رابطة مالكي السويفت

[ahmed76]

السلا عليكم
يا جماعة حد يعرف سعر الحاجات الآتية للأهمية :
- طلمبة المياه الأصلية
- الترموستات
- صباع الحرارة والكتاوت بتاع المروحة
وشكرا

صباح الفل
طلمبه المياه يابانى اصلى بس مش فاكر نوعها بصراحه بحوالى 125 جنيه ممكن تزيد او تقل 5 او 10 جنيه
الباقى مش عارف سعره

[semsem_inside]

أنا فعلا سألت لقيت طلمبة المياة اليبانى الأصلى ثمنها 123 أما صباع الحرارة 20 جنيه

[sewefy]

العربيه بعد ال 80 القيها فيها رعشه جامده وباينه اوى فى الدركسيون اعمل ايه فى الموضوع ده

[kar!m]

العربيه بعد ال 80 القيها فيها رعشه جامده وباينه اوى فى الدركسيون اعمل ايه فى الموضوع ده

رصص العجل اللى قدام

[sewefy]

عندى عربيه سويفت اتوماتيك كل ما اشغل النور العالى او النور والكلكس عداد الحراره يعلى اوى فوق 100 والعربيه يبقى فيها رعشه وبرجله اعمل ايه فى الموضوع ده

[sewefy]

مفيش حد هنا يعرف العيب فين
من اخوانى بتوع الربطه السوفتيه

[kar!m]

مفيش حد هنا يعرف العيب فين
من اخوانى بتوع الربطه السوفتيه

بص واضح انها حاجه مش طبيعيه .. يعنى أنا أشك ان الحراره تكون بتعلى فعلا .. بس أعتقد ان العداد هو اللى بيغش لما تحمل على الكهربا .. ما تروح لكهربائى شاطر و تشوف فى ايه

[exact]

عندى عربيه سويفت اتوماتيك كل ما اشغل النور العالى او النور والكلكس عداد الحراره يعلى اوى فوق 100 والعربيه يبقى فيها رعشه وبرجله اعمل ايه فى الموضوع ده

لحظيا يعني؟؟

بص واضح انها حاجه مش طبيعيه .. يعنى أنا أشك ان الحراره تكون بتعلى فعلا .. بس أعتقد ان العداد هو اللى بيغش لما تحمل على الكهربا .. ما تروح لكهربائى شاطر و تشوف فى ايه

أؤيد نظريتك جدا جدا جدا
بدليل حكاية انه بيقول ان الحرارة بتعلى اما بيضرب كلاكس ومحدش بيضرب كلاكس ربع ساعة فمعني الكلام ان العملية لحظية ودي غالبا جاية ان احد السيليكونات او المكثفات في لوحة العدادات اتحرق او ان فيه عيب وصلات
ودي صورة العداد الطبيعي

[sewefy]

اولا شكرا على ردك واهتمامك بس مش بتبقى لحظيا طول ما انا مشغل النور العالى صوت الماتور بيعلى زياده عن اللزوم ومش بيزل غير لما اطفى النور العالى والواطى مع الكلاكس العربيه بترعش وتبرجل

[th_it2003]

السلام عليكم و رحمة الله
أحب أنضم للرابطة عندى سويفت نبيتى موديل 96 و هى بصراحة جميلة جداً
حصل معايا مشكلة ان شاء الله تكون بسيطة
مروحة الرادياتير غيرتها بس بعد ما غيرتها لاحظت ان صوتها اعلى من الأول مش عارف ليه؟

[exact]

اولا شكرا على ردك واهتمامك بس مش بتبقى لحظيا طول ما انا مشغل النور العالى صوت الماتور بيعلى زياده عن اللزوم ومش بيزل غير لما اطفى النور العالى والواطى مع الكلاكس العربيه بترعش وتبرجل

بخصوص النور هاقول لك على حاجة تعملها...دور العربية لحد اما تسخن...وبعدين خللي حد يركب العربية وافتح الكبوت وخليه يبدا يشغل النور وهتراقب الكربيراتير كويس جدا من ناحية الرفرف اليمين...هتلاقي دراع صغير كده في آخره مسمار قلاووظ اول اما النور يقيد بينزل ويضغط من المسمار على دراع تاني...ابدأ فك المسمار ده سنه سنه وهتلاقي كل اما بتلف لفة العربية توطى شويه...وبعدين اطفى النور وارجع شغله مرتين تلاتة...بس نصيحة لوجه الله خليه اما النور يقيد يعلي البنزين سنه صغيرة قوي ومتفكش المسمار خالص عشان البطارية هتنام منك
فكرة الدراع ده انه معمول اما يبقى فيه حمل كهربا بيزود سنة بنزين عشان يدي سرعة للدينامو عشان ميبقاش فيه حمل عالبطارية...وفي نفس الوقت ميبطلش الموتور وممكن على بكرة كده اصورهولك

السلام عليكم و رحمة الله
أحب أنضم للرابطة عندى سويفت نبيتى موديل 96 و هى بصراحة جميلة جداً
حصل معايا مشكلة ان شاء الله تكون بسيطة
مروحة الرادياتير غيرتها بس بعد ما غيرتها لاحظت ان صوتها اعلى من الأول مش عارف ليه؟

ممكن عاوزة تتربط او المروحة نفسها معيوبة فيها ريشه اتقل من التانية فمش بتبقى موزونة او فيه ريشة مشروخة

[exact]

الحقوني

يارجالة أنا العربية سخنت امبارح
وديتها للدكتور
كشف عليها ولقينا فيه حصوه فالردياتير

آه والله...لقينا الردياتير مليان زلط ورواسب كلسية من الميه القذرة

على اني حاطط ميه خضرا من اللي المفروض انها بتدوب الصدا
ومفيش ولا ماسورة سالكة

كنت راجع من القاهرة وجيت عند أجا كده لقيت المكيف الله اجعله خير ولا الديب فريزر على غير العادة مع ان الجو نااااااااااااار
لدرجة اني من كتر البرودة قلت افتح الشباك
اسمع المكنه بتكركر كان فيها بنزين 70
مع اني كنت ماشي على 90 ومديها الرابع
رحت راكن على جنب وقبل ما اقف اجاركم الله من اللي حصل
الاقي العربية بتطلع دخان من كل مكان ومش قادر المس الكبوت
فتحت الكبوت بالعافية ولقيت كل شئ في حوض الموتور بلا استثاء بيدخن
مع ان عداد الحرارة ثااااااااااااااااابت فالنص

والقربة ناشفة حجر وبتدخن جامد جدا
قعدت ييجي ساعة جنبها
رفعت مقاس الزيت لقيته سليم ولله الحمد بس الزيت طبعا اتحرق وطاروا ال 230 جنيه بتوع الموبيل وان

جبت القمع وفتحت الردياتير ودورت العربية ولسه باحط المية لقيت صاروخ ميه سخنة كان هيطير عيني لولا ستر ربنا والحمد لله على النضارة
استنيت شويتين وبعدين زودت واحدة واحدة لحد اما شبعت

الغريب حكاية عداد الحرارة مع انه بيتجاوب مع السرعة وكانت العربية سخنت قبل كده من فترة وكان بطلع وينزل

المهم انا باوجه من هنا رساله لكل واحد بيسافر...ركز مع الردياتير جامد جامد جامد

[sewefy]

متشكر على الرد الوافى ده بس انا عملت اللى انته قولت عليه لقيت فعلا صوت الماتور خف شويه بس لسه موجود لما افتح النور العالى او ادى انتظار يعنى اى كهرباء بتلغبط العربيه
على العلم انى قست الديناموا والبطاريه مرتين ويقولولى تمام
اعمل ايه علشان الموضوع ده مجنينى

[sewefy]

وياريت تصوره علشان ابقى متاكد منه
وشكرا اوى يا باشا على اهتمامك ويا ريت نتواصل مع بعض

[exact]

متشكر على الرد الوافى ده بس انا عملت اللى انته قولت عليه لقيت فعلا صوت الماتور خف شويه بس لسه موجود لما افتح النور العالى او ادى انتظار يعنى اى كهرباء بتلغبط العربيه
على العلم انى قست الديناموا والبطاريه مرتين ويقولولى تمام
اعمل ايه علشان الموضوع ده مجنينى

معلش انا مشغول حبتين اليومين دول
الكربيراتير فيه حوالي 3 او 4 دراعات بنفس النظام كده
ممكن تدور عليه وتكرر نفس اللي عملته...
بس لازم كل حاجة فالكهربا تبقى مطفيه والعربية سخنة وبعدين تبدأ تشغل العالي وتتابع
أول ما أفضى هاصورهولك