مش عاوز اكره التيدا ساعدونييييييي

[mido_fn]

[size="7"]اذيكم يا احلي شباب
انا عضو جديد متابع للمنتدي بقالي فترة وبامانة معجب جدا بتعليقات الاعضاء والنصايح الذهبية
بحس ان الكل هنا بيحب بعضه في الله
ده اول كتابة ليا اعزروني علي سوء التنظيم

ادخل في الموضوع
انا اشتريت نيسان تيدا هاتشباك 2012 اعلي فئة من 4 شهور وعاملة معايا 6000 دلوقتي العربية ماشاء الله متور جبار تكييف تحفة ثبات عفشة كله تمام
بس مشاكلي معاها كلها متركزة في الاصوات الي بسمعها
كل الاصوات بسمعها وانا علي سرعة 60 وطالع علي طريق غير ممهد مكسر
1-
بسمع خربطة من السقف مش عارف تقريبا من فوق لمبة الصالون او فتحة السقف
2-
بسمع خربطة من ورا يمين كانها من الباب الي ورا او من عند قايم الشنطة
3_
كنت بسمع تزييققة من الشنطة واتحلت حل مؤقت في التوكيل والغريبة انه بيقولي هيرجع تاني لان كل الهاتشباك كده

4-
صوت اخير هيجنني بسمع كان فار بيلعب او كتكوت بيصوصو من قدام نحية التكييف او المتور المهم قدام يمين مش قادر اوصفه قوي

اسف طولت عليكم انا بجد حابب العربية دي قوي بس الواحد لما يسمع حاجات زي دي في عربية زيرو بيتعقد بصراحة وحاسس اني مش هلاقي الحل الا علي اديكم
شكرا

[Ahmed.TV]

مش عارف اقولك ايه .. بس غير مركز الخدمة وروح اى مركز خدمة اخر .. وان شاء الله تتحل مشاكلك على خير

[mido_fn]

تسلملي انا رحت زهراء المعادي احتمال اروح اوتو المرة الجاية
منتظر رد الاعضاء

[mido_fn]

ارجو المشاركة يا اهل الخبرة

[SHNORY]

اهلا بحضرتك عضو معانا في المنتدي
بس قوانين المنتدي بتمنع ان عضو يسجل باسم مشابه لعضو اخر
واحنا عندنا عضو قديم باسم dr mido برضه
فنستأذن حضرتك تبعت للاداره وتغير اسمك

[Ahmedmiy]

بسم الله الرحمن الرحيم

بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

ما شاء الله بارك الله لك فى ما رزق فقد أحسنت الاختيار فالحمد لله

أضم صوتى لصوت أخى العزيز منسق نيسان / أحمد مصطفى تى فى بزيارة مركز صيانة أخر وعرض المشاكل المطروحه للأصوات وخصوصا صوت الكتكوت هههه

على كل حال ممكن إن شاء الله قبل الذهاب للصيانة تحاول مراجعة أى شىء داخل السيارة قابل للإهتزاز أثناء الحركة وخصوصا فى الشنطة الخلفية أو تحت الكراسى أو درج التابلوه وطبعا الكلام من التوكيل غير منطقى أو مقنع بأن الصوت سيعود مرة أخرى علشان كل الهاتش باك كده

بمنتهى البساطة أظن بأن الفنى أثناء الصيانة الدورية إذا قام بتربيط العفشة جيداً وتم مراجعة أماكن الاصوات بإهتمام إن شاء الله ستكون الامور مستقرة
ويا ترى حضرتك معاك لوجو نايل موتورز على السيارة أم لا إذا لم يكن أنصح بالحصول عليه وإختيار مركز خدمة مميز .

أخيرا أتمنى لك دوام النجاح والسداد .

سبحان الله العظيم وبحمده
لا حول ولا قوة إلا بالله
سبحان الله وبحمده سبحان الله العظيم
أستغفر الله العظيم وأتوب إليه

[mido_fn]

انا اسف انا فعلا مش عارف اعمل اي حاجة هنا ابيض يا ورد
انا بعت علي راسلنا دي بس مش عارف يعني اغيره انا من نفسي ؟ ولا اعمل ايه

[mido_fn]

اشكر حضرتك جدا علي الرد الجميل يا ريت تعرفني ايب اللوجو منين
بس علي فكرة انا اول ما بقول اسم نايل موتورز بيتعملي الف حساب هههههههه المنتدي مكهربهم
بس فعلا عاوز احط اللوجو يا ريت تشرحلي اجيبه منين

[Ahmed_selmy]

اللوجو من عند الحج احمد مشعل (جينز كار ) او مع الاستاذ احمد مصطفى منسق القسم
وبالنسبه للاصوات انا بردوا احيانا لو فى طريق غير ممهد بسمع صوت من قدام يمين زى ما يكون صوت تزييق او كركبه, بس انا قلت ممكن من الحاجات اللى بكون حاططها فى التابلوهز
بشكل عام انا راى انك تبص انت فى العربيه هل فى حاجه سايبه او مفكوكه , ممكن تكون حاجه واقعه او حاجه مش مربوطه ممكن يكون الكوريك اللى فى الشنطه او اى حاجه فى الشنطه تكون سايبه.
وعموما ودا رائ الشخصى بعد قراءه كتيره فى المنتدى ,ان موضوع الاصوات ده فى اى عربيه مبيكونش ليه حل بنسبه 90% الا طبعا لو حاجه كبيره زى المساعدين او حاجه فى الصاج نتيجه خابطه وغيره , انما الاصوات البسيطه بتاعه التزيق الخفيف او نقره خفيف فى موقف معين عاده مبيعرفوش يوصلوا لحاجه ولو حلوها شويه الصوت بيرجع تانى.
بردوا ودا رائ الشخصى ان لو الاصوات دى مش مسببالك مشكله اوى نفضلها, جرب اه روح للتوكيل واعمل اللى عليك بس لو ملقيوش حل متحطهاش فى دماغك.

[Dr'AhmZZong]

أصوات تابلوه التيدا ملهاش علاج للاسف ..

[kliken]

انا ما عنديش تفسير للاصوات بس انا عربيتى هاتشباك برضه اعلى فئه بدون فتحه عامل بيها 7500 كم تقريبا و نا بسمعش اصوات الحمد لله

[Youssef.Awad]

اولا: تقرير لذيذ واسلوبك حلو فى الكتابة

ثانيا: غالبا فى اى عربية هاتشباك او suv او اى عربية شنطتها بتكون داخل الصالون بتسمع فيها اصوات اكتر من العربيات السيدان اللى بتكون فيها الشنطة خارج العربية

ثالثا: اصوات تابلوه التيدا فعلا امر واقع وبتزيد مع الطرق الغير ممهدة وده اتعرض قبل كده فى موضوعات لاصحاب التيدا فى القسم هنا
رابعا: انا فى الصنى ساعات باسمع صوت خروشة برضه من التابلوه الامامى وده بيكون نتيجة لاحتكاك البلاستيك ببعضه وفرش الابواب وما تنساش حضرتك انه داخل التابلوه فيه علبه ثلاجة التكييف ودى بتكون محاطة بفِل ابيض زى اللى بيكون حماية فى الاجهزة الكهربائية وفى الاغلب الصوت بيكون من اهتزازه مع سطح الطريق

[mido_fn]

اشكر حضرتك يا استاذ يوسف علي المرور بس بجد انا زعلت من العربية لان اليباني المفروض ميبقاش فيه الاصوات دي حتي لو كان تقفيل مكسيكي

[mido_fn]

http://www.nilemotors.net/Nile/275757-2012.html العصو سينتون كان قال هيعمل حل للمشكلة دي لانه حلها عنده بس مش لاقيله مشاركات جديدة في الموضوع ده

[Dr'AhmZZong]

اشكر حضرتك يا استاذ يوسف علي المرور بس بجد انا زعلت من العربية لان اليباني المفروض ميبقاش فيه الاصوات دي حتي لو كان تقفيل مكسيكي

حتى التقفيل الياباني فيها الصوت ده !