طلب مساعده ضروري - التوكيل خبط العربيه

[2CODE]

خلي بالكم في كيا ولا اداني امر شغل ولا اي حاجة من الكلام ده !!!!!!! بس في bmw اداني ورق كتير كده ومضيت عليه الاول

بس انا فكرت ان ده احترام من bmw مش اكتر مكنتش اعرف انه "المفروض" يكون في كل الشركات لكن مش بيحصل

بجد مش بيحصل يا جماعة موضوع امر الشغل ده للاسف !!!

[K.Ossama]

المفروض أن العربية في أمر الشغل بتبقى مرسومة و المهندس بيعاين لو لقى عربية مخبوطة في أي جنب من جوانبها و بيبقى فيها موافقة العميل على الأصلاح و الشكوى بتاعة العميل و بيديلك نسحة وهو معاه نسخة تانية بيدخل العربية بيها الورشة و ده اللى بيحصل في توكيل رينو العبور

ده الطبيعى......
فى توكيلات أوبل وفولكس

[ibrahimsaad]

خلي بالكم في كيا ولا اداني امر شغل ولا اي حاجة من الكلام ده !!!!!!! بس في bmw اداني ورق كتير كده ومضيت عليه الاول

بس انا فكرت ان ده احترام من bmw مش اكتر مكنتش اعرف انه "المفروض" يكون في كل الشركات لكن مش بيحصل

بجد مش بيحصل يا جماعة موضوع امر الشغل ده للاسف !!!

يبقى لازم بقى كل واحد يصر على انه ياخد الورق ده ولازم كلنا نطالب بحقنا والا هتتكرر نفس المشكله اللى حصلت دى لاى حد لاقدر الله

[horas3000]

خلي بالكم في كيا ولا اداني امر شغل ولا اي حاجة من الكلام ده !!!!!!! بس في bmw اداني ورق كتير كده ومضيت عليه الاول

بس انا فكرت ان ده احترام من bmw مش اكتر مكنتش اعرف انه "المفروض" يكون في كل الشركات لكن مش بيحصل

بجد مش بيحصل يا جماعة موضوع امر الشغل ده للاسف !!!

ده انهي فرع اللي عمل كده
اللي اعرفه و اتقالي من ناس معاها كيا ان في امر شغل و محضر استلام عادي
ما هو هو توكيل رينو و يسري عليه نفس الكلام

[lamada]

عملت ايه عاوزين نعرف

[Hunting_Eagle]

ربنا يعوض عليه .. و يساعده على استرداد حقه

يا شباب محدش يدخل عربيته صيانة او اصلاح الا بمحضر ..

المحضر ده في المقام الاول امان للتوكيل قبل العميل .. علشان صاحب العربية ما يفتريش على مركز الصيانة و يقول انهم خبطوا العربية .. او عملوا شغل غير المطلوب

بس الواضح ان العكس بقى هو اللي صحيح

العميل لازم ياخد محضر تسليم .. الاصل كمان مش الصورة .. موضح فيه الخبطات و الخدوش و الكيلو متر (مهم جدا) .. و غير كده بيتكتب الشكوى المراد تصليحها (لو في الضمان) و القطع اللي هتتغير على حساب العميل

غير كده .. لا تلومن الا نفسك

ده توكيل دايو التعبان كان بيعمل كده من اكتر من 6 سنين

[مانويل مايكل]

بلد ماشية بالدراع صحيح.
الظلم وحش جدا طبعا. حاول توصل لشهود من اللى كانوا بيعملوا صيانة مع صديقك. أذا لم تجد فائدة فعلمهم الأدب ذى ما قالوا الأعضاء المحترمين اللى قبلى .

[rockeromda]

السلام عليكم
المفروض ان في الصيانة/زيارة التوكيل - تجربتي مع توكيل كيا من 3 سنين - باحجز مع الكول سنتر وبيديني رقم الحجز باروح به
لما المهندس يستلم العربية بيكون معاه امر شغل فيه بيانات العربية (من واقع الرخصة) وفيه كروكي للعربية بيحط عليه علامات مكان الحكات والخبطات
وبيكتب فيه ملاحظات وايه اللي مطلوب يتعمل وبيمضيك على تكلفة مبدئية للشغل
تحياتي

[man1974]

السلام عليكم
عن تجربة توكيل متسوبيشي في الاسماعيلية في صناية الألف ما أدنيش أي ورقة، حتى أنا استغربت وأقلتله طيب أدفع الحساب دولقتي، فقالي لا بعد ما نخلص الصيانة، وفي الآخر طلع العربية بره وبعدين دفعت الحساب وخت الفاتورة، يعني لا قدر الله لو حصلت حاجة يقلك ما نعرفش، أنته مين.
ربنا يعوض عليك، يا ريت كل الناس اللي بتعمل صيانة في التوكيل تاخد بالها من النقطة دي.

[eng.mohdm]

كلم جهاز حماية المستهلك

[Dr\Mohamed]

طمنا يا أفندم الموضوع وصل لفين مع التوكيل

[Dr_Smart]

المشكله دي حصلت معايا قبل كده بس كان فيه ورقة استلام ( امر شغل )

وخبطولي الشنطه والاكصدام .. ماكنش فيه حل غير اني اقبل اعتذارهم وغيرولي الاكصدام وصلحو الشنطه وطبعا العربيه باتت عندهم اكتر من اسبوع وكانت فبريكه وبقيت راشش شنطه

بس الواحد مش عايز يدخل في مشاكل كفايه اللي هو فيه .. وربنا يعوض

لكن بالنسبه لصاحب الموضوع موقفه وحش نظرا لأن مفيش معاه أي ورقه وكان لازم الموضوع يتحل في ساعتها بالتفاوض معاهم مباشرة او لو رفضو ياخد شهود ويطلع يعمل محضر او يتصل بالنجده ويعمل المحضر في التوكيل في وجود الشهود

لكن كده مفيش قدامه غير انه يشتكي لنيسان ايجيبت لو ليهم سلطه على مركز الصيانه ده ويحل الموضوع عن طريقهم بشكل ودي .. او يروح لمدير المركز مباشرة ويحل الموضوع وديا برضو ولو قلو ادبهم يعلي صوته ويقل ادبه هو كمان لو ليه في سكة البلطجه للاسف ده الحل الوحيد عشان يحس انه علمهم الادب

وربنا يعوض عليه

[mohamed289]

معلش يا فندم انا لسه اول مره ادخل هنا و مش عارف المشكله اتحلت ولا لأ بس انا رأيي انه يصور العربيه و يبعت ميل للتوكيل الرئيسى بره مصر و يحيلهم الموضوع بالكامل و صدقنى بنسبه 80 % الموضوع هيتحل غصب عن نيسان مصر نفسها ده لو هما ما حلوش الموضوع و اخدت عربيه بديله مش بس تصلحها