مميزات وعيوب الماروتى بالتفصيل

[m7nsh]

طالما الأكصدام نفسه سليم ككل ,, و المشكله فى الحته اللى زى الكليبس اللى بتثبته فى العربيه ,, يبقى ممكن تلزقه ! ايوه تلزقه

فى ماده لاصقه قويه ااااااوى بتلزق الحديد و كان جوز اختى لازق بيها حتت حديد فى حديد فى عربيته (لانسر ) و فعلا لزق قوى اوى اعتقد هينفع فى الحوار ده

جرب اسال عليه

[mohamedpay]

بالنسبة لتصليح الإكصدام ممكن تصلحه بصقر قريش الحى العاشر

[nzqtw6]

هي الماروتي ياباني؟

هي الماروتي ياباني 100% ولا بتتجمع في مصر ؟

[bishoy02010]

انا ياجماعه معروض عليا ماروتى بس الغريب
انها اوتوماتيك حد يعرف عنها حاجه
هى موديل 96 وبيقول خليجى عشان الاوتوماتيك
منزلش منها مصر وطالب فيها 14 ياريت تيفدونى عشان انا المفروض اخلص فيها بكره وشكرا

ماروتى إيه اللى اوتوماتيك انا عمرى مسمعت عن الموضوع ده

[khaledkamel2]

احب اعرف الاخوة على هذه السيارة الجميلة وهى فعلا اقتصادية جدا فى قطع الغيار والبنزين وجميله جدا و نا عمة وممكن تركنها فى اى مكان هو عيبها بس فى الشنطة انها صغيرة جدا لكن كا عربية فعلا اكثر من هايلة

[Falcon16]

انا روحت اسأل عنها فى معرض الطارق قال لى من ضمن تكاليف شرائها تقسيط غير المقدم وغير قسط التأمين قالى على مصاريف ادارية للمعرض بخلاف المصاريف الادارية للبنك هل ده مظبوط اصلى كنت بسمع ان المصاريف الادارية دى بس للبنك علشان القرض لكن وجود مصاريف تانية ادارية للمعرض اول مرة اسمع عنها
هل ده عادى ولا زيادة من معرض الطارق

[m7nsh]

انا زيك برده اول مره اسمع عنها ,, بس يمكن الباقيين بيحطوها وسط حجات تانيه و مش بيقولو عليها ,, وده عشان قال عليها فافتكرناه هو الوحش ,, فاهم قصدى يا falcon ?

وبعدين كده او كده محنا عارفين ان كلهم حراميه :)

----

هو الموضوع ده مات كده ليه ؟؟ محدش بقى بيكتب فيه اى حاجه خالص !!

[suzuk]

اولا انا اعمل بتوكيل سوزوكى فى المبيعات
لابد من اختيار البنك الصحيح زو فائدة قليلة
لابد من اختيار شركة التامين التى تظمن لك حقق
سداد اى مصاريف للبنك فقط وليست لاى جهه
تاكد من موديل السيارة

[m7nsh]

نصائح جميله و مفيده ,, الف شكر ليك ياباشا .. و منتظرين مشاركاتك الجايه

[tarek_wahba]

لماذا يا أهل الخبرة ويا شباب المنتدى الاعزاء لا يوجد أحد تكلم عن تجربتة مع الماروتى وما هى مميزاتها وما هى عيوبها فأنا معجب بالسيارة وأريد شرائها ولكن أنا فى حيرة شديدة لان عند مقارنتها مع 127 و 128 أغلب الاخوة يؤيد الماروتى مع ذكر مميزات قليلة جدا ولا يذكر غير عيب واحد فقط وهو أنها ضيقة شوية وما تقدرش تسافر بيها ولو أنت لوحدك يبقى ماروتى ولو معاك عيلة يبقى 128
وانى أرى أن شباب المنتدى أو من مالكى هذة السيارة داخل المنتدى لا يعطوا هذة السيارة حقها فى التوضيح للاخريين عن مميزاتها وعيوبها بالتفصيل وخير دليل هم مالكيها وأصحاب السيارة داخل المنتدى فكيف ترشدون الاخوة والزملاء عن مميزاتها وعيوبها بالتفصيل حتى يستطيع كل من يريد شرائها أن يعرف عنها كل شىء . أم أنها سيارة لاتستحق مثل ذلك الشرح الموجود عن باقى السيارات فى المنتدى فأنى أرى أنها سيارة منتشرة ولكن داخل المنتدى لا يوجد معلومات كافية عنها مثل باقى السيارات لماذا ؟ أرجو من السادة أصحاب ومالكى السيارة والاخوة الزملاء فى هذا المنتدى الاكثر من رائع ذكر المميزات والعيوب ومشاكل هذة السيارة وأسف على الاطالة ولكم جزيل الشكر .

السلام عليكم و رحمة الله و بركاته
مالك يا استاذ abdm متضايق ليه الموضوع فيه ردود زي الفل هل قرأت كل 27 صفحة و لم تجد ما يناسبك ؟على العموم أنا اكرر لك ردي عسى أن يرد على بعض إستفساراتك و بعدين موضوع كل حاجة دي صعب اوي حدد طلبك إلى حد ما ماشي يا باشا و تحت امرك برضه في اي استفسار.
انا معاي ماروتي من سنة و نصف ماشاء الله استهلاكها جوة البلد الصفيحة تعمل من 300 - 350 حسب رجلك على دواسة البنزين و خارج البلد 400-420 انا باسافر بيها على120 -140 من السويس للقاهرة و الشرقية و المنوفية تقفيلها حلو على قد سعرها باركب فيها انا و الزوجة و اطفالي 3( 13 سنة و 10 سنين و 4 سنين )و اكتر من مرة اتحديت بيها و ركبت 3 حجم وسط وراء غير 1 حجم كبير جنبي و لم تلمس الأرض و لا في المطبات و احنا عندنا المطبات ماشاء الله عليها . التوكيل ممتاز قطع غيار ببلاش و لم احتاج فيها اي شئ للأن لا تحتاج بنزين و لا زيت و كفايه ان موتورها ياباني و بجد واسعة من جوة ارجو ان اكون افدتك

[m7nsh]

رد وافى شافى منك يا استاذ طارق :)
ربنايباركلك فيها يا باشا

[m1561975]

أنا مش معاكم في موضوع معاملة التوكيل، أنا التوكيل عندنا في اسكندرية زبالة، بيبيع قطع غيار مش أصلية (فوانيس و إشارات) و مش عارف آخد منهم حق و لا باطل.

[m1561975]

يا جماعة لو تبعتولي عنوان فرع التوكيل اللي أنتم بتروحوله أكون شاكر لكم، و هحاول آجي الصيانة الجاية في القاهرة.

[aymansaad]

بجد انا حس انها عربية محترمة

[m7nsh]

والله يا m1561975 انا من مقاطعى التوكيل :) فمش هقدر افيدك فى النقطه دى
اصل الماروتيه هنا حزبين ,, اللى بيروحو التوكيلات و اللى مقضيينها ! ونا من اللى بيقضوها
بس اعتقد اغلب اللى بيروح بيروح فرع الدقى
ونا فهمت انك من اسكندريه ,, فهيبقى مشوار و بينى وبينك حاسس انه ملوش لازمه لأن فعلا العربيه مفيهاش اى نوع من التعقيد بالعكس بسييييييييييطه جدااااا و اى ميكانيكى بمعنى اى ميكانيكى يخلصلك فيها ,, انت لوحدك ممكن تعمل صيانتك ليها بنفسك
............*
استاذ aymansaad
رأيك لوحده يخليها عربيه محترمه :)