حادث كورولا لصديق ....العربية اتقلبت ومحتاجين نصيحة +الصور

[JAM]

الف حمدالله على سلامة صاحبك... وقدر الله ماشاء فعل

بص ياباشا.. ياريت قبل ماتروح الحرفيين معلش إتعب نفسك وبص على السمكرية اللى فى منطقة أبو الغيط وباسوس..فى طريق القناطر الخيرية.. والله انا شفت عربيات متبهدلة عن بتاعة صاحبك ورجعت عروسة... بس هوا الموضوع محتاج منك نص يوم... صور العربية كويس واطبعها وانزل بالصور دى عند السمكرية... وانا شايف إنها ممكن تتصلح وتخمينى دا جه من العربيات اللى كنت بشوفها قبل كده.. واللى فيه الخير.. يقدمه ربنا

[khpopo]

لاحول ولا قوة الا بالله فى البلد ...حمدلله على سلامته ويخلف عليه
ربنا يرحمنا ويسترها معانا جميعا

[ahmed_h_g]

الف سلامه على صاحبك وان شاء الله خير
أنا شايف ان العربيه فيها أمل تتصلح كله شغل سمكره فى الصاج متقلقش ان شاء الله خير

[Dr.Mostafa Anwar]

اولا: الف سلامه اخى الكريم واحتسب ما حدث عند الله

ثانيا: بيع يا اخي

نفس الموقف ده حصل لي بس في كورولا 2001

وصلحتها واتكلفت 35000 جتيه

الكلام ده سنه 2005

ومن يومها والعربيه قارفاني اخر قرف

كل شويه مشكله وحاجات واصوات مالهاش حل وماحدش فاهم ولا عارف يحلهالي

من الاخر هتكره اليوم اللى دفعت فيه مليم على العربيه

وعمر العربيه ما هترجع زي الاول تاني

نصيحه من اخ لاخوه لوجه الله

[acs]

الف سلامه لصديقك ربنا يسترها علينا جميعاً
العربيه هتحتاج مجهود جامد اوى منكم

[mada121977]

الف سلامه على صاحبك يا محمد باشا والحمدلله انه بخير
لو تحب اسألك عندنا فى المنصوره على تكاليف السمكره انا تحت امرك
السمكرى بتاعى كان لسه عنده عربيه اخت بتاعت صاحبك لونها اسود كانت ضايعه خالص وماشاء الله شفتها بعد ماخلصت كانت متظبطه تمام لو تحب أسألهولك على التكاليف واسعار القطع اللى غيرها

[Usama Nagi]

الف سلامة علي صاحبك
باين من الصورة ان العربية ما اتخبطتش من ادام فعشان كده الأتنين الأيرباجز الأمامية ما اشتغلوش لأن العربية اتقلبت ما اتخبطتش من قدام (لأن السينسور بتاعهم في الأكصدام و طول ما الأكصدام ما اتخبطش من قدام مش هيشتغلوا)
اما الأتنين التانيين انا معرفش ليه ما اتفتحوش(مش هما اير باجز جانبيه)

[pro_samir]

مش عارف اقول حاجه غير حسبنا الله ونعم الوكيل

[Hondawy_2008]

أولا ألف سلامة لصاحبك
ثانيا مرة في برنامج كانو جايبين مسئول في المرور بيقول ان 99% من الحوادث أخطاء بشرية وان الطرق زي الفل حسبي الله و نعم الوكيل في كل مسئولين المرور في البلد

[waleedrahmy]

شوف تصلحها حا يكلف كام وسعرها بعد التصليح كام ولو بعتها علي وضعها كام...................وحمدلله علس سلامتك الحديد يشتري غيره لاكن الرجالة ما تتعوضش

[Hosam_Optrawy]

حمد الله على سلامته

شوف هاتتكلف كام تصليح وهاتجيب كام بعد التصليح

ولو اتباعت كدا هاتجيب كام

شوف اقل الخسائر واعمله

[hesham22822]

المهم ان صاحبك طلع سليم الحمد لله . اللى يجى فى الحديد يتصلح

[M.Mosaad]

حمد الله علي السلامه اولا و معلشي اللي يجي في الحديد يتعوض
بس فعلا المفروض يعرف موضوع الاير باجز دة مفتحشي ليه و ممكن فعلا يرفع قضية او يكلم حمايه المستهلك لو فعلا الاير باجز كان فيها حاجة
انا معرفشي صاحبك كان عارف الطريق دة و مشي عليه قبل كدة لانه لو مكانش مشي عليه يبقي مكانش ليه لازمه السرعه طالما دي طبيعه شوارعنا الجميله و مش هتتصلح يبقي الواحد لو في منطقه ميعرفهاش كويس ميجرييش جامد متزعلشي من كلامي دي نصيحه لكل الاخوة و اولهم انا

و ربنا يخلف عليه باحسن منها انشاء الله

[Ahmed.Ali]

حسب معلوماتي المتواضعه و حسب كتالوج الجين2
الايرباج لا تفتح في حاله الانقلاب

[NaderNabil]

أولاً حمد الله على سلامة صاحبك

ثانياً: بما ان العربية فيها 4 إيرباج فقط...يبقى هايكونوا 2 أماميين و 2 في الكراسي...

الإيرباجز طبيعي جداً ماتفتحش..ليه؟

1- مافيش خبطة أمامية صريحة...بالعكس وش العربية مافهوش أي تكسير الإكصدامات بس اللي خارجة من مكانها...يعني كده الإيرباجز الأمامية بريئة
2- مافيش خبطة جانبية في منطقة المقصورة...و الأبواب زي الفل... يعني كده الإيرباجز اللي في الكراسي بريئة

3- اللي إتضر هو السقف و القوايم و ده مسؤول عنه الإيرباجز العلوية أو الستارة الهوائية اللي بتغطي الزجاج الجانبي و دي مش موجودة في العربية

و عموماً ان صاحبك -الحمدلله- طلع بالسلامة بدون إصابات جسيمة ده الدليل الواضح على قدرة العربية على حماية راكبيها بغض النظر عن خروج الإيرباجز من عدمها