر ................

التوفير

خلينا نعمل مقارنة بين النيواكسنت الى بتنزل بره مصر والى بتجلنا هنا هتلقى انها حاجه ولا هى على قد فلوسك ولا بامكانيات متواضعة دى اقل من ماتتخيل. هل وصل بينا الوضع ان العربية تيجى الجريدة الى فى الباب والشنطة مش بلون العربية!! مع انها كانت زمان بتيجى نفس اللون و الفرش الداخلى فقير جدا ده موضوع غريب العربية مميزاتها تقل وسعرها يزيد!!!!

فين الأوبشنز

1- الزجاج كهرباء
2- سنتر
3- كاسيت
تكييف !! اعتقد انه معدش اوبشن
والعربية فى الأخر ب 81 الف !!!!! ازاى بقى على " قد فلوسك "

انا بحب العربيات الهيونداى جدا بس الموضوع محتاج وقفة جادة وغبور توكيل كبير وقادر على تعيين عمالة ماهرة ومهندس صيانة يستقبلك بإبتسامة ويحل كل مشكلة عندك ويتأكد ويحرص على حلها مش يديك العربية ومايصدق انك نسيت المشاكل وتاخد عربيتك ولما تفتكر يبقى ربنا يحلها، النظام الإدارى فى غبور يهدف للمحافظة على سمعته وهذه ليست مجاملة ولكن لايخلو مكان من الأيدى العابثة والقرارت الخاطئة ونحن نطلب القليل وهو متابعة مايحدث فى المطبخ الذى لا يراه احد ويكتشفه الزبون اخيرا والسوق وتكون المعانة لكلى الطرفين وتظهر طوابير سيارات بها مشاكل وضغط كبير على مراكز الخدمة والنهاية سمعة سيئة للطرفين ايضاُ.

شكرا لكم،

[Ahmed Anwer]

انا ليا ملحوظة واحدة بس ،،

ان غبور التوكيل الوحيد في مصر اللي بيركب انذار في عربياته ،،

لأن اساسا اختراع الانذار مبقاش ينزل في اي عربية في العالم

يعني المفروض دي خدمة اضافية بيقدمها للعملاء المصريين

اللي اهم حاجة عندهم ان يدوس علي زرار العربية توقوقله من بعيد

و اهيي جت علي دماغه

ممكن تقلوله يشيل الانذار و يزود التوفير

[MOHAMED ABD EL SHAFY]

المشكلة كلها ان هيونداى عاملة عربيات لجميع فئات الشعب فطبعا كل ما تقل الفئة السعرية للعربية تقل كفاءتها و كمالياتها و ده اللى بيخللى الناس تكره الكورى
لان معظم اللى بيتكلموا عن هيونداى من ملاكها عندهم عربيات فى فئة قليلة زى اكسنت و فيرنا فلازم تلاقى عيوب , و من الناحية التانية تلاقى الماركات اللى كل الناس بتشكر فيها مالهاش عربيات فى فئات سعرية صغيرة
يعنى هى غلطة هيونداى انها عملتلك عربية على قد فلوسك بامكانيات متواضعة على قد فلوسك و كمان مش عاجبك ؟

معلش عاوز اوضح حاجة
الكلام دا مغلوط وقد تناولته بشئ من العصبية والاندفاع نحوة ومش شرط ابدا المثال اللى حضرتك ذكرتة وهديك مثال بسيط احنا جبنا ماروتى وبقالها 8 شهور وماشية فحت وردم ولم نضع فيها مفك مفيش غير الزيت و3 كبايات ميه بالعدد يبقى عاوز تقنعنى ان الناس دول معندهمش ضمير
لا طبعا الموضوع موضع ضمير واهتمام بالتقفيل واهتمام بالشخص اللى هيقود المركبة وهيدفع فلوس فيها وممكن تكون من شقاة وتعبة
عمرنا ما سمعنا عن عيوب قاتلة وعيوب عجيبة ومستمرة زى اللى بنشوفها من الماركة دى

[MOHAMED ABD EL SHAFY]

"تجربتي مع الفيرنا

--------------------------------------------------------------------------------

باختصار هقولكوا علي تجربتي مع الفيرنا

أنا جبت فيرنا سنة 2004 . . . 1600 أوتوماتيك كاملة ب 87000

مشيت معايا 130000 لحد دلوقتي

العربية جابت فتيس و خرب بيتي تصليح

بقالها أكتر من سنة بتسخن و معرفولهاش حل لحد ما جابت وش سلندر بعد ما صرفت الاف الجنيهات علي مشكلة الحرارة
و طبعا وش سلندر سحب مبلغ تاني

بتيجي فيها أصوات غريبة و مالهاش حل جذري

صوت العربية دلوقتي قريب من صوت الموتوسيكل الصيني الردئ منه كمان

التوكيل عصابة كبيرة همها الأول تلم فلوس مش تخدم العميل بأي شكل من الأشكال
و طول مانتا في الضمان يقولك كل حاجة كويسة حتي لو اشتكيت من حاجة يشتغلك عشان تمشي من قدامه بدون ما يصرفوا حاجة تبع الضمان و مدربين علي الموضوع دة 100 /100
بعد ما الضمان يخلص يطلعلك القطط الفطسانة في العربية عشان يخرب بيتك و يدفعك أكبر كم من الفلوس

الضمان خلص بدون ما يفيدوني بحاجة ذات قيمة ( بصراحة غيرولي الكلاكس مرة ) و رجع عطل تاني و اشتريت واحد من برة التوكيل

طبعا أنا ببيع العربية دلوقتي و مش طايق أشوف شكلها
و أنضح أي حد بيفكر في فيرنا انه ما يشتريهاش

شكرا"
منقول

[alivara]

اوكى و انا بقول حاجة يا جماعة حاجة اخيرة , اعتبروا الاتى :
اكسنت و فيرنا و نيو اكسنت كوري // ماتريكس كوري يابانى // النترا و سوناتا يابانى ... لانهم فعلا خالفوا كل التوقعات