ملاحظاتي عن الشارك اللي اتظلمت بجد من الكل

[khaledmekawy2008]

الحمد لله اني كانت اول مرة اجرب فيها بنفسي الشارك السبورت بتاعتي علي طريق سريع امبارح مع اني قبل كده جربت شارك بس فاضيه ومكنتش حالتها حلوة ودي اهم ملاحظاتي عنها والفرق اللي حسيته بينها وبين البوما السوبر اكشن اللي هي معايا واستخدمتها بقالي 3 سنين
1- الشارك في سحبها بتقل عن البوما البوما تحس انها طيارة فالسحب ومفيش عربية 1600 تجاريها لغاية 120
2- بعد 120 سحب الشارك بيزيد اوي عن سحب البوما بشكل ملحوظ حتي اني امبارح عالصحراوي وصلت ل 180 من غير ما احس
3-فعلا ودي نقطة كنت غلطت فيها قبل كده وقلت ان ثباتها مش قد كده لا والف لا كمان الشارك بجد طلعت ثابته اخر حاااااااااجة والمناورة بيها اخر تمام بجد ثابته بغبااااء واثبت من البومة بمراحل وحتي عالسرعات العالية والله ما تحس ابدا انها خفيفة
4- الباور بتاعها خرافي لما تكون ماشي هادي يكون مريح اوي وخفيف ولما تسرع يتقل
5-استهلاك البنزين اقل من البوما بس مش بالفرق الملحوظ
6-واسعة من جوه ولغاية دلوقتي مركبتش عربية اوسع منها في فئتها دي
7-زيها زي البومة مبتحكش فالمطبات ودي نقطة تميزها عن باقي العربيات اللي في فئتها
8-العفشة مش هقدر اقول عليها الا انها تطوير للبوما وبقت اريح من البوما وفي نفس الوقت ناشفة حبتين عشان رياضية بس مريحة ومتحسش بتخبيط زي البوما
9-اللي انا اخده عليها بس الاكصدام بتاعها لازق فالصدر علطول يعني اي خبطة من قدام بتبقي صعبة اوي
10- الكماليات مفيش مقارنة بينها وبين البوما
11- الشكل مفيش عربية شكلها وحش عملتها ميتسوبيشي ودي ازواق
وفي جملة اتقالت في المنتدي عجبتني محدش هيحس بقيمة الشارك الا لما يكون ساقها

[HOSSAM99]

ربنا يبارك لحضرتك فيها
العربيه دي اتظلمت ظلم بين كعاده السوق المصري مع العربيات _____ الاصليه____

[dramir1]

الشارك فعلا عربيه جميله جدا انا جربتها وكانت رائعه فعلا بس ملاحظاتي عليها في الرابط التالي.... ....ربنا يباركلك في عربيتك ...وياريت تقولنا اسعار بعض قطع الغيار...والعربيه مع حضرتك بقالها اد ايه؟ وهل فيها مثبت سرعه؟؟

http://www.nilemotors.net/Nile/193102-take-away.html

[amr_2009]

اولا ..الف مبروووك..وربنا يكفيك شرها يارب..
ثانيا..كنت انا اللى قلت محدش هيعرف قيمتها غير اللى ساقها
ثالثا...الباشا من فين فى الزقازيق..لان اعتقد ممكن نبقى جيران...لانى من هنا بردو

[khaledmekawy2008]

الشارك فعلا عربيه جميله جدا انا جربتها وكانت رائعه فعلا بس ملاحظاتي عليها في الرابط التالي.... ....ربنا يباركلك في عربيتك ...وياريت تقولنا اسعار بعض قطع الغيار...والعربيه مع حضرتك بقالها اد ايه؟ وهل فيها مثبت سرعه؟؟
http://www.nilemotors.net/nile/193102-take-away.html

انا العربية معايا من 17 يوم وكانت اول مرة اجرب فيها السفر لمسافة طويلة اول امبارح ومفهاش مثبت سرعة ومش موجود الا في الموديل 2000 سي سي وده مش موجود فمصر

[khaledmekawy2008]

اولا ..الف مبروووك..وربنا يكفيك شرها يارب..
ثانيا..كنت انا اللى قلت محدش هيعرف قيمتها غير اللى ساقها
ثالثا...الباشا من فين فى الزقازيق..لان اعتقد ممكن نبقى جيران...لانى من هنا بردو

الله يبارك فيك يا باشا
وانا مش من الزقازيق نفسها من ههيا لو تعرفها واتشرفت بمعرفة حضرتك
وحضرتك منين فالزقازيق؟؟؟

[Xander2010_Evo]

4- الباور بتاعها خرافي لما تكون ماشي هادي يكون مريح اوي وخفيف ولما تسرع يتقل

شوور من المعلومة دي؟؟ أصل ده زي أوبشن موجود في عربيات هاي زي مرسيدس وبي أم دبليو
ما أظنش إن ميتسوبيشي تعمله لآنها بتعتمد علي Sensetivity عالية جدآ

[foop_2010]

انا العربية معايا من 17 يوم وكانت اول مرة اجرب فيها السفر لمسافة طويلة اول امبارح ومفهاش مثبت سرعة ومش موجود الا في الموديل 2000 سي سي وده مش موجود فمصر

موجود ياباشا2000 سي سي في مصر في واحدة 2009 كانت عاملة 540 ألف بس اتباعت

[bassem_sams]

اه فكرها دى كانت ايفوليشن و لونها نبيتى تقريبا شوفتها عند رواس زمان

[mimohsen]

انا معايا شارك من 2008 وكنت اقرا واسمع الناس تقول عربيه مش كويسه ... كنت اقول ومالوا يقولوا براحتهم .. كفايه اللي راكبها يعرف قيمتها ويستمتع بسواقتها ... وفهمت حاجه في السوق المصري ان مالوش اي مقاييس وغالبا لو عملت عكس كلام السوق انت اللي كسبان

[kholio]

4- الباور بتاعها خرافي لما تكون ماشي هادي يكون مريح اوي وخفيف ولما تسرع يتقل

شوور من المعلومة دي؟؟ أصل ده زي أوبشن موجود في عربيات هاي زي مرسيدس وبي أم دبليو
ما أظنش إن ميتسوبيشي تعمله لآنها بتعتمد علي sensetivity عالية جدآ

الشارك فيها فعلا باور كهربا والطارة تتقل كل ما السرعة تزيد

[bassem_sams]

بالنسبه لأصحاب سيارة شارك كنت عايز اتأكد منهم على كام حاجه شغلين بالى

1-كان فى شارك كامله توكيل منزلين نظام عازل صوت هل جربتوة و فعلا فعال و لا لأ ن ناس كتيرة بتقولى صوتها عالى ففكرت لو جبت كامله هتختلف

2-جسم عربيه و اكصدامات ورق و لا قويه يعنى تستحمل و لا من اقل تريحه على اكصدام يفرق

3-انا قرأت و عايز ملاكها يأكدولى معلومه دى ان لما عربيه ماشيه على كوبرى 6 اكتوبر مثلا بسرعه و تعدى على مفصل تحس انها عامت حاجه بسيطه او ثباتها قل هل ده صحيح ام لا

4-بالنسبه لكراسى و عفشه عربيه هل مريحه فى قياده مسافه طويله او فى زحمه

5-موضوع الusb هل موجود او له حل لتشغيل فلاشه

6-طبعا انا قرأت هنا انها مبتحكش و هى محمله و دى كانت مقلقانى فشكرا انى اتأكدت منها

7-هل كامله فيها حساس ركن و طى مرايا بكهرباء و مرايا تعتيم

8-الأستبن جنط 16 زى اللى متركب و لا ايه و اخبار جنط 16 معاكم ايه فى شوارع مكسرة او مطبات حلو و لا 15 افضل

فى انتظاركم لأنى محتار مابينها و بين كورولا بسانا مايل ليها اكتر فعايز اتأكد من نقط دى علشان اقدر احدد

[Xander2010_Evo]

الشارك فيها فعلا باور كهربا والطارة تتقل كل ما السرعة تزيد

ههههههه طيب أنا هاخد بكلام حضرتك وأنزل أسرق واحدة من صاحبي
وعلي الله تتقلب مني

[bassem_sams]

ارجو من اخوه الأتيه و من ملاكها
kholio , king1974 , ahmedalkouly,brkatt,amr_2009,mimohsen,khaledmekawy 2008,

ارجو منكم مساعدتى برد على اسفسارتى لأنى محتار و فى انتظاركم

[Formulator]

الشارك فيها فعلا باور كهربا والطارة تتقل كل ما السرعة تزيد

الـ Speed Sensitive Power Steering دى device بتبقى integrated فى الباور الكهرباء, وبتاخد معلوماتها من عداد السرعة عشان تقدر كمية الـAssistance اللازمة للدركسيون حسب السرعة
دى موجودة من زمان فى عربيات كتيييييييييير (باور كهرباء) زى البونتو الـ بـ 70 ألف..!!!