تغيير ترموستات الكوع + وضبط مفتاح الهواء للكربراتير فى الماروتى

[maged]

الحمد لله اتحلت مشكلة السخونة
رحت النهاردة اشتريت ترموستات مروحة كان يوجد نوعين نوع بسلك وفيشة ونوع بدون سلك طبعا اشتريت ابو سلك لانه زى اللى راكب فيها
وبعد تركيبه الحمد لله المروحة بقت تشتغل قبل النص والحرارة مستحيل توصل للنص

[love7amada]

الحمدلله

[maged]

يا فرحة ما تمت
للاسف المشكلة رجعت تانى والحرارة بقت زى ماكانت بعد النص
اعمل ايه تانى

[sab3aawy]

باشمهندس سبعاوى يا ريت المشاركة برأيك فى الموضوع دا و شكرا

ده ردى فى موضوع آخر على نفس المشكلة :

انا عانيت اشد المعاناه الفترة الماضية من موضوع السخونة والترموستات الخ ، وطلع ان العيب مش من الترموستات خالص والحمد لله حليت المشكلة
المسارات بتاعت المية فى المحكر والردياتير كانت مكتومة ، ومع عدم وجود ثرموستات الكوعى ده بيخلى دفع الطرمبة الى اعلى الردياتير قوى جدا، ومع سخونة المية وبدء غليان جزء منها الضغط فى منطقة اعلى الردياتير بيوصل للحد الأقصى المسموح اللى بعده بتبتدى المية تزق صمام الامان بتعا غطاء الردياتير وتروح على القربة، وبالتالى بتنقص، ولما تنقص واصلا احنا متفقين انها بتعدى فى مسارات ضيقة فى الردياتير بتكون وصلت للثرموستات بتاع المروحة ساقعة اسقع من الدرجة اللى تخليه يلقط، وفى حين انها بسبب كميتها القليلة برضه بتسخن جدا فى الموتور وعلى ما توصل لحساس العداد الموجود فى اسخن نقطة فى المحرك بتكون فوق درجة الغليان وهو الامر الذى يؤدى انك تشوف درجة الحرارة عالية جدا لأن حساس عداد الحرارة راكب فى اسخن نقطة فى الدايرة وثرموستات المروحة راكب فى ابرد نقطة فى الدايرة، ومع زيادة سخونة المية تغلى اكتر والضغط يزيد اكتر وتطرد مية اكتر للقربة وتسخن اكتر حتى تصل لنقطة الكارثة
اعمل اللى انا عملته وبإذن الله ربنا هيحلها معاك زى ما حلها معايا
1- اشترى منظف رادياتير مركز (أنا جبت رابيدو انتاج مصرى بتاع شركة ادكو اسكندرية تمنه اقل من 10 جنيه)
2- اشترى غطاء ردياتير جديد(انا جبت واحد تايوانى تمنه 10 جنيه)
3- لو لسة محتفظ بثرموستات الكوعة اختبره (سخن شوية مية وامسكه من أعلاه بزرادية ونزله فى المية بحيث البلوك النحاس بتاعه يبقى مغمور وخليك ماسه شوية وبص عليه، مفروض انه يفتح وتلاقى البلوك النحاس نزل لتحت قبل غليان المية، لو مفتحش اشترى واحد تانى)
4- اشترى جوان للكوعة ، لو ملقيتوش سهل تفصيله (انا قصيت واحد من كاوتش بتاع غيار تالف لبالونة موتور مياه منزلى، ويمكن قصه من اى كاوتش داخلى قديم، وبالتجربة المطاط بيستحمل درجة حرارة مية المحرك ، لاحظ ان الخراطيم مطاطية)
5- اشترى علبتين من المادة المركزة الخضراء التى تضاف الى مية الحنفية لتحويلها الى ميه خضراء، اقضل كثيرا من المياه الخضراء المخففة التى تباع فى جراكن، انا جبت الأمريكى ماركة أبرو من شارع دمشق ب 10 جنيه
6- فضى المية اللى فى العربية وبعدين قم بقفيل دائرة المياه واملاه مية من الحنفية والموتور بارد، وبعدين صب عليها منظف الردياتير او مزيل الصدأ كما يسمونه
7- دور العربية وسيبها دايرة سلانسيه 20-30 دقيقة
8- بطل العربية وسيبها لحد ما تبرد الى درجة حرارة الجو (مش أقل من ساعتين)
9- نزل مية الغسيل بالكامل من الدورة
10 فك الكوعة ونضف مكان الجوان القديم بعناية من الكوعة ومن مكانها وفصل جوان لو مكنتش اشتريت واحد
11رجع ثرموستات الكوعة الى مكانه، وحط الجوان فوق منه(الجوان لازم ييجى فوق الثرموستات وليس تحته
12 قفل الكوعة بعناية على الثرموستات والجوان
13 املا الردياتير من الحنفية واضف عليها علبة واحدة من المركز الأخضر(خلى التانية معاك)
14- ركب غطاء الردياتير الجديد
15- املأ القربة بمياه من الحنفية بدون اضافات حتى منتصف المسافة بين min و max ولا تضيف اى شئ لمياه القربة حتى يظل لونها شفاف، ولاحظ مستواها بدقة
16 استعمل السيارة فى مشاوريك العاديدة ولاحظ تغير لون مياه القربة وارتفاع مستواها على مدى يومين ولاحظ كذلك هل ثرموستات المروحة بيشتغل فى وقته الطبيعى(فوق النص بحاجة بسيطة ام لا)
17- لو لاحظت ان مستوى المية فى القربة تقريبا مبيعلاش (يعنى مش اكتر من 2 مللى مثلا فى مشوار 50 كم) ولون المية فى القربة لم يتغير للأخض سوى بدرجة بسيطة جدا(يعنى بقت مية شفافة لونها يميل شوية للأخضر، مش نفس درجة الأخضر بتاعة مية الردياتير) يبقى باذن الله مشكلتك اتحلت وده هينعكس على اداء ثرموستات المروحة
لو بعد الشرالتجربة دى مجابتش نتيجة نحاول نتناقش تانى

[maged]

الف شكر مستر سبعاوى على الاشتراك معنا فى الموضوع
لكن انا عندى مياة الردياتير لا تنقص ابدا مهما كانت السخونه وانا لاحظت من كلامك انه كان يوجد مشكلة فى نقصان المياة عندك
وكمان انا معنديش ترموستات كوع فهل اشترى واحد ام لا
وكمان انا ذهبت لمتخصص ردياتير من المشهورين بلامانه اسمه السبكى بشلرع احمد عرابى عين شمس وقال لى ان الردياتير مش مخنوق بل يعمل بطريقة سليمه ودورة المياة سريعة وتقليب المياة ممتاز وهو يستبعد ان يكون الردياتير سبب المشكلة
ودلوقتى انا عملت مفتاح كمترايه بنفسى لتشغيل المرحوحة عند النص تجنبا للسخونة لحين التفكير فى حل للمشكلة
فهل كل ما قلته للك يغير اى شىء فى الحل المقدم منك
والف شكر لمشاركتك وانا واثق انه طالما انك بدأت تشارك معنا فى الموضوع ان شاء الله المشكلة سوف تحل

[alking_2006]

السلام عليكم

يا جماعة انا بردو عندى نفس المشكلة و زى مشرحت فى اول المشاركة فى الموضوع انى عملت كل الحلول بس انا شايف الحاجة اللى انا لسه معملتهاش هيا تنظيف دورة التبريد باستخدام مزيل الصدأ و شراء غطاء جديد للرادياتير.

ربنا يسهل هجرب و اقولكوا بس ارجع من السفر ادعولى

[moustafamoussa]

يا فرحة ما تمت
للاسف المشكلة رجعت تانى والحرارة بقت زى ماكانت بعد النص
اعمل ايه تانى

ما يحسد الترموستات الا اصحابة

[maged]

السلام عليكم

يا جماعة انا بردو عندى نفس المشكلة و زى مشرحت فى اول المشاركة فى الموضوع انى عملت كل الحلول بس انا شايف الحاجة اللى انا لسه معملتهاش هيا تنظيف دورة التبريد باستخدام مزيل الصدأ و شراء غطاء جديد للرادياتير.

ربنا يسهل هجرب و اقولكوا بس ارجع من السفر ادعولى

ياترى جربت حل استاذ سبعاوى ولا لسه
عشان انا عايز اعرف النتيجه

[mrghost]

انت متأكد ان عداد الحراره نفسه مفيهوش مشكله؟ مفيش تهريب من كابلات البطاريه ؟
انا كان عندى مشكله ف الشاهين وهى ان كان كابل الارضى بيهرب وكانت النتيجه ان العدادات كانت بتتحرك لقيمه اكبر من الحقيقه يعنى عداد البنزين كان بيدى قراءه اكتر من اللى فى التانك وكمان عداد الحراره كان بيوصل لل 100 مع ان العربيه مكانتش سخنه
وممكن برضه تكون مروحة الردياتير عندك ضعيفه