رينو مصر تطلق السياره رينو سكالا ( صني الشكل الجديد)

[mzda]

أطلقت الشركة المصرية العالمية للسيارات EIM وكيل "رينو" في مصر السيارة الجديدة كليا "سكالا" لأول مرة في مصر.

وكشفت الشركة من خلال مؤتمر صحفي عقدته قبل قليل في أحد فنادق القاهرة وحضره مندوب من ContactCars.com عن أن "سكالا" متوافرة بثلاثة طرازات.

الأول PE منها اليدوي وسعره 89 ألف جنيها والثاني أتوماتيك سعره 94 ألف جنيه ، فيما الطراز الثالث فهو (هاي لاين SE) وبه جنوط سبور، عجلة قيادة متعددة الوظائف وسعره103 ألف جنيه.

وتتميز "سكالا" بأن محركها 1600 سي سي 107 حصان ، والسيارة مصنعة في مصانع نيسان في كوريا الجنوبية وهي ثمرة تحالف (نيسان-رينو) باعتبارهما شركة واحدة.

وأعلنت الشركة المصرية العالمية للسيارات EIM أنها ستفتتح أربعة مراكز صيانة جديدة في أبورواش والأسكندرية والمنيا و أسيوط لخدمة عملاء "سكالا" الجدد.

يذكر ان السياره ما هي الا نيسان صني الشكل الجديد المتواجد في الخليج بس تقفيل مصانع كوريا بالاضافه الي بعض كماليات والتعديلات ( مالتي فانكشن + تابلوه جديد ....)

[ahmad--ezzat]

تحفه تحففففه...وانا فى نظرى احسن من الاوبترا والجين 2 والصنى نفسها

[mahamedaraby]

مش اوى كده انا شايف انها كويسه يس الصنى الحاليه تتفوق عليه بالموتور اليابانى والفتيس برضوا لكن دى على ما اعتقد كوروى 100% المهم بالتوفيق لتحالف نيسان ورينو واللى الامام دايما فى انتاج الافضل لينا

[mzda]

علي فكره المكونات بتاعتها يباني تجميع كوريا زي الصني في الموتور والعفشه وعلي فكره ده حيخلي الصني سعرها ينزل عشان تعرف تنافس وكمان قطع غيارها حتبقي 90 % زي الصني مع اختلاف الفوانيس والاكصدام

[Ahmed.TV]

ادينا بكرة حنشوف ونحكم على الطبيعة لما تنزل باذن الله , وبلاش نقول ونحكم انها افضل من سيارات اخرى فى السوق الا لما تنزل ونجربها على ارض الميدان

بس اعتقد ان العربية دى لما تنزل مصر حتخلى الصنى تعمل شوية تغيرات وخصوصا فى الداخل فى الصالون عشان الاتنين نفس الصالون و شكلهم قريب من بعض جدا

ولا ايه ياجماعة بردوا

[YoussefMostafa]

العربية ده للناس اللي عايزة صني وخايفة م التقفيل المصري

تسلم يا باشا ع الخبر

[AhmadKamal]

A/C

طب يا تري ايه أخبار التكييف؟؟؟


ويا تري قطع الغيار هتكون كوري ولا ياباني ولا روماني

[fady_anis]

اعتقد علشان كده منزلش الشكل ده فى مصر تحت اسم نيسان صنى ودى انا شايف انها حركه ذكية من نيسان مصر لأن الموديل ده تحت اسم نيسان صنى فى الخليج معجبش الناس هناك وزى ما انتو عارفين هنا فى مصر بنقلد بتوع الخليج شويه بدليل اننا بنجيب عربياتهم ومبنشتريش العربيات اللى نازله لمصر مخصوص وانا شايف بقا ان الصنى فى التغيير الجديد بعد سنتين هيبقى تغيير كلى

[Bishoy.Girgis]

العربية النيسان ياباني لكن في اعتقادي الشخصي ان نيسان كده هتنزل كتير اوي من مستواها لأنها لما تتعاقد انها تصنع و تجمع في كوريا يبقي الوضع اختلف و بقي كوري مش ياباني و طبعا كل ده بسبب الازمة الاقتصادية اللي سببت ان العربيات الراقية و المحترمة في السوق يا اما تقفل يا اما تشترك مع الشركات الاقل احتراما و بكده اللي اشتري اشتري خلاص
و ده رأي الشخصي

[alfbaa]

اعتقد انها هتكون افضل من الصني كسياره لانها احدث ولكن كونها تابعه لوكيل وعلامه رينو هيخوف ناس كتير منها ... اولا سعر اعاده البيع بتاع الرينو في مصر سيء(رغم انها عربيات فوق الممتازه) ثانيا وكيل رينو واخد على قطع الغيار الفرنساوي اللي هي بطبيعه الحال اغلى من الياباني شويه وسمعة قطع الغيار الفرنساوي في مصر انها مولعه نار واعتقد ان قطع غيار الصني هتبقى ارخص ايضا بسسب انتشار العربيه بالفعل

ولكن هذه السياره وايضا اللوجان ممكن يغيروا شكل الرينو في مصر

[احمد عزت]

والله انا رأى التخيلى

1:هتحقق نجاح حلو جنبا الى جنب مع الصنى بالذات الموديل اللى ب94
2:العربية زى فكرة الصنى يابانى ولكن تقفيل كورى والتابلوة على فكرة مع الدركسيون والعدادات يحسسك بالشياكة اكتر من الصنى
3:التقفيل هيبقى اكيد افضل شوية
4 ولكن هتبقى نفس المشاكل
الوسع الداخلى .....استهلاك البنزين (بس ممكن مع اختلاف الموتور وانة موتور الفلوانس ممكن الدنيا تختلف).....مفيش فى الموديل دة اى بى اس

5:قطع الغيار اى كانت فى المجمل مش هتبقى غالية اوى لان اساس يا جماعة فكرة ان رينو غالى وخلاص دة بدأت تتلاشى من سنوات

6:الخوف بس ان النيسان هية اللى تغلى عربياتها وبعدها تغير الرينو وتقولك دة انا رينو وتغلى هية كمان ونلاقى نفسنا واقفين نتفرج عليهم ومش بنشترى

7:قد تتفوق السيارة بسعرها الاوتو ماتيك على قريناتها الاصغر مثل الاكسنت والريو وفى الجودة والعملانية عن الالنترا......ولكن صعب التفوق على السيراتو لحداثة شكلها ولكن بردك فرق ال 10 الف بين البيزك هنا والبيزك هنا ممكن يغرى خاصتا ان بيزك الرينو احسن بيزك السيراتو فى الكماليات والاتنين فى التوكيل واحد وهم اخوة نصير

وياخبر النهاردة بفلوس كام يوم ويبقى ببلاش.....وخلى السوق يلعب وينافس

[Ahmed Anwer]

سعر العربية ده

يثبت ان سيارات التجميع المحلي اسعارها مبالغ فيها جدا

هيا تقريبا بنفس سعر الصني المصري

طب ال 40% جمارك بيروحوا فين !!!

[handasa]

عجبانى اوى اوى
لو تنزل قريبا
انا ممكن اصبر و اغير
انا اسمع ان مراكز رينو 100100

[mzda]

دول شويه صور ومواصفات للعربيه الي بتنزل في الخليج تحت شعار نيسان ( نفس مواصفات الصني في مصر )

[Ahmed.TV]

انا عاوز اعرف رينو عشان ركبت العلامة عليها وعلى الجنوط تبقا تبعها خلاص
مفروض طالما الماتور ماتور نيسان والشكل من جوة ومن بره من انتاج نيسان يبقا العلامة تنزل على العربية نيسان

وبعدين الكاسيت اللى فى الصورة دى ياترى حينزل مصر ولالا
وياترى هل فيها abs وايرباجز ولالا
وهل الباور بتعها حيكون كهرباء ولالا
كل دى استفسارات عاوزين نعرفها